Pagpatunhay sa Tingog sa Katawhan sa Pakigsaad diha sa Nagtubo nga Henerasyon
Usa sa atong labing sagrado nga mga responsibilidad mao ang pagtabang sa atong mga anak nga masayod sa lawom ug piho nga paagi nga si Jesus mao ang Kristo.
Ang usa sa labing makapatandog nga mga takna diha sa Basahon ni Mormon mao ang pagbisita sa nabanhaw nga Manluluwas ngadto sa katawhan didto sa templo sa yuta sa Bountiful. Human sa usa ka adlaw nga pagtudlo, pagtambal, ug pagpalig-on sa hugot nga pagtuo, si Jesus midirekta sa atensiyon sa katawhan ngadto sa nagtubo nga henerasyon: “Siya misugo nga ang ilang gagmay nga mga bata kinahanglan dad-on.”1 Siya nag-ampo alang kanila ug mipanalangin sa matag usa kanila. Ang kasinatian makapatandog kaayo nga ang Manluluwas mismo mibakho sa daghang higayon.
Dayon, namulong ngadto sa pundok sa katawhan, si Jesus miingon:
“Tan-awa ang inyong gagmayng mga bata.
“Ug samtang sila mipunting sa ilang mga mata … , sila nakakita sa langit nga naabli, ug sila nakakita sa mga anghel nanaog gikan sa langit,” nangalagad sa ilang gagmay nga mga bata.2
Ako naghunahuna sa makadaghan mahitungod niini nga kasinatian. Tingali nakapahumok kini sa kasingkasing sa matag tawo! Sila nakakita sa Manluluwas. Sila nakahikap Kaniya. Sila nakaila Kaniya. Siya nagtudlo Kanila. Siya mipanalangin kanila. Ug Siya nahigugma kanila. Dili ikatingala nga human niining sagrado nga panghitabo, kining mga bata nagtubo nga mitabang sa pagmugna og katilingban sa kalinaw, kauswagan, ug Kristohanong gugma nga milungtad sa daghang henerasyon.3
Dili ba maanindot kaayo kon ang atong gagmayng mga bata makabaton og mga kasinatian nga sama niana uban ni Jesukristo—usa ka butang nga mobugkos sa ilang mga kasingkasing ngadto Kaniya! Siya nagdapit kanato, sama sa Iyang pagdapit niadtong mga ginikanan diha sa Basahon ni Mormon, sa pagdala sa atong gagmayng mga bata ngadto Kaniya. Kita makatabang kanila nga makaila sa Ilang Manluluwas ug Manunubos sama na nasinati niining gagmay nga mga bata. Kita makapakita kanila kon unsaon sa pagpangita sa Manluluwas diha sa mga kasulatan ug pagtukod sa ilang pundasyon ngadto Kaniya.4
Bag-ohay lang, usa ka maayong higala mitudlo kanako og usa ka butang nga wala nako mabantayi sa una mahitungod sa sambingay sa maalamong tawo nga nagtukod sa iyang balay sa ibabaw sa usa ka bato. Sumala sa asoy diha sa Lucas, samtang gipahiluna sa maalamong tawo ang pundasyon sa iyang balay, siya “nagkalot og lawom.”5 Dili kadto basta-basta lang o yano nga buluhaton—nagkinahanglan kadto og pagpaningkamot!
Aron matukod ang atong kinabuhi sa ibabaw sa bato sa atong Manunubos, si Jesukristo, kinahanglan kita nga mokalot og lawom. Atong tangtangon ang bisan unsang balason o wala kinahanglana nga mga butang sa atong kinabuhi. Atong ipadayon ang pagkalot hangtod nga makaplagan nato Siya. Ug tudloan nato ang atong mga anak sa pagbugkos sa ilang mga kaugalingon ngadto Kaniya pinaagi sa sagrado nga mga ordinansa ug mga pakigsaad aron kon ang kaatbang nga mga unos ug mga baha moabot, kay segurado nga moabot gayod kini, dili kini kaayo makaapekto kanila “tungod sa lig-on nga sukaranan diin [sila] natukod.”6
Kini nga matang sa kalig-on dili kay mahitabo lamang. Dili kini mapasa ngadto sa sunod nga henerasyon sama sa espirituwal nga kabilin. Ang matag tawo kinahanglang magkalot og lawom aron makakaplag niana nga bato.
