Ang Gugma Gipamulong Dinhi
Hinaot nga matag usa kanato makakat-on sa pagsulti ug pagpaminaw sa Iyang gugma dinhi, diha sa atong mga kasingkasing ug sa mga panimalay, ug diha sa atong mga calling sa ebanghelyo, sa mga kalihokan, sa pagpangalagad, ug sa pagserbisyo.
Ang atong mga bata sa Primary manganta og, “Ang gugma gipamulong dinhi.”1
Usa ka higayon gihatagan nako si Sister Gong og gamay nga locket. Ako kadtong gipakulitan og tulbok-tulbok, tulbok-tulbok, tulbok-tulbok-badlis. Kadtong mga kabesado sa Morse code [sinyas] makabantay sa mga letra nga I, I, U. Apan akong giapilan og ikaduha nga sinyas. Sa Mandarin Chinese, ang “ai” nagpasabot nga “gugma.” Mao nga, kay gidoble man sa pagsulat, ang mensahe mao ang “gihigugma ko ikaw.” Susan, palangga, “I, ai (爱), U [gihigugma ko ikaw].”
Atong gisulti ang gugma sa daghang mga pinulongan. Ako gisultihan nga ang tawhanong pamilya makasulti og 7,168 nga buhing mga pinulongan.2 Sa Simbahan makasulti kita og 575 ka dokumentado nga nag-una nga mga pinulongan, nga adunay daghang mga dayalekto. Kita usab makapadayag sa atong mga intensiyon, kabug-aton sa tono, ug emosyon pinaagi sa kahanas sa pagmugna [art], musika, sayaw, lohikal nga mga simbolo, ug pagpadayag sa pagbati ngadto sa kaugalingon ug ngadto sa uban.3
Karon, atong ipamulong ang tulo ka pinulongan sa ebanghelyo sa gugma: ang pinulongan sa pagkamahigalaon ug sa balaang pagtahod, ang pinulongan sa serbisyo ug sakripisyo, ug ang pinulongan sa pagkahisakop ngadto sa pakigsaad.
Una, ang ebanghelyo sa pagkamahigalaon ug sa balaang pagtahod.
Uban sa pagkamahigalaon ug sa balaang pagtahod, si Sister Gong nangutana sa mga bata ug kabatan-onan, “Giunsa ninyo pagkahibalo nga gihigugma kamo sa inyong mga ginikanan ug mga pamilya?”
Sa Guatemala, ang kabataan nag-ingon, “Ang among mga ginikanan naningkamot og maayo aron mapakaon ang among pamilya.” Sa North America, ang kabataan nag-ingon, “Ang akong mga ginikanan mobasa kanako og mga istorya ug ipahiluna ko sa higdaanan inig ka gabii.” Sa Balaan nga Yuta, ang kabataan nag-ingon, “Ang akong mga ginikanan moprotekta nako gikan sa peligro.” Sa Ghana, West Africa, ang mga bata nag-ingon, “Ang akong mga ginikanan motabang nako sa mga tumong sa Kabataan ug Kabatan-onan.”
Usa ka bata miingon, “Bisan kapoy na kaayo siya human sa tibuok adlaw nga pagtrabaho, ang akong inahan makigdula nako sa gawas.” Ang iyang inahan mihilak sa dihang nadungog niya nga ang iyang inadlaw-adlaw nga mga sakripisyo gihatagan og bili. Usa ka batan-ong babaye miingon, “Bisan tuod ang akong mama ug ako usahay magkasumpaki, mosalig ko sa akong inahan.” Ang iyang inahan mihilak usab.
Usahay kinahanglan kitang masayod nga ang gugma nga gipamulong dinhi gipaminaw ug gipasalamatan dinhi.
Pinaagi sa pagkamahigalaon ug sa balaang pagtahod, ang atong sakramento ug ubang mga miting makatutok kang Jesukristo. Atong hisgotan sa matinahorong paagi ang mahitungod sa Pag-ula ni Jesukristo, personal ug tinuod gayod, dili lamang sa pag-ula nga anaa lamang sa hunahuna. Atong gitawag ang gipahiuli nga Simbahan ni Jesukristo pinaagi sa Iyang ngalan, Ang Simbahan ni Jesukristo sa mga Santos sa Ulahing mga Adlaw. Atong gigamit ang matinahorong pulong sa pag-ampo kon motawag kita sa Langitnong Amahan ug mahigalaon nga pagtahod kon makigsulti kita sa usag usa. Samtang atong makita si Jesukristo diha sa labing mahinundanong bahin sa mga pakigsaad sa templo, dili na kaayo kita motawag niini nga “pag-adto sa templo” ug mas motawag niini nga “pagduol kang Jesukristo didto sa balay sa Ginoo.” Ang matag pakigsaad mohunghong sa, “Ang gugma gipamulong dinhi.”
