Ang Gahom ni Jesukristo diha sa Atong mga Kinabuhi Matag Adlaw
Ang tinubdan sa atong kalig-on mao ang hugot nga pagtuo diha ni Jesukristo samtang magtinguha kita sa pagduol ngadto Kaniya sa matag adlaw.
Minahal kong mga kaigsoonan, mao kini Ang Simbahan ni Jesukristo sa mga Santos sa Ulahing mga Adlaw. Unsa ka dako ang kalipay nga magkapundok isip Iyang Simbahan. Mapasalamaton ako nga si Presidente Russell M. Nelson nagpahinumdom kanato sa paggamit kanunay sa eksakto nga ngalan sa Simbahan sa Ginoo aron kita makahinumdom kang kinsang Simbahan kini ug kang kinsang mga pagtulon-an ang atong gisunod.
Si Presidente Nelson mipahayag: “Sa umaabot nga mga adlaw, kita makakita sa labing dako nga mga pagpakita sa gahom sa Manluluwas nga sukad wala pa makita. … Siya motanyag og dili maihap nga mga pribilihiyo, mga panalangin, ug mga milagro diha sa mga matinud-anon.”1
Usa sa labing dako nga mga pribilihiyo alang kanako ug sa akong asawa, si Renee, mao ang pagpakigtagbo sa mga Santos diin kami nangalagad. Kami nakadungog sa ilang mga istorya, nakasaksi sa ilang kapildihan, nakigbahin sa ilang kagul-anan, ug naghudyaka sa ilang kalamposan. Kami nakasaksi og daghang mga panalangin ug mga milagro nga gihatag sa Manluluwas sa mga matinud-anon. Nakahimamat kami og mga tawo kinsa misinati og mga imposible, kinsa miantos sa dili mahunahuna.
Nakita namo ang pagpadayag sa gahom sa Manluluwas sa usa ka biyuda nga ang iyang bana namatay samtang sila diha sa buluhaton sa Ginoo didto sa Bolivia.2 Nakita namo kini diha sa usa ka batan-ong babaye sa Argentina kinsa gitukmod ilawom sa tren ug naputlan sa iyang bitiis, tungod lang sa usa ka tawo nga gustong mokawat sa iyang selpon.3 Ug sa iyang dili minyo nga amahan, kinsa karon kinahanglang maninguha sa pagpalambo sa iyang kinabuhi ug sa paglig-on sa iyang anak nga babaye human sa dili masabot nga buhat sa kabangis. Nakita namo kini sa mga pamilya nga nawad-an sa ilang mga panimalay ug matag kabtangan atol sa mga sunog sa Chile duha lang ka adlaw sa dili pa ang Pasko sa 2022.4 Nakita namo kini niadtong kinsa miantos human sa usa ka makatruma nga diborsyo ug niadtong inosente nga mga biktima sa pag-abuso.
Unsa may nakahatag kanila og gahom sa pagpadayon sa malisod nga mga butang? Unsay nakahatag og dugang nga kalig-on sa pagpadayon bisan ang tanan mora og nangawala?
Akong nakaplagan nga ang tinubdan niana nga kalig-on mao ang hugot nga pagtuo diha ni Jesukristo samtang tinuyo nga magtinguha kita sa pagduol ngadto Kaniya sa matag adlaw.
Ang propeta nga si Jacob mitudlo, “Ug siya mianhi sa kalibotan aron siya moluwas sa tanan nga mga tawo kon sila mopatalinghog sa iyang tingog; kay tan-awa, siya miantos sa mga kasakit sa tanan nga mga tawo, oo, ang mga kasakit sa tanan nga mga buhi nga binuhat, mga lalaki, mga babaye, ug mga bata, nga nahisakop sa banay ni Adan.”5
Usahay, ang pagbaton og hugot nga pagtuo diha ni Jesukristo daw imposible, hapit dili makab-ot. Makahunahuna kita nga ang pagduol ngadto kang Kristo nagkinahanglan og kalig-on, gahom, ug kahingpitan nga wala kanato, ug wala lang gyod tay kalagsik sa pagbuhat niining tanan. Apan unsay akong nakat-onan gikan niini nga mga tawo mao nga ang hugot nga pagtuo diha ni Jesukristo ang nakahatag kanato og kalagsik sa pagsugod sa panaw. Usahay makahunahuna kita, “Kinahanglan nakong tarongon ang akong kinabuhi sa dili pa ko moadto ni Jesus,” apan ang kamatuoran mao nga kita moduol ngadto kang Jesus aron tarongon ang atong kinabuhi pinaagi Kaniya.
