Higugmaa ang Imong Isigkatawo
Ang kamanggiluy-on usa ka hiyas ni Kristo. Naggikan kini sa gugma alang sa uban ug walay utlanan.
Karong buntaga, dapiton ko kamo sa pag-uban kanako sa panaw sa Africa. Dili kamo makakita og bisan unsang mga leon, mga zebra, o mga elepante, apan tingali, sa kataposan sa panaw, makita ninyo giunsa sa liboan ka miyembro sa Ang Simbahan ni Jesukristo sa mga Santos sa Ulahing mga Adlaw pagsanong sa lahi nga paagi ang ikaduhang dako nga sugo ni Kristo nga “higugmaa ang imong isigkatawo” (Marcos 12:31).
Hunahunaa sa makadiyot ang rural, pulang yuta sa Africa. Makita ninyo ang uga ug panas nga yuta nga wala maulani og igo nga gidaghanon sulod sa daghang katuigan. Ang pipila ka hayop nga imong masugatan mas bukogon kay sa unoran ug gidala sa usa ka tawong Karamajong nga nagbukot og habol kinsa, may sandal ang mga tiil, mobiyahe sa panghinaot nga makakita og mga tanom ug tubig.
Kon suhiron ninyo ang libaongon ug batoon nga dalan, makita ninyo ang pipila ka pundok sa matahom nga mga bata ug mahibulong nganong wala sila sa eskwelahan. Ang mga bata mopahiyom ug mowarawara, ug kamo mowarawara pod uban sa luha ug pahiyom. Nubenta y dos porsyento sa kinamanghorang mga bata nga imong makita niini nga panaw nagpuyo sa kanihit sa pagkaon, ug matandog pag-ayo ang imong kasingkasing sa kasakit.
Sa unahan, makita nimo ang usa ka inahan nga mainampingong magbalanse sa lima ka galon (19 ka litros) nga tubig sa iyang ulo ug lahi pa sa iyang kamot. Nagrepresentar siya sa usa sa matag duha ka panimalay niining dapita diin ang kababayen-an, batan-on ug tigulang, molakaw og kapin sa 30 minutos padulong ug pabalik, matag adlaw, ngadto sa kuhaanan og tubig para sa ilang pamilya. Usa ka balod sa kasubo ang mohasmag kanimo.
Duha ka oras ang molabay ug moabot ka sa layo, hawan nga may landong na nga dapit. Ang abotanang dapit dili usa ka dakong hawanan o dili gani tolda apan ilawom sa pipila ka dagkong kahoy nga nagsalipod sa naglagiting nga kainit sa adlaw. Niining dapita, mabantayan nimo nga walay nag-agas nga tubig, walay kuryente, walay mga kasilyas. Ikaw motan-aw sa palibot ug masayod nga ikaw anaa taliwala sa usa ka katawhan nga nahigugma sa Dios, ug dihadiha dayon imong bation ang gugma sa Dios alang nila. Nagpundok sila aron makadawat og tabang ug paglaom, ug miabot ka sa pagpakigbahin niini.
Kadto mao ang panaw ni Sister Ardern ug kanako, kauban ni Sister Camille Johnson, nga atong Kinatibuk-ang Presidente sa Relief Society, ug sa iyang bana, nga si Doug, ug ni Sister Sharon Eubank, direktor sa Humanitarian Sevices sa Simbahan, dihang mibiyahe kami sa Uganda, usa ka nasod nga may 47 ka milyon nga mga tawo sa Africa Central Area sa Simbahan. Nianang adlawa, ubos sa landong sa mga kahoy, gibisita namo ang usa ka community health project nga gitabangan og pundo sa Church Humanitarian Services, UNICEF, ug sa Ministry of Health sa Gobyerno sa Uganda. Kasaligan kini nga mga organisasyon, nga mainampingong gipili sa pagseguro nga ang makitawhanong mga pundo sa mga miyembro sa Simbahan mainampingon nga gigamit.
Sa daw gikumot nga kasingkasing nga makakita og kulang sa sustansyang mga bata ug sa mga epekto sa tuberkulosis, malaria, ug walay kataposan nga kalibanga, miabot sa matag usa kanamo ang dugang nga paglaom sa mas maayong kaugmaon niadtong among mga nahimamat.