Ang bag-ong mga miyembro moingon nga ang mga bokabularyo sa Simbahan sa kasagaran nagkinahanglan nga ipahayag sa masabot nga pinulongan. Magkatawa kita sa hunahuna nga ang “stake house” mahimong sabton nga lamian nga karne sa baka para sa panihapon, ang “ward building” mahimong ikaparehas sa ospital; ug ang “pangbukas nga mga ehersisyo” modapit nato sa pagsayaw sa ulo, abaga, tuhod, ug tiil diha sa parkinganan sa simbahan. Apan, palihog,magmasinabtanon ug magmabination kita samtang dungan kitang magkat-on sa bag-ong mga pinulongan sa gugma. Bag-ohay pa lang sa simbahan, ang bag-ong kinabig gisultihan nga ang iyang sayal mubo ra kaayo. Imbis nga mainsulto, mitubag siya, sa sama niini nga paagi, “Ang akong kasingkasing nausab; palihog pagmapailobon samtang nagkat-on pa sa pagsunod ang akong sayal.”4
Ang mga pulong nga atong gamiton makapaduol o makapalayo nato gikan sa ubang mga Kristiyano ug mga higala. Usahay maghisgot kita sa misyonaryo nga buhat, buhat sa templo, makitawhanon ug pangkaayohan nga buhat sa mga paagi nga makapahunahuna sa uban nga nagtuo kita nga kita ra ang naglihok. Buhaton nato nga kanunay nga maghisgot pinaagi sa mahigalaon ug matinahorong pasalamat sa buhat sa Dios ug sa himaya ug sa mga pasidungog, kaluoy, ug grasya ni Jesukristo ug sa Iyang maulaong sakripisyo.5
Ikaduha, ang pinulongan sa ebanghelyo sa serbisyo ug sakripisyo.
Samtang magpundok kita pag-usab matag semana aron sa pagtahod ug pagmaya sa adlaw nga Igpapahulay atong mapadayag ang atong mga pasalig sa pagkigsaad sa sakramento ngadto ni Jesukristo ug sa matag usa pinaagi sa atong mga calling sa Simbahan, pag-inigsoonay, pagpakigdait, ug pagserbisyo.
Dihang nangutana ko sa lokal nga mga lider sa Simbahan kon unsay nakahasol nila, ang mga igsoong lalaki ug mga igsoong babaye miingon, “Ang ubang mga miyembro dili modawat og mga tawag sa Simbahan.” Ang mga tawag sa pagserbisyo sa Ginoo ug sa usag usa dinhi sa Iyang Simbahan mohatag og oportunidad sa paglambo sa pagkamanggiluy-on, kapasidad, ug kamapaubsanon. Samtang kita i-set apart, makadawat kita sa inspirasyon sa Ginoo aron mobayaw ug molig-on sa uban ug sa atong kaugalingon. Siyempre, ang mausabon nga mga sirkumstansiya ug mga panahon sa atong mga kinabuhi makaapekto sa atong abilidad sa pagserbisyo, apan hinaot nga dili sa atong tinguha. Uban ni Hari Benjamin, moingon kita, “Apan kon ako aduna ako mohatag”6 ug ihalad ang tanan nga atong mahalad.
