Unsa kaha Kadako ang Imong Hingpit nga Kalipay
Ako karon modapit kaninyo sa pagdala sa inyong kahibalo ug kasinatian, inubanan sa inyong mga pagpamatuod nga gipakigbahin latas sa panahon, ug moserbisyo og usa ka misyon.
Akong minahal nga mga kaigsoonan, akong mga hunahuna karon anaa sa pagpundok sa Israel, ang unsay gitawag ni Presidente Russell M. Nelson nga mao “ang labing importanteng butang nga nahitabo na sa yuta karon. Walay makatandi niini sa gidak-on, walay makatandi niini sa kaimportante, walay makatandi niini sa kahalangdon.”1
Ang pagpundok mao ang kinadak-an nga pag-ila nga “ang bili sa mga kalag mahinungdanon sa panan-aw sa Dios.”2 Ingon lang niana ka yano. Kita nagpundok sa mga anak sa Dios niining kataposan nga mga adlaw nga sila unta adunay “mga panalangin nga gibubo ngadto sa ilang mga ulo”3 ug sa mga saad sa “mga katigayonan sa kahangtoran.”4 Busa aron mapundok ang Israel kita nagkinahanglan og mga misyonaryo—mas daghan pa kaysa nagserbisyo.5 Karon namulong ko ngadto sa daghang may kasinatian nga mga senior sa Simbahan kinsa makaserbisyo isip mga misyonaryo. Ang Ginoo nagkinahanglan kaninyo. Kami nagkinahanglan kaninyo sa New York ug Chicago, Australia ug Africa, Thailand ug Mexico, ug sa tanan nga dapit taliwala niini.
Tugoti ko nga dad-on kamo balik sa tuig 2015. Ako usa ka bag-o pa nga gitawag nga sakop sa Korum sa Napulog Duha ka Apostoles. Usa sa maanindot nga mga responsibilidad nga among gidala isip Apostoles mao ang pagdestino og mga misyonaryo ngadto sa ilang mga dapit sa pagtrabaho. Ako miapil isip usa ka Seventy diha sa proseso,6 apan karon isip usa ka Apostol, nabati nako ang dako kaayo nga responsibilidad sa buluhaton. Ako nagsugod sa mainampoon nga pagbutang og daghang kaayong batan-on nga mga elder ug mga sister, tagsa-tagsa, diha sa mga misyon sa tibuok kalibotan. Dayon nagsugod ko sa pagpangita og mga buluhaton alang sa senior nga mga magtiayon. Dihay 10 sa lista. Dili kaayo daghan. Nasorpresa, gipangutana nako ang akong kauban gikan sa Departamento sa Misyonaryo, “Pila kabuok ang atong gikinahanglan niining semanaha aron matubag ang mga hangyo?”
Mitubag siya, “300.”
Kanang makapahinuklog nga higayon nagpabilin kanako: 10 ka magtiayon aron sa pagtubag og 300 ka hangyo.
Si Presidente Russell M. Nelson miawhag sa mga magtiayon nga “moluhod ug mangutana sa Langitnong Amahan kon ang panahon mao ba ang husto alang kanila nga moserbisyo og misyon.”7 Sa tanan nga mga kwalipikasyon, siya miingon, “ang tinguha sa pagserbisyo mao ang labing importante.”8
Sama sa giingon sa kasulatan, “Kon kamo adunay tinguha sa pag-alagad sa [Dios] kamo gitawag ngadto sa buhat.”9 Ang buhat mahitungod tanan sa balaod sa pag-ani. Atong mabasa sa Juan, “Aron ang magpupugas ug ang mag-aani managduyog sa kalipay.”10
Akong nakita ang balaod sa pag-ani nga natuman sa akong kaugalingon nga pamilya.
Pipila ka tuig ang milabay mibisita ko sa pamilya, sa dihang ang bishop mihangyo kanako sa pagtapos sa tulumanon sa sakramento.11 Samtang minaog ko sa pulpito, usa ka babaye miduol kanako uban sa iyang pito ka anak ug mipaila sa iyang kaugalingon isip si Sister Rebecca Guzman.