Kana nga paglaom miabot, nga usa ka bahin, pinaagi sa kamabination sa mga miyembro sa Simbahan gikan sa tibuok kalibotan nga midonar og oras ug kwarta ngadto sa makitawhanong paningkamot sa Simbahan. Ug akong nakita ang masakiton ug ang nag-antos nga natabangan ug nabayaw, akong giduko ang akong ulo sa pagpasalamat. Niana nga panahon, mas nasabtan nako unsay ipasabot sa Hari sa mga hari, kinsa miingon:
“Umari kamo, o mga dinayeg sa akong Amahan, panunda ninyo ang gingharian nga gitagana alang kaninyo … :
“Kay gigutom ako, ug inyo ako nga gipakaon: Giuhaw ako ug inyo ako nga gipainom: Nadumuluong ako ug gihinangop ninyo ang pagpasaka kanako” (Mateo 25:34–35).
Ang pangaliya sa atong Manluluwas mao kini “pasigaa ninyo ang inyong kahayag sa atubangan sa mga tawo, aron makita nila ang inyong mga maayong buhat, ug dayegon nila ang inyong Amahan nga anaa sa langit.” (Mateo 5:14–16; tan-awa usab sa mga bersikulo 14–15). Nianang layo nga dapit sa yuta, ang maayo ninyong mga buhat mipasanag sa ilang kinabuhi ug mipagaan sa palas-anon sa mga tawo nga anaa sa hilabihang panginahanglan, ug ang Dios nahimaya.
Nianang mainit ug maabog nga adlaw, nanghinaot ko nga unta inyong nadungog ang ilang mga pag-ampo sa pagdayeg ug pagpasalamat sa Dios. Nagtugon sila nako nga sultihan ko kamo gamit ang lumad nilang Karamajong, nga “Alakara.” Salamat.
Ang among panaw nagpahinumdom nako sa sambingay sa maayong Samarianhon, kansang panaw mihatod kaniya ngadto sa abogon nga dalan, dili sama sa akong gihulagway, nga usa ka dalan gikan sa Jerusalem ngadto sa Jerico. Kining tigpangalagad nga Samarianhon nagtudlo kanato unsay ipasabot sa “paghigugma sa imong isigkatawo.”
Nakakita siya og “usa ka tawo … [kinsa] gibanhigan sa mga tulisan, gihuboan nila siya, gibun-og, ug gibiyaan nga himalatyon” (Lucas 10:30). Ang Samarianhon “naluoy [kaniya]” (Lucas 10:33).
Ang kamanggiluy-on usa ka hiyas ni Kristo. Naggikan kini sa gugma alang sa uban ug walay utlanan. Si Jesus, ang Manluluwas sa kalibotan, mao ang ehemplo sa kamanggiloy-on. Kon mabasa nato nga si “Jesus mibakho” (Juan 11:35), mga saksi kita, sama ni Maria ug ni Marta, sa Iyang kamanggiloy-on, diin maoy hinungdan nga Siya una nga natandog pag-ayo ug nanghupaw (tan-awa sa Juan 11:33). Sa ehemplo diha sa Basahon ni Mormon bahin sa kamanggiloy-on ni Kristo, si Jesus mipakita sa pundok sa katawhan ug miingon:
Aduna ba kamo dihay mga bakol, o mga buta, o mga pungkol, o mga angol, … o mga bungol, o gitakbuyan sa tanan nga matang sa sakit? Dad-a sila ngari ug Ako moayo kanila, kay Ako adunay kaluoy diha kaninyo. …
“… Ug siya miayo kanila matag usa” (3 Nephi 17:7, 9).
Bisan sa atong tanan nga paningkamot, kamo ug ako dili makaayo sa tanan, apan ang matag usa kanato posibleng makahimo og kalainan alang sa kaayohan sa kinabuhi sa usa ka tawo. Usa lamang kadto ka bata, usa lamang ka batang lalaki, kinsa mihalad og lima ka pirasong pan ug duha ka isda nga nakapakaon sa lima ka libo. Tingali makapangutana kita bahin sa atong halad, sama sa gihimo sa disipulo nga si Andres bahin sa mga pan ug sa mga isda, “Mag-unsa man kini alang niining daghang tawo?” (Juan 6:9). Ipaniguro ko kaninyo: igo na ang paghatag og pagbuhat sa unsay inyong mahatag ug dayon sa pagtugot kang Kristo nga modugang sa kulang.
Niini nga punto, si Elder Jeffrey R. Holland midapit kanato, “dato o kabos, … nga ‘mohimo kutob sa atong mahimo’ kon ang uban nagkinahanglan.” Dayon mipamatuod siya, sama sa akong buhaton, nga ang Dios “motabang ug mogiya kaninyo sa [inyong] manggiluy-ong mga buhat sa pagkadisipulo” (“Dili Ba Kitang Tanan Makililimos?,” Liahona, Nob. 2014, 41).