Mga lider sa stake ug ward, buhaton nato ang atong bahin. Samtang atong tawagon (ug i-release) ang mga igsoong lalaki ug mga igsoong babaye sa pagserbisyo sa Simbahan sa Ginoo, palihog buhaton nato kini uban ang kaligdong ug inspirasyon. Tabangi ang matag usa nga mobati nga gipasalamatan ug nga sila mahimong magmalamposon. Palihog pakitambag ug paminaw sa igsoong babaye nga mga lider. Hinaot nga mahinumdon kita, sama sa gitudlo ni Presidente J. Reuben Clark, diha sa Simbahan sa Ginoo moserbisyo kita kon asa kita gitawag “nga walay tawo nga mangayo ni mobalibad”7
Sa dihang nagminyo si Sister Gong ug Ako, si Elder David B. Haight mitambag: “Pagbaton kanunay og calling sa Simbahan. Ilabi na kon mabisi ang kinabuhi,” miingon siya, “gikinahanglan nimo nga mabati ang gugma sa Ginoo alang niadtong imong giserbisyohan ug alang kanimo samtang ikaw magserbisyo.” Akong isaad nga ang gugma gipamulong dinhi, didto, ug bisan asa samtang kita motubag og oo ngadto sa mga lider sa Simbahan aron moalagad sa Ginoo sa Iyang Simbahan pinaagi sa Iyang Espiritu ug sa atong mga pakigsaad.
Ang gipahiuli nga Simbahan sa Ginoo mamahimong usa ka dapit sa pagpatubo og usa ka Zion nga komunidad. Samtang kita magsimba, moserbisyo, mopahimulos, ug dungan nga magkat-on sa Iyang gugma, atong mapalig-on ang usag usa diha sa Iyang ebanghelyo. Tingali dili kita magkauyon sa politika o sa katilingbanon nga mga isyu apan makakaplag og kahiusahan samtang manganta kitang tanan sa ward choir. Atong maalimahan ang pagkasuod ug mabatokan ang pag-iyahay samtang regular kita nga mangalagad sa kinasingkasing sa matag usa nga panimalay ug mga kasilinganan.
Atol sa mga pagbisita sa mga miyembro kuyog sa mga presidente sa stake, gibati nako ang ilang lawom nga gugma alang sa mga sakop sa matag sirkumstansiya. Samtang milabay kami sa mga panimalay sa mga miyembro sa iyang stake, ang usa ka presidente sa stake miingon nga bisan kon kita nagpuyo man sa usa ka panimalay nga adunay swimming pool o panimalay nga yuta ang salog, ang pag-alagad sa Simbahan maoy usa ka pribilihiyo nga sa kasagaran naglakip og sakripisyo. Apan, maalamon siya nga mipamalandong nga, kon kita magtinabangay sa pagserbisyo ug pagsakripisyo diha sa ebanghelyo, makakita kita og mas diyotay nga mga sayop ug mas dako nga kalinaw. Kon ato Siyang tugotan, si Jesukristo motabang kanato sa pagpamulong sa Iyang gugma dinhi.
Niini nga ting-init, ang among pamilya nakahimamat og talagsaong mga miyembro sa Simbahan ug mga higala didto sa Loughborough ug Oxford, sa England. Kining makahuloganong mga panagpundok mipahinumdom kanako kon sa unsang paagi nga ang mga kalihokan nga sosyal ug serbisyo sa ward makatabang sa pag-ugmad og bag-o ug malungtarong mga kasuod sa ebanghelyo. Sa dugay-dugay na nga panahon akong gibati nga, sa daghang mga dapit sa Simbahan, ang pipila ka dugang nga mga kalihokan sa ward, siyempre planohon ug ipahigayon inubanan sa katuyoan sa ebanghelyo, mobugkos kanato pinaagi sa mas dakong pagbati sa pagkasakop ug panaghiusa.
Ang usa ka dinasig nga pangulo ug komitiba sa mga kalihokan sa ward makaalima og mga indibidwal ug komunidad sa mga Santos. Ang ilang maayong pagkaplano nga mga kalihokan makatabang sa tanan nga mobati nga adunay bili, nahisakop, ug gidapit sa paghimo og mapuslanong tahas. Ang maong mga kalihokan mopasuod sa nagkalainlaing edad ug mga kasinatian, momugna og malungtarong mga handomanan, ug mapahigayon nga gamay ra o walay gasto. Ang makalingaw nga mga kalihokan makadapit usab sa mga silingan ug mga higala.
Ang pakigdait ug serbisyo sa kasagaran magkauban. Ang mga young adult nasayod nga kon gusto gayod ninyong makaila ang usa ka tawo, nan pagtupad mo nga magpintura diha sa hagdanan atol sa proyekto sa pagserbisyo.