Siya nangutana, “Elder Rasband, nakaila ka ni Rulon ug Verda Rasband?”
Ako nalipay og maayo ug mitubag, “Sila ang akong mga ginikanan.”
Makita na ninyo kon asa kini paingon. Uban sa pagtugot ni Rebecca, kinsa anaa dinhi uban sa iyang pamilya sa Conference Center, ako mopakigbahin sa istorya sa iyang pamilya.12
Ang akong mga ginikanan, sila si Elder Rulon ug Sister Verda Rasband, nagserbisyo isip senior nga magtiayon sa Florida Fort Lauderdale Mission.13 Sila nagsangyaw ug pinaagi sa diosnong giya nanuktok sa pultahan sa panimalay ni Rebecca. Siya usa pa lamang ka tin-edyer ug ganahan nga maminaw sa musika sa mga Osmond, ilabi na sa atong higala nga si Donny—kinsa anaa usab dinhi karon.14 Siya naminaw sa ilang mga interbiyo sa media ug nakahibalo nga sila mga miyembro sa Ang Simbahan ni Jesukristo sa mga Santos sa Ulahing mga Adlaw. Siya mibati nga adunay butang nga lahi mahitungod kanila, ug naghunahuna nga tingali kini mao ang ilang relihiyon, si Rebecca migahin og duha ka tuig sa pagsiksik sa mga tinuohan sa Simbahan diha sa librarya sa eskwelahan. Mao nga, sa dihang nanuktok ang usa ka makita nga mabination nga magtiayon diha sa pultahan sa ilang pamilya ug mipaila sa ilang kaugalingon isip Santos sa Ulahing mga Adlaw nga mga misyonaryo, siya nasorpresa.
“Ang akong inahan misulti kanako nga papahawaon sila,” si Rebecca misulat kadugayan, “apan ang akong kasingkasing misulti, ‘Ayaw.’ Ako mitan-aw sa ilang mga nawong, ug mibati og dako kaayo nga kainit ug gugma. Ang panumdoman makapaluha gihapon sa akong mga mata ug makapabati ug halawom nga emosyon sa akong kasingkasing.”15
Gipasulod sila ni Rebecca, ug ang akong misyonaryo nga mga ginikanan mipakigbahin og usa ka mensahe ngadto kaniya, sa iyang duha ka manghod nga babaye, ug bisan pa man sa iyang mga pagsupak, sa iyang inahan.
Si Rebecca mihulagway kanako: “Ang duha nimo ka ginikanan maanindot sa pagpasabot sa bisan unsang pangutana nga anaa kami. Ako gihapon makakita sa ilang mga nawong ingon nga adunay kahayag nga nagpalibot kanila. Kami kanunayng mogakos sa imong inahan sa dihang siya mibiya, ug siya kanunayng miseguro sa pagtabang sa akong inahan nga mobati nga komportable ug gitahod. Ang imong amahan kanunay nga adunay kahinam diha sa iyang mga mata samtang siya nagtudlo kanamo mahitungod ni Jesukristo. Siya naningkamot sa paglakip sa akong amahan sa mga panaghisgot ug sa kataposan akong amahan nahimong mabination ngadto sa mga misyonaryo. Ang akong amahan usa ka kosinero sa lokal nga country club ug nagsugod sa pagluto og mga panihapon alang sa imong mga ginikanan, lakip sa paghimo sa paborito sa imong amahan, ang key lime pie.”16
Sa dihang si Elder ug Sister Rasband mihangyo kang Rebecca ug sa iyang pamilya sa pagbasa sa Basahon ni Mormon, gibuhat gayod ni Rebecca sulod sa lima ka adlaw. Siya gusto nga mabunyagan dayon, apan ang ubang mga sakop sa iyang pamilya dili pa andam. Human sa upat ka bulan, si Rebecca namugos nga magpabunyag siya ug mopasakop sa tinuod nga Simbahan. Siya mihinumdom, “Ang akong kalag hingpit nga nasayod nga kadto tinuod.”17 Niadtong Abril 5, 1979, ang mga misyonaryo mibunyag sa 19 anyos nga Rebecca, sa iyang inahan, ug sa duha ka igsoong babaye. Ang akong amahan usa ka saksi diha sa bunyag.