Makat-onan nato kini nga pagtulon-an gikan sa laing asoy diha sa Basahon ni Mormon. Sa dihang si Hari Benjamin mihatag sa iyang kataposang pakigpulong ngadto sa iyang katawhan, nagpundok sila isip mga pamilya aron maminaw sa iyang mga pulong.7 Si Hari Benjamin mihatag og gamhanan nga pagpamatuod mahitungod ni Jesukristo, ug ang katawhan natandog kaayo sa iyang pagpamatuod. Sila mipahayag:
“Ang Espiritu … nakahimo og dako nga kausaban dinhi kanamo, o dinhi sa among mga kasingkasing. …
“Ug kami mauyonon sa pagsulod ngadto sa usa ka pakigsaad uban sa atong Dios sa pagbuhat sa iyang kabubut-on… sa tanan nga nahibilin sa among mga adlaw,”8
Tingali magdahom ang tawo nga ang gagmayng mga bata nga adunay mga ginikanan nga hilabihang nakabig sa kataposan makabig ug mohimo og mga pakigsaad sa ilang kaugalingon mismo. Apan bisan pa niana, sa mga rason nga wala hisgoti diha sa rekord, ang mga pakigsaad nga gihimo sa mga ginikanan wala makadulot sa uban nilang mga anak. Paglabay sa pipila ka tuig, “dihay daghan sa mga bag-o nga kaliwatan nga dili makasabot sa mga pulong ni hari Benjamin, ingon nga gagmay pa nga mga bata sa panahon nga siya namulong ngadto sa iyang mga katawhan; ug sila wala motuo sa tradisyon sa ilang mga amahan.
“Sila dili motuo unsa ang giingon mahitungod sa pagkabanhaw sa mga patay, ni sila motuo mahitungod sa pag-anhi ni Kristo. …
“Ug sila dili mabunyagan; ni sila mopasakop sa simbahan. Ug sila usa ka nahimulag nga mga katawhan ingon sa ilang hugot nga pagtuo.”9
Pagkamahinuklogon nga hunahuna! Alang sa nagtubo nga henerasyon, dili igo ang hugot nga pagtuo kang Jesukristo nga mahimo nga “ang tradisyon sa ilang mga amahan.” Sila kinahanglan makaangkon sa ilang kaugalingong hugot nga pagtuo kang Kristo. Isip ang mga katawhan sa Dios sa pakigsaad, unsaon nato pagkulit sulod sa mga kasingkasing sa atong mga anak ang tinguha sa paghimo ug pagtuman og mga pakigsaad ngadto Kaniya?
Makasugod kita pinaagi sa pagsunod sa ehemplo ni Nephi: “Kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga ang among mga anak mahimo nga masayod sa unsa nga tinubdan sila mahimo nga mangita alang sa kapasayloan sa ilang mga sala.”10 Ang mga pulong ni Nephi nagpasabot sa kanunay, padayon nga paningkamot sa pagtudlo sa atong mga anak mahitungod ni Kristo. Atong mapaseguro nga ang tingog sa mga katawhan sa pakigsaad dili maghilom diha sa mga dalonggan sa nagtubo nga henerasyon ug nga si Jesus dili lamang usa ka hilisgotan panahon sa Dominggo.11
Ang tingog sa katawhan sa pakigsaad makaplagan diha sa atong kaugalingong mga pulong og pagpamatuod. Kini makaplagan diha sa mga pulong sa buhing mga propeta. Ug kini gipreserbar sa makusganong paagi diha sa mga kasulatan. Diha niini nga ang atong mga anak makaila kang Jesus ug makakaplag og mga tubag sa ilang mga pangutana. Diha niini nga sila makakat-on sa ilang kaugalingon sa doktrina ni Kristo. Diha niini nga sila makakaplag og paglaom. Kini moandam kanila sa tibuok kinabuhi nga pagpangita sa kamatuoran ug pagkinabuhi diha sa dalan sa pakigsaad.
Ganahan kaayo ko niining tambag gikan ni Presidente Russell M. Nelson:
“Asa man kita moadto aron maminaw Kaniya?
“Kita makaadto sa mga kasulatan. Kini nagtudlo kanato bahin ni Jesukristo ug sa Iyang ebanghelyo, sa gidak-on sa Iyang Pag-ula, ug mahinungdanong plano sa Amahan sa kalipay ug katubsanan. [Ang] inadlaw nga pagbasa sa pulong sa Dios importante alang sa espirituhanong kaluwasan, ilabi na niining panahon sa nagkagrabe nga kaguliyang. Samtang kita magbusog sa mga pulong ni Kristo matag adlaw, ang mga pulong ni Kristo mosulti nato unsaon sa pagtubag sa mga kalisod nga wala nato mahunahunai nga atong atubangon.”12
Busa unsay buot ipasabot sa pagbusog diha sa mga pulong ni Kristo ug pagpaminaw Kaniya? Maingon ta, nga nagpasabot kini sa bisan unsang paagi nga epektibo kaninyo! Tingali kini ang pagpundok sa inyong pamilya aron maghisgot sa mga butang nga gitudlo kaninyo sa Espiritu Santo sa inyong pagtuon sa kasulatan gamit ang Dali, Sunod Kanako. Tingali kini ang pagpundok kada adlaw uban sa inyong mga anak aron magbasa og pipila ka bersikulo gikan sa mga kasulatan ug dayon mangita og mga kahigayonan sa paghisgot kon unsa ang inyong nakat-onan samtang naggahin kamo og panahon nga magkauban. Pangitaa lang kon unsay epektibong paagi alang kaninyo ug sa inyong pamilya; dayon sulayi ang pagbuhat og mas maayo matag adlaw.