Siyempre, walay indibidwal ug walay pamilya nga perpekto. Kitang tanan nagkinahanglan og tabang aron mas makapamulong og gugma dinhi. “Ang hingpit nga gugma nagahingilin sa kahadlok.”8 Ang hugot nga pagtuo, serbisyo, ug sakripisyo mas mopaduol kanato ngadto sa atong Manluluwas. Kon mas manggiluy-on, matinud-anon, ug dili para sa kaugalinon ang atong serbisyo ug sakripisyo alang Kaniya, mas makasugod kita sa pagtugkad sa maulaon nga kaluoy ug grasya ni Jesukristo alang kanato.
Ug kana modala kanato ngadto sa pinulongan sa ebanghelyo sa pagkahisakop sa pakigsaad.
Nagpuyo kita sa kalibotan nga tigpasulabi sa kaugalingon. Daghan ra kaayo ang “pilion nako ang para sa akong kaugalingon.” Maingon ta nga nagtuo kita nga mas nakahibalo kita kon unsay labing maayo para sa atong kaugalingon ug kon unsaon kini sa pagkab-ot.
Apan sa kataposan dili kana tinuod. Si Jesukristo mao ang persona niining gamhanan, walay paglubad nga kamatuoran:
“Kay bisan kinsa nga buot magpatunhay sa iyang kinabuhi mawagtangan hinoon siya niini; ug bisan kinsa nga magawagtang sa iyang kinabuhi tungod kanako makakaplag siya niini.
“Kay unsa may kapuslanan alang sa usa ka tawo kon maangkon niya ang tibuok kalibotan nga pagapildihan sa iyang kinabuhi?”9
Si Jesukristo nagtanyag og mas maayo nga pamaagi—mga relasyon nga giugmad diha sa balaan nga pakigsaad, mas lig-on kay sa gapos sa kamatayon. Ang pagkahisakop sa pakigsaad sa Dios ug sa usag usa makaayo ug makabalaan kanato ug sa atong labing gipakabililhon nga mga relasyon. Sa tinuod, mas nakaila Siya kanato ug nagmahal kanato labaw pa kay sa atong pagkaila o paghigugma sa atong kaugalingon. Sa tinuod, kon atong ipakigsaad ang tibuok natong kaugalingon, kita mahimong mas labaw pa kay sa unsa kita karon. Ang gahom ug kaalam sa Dios makapanalangin kanato sa tanang maayo nga gasa, sa Iyang panahon ug paagi.
Ang mamugnaong artipisyal nga intelihente (AI) nakahimo og dagkong kalamposan sa paghubad sa pinulongan. Dugay nang milabay ang mga adlaw dihang ang kompyuter tingali mohubad sa simbolikanhong hugpong sa mga pulong “Ang espiritu andam, apan ang unod mahuyang” isip “Maayo ang bino, apan pan-os ang karne.” Ikaikag kaayo, nga ang labihan nga pagbalikbalik sa mga sanglitanan sa usa ka pinulongan makatudlo sa kompyuter sa usa ka pinulongan nga mas labaw pa ka epektibo kay sa pagtudlo sa kompyuter og mga lagda sa grammar.
Sa samang paagi, ang atong direkta, balikbalik nga mga kasinatian mahimong maoy labing maayong espirituwal nga paagi sa pagkat-on sa mga pinulongan sa ebanghelyo sa pagkamabination ug sa balaang pagtahod, serbisyo ug sakripisyo, ug pagkahisakop sa pakigsaad.
Nan, diin man ug sa unsa nga paagi si Jesukristo nakigsulti kaninyo pinaagi sa gugma?
Sa unsa nga paagi nga nadungog ninyo ang Iyang gugma nga gipamulong dinhi?
Hinaot nga matag usa kanato makakat-on sa pagsulti ug pagpaminaw sa Iyang gugma dinhi, diha sa atong mga kasingkasing ug sa mga panimalay, ug diha sa atong mga calling sa ebanghelyo, sa mga kalihokan, sa pagpangalagad, ug sa pagserbisyo.
Diha sa plano sa Dios, ang matag usa kanato mouswag usa ka adlaw niana gikan niini nga kinabuhi ngadto sa laing kinabuhi. Kon ato nang mahimamat ang Ginoo, akong mahanduraw Siya nga mag-ingon, inubanan sa mga pulong nga pahimangno ug saad, “Ang akong gugma ipamulong dinhi.” Sa sagradong ngalan ni Jesukristo, amen.