Sa dihang nahimamat nako si Rebecca ug ang iyang pamilya sa simbahan, nagpalitrato kami sa iyang pamilya uban kanako. Ako kining gidala pauli ngadto sa akong tigulang nga inahan, ug gipaduol niya kini sa iyang kasingkasing. Dayon siya misulti kanako, “Ronnie, kini mao ang usa sa labing malipayon nga mga adlaw sa akong kinabuhi.”
Ang tubag sa akong inahan makadasig og pangutana alang sa atong mga senior: “Unsa ang inyong gibuhat niini nga hugna sa inyong kinabuhi?” Adunay daghan kaayo nga mga paagi nga ang senior nga mga misyonaryo makabuhat sa unsay dili mabuhat ni bisan kinsa. Kamo usa ka talagsaon nga puwersa alang sa kaayohan, adunay daghang kasinatian sa Simbahan, ug anaa sa nindot kaayo nga posisyon sa pag-awhag ug pagluwas sa mga anak sa Dios.
Pipila kaninyo tingali naghunahuna: “Apan unsaon man pagbiya sa mga apo? Kami dili makatambong sa importante nga mga hitabo sa pamilya, sa mga adlawng natawhan, mingawon sa mga higala, ug gani sa among mga binuhi.” Kon akong gipangutana akong inahan kon ngano siya ug si Papa nagmisyon, nasayod ako nga moingon unta siya niini: “Ako adunay mga apo. Gusto ko nga masayod sila nga ang inyong amahan ug ako miserbisyo sa misyon, gusto namo magpakita og ehemplo alang sa among kaliwatan, ug kami napanalanginan, napanalanginan gayod.”
Samtang ako mibisita sa mga misyon sa tibuok kalibotan, nakita nako ang talagsaon nga serbisyo sa atong daghan kaayo nga senior nga mga misyonaryo. Klaro nga sila malipayon sa pagbuhat sa “kabubut-on sa Ginoo” ug sa pagpaningkamot sa “buluhaton sa Ginoo.”18
Alang sa pipila, ug kami naglaom nga liboan kaninyo, ang full-time nga misyonaryo nga pagserbisyo sa laing layo nga bahin sa kalibotan mao gayod ang husto nga dapit.19 Alang sa uban, ang pagserbisyo og usa ka pangserbisyo nga misyon sa Simbahan sa inyong dapit mahimong mas palabihon. Tungod sa mga kakulian sa panglawas ug ubang mga kahimtang, adunay mga dili makaserbisyo. Kami nakasabot niadto nga mga sitwasyon, ug kini mao ang akong paglaom nga makakita kamo og mga paagi sa pagsuporta niadtong nagserbisyo. Sunda ang tambag sa propeta ug pag-ampo aron masayod kon unsay ipabuhat sa Ginoo kaninyo.
Ang mga misyon sa tibuok kalibotan nangamuyo alang sa inyong tabang. Si Presidente Nelson misulti bahin sa atong senior nga mga misyonaryo, “Sila batan-on sa espiritu, maalamon, ug andam nga motrabaho.”20
Diha sa misyon, kamo adunay daghang oportunidad nga kapilian: mahimo kamong moserbisyo diha sa mga buhatan sa misyon o mga templo, mopalig-on sa batan-on nga mga misyonaryo, mosuporta sa gagmay nga mga branch, motrabaho diha sa mga sentro sa FamilySearch o sa makasaysayon nga mga dapit, motudlo sa institute, mohatag og makatawhanong pagserbisyo, makigtambayayong uban sa mga young adult, motabang diha sa mga sentro sa panarbaho o diha sa mga uma sa Simbahan. Ang mga detalye sa mga paagi sa pagserbisyo, unsay labing haom kaninyo, asa kamo gikinahanglan, ug unsaon ninyo nga mahimong andam nga magmisyon gitubag diha sa website nga “Senior Missionary.”21 Mahimo usab kamong makig-istorya sa inyong bishop o presidente sa branch.
