Ang Nahisalaag ug ang Dalan nga Makapabalik Kanato sa Dios
Bisan tingali ang mga pagpili mipalayo kaninyo gikan sa Manluluwas ug sa Iyang Simbahan, ang Gamhanan nga Tig-ayo nagbarog diha sa dalan nga makapabalik kanato sa Dios, nag-abiabi kaninyo.
Dihay Usa ka Tawo nga May Duha ka Anak nga Lalaki
Kini gitawag sa uban nga ang labing nindot nga mubo nga istorya nga sukad nasugilon.1 Sukad gihubad kini ngadto sa liboan ka pinulongan sa tibuok kalibotan, posible kaayo nga atol sa miaging duha ka liboan ka tuig, kini nga istorya gisugid sa matag adlaw sa usa ka tawo sa usa ka dapit sa kalibotan.
Gisugilon kini ni Jesukristo, atong Manluluwas ug Manunubos, kinsa mianhi sa yuta “aron … pagluwas sa nawala.”2 Siya nagsugod uban niining yano nga mga pulong: “Dihay usa ka tawo nga may duha ka anak nga lalaki.”3
Dihadiha dayon atong nahibaloan ang usa ka makapaguol kaayo nga panagbangi. Usa ka anak nga lalaki4 misulti sa iyang amahan nga nahuman na siya sa kinabuhi sa panimalay. Gusto niyang pangayoon ang iyang kagawasan. Gusto niyang biyaan ang kultura ug mga pagtulon-an sa iyang mga ginikanan. Gipangayo niya ang iyang bahin sa kabilin—karon.5
Makahunahuna ba kamo kon unsay gibati sa amahan sa dihang nadungog niya kini? Sa dihang nakaamgo siya nga unsay gusto sa iyang anak nga lalaki labaw sa bisan unsang butang mao ang pagbiya sa pamilya ug tingali dili na gayod mobalik?
Ang Dako nga Panimpalad
Gibati gayod tingali sa anak nga lalaki ang kaikag sa panimpalad ug kahinam. Sa kataposan, nagkinaugalingon na siya. Gawasnon gikan sa mga baroganan ug mga lagda sa kultura sa iyang kabatan-on, siya sa kataposan makahimo na og iyang kaugalingon nga mga pagpili nga dili maimpluwensiyahan sa iyang mga ginikanan. Wala nay pagbati nga sad-an. Siya makatagamtam na gayod sa pakig-uban sa mga tawo nga sama kaniya ug magpakabuhi sa paagi nga gusto niya.
Naabot didto sa usa ka layo nga dapit, dali siyang nakahimo og bag-o nga mga higala ug nagsugod sa pagpuyo sa kinabuhi nga kanunay niyang gipangandoy. Tingali nahimo siyang paborito sa daghang tawo, tungod kay gawasnon kaayo siya sa paggasto sa kwarta. Ang iyang bag-o nga mga higala—mga nakabenepisyo sa iyang pagkausikan—wala mohukom kaniya. Sila misaulog, miabiba, ug kusganong misuporta sa iyang mga pagpili.6
Kon aduna pay social media niadtong panahona, segurado nga napuno niya ang mga page sa social media sa alegre nga mga litrato sa nagkatawa nga mga higala: #Nagpuyosaakonglabingmaayongakinabuhi! #Walanaylabawpakamalipayonsukad! #Gibuhatuntanakokinidugayna!
Ang Kagutom
Apan ang party wala magdugay—panagsa ra gayod nga magdugay kini. Duha ka butang nga nahitabo: una, nahutdan siya og kwarta, ug ikaduha, usa ka kagutom ang paspas nga nakaapekto sa dapit.7
Samtang nagkagrabe ang mga problema, nataranta siya. Ang kaniadtong dili kapugngan, mapatuyangon nga sugarol dili na karon makapalit og pagkaon, unsa na lang kaha sa usa ka dapit nga kapuy-an. Unsaon man niya aron mabuhi?
Nagmanggihatagon siya ngadto sa iyang mga higala—sila motabang ba kaha niya karon? Nakakita ko niya nga nangayo og gamayng suporta—sa pagkakaron lang—hangtod nga siya makasuporta usab sa iyang kaugalingon.
Ang mga kasulatan nagsulti kanato, “Walay mihatag kaniya.”8
Desperado nga magpabiling buhi, nakakita siya og usa ka lokal nga mag-uuma nga mikuha niya aron mopakaon sa mga baboy.9
Karon nga gigutom na og maayo, gibiyaan ug nag-inusara, ang batan-ong lalaki tingali naghunahuna gayod kon ngano nga ang iyang sitwasyon grabeng nausab sa negatibo nga paagi.
Dili lang ang walay sulod nga tiyan ang nakahasol kaniya. Ang iyang haw-ang nga kalag ang nakapabalaka kaniya. Segurado kaayo siya nga ang pagtugyan ngadto sa iyang kalibotanon nga mga tinguha makapalipay kaniya, nga ang moral nga mga balaod mga babag ngadto niana nga kalipay. Karon mas nakahibalo na siya. Ug o, pagkadako nga presyo nga iyang gibayaran alang niana nga kahibalo!10
Samtang nagkagrabe ang pisikal ug espirituwal nga kagutom, ang iyang mga hunahuna mibalik ngadto sa iyang amahan. Siya kaha motabang kaniya human sa tanang nahitabo? Bisan ang labing ubos sa mga sulugoon sa iyang amahan adunay pagkaon ug kapasilongan gikan sa mga unos.