Nianang layo nga yuta, nianang dili mahikalimtan nga adlaw, mibarog ako ug karon nagbarog ako isip usa ka saksi sa makapakurog sa kalag ug makausab sa kinabuhi nga kamanggiloy-on sa mga miyembro sa Simbahan, mga adunahan ug kabos.
Ang sambingay sa Maayong Samarianhon nagpadayon samtang “gibugkosan ang mga samad [sa maong tawo] … ug didto gialimahan siya” (Lucas 10:34). Ang atong makitawhanong mga paningkamot sa Simbahan naghimo sa dihadiha nato nga pagsanong sa kinaiyanhong mga katalagman ug nagbugkos sa nagkadaghang samad sa kalibotan nga mga sakit, kagutom, pagkamatay sa masuso, kulang sa nutrisyon, pagkawala sa kapuy-an, ug sa kasagarang dili makitang mga samad sa pagkawala sa paglaom, kasagmuyo, ug kasubo.
Ang Samarianhon dayon “mikuhag duha ka denario ug iyang gihatag kini sa tag-iya sa abotanan ug miingon kaniya, Atimana siya” (Lucas 10:35). Isip usa ka simbahan mapasalamaton kita nga gikatambayayong ang ubang “tag-iya sa abotanan” o mga organisasyon sama sa Catholic Relief Services, UNICEF, ug Red Cross/Red Crescent, sa pag-abag sa atong mga makitawhanon nga paningkamot. Mapasalamaton usab kami sa inyong “duha ka denario” o duha ka euro, duha ka pesos, o duha ka shilling nga nagpagaan sa palas-anon nga gisagubang sa daghan kaayo sa tibuok kalibotan. Lagmit dili ninyo mahibaloan ang mga nakadawat sa inyong panahon, mga dolyar, mga sentabo, apan ang kamanggiluy-on wala magkinahanglan nga atong mahibaloan kinsa sila; nagkinahanglan lang kini nga kita mohigugma kanila.
Salamat, Presidente Nelson, sa pagpahinumdom kanamo nga “kon higugmaon nato ang Dios uban sa tibuok natong kasingkasing, Iyang ipaling ang atong mga kasingkasing ngadto sa kaayohan sa uban” (“Ang Ikaduhang Daku nga Sugo,” Liahona, Nob. 2019, 97). Mopamatuod ko nga matag usa kanato makaangkon og dugang pa nga kamaya, kamapaubsanon, ug gugma samtang mosanong kita sa panawagan ni Presidente Nelson sa pagpaduol sa atong mga kasingkasing ngadto sa kaayohan sa uban ug sa pangaliya ni Joseph Smith sa “pagpakaon sa gigutom, pagsinina sa mga hubo, pagsangkap sa mga biyuda, pagpauga sa luha sa biniyaan, [ug] paghupay sa mga gisakit, dinhi man sa Simbahan, o bisan asa, o sa mga walay simbahan, bisan asa [nato makaplagan] sila” (Joseph Smith, Times and Seasons, Marso 15, 1842, 732).
Kadtong tanang milabay nga bulan, among nakita ang mga gigutom ug ang mga sinakit sa uga ug abogon nga kapatagan ug mga saksi kami sa ilang mga mata nga nangamuyo og tabang. Sa kaugalingon namong paagi, kami natandog pag-ayo sa espiritu ug nanghupaw (tan-awa sa Juan 11:33), ug sa gihapon kadtong mga pagbati nalig-on samtang nakita namo nga nagpadayon ang kamanggiluy-on sa mga miyembro sa Simbahan ingon nga ang mga gigutom gipakaon, ang mga biyuda nasangkapan, ang mga gisakit nahupay ug ang ilang mga luha napauga.
Hinaot nga kita hangtod sa hangtod maglantaw sa kaayohan sa uban ug ipakita pinaagi sa pulong ug buhat nga kita “andam sa pagtambayayong sa usag usa nga mga alantoson” (Mosiah 18:8), sa “paghiusa sa masulob-on og kasingkasing” (Doktrina ug mga Pakigsaad 138:42), ug sa pagtuman sa ikaduha ug dako nga sugo nga “higugmaa ang imong isigkatawo” (Marcos 12:31). Sa ngalan ni Jesukristo, amen.