Ako mitawag og daghang magtiayon nga moserbisyo ug nakakita samtang ang Kahayag ni Kristo mipuno sa ilang mga panagway.22 Sa ilang pagpauli, sila mihulagway nga nahimong mas suod ngadto sa Ginoo ug mas suod sa usag usa, mibati sa Espiritu sa Ginoo nga gibubo diha kanila, ug nasayod nga sila nakahimo og kalainan.23 Kinsa man ang dili gusto niana?
Ang usa ka misyon tingali mao ang labing mahinungdanon nga hugna sa kinabuhi sa usa ka magtiayon. Usa ka maayo nga ulohan tingali mao ang “Akong Ginoo Nagkinahanglan Kanako.”24 Kamo tingali tawagon sa pagbuhat og butang nga dili kamo pamilyar; apan ang gahom sa Espiritu mopabati kaninyo nga komportable.
Ang akong mga ginikanan ug napulo ka liboan sa nauli nga misyonaryo nga mga magtiayon mipamatuod sa hingpit nga kalipay nga ilang nakaplagan sa misyonaryo nga buhat. Ang Ginoo miingon diha sa ulahing mga adlaw nga kasulatan, “Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!”25
Si Isaias mihatag kanato og balaknon nga paghulagway sa unsay gipasabot nga moserbisyo diha sa “natad” sa misyon. Ang kasulatan nagsulti kanato nga “ang uma mao ang kalibotan.”26 Kining bantogan nga karaan nga propeta misulat, “Kay kamo manggula uban ang kalipay, ug pagamandoan uban sa pakigdait: ang mga bukid ug mga bungtod mohunat sa pag-awit sa imong atubangan; ug ang tanang kakahoyan sa kapatagan mopagakpak sa ilang mga kamot.”27 Ang mga bukid, mga bungtod, kapatagan, ug kakahoyan mahimong mahisama ngadto sa mga presidente sa misyon, mga bishop, mga lider sa district, mga miyembro, ug niadtong kinsa nagtinguha sa kamatuoran apan “wala masayod asa kini pangitaa.”28 Sila mopamatuod nga ang senior nga mga misyonaryo dako kaayo og impluwensiya sa ilang pagpamatuod sa atong Manluluwas ug Manunubos, si Jesukristo.
Isip usa ka Apostol ni Ginoong Jesukristo, ako mohangyo kaninyo nga moserbisyo isip usa ka misyonaryo diha sa pagpundok sa Israel ug tingali sa pagserbisyo gani og usab. Kami nagkinahanglan kaninyo—kami nagkinahanglan kaninyo. Kami mapasalamaton alang kaninyo nga mga senior alang sa mga kinabuhi nga inyong gipakita ug sa mga ehemplo nga kamo nahimo diha sa inyong mga panimalay, mga ward, ug mga stake. Ako karon modapit kaninyo sa pagdala sa inyong kahibalo ug kasinatian, inubanan sa inyong mga pagpamatuod nga gipakigbahin latas sa panahon, ug moserbisyo og usa ka misyon. Ako nag-ampo nga sa sunod nga higayon nga ako molingkod aron sa pagdestino og senior nga mga magtiayon, adunay gatosan kaninyo nga mahinamong naghulat sa inyong tawag.
Ako usab mosaad nga samtang kamo moserbisyo, inyong mabati ang gugma sa Ginoo diha sa inyong kinabuhi, kamo makaila Kaniya, Siya makaila kaninyo, ug “unsa ka dako ang [inyong] hingpit nga kalipay.”29 Ang inyong mapahinungoron nga serbisyo ngadto ni Jesukristo modasig ug mopanalangin sa inyong pamilya, sa inyong mga apo, ug mga apo sa tuhod. “Kalinaw, ug gugma padagayaon”30 diha sa ilang mga kinabuhi alang sa mga katuigan nga moabot. Mosaad ko. Sa ngalan ni Jesukristo, amen.