Apan mobalik ngadto sa iyang amahan?
Dili gayod.
Mokompisal ngadto sa iyang baryo nga iyang giwaldas ang iyang kabilin?
Imposible.
Moatubang sa mga silingan nga mipasidaan gayod kaniya nga iyang gipakaulawan ang iyang pamilya ug gipaguol og maayo ang iyang mga ginikanan? Mobalik ngadto sa iyang karaan nga mga higala human nanghambog kon giunsa niya nga nahimong gawasnon?
Dili madala.
Apan ang kagutom, pag-inusara, ug pagbasol dili lang gayod mawala—hangtod nga “nakaamgo siya sa dako niyang sayop.”11
Nasayod siya kon unsa ang kinahanglan niyang buhaton.
Ang Pagbalik
Karon mobalik kita ngadto sa amahan, ang masulub-on kaayo nga agalon sa pamilya. Pila ka gatos, tingali liboan, ka oras ang iyang gigahin sa pagkabalaka bahin sa iyang anak nga lalaki?
Kapila siya mitan-aw sa mismong agianan nga gisunod sa iyang anak nga lalaki ug mihandom sa grabeng pagkawala nga iyang nabati samtang ang iyang anak nga lalaki mipalayo? Pila ka pag-ampo ang iyang gibuhat sa kalawom sa kagabhion, nangamuyo sa Dios nga mahimong luwas ang iyang anak nga lalaki, nga siya makadiskobre sa kamatuoran, nga siya mopauli?
Ug dayon usa ka adlaw, ang amahan mitan-aw nianang mingaw nga agianan—ang agianan nga padulong pauli—ug nakakita og usa ka tawo sa layo nga naglakaw paingon kaniya.
Posible ba kini?
Bisan og ang indibidwal layo pa kaayo, ang amahan nakahibalo dayon nga kini mao ang iyang anak nga lalaki.
Siya midagan ngadto kaniya, migakos og maayo kaniya, ug mihalok kaniya.12
“Amahan,” ang anak nga lalaki mituaw, diha sa mga pulong nga tingali iyang gibalik-balik og liboan ka higayon, “nakasala ako sa Dios ug kanimo. Dili na ako angayng ilhon nga imong anak nga lalaki. Ang tanan nga akong gihangyo mao nga kuhaon ko nimo isip usa ka sinuholan.”13
Apan ang amahan hapit wala siya patiwasa. Nagluha, siya misugo sa iyang mga sulugoon: “Dad-a ngari ang labing maanindot nga bisti ug ibutang kini sa mga abaga sa akong anak nga lalaki. Sul-obi og singsing ang iyang tudlo ug sandalyas ang iyang mga tiil. Paghimo og piyesta aron magsaulog. Mibalik na ang akong anak nga lalaki!”14
Ang Kasaulogan
Sa akong opisina nagbitay ang usa ka painting sa German artist nga si Richard Burde. Si Harriet ug ako ganahan niini nga painting. Kini naghulagway sa usa ka malumo nga eksena gikan sa sambingay sa Manluluwas sa usa ka mas lawom nga panglantaw.
Samtang hapit tanan nalipay og maayo sa pagbalik sa anak nga lalaki, adunay usa nga wala nalipay—iyang magulang nga igsoong lalaki.15
Padayon siyang nahiubos og maayo sa iyang igsoon nga lalaki.
Diha siya sa dihang ang iyang igsoon nga lalaki nangayo sa iyang kabilin. Nasaksihan gayod niya ang hilabihan nga kasakit nga nasinati sa iyang amahan.
Sukad mibiya ang iyang igsoon nga lalaki, naningkamot siya nga tabangan ang iyang amahan nga dili maguol. Matag adlaw, naningkamot siya sa pagpahiuli sa masulub-on nga kasingkasing sa iyang amahan.
Ug karon nabalik ang walay pakabana nga anak, ug ang mga tawo dili makahunong sa paghatag og daghang atensiyon sa iyang rebelde nga igsoon nga lalaki.
“Kining tanang katuigan,” siya misulti sa iyang amahan, “kausa wala gayod ako mibalibad sa pagbuhat og usa ka butang nga imong gihangyo. Apan nianang tanang panahona, wala gayod ko nimo pahalipayi.”16
Ang mahigugmaon nga amahan mitubag, “Minahal nga anak, imo ang tanan kong katigayonan! Dili kini mahitungod sa pagtandi sa mga ganti o mga pagsaulog. Mahitungod kini sa pagkaayo. Kini mao ang higayon nga atong gilaoman niining tanang katuigan. Ang imong igsoon namatay apan karon nabuhi pag-usab! Nawala siya apan karon nakaplagan na siya!”17
Usa ka Sambingay alang sa Atong Panahon
Akong minahal nga kaigsoonan, minahal nga mga higala, sama sa tanang sambingay sa Manluluwas, kini dili lamang mahitungod sa mga tawo nga nagpuyo sa dugay nang panahon. Kini mahitungod kaninyo ug kanako, karon.