Dili kita moduol ngadto ni Jesus tungod kay kita hingpit. Kita moduol ngadto Kaniya tungod kay kita may depekto ug diha Kaniya kita mahimong “mahingpit.”6
Sa unsang paagi kita mosugod sa pagbuhat og gamay nga pagtuo kada adlaw? Alang kanako magsugod kini sa buntag: Inig mata nako, imbes motan-aw sa akong selpon, mag-ampo ko. Bisan usa ka yanong pag-ampo. Dayon mobasa og kasulatan. Kini makatabang nako sa akong sinemana nga pakigsaad nga akong gihimo sa akong pag-ambit sa sakramento nga “kanunay mahinumdom kaniya.”7 Kon akong sugdan ang akong adlaw sa usa ka pag-ampo ug usa ka kasulatan, ako “makahinumdom Kaniya” kon ako motan-aw sa akong selpon. Ako “makahinumdom Kaniya” kon ako mag-atubang og mga problema ug mga kasungian, ug maninguha ako sa pag-atubang niini sama sa buhaton ni Jesus.
Kon ako “mahinumdom Kaniya,” mobati ko og tinguha sa pag-usab, sa paghinulsol. Ako makakaplag sa tinubdan sa kalagsik aron sa paghupot sa akong mga pakigsaad, ug akong mabati ang impluwensya sa Espiritu Santo sa akong kinabuhi “ug maghupot sa iyang mga sugo diin siya mihatag [kanako]; nga [ako] unta sa kanunay makabaton sa iyang Espiritu.”8 Kini nagtabang kanako sa paglahutay hangtod sa kataposan.9 O bisan sa kataposan lang sa adlaw! Ug niadto nga mga adlaw nga makalimot ko Kaniya sa tibuok adlaw, anaa gihapon Siya, naghigugma kanako ug nagsulti kanako, “OK ra; makasulay ka og balik ugma.”
Bisan og kita dili perpekto sa paghinumdom Kaniya, ang atong mahigugmaon nga Langitnong Amahan dili gayod makalimot kanato.
Usa sa mga sayop nga kasagaran natong gibuhat mao ang paghunahuna nga ang paghupot sa mga pakigsaad, o ang mga saad nga atong gihimo ngadto sa Dios, usa ka transaksiyon nga atong gihimo uban Kaniya: ako motuman, ug Siya manalipod kanako sa bisan unsang daotan nga mahitabo kanako. Ako nagbayad sa akong ikapulo, ug dili gayod ko mawagtangan og trabaho o ang kalayo dili mosunog sa akong balay. Apan kon ang mga butang dili mao sa unsay atong gilaoman, mangamuyo kita ngadto sa Ginoo, “Wala ka ba mabalaka nga hapit na man ako malunod?”10
Ang atong mga pakigsaad dili lamang transaksiyonal; kini may pagbag-o.11 Pinaagi sa akong mga pakigsaad ako makadawat og pagbalaan, paglig-on sa gahom ni Jesukristo, nga nagtugot kanako nga mahimong usa ka bag-o nga tawo, sa pagpasaylo sa unsay daw dili mapasaylo, sa pagbuntog sa imposible. Ang tinuyo nga paghinumdom ni Jesukristo kanunay gamhanan; kini naghatag kanako og dugang nga kalig-on nga “maghupot sa iyang mga sugo diin siya mihatag [kanako].”12 Kini nagtabang kanako nga mas maayo, mopahiyom nga walay rason, nga mahimong tigpasiugda og kalinaw,13 aron maglikay og panagbangi, ipatigbabaw ang Dios sa akong kinabuhi.14
Kon ang atong kasakit o ang kasakit sa usa ka tawo nga atong gimahal sobra ra kaayo nga dili na nato maantos, ang paghinumdom ni Jesukristo ug pagduol ngadto Kaniya makapagaan sa alantoson, makapahumok sa kasingkasing, ug makapahupay sa kasakit. Mao kini ang gahom nga nakapahimo sa usa ka amahan lapas pa sa iyang natural nga kapasidad sa pagtabang sa iyang anak nga babaye sa pisikal ug emosyonal nga kasakit sa pagkawala sa iyang bitiis.