Ikonsiderar kining hunahuna gikan sa Pagtudlo sumala sa Pamaagi sa Manluluwas: “Tagdon sa tinagsa-tagsa, ang usa ka home evening, panahon sa pagtuon sa kasulatan, o panag-istoryahanay og ebanghelyo ingon og wala kini makatuman og daghan. Apan ang pagkatapok sa gagmay, yano nga mga paningkamot, nga gibalik-balik sa kanunay sa paglabay sa panahon, mahimong mas gamhanan ug makapalig-on kay sa panagsa nga halandomong higayon o makahuloganong leksiyon. … Busa ayaw paghunong sa pagpaninguha, ug ayaw kaguol mahitungod sa pagtuman og usa ka dakong butang matag higayon. Pagmakanunayon lamang sa inyong mga paningkamot.”13
Usa sa atong labing sagrado nga mga responsibilidad mao ang pagtabang sa atong mga anak nga masayod sa lawom ug piho nga paagi nga si Jesus mao ang Kristo, ang Anak sa buhi nga Dios, ang ilang personal nga Manluluwas ug Manunubos, kinsa nagbarog sa ulohan sa Iyang Simbahan! Dili kita makatugot nga ang atong tingog matak-om o mahilom kon maghisgot bahin Kaniya.
Tingali bation ninyo nga dili angay alang niini nga tahas, apan kinahanglan dili kamo mobati nga nag-inusara. Pananglitan, ang mga konseho sa ward gitugotan nga mag-organisar og mga konseho sa magtutudlo alang sa mga ginikanan. Dinhi niining kada tulo ka bulan nga mga miting, ang mga ginikanan magkapundok aron makakat-on gikan sa matag usa nga mga kasinatian, maghisgot kon giunsa nila paglig-on ang ilang mga pamilya, ug magkat-on og importante nga mga baroganan sa Kristohanong mga panudlo. Kini nga miting kinahanglan nga ipahigayon atol sa ikaduha nga oras sa simbahan.14 Pangulohan kini sa usa ka sakop sa ward nga gipili sa bishop ug magsunod sa pamaagi sa mga miting sa regular nga konseho sa mga magtutudlo, gamit ang Pagtudlo sumala sa Pamaagi sa Manluluwas isip ang labing unang kapanguhaan.15 Mga bishop, kon ang inyong ward wala magpahigayon karon og mga miting sa konseho sa mga magtutudlo alang sa mga ginikanan, pakigtinabangay sa inyong presidente sa Sunday School ug sa konseho sa ward aron maorganisar ang inyong kaugalingon.16
Akong hinigugmang mga higala diha ni Kristo, mas maayo ang inyong nabuhat kay sa inyong gihunahuna. Padayon sa pagbuhat niini. Ang inyong mga anak nagtan-aw, naminaw, ug nagkat-on. Samtang magtudlo kamo kanila, inyong mahibaloan ang ilang tinuod nga kinaiyahan isip minahal nga mga anak nga lalaki ug mga anak nga babaye sa Dios. Sila tingali makalimot sa Manluluwas sa mubong panahon, apan akong isaad kaninyo nga Siya dili gayod makalimot kanila! Kadtong mga takna nga ang Espiritu Santo nakigsulti kanila magpabilin diha sa ilang mga kasingkasing ug mga hunahuna. Ug usa ka adlaw niana ang inyong mga anak mopalanog sa pagpamatuod ni Enos: “Ako nasayod sa akong mga ginikanan nga sila makiangayon,kay [sila] mitudlo kanako … diha sa pagmatuto ug sa pagpahimatngon sa Ginoo—ug bulahan ang ngalan sa akong Dios tungod niini.”17
Atong dawaton ang pagdapit sa Manluluwas ug dad-on ang atong mga anak ngadto Kaniya. Kon buhaton nato kini, sila makakita Kaniya. Sila makahikap Kaniya. Sila makaila Kaniya. Siya motudlo kanila. Siya mopanalangin kanila. Ug, o, higugmaon kaayo Niya sila. Ug, o, gihigugma kaayo nako Siya. Sa Iyang sagrado nga ngalan, si Jesukristo, amen.