Kinsa sa atoa ang wala mibiya gikan sa dalan sa pagkabalaan, nasayop sa paghunahuna nga makakaplag kita og dugang nga kalipay sa pagsunod sa atong nakasentro sa kaugalingon nga paagi?
Kinsa kanato ang wala mobati nga napaubos, nagmasulub-on, ug nagkinahanglan kaayo og kapasayloan ug kaluoy?
Tingali ang uban naghunahuna gani, “Posible pa ba gayod nga mobalik? Ako ba nganlan sa kahangtoran, isalikway, ug likayan sa akong kanhi nga mga higala? Dili ba mas maayo nga magpabilin lang nga nahisalaag? Unsay reaksiyon sa Dios kon maningkamot ko nga mobalik?”
Kini nga sambingay naghatag kanato sa tubag.
Ang atong Langitnong Amahan modagan paingon kanato, Iyang kasingkasing naghingapin sa gugma ug kapuangod. Siya mohangop kanato; mobutang og usa ka bisti libot sa atong mga abaga, usa ka singsing sa atong tudlo, ug mga sandalyas sa atong mga tiil; ug mopahayag, “Karon kita magsaulog! Tungod ang akong anak, kinsa namatay kaniadto, nabuhi pag-usab!”
Ang langit magmaya sa atong pagbalik.
Dili Ikaasoy nga Kalipay ug Puno sa Himaya
Mahimo ba akong mokuha og higayon karon ug mamulong kaninyo sa indibidwal nga paagi?
Bisan unsa pay nahitabo sa inyong kinabuhi, ako mosubli ug mopahayag sa mga pulong sa akong minahal nga higala ug isig ka Apostol nga si Elder Jeffrey R. Holland: “Imposible nga ang mahangtorong kahayag sa [maulaon nga sakripisyo] ni Kristo dili moabot [kanimo].”18
Bisan tingali ang mga pagpili mipalayo gayod kanimo gikan sa Manluluwas ug sa Iyang Simbahan, ang Gamhanan nga Tig-ayo nagbarog diha sa dalan nga makapabalik kanato sa Dios, nag-abiabi kanimo. Ug kita isip mga miyembro sa Simbahan ni Jesukristo nagtinguha sa pagsunod sa Iyang ehemplo ug mohangop kanimo isip atong mga igsoon, isip atong mga higala. Kami nagmaya ug nagsaulog uban kanimo.
Ang imong pagbalik dili mopagamay sa mga panalangin sa uban. Kay ang ganti sa Amahan walay kataposan, ug unsa ang gihatag ngadto sa usa dili mopagamay gayod sa natawhang katungod sa uban.19
Wala ko nagpakaaron-ingnon nga ang pagbalik usa ka sayon nga butang nga buhaton. Ako makapamatuod niana. Kini tingali, sa pagkatinuod, mao ang kinalisoran nga pagpili nga imong himoon gayod.
Apan ako mosaksi nga sa higayon nga kamo modesisyon nga mobalik ug maglakaw diha sa pamaagi sa atong Manluluwas ug Manunubos, ang Iyang gahom mosulod sa inyong kinabuhi ug mousab niini.20
Ang mga anghel sa langit magmaya.
Ug mao usab kami, inyong pamilya diha ni Kristo. Human sa tanan, nasayod kami kon unsa sama nga mahimong usa ka nawala. Kitang tanan nagsalig kada adlaw sa samang maulaon nga gahom ni Kristo. Nasayod kami niini nga dalan, ug kami molakaw uban kaniyo.
Dili, ang atong dalan dili lingkawas sa kasakit, kasub-anan, o kaguol. Apan kita nakaabot niini nga gilay-on “pinaagi sa pulong ni Kristo uban sa dili matarog nga hugot nga pagtuo diha kaniya, mosalig sa hingpit diha sa mga maayo nga buhat kaniya kinsa gamhanan sa pagluwas.” Ug magkauban kitang “mopadayon sa unahan uban ang pagkamakanunayon kang Kristo, magbaton sa usa ka hingpit nga kahayag sa paglaom, ug usa ka gugma sa Dios ug sa tanan nga mga tawo.”21 Magkauban kitang “nangalipay sa dili ikaasoy nga kalipay ug puno sa himaya,”22 tungod si Jesukristo mao ang atong kalig-on!23
Kini ang akong pag-ampo nga ang matag usa kanato makadungog, niining mahinungdanon nga sambingay, sa tingog sa Amahan nga nagtawag kanato nga mosulod sa dalan nga makapabalik kanato sa Dios—nga kita unta makabaton sa kaisog nga maghinulsol, modawat og kapasayloan, ug mosunod sa dalan nga makapabalik kanato sa atong mapuangoron ug maluluy-on nga Dios. Niini ako mopamatuod ug mobilin kaninyo sa akong panalangin sa ngalan ni Jesukristo, amen.