Sa dihang si Elder Soares mibisita sa Argentina niadtong Hunyo ug nangutana ni Flavia mahitungod sa iyang trahedya nga aksidente, siya sa matinud-anon mitubag, “Nakasinati ako og kasamok, kapait, kasuko, ug kalagot sa dihang [nahitabo kini]. Usa ka butang nga nakatabang kanako mao ang dili pagpangutana, ‘nganong ako?’ apan ‘alang sa unsa man?’ … Kini ang usa ka butang nga nakapasuod kanako ngadto sa uban ug ngadto sa Ginoo. … Imbes nga magpalayo sa akong kaugalingon gikan Kaniya, kinahanglan kong motapot ngadto Kaniya.”15
Si Presidente Nelson mitudlo: “Ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on nato sa pagpakigbatok sa atong mga pagsulay, mga tentasyon, ug mga kasakit. … Sa ingon, ang mga tigtuman sa pakigsaad adunay katungod sa espesyal nga matang sa kapahulayan.”16 Mao kini ang matang sa kapahulayan ug kalinaw nga akong nakita sa mga mata sa biyuda, bisan sa kasakit nga iyang gibati sa kasingkasing sa kamingaw sa iyang bana matag adlaw.
Ang Bag-ong Tugon nagsulti sa panahon sa dihang si Jesus ug ang Iyang mga disipulo dinha sa barko:
“Ug mihuros ang usa ka kusog nga unos, ug tungod sa dagkong balod nasudlag tubig ang sakayan. …
“Ug siya … natulog lang nga nag-unlan: ug gipukaw siya, ug nag-ingon ngadto kaniya, Magtutudlo, wala ka ba mabalaka nga hapit na man kita malunod?
“Mibangon siya, ug iyang gipahunong ang hangin, ug ang mga balod iyang giingnan, Hunong. …
“Ug miingon siya kanila, Nganong nalisang man kamo? wala ba kamoy pagsalig?”17
Ako sa kanunay naintriga niini nga istorya. Ang Ginoo ba nagdahom kanila sa paggamit sa ilang hugot nga pagtuo aron sa pagpakalma sa bagyo? Sa pagbadlong sa hangin? Ang hugot nga pagtuo diha kang Jesukristo mao ang pagbati sa kalinaw aron makasugakod sa unos, nahibalo nga dili kita malunod tungod kay Siya anaa sa sakayan uban kanato.
Mao kini ang matang sa pagtuo nga among nakita sa dihang mibisita kami sa mga pamilya human sa dakong sunog sa Chile. Ang ilang mga balay nahurot og kasunog; nawala kanila ang tanan. Gani samtang naglakaw kami sa unsay ila untang mga balay ug ila kaming giistoryahan mahitungod sa ilang mga kasinatian, gibati namo nga nagbarog kami diha sa balaan nga yuta. Usa ka sister miingon sa akong asawa, “Sa dihang nakita nako nga ang silingang mga balay nangasunog na, nakahunahuna ko nga ang among balay masunog na usab, nga mawala kanamo ang tanan. Imbes mawad-an og paglaom, nasinati nako ang pagbati nga dili mahulagway nga kalinaw. Bisan pa man, gibati nako nga ang tanan ma-OK ra.” Ang pagsalig sa Dios ug paghupot sa atong mga pakigsaad uban Kaniya magdala og gahom sa atong kahuyang ug kahupayan sa atong kagul-anan.
Ako mapasalamaton sa oportunidad nga si Renee ug ako nakahimamat sa pipila niining talagsaon nga mga Santos, alang sa ilang daghang ehemplo sa hugot nga pagtuo, kalig-on, ug kamalungtaron. Sa mga istorya sa kasubo ug kahigawad nga dili gayod mamantala o dili gayod ma-viral sa social media. Sa mga litrato nga wala makuha ang mga luha ug mga pag-ampo nga gihalad human sa pagkawala o sa makatruma nga diborsyo; alang sa mga post nga wala gayod mahimo sa kahadlok, sa kagul-anan, ug sa kasakit nga naantos ra salamat sa ilang hugot nga pagtuo kang Jesukristo ug sa Iyang Pag-ula. Kini nga mga tawo nakapalig-on sa akong kaugalingong pagtuo, ug niana mapasalamaton kaayo ko.
Ako nasayod nga mao kini ang Simbahan ni Jesukristo. Ako nasayod nga Siya nagbarog andam nga motuga kanato sa Iyang gahom kon kita moduol ngadto Kaniya matag adlaw. Sa ngalan ni Jesukristo, amen.