Gusto Ba Kamo nga Magmalipayon?
Pagpabilin diha sa dalan sa pakigsaad. Ang inyong kinabuhi mahimong mas sayon, mas malipayon, ug mapuno sa hingpit nga kalipay.
Gusto ba kamo nga magmalipayon? Unsay nakapahimo ninyo nga dili malipayon? Si Presidente Russell M. Nelson miingon: “Kon gusto ka nga mahimong miserable, supaka ang mga sugo—ug ayaw gayod paghinulsol. Kon gusto ka og hingpit nga kalipay, pabilin sa dalan sa pakigsaad.”1 Dili ba sayon ra aron magmalipayon? Himoa lang ang mga pakigsaad ug tumana kini diha sa inyong mga kinabuhi. Atong rebyohon ang pipila ka butang nga makatabang nato aron magpabilin diha sa dalan sa pakigsaad ug makahimo natong malipayon.
1. Unsa ang Dalan sa Pakigsaad?
Sumala ni Elder Dale G. Renlund: “ang pulong nga dalan sa pakigsaad nagpasabot sa daghang han-ay sa mga pakigsaad nga pinaagi niini makaduol kita kang Kristo ug masuod ngadto Kaniya. Pinaagi niining bugkos sa pakigsaad, makaangkon kita og pamaagi sa pagkab-ot sa Iyang mahangtoron nga gahom. Ang dalan magsugod sa hugot nga pagtuo kang Jesukristo ug paghinulsol, sundan sa bunyag ug pagdawat sa Espiritu Santo.”2 Atong bag-ohon kini nga mga pakigsaad sa matag higayon nga kita moambit sa sakramento.
Sugod sa pakigsaad sa pagbunyag, kita naghimo og dugang pa nga mga pakigsaad sa tibuok natong kinabuhi. Usab, si Elder Renlund miingon: “Ang dalan sa pakigsaad modala ngadto sa mga ordinansa sa templo, sama sa pagtuga diha sa templo. Ang pagtuga maoy gasa sa Dios sa sagrado nga mga pakigsaad nga mokonekta kanato ngadto Kaniya sa hingpit.”3
2. Kamo ba Anaa sa Dalan sa Pakigsaad?
Usahay kon kita mohimo og mga pakigsaad, kita mapakyas sa pagtuman niini. Kon mahitabo kini, unsaon ninyo pagbalik ngadto sa dalan sa pakigsaad? Tugoti ko nga mopakigbahin og pipila ka ehemplo sa pagbalik ngadto sa dalan sa pakigsaad.
Mga sobra sa usa ka bulan na ang milabay, nakadawat ko og mensahe gikan sa usa ka nakauli na nga misyonaryo kinsa miserbisyo uban kanamo. Siya miingon: “Ang kataposan nahimong lisod. Ang pagpakigbatok sa kabalaka ug depresyon kada adlaw nakapahimong bug-at kanako, ug lisod kini kaayo. Akong gibati nga nag-inusara ug miserable. Nag-ampo ko alang sa giya sa atong Langitnong Amahan alang sa kalinaw ug kahupayan sa unsay akong mahimo sa pagpakigbatok sa kalisdanan. … Samtang nag-ampo ko, gibati nako ang pag-ahat sa Espiritu nga nagsulti kanako nga gikinahanglan nako nga mobayad sa akong ikapulo sa hingpit. … Akong gibati ang Espiritu nga kusog kaayo, ug dihadiha dayon akong gibati ang ka dinalian sa pagbuhat sa ingon. Uban sa tinguha sa pagbuhat sa ingon, akong gibati ang pag-aghat nga ‘kon ikaw mobayad sa imong ikapulo, mamaayo ra ang tanan.’ Nanlimbasog gihapon ko sa pagkaplag og kalinaw, apan aduna koy pagpamatuod sa atong Manluluwas ug nga pinaagi sa akong pagkamasulundon, akong mabati ug makaplagan ang kalinaw nga akong gipangita sa akong kasingkasing ug sa hunahuna. Ako bag-ohay lang nakahukom nga mobalik sa Simbahan ug sa pagtinguha sa Espiritu diha sa tanan nga akong buhaton.”
Karon maayo na ang iyang kahimtang. Mahimo usab mong mangayo sa Langitnong Amahan alang sa kalinaw, apan ang tubag mahimong lahi kay sa unsay inyong gidahom. Basta magtinguha lang mo nga makaila sa Manluluwas ug mag-ampo sa Langitnong Amahan, hatagan kamo Niya og gipahiangay nga tubag alang gayod kaninyo.
Si Presidente Thomas S. Monson mitudlo:
“Ang labing mahinungdanon nga leksiyon nga atong makat-onan dinhi sa kinabuhi mao nga kon ang Dios mosulti ug kita mopatalinghog, kita maanaa gayod kanunay sa eksakto.”4
“Kon atong sundon ang mga kasugoan, ang atong kinabuhi mas malipayon, mas makatagbaw, ug dili kaayo komplikado. Ang atong mga hagit ug mga problema mas sayon pas-anon, ug atong madawat ang gisaad nga mga panalangin [Dios].”5
Dihang gitawag ko nga mahimong bishop, kadto atol sa labing lisod nga panahon sa akong kinabuhi. Usa ko ka batan-ong amahan sa sayong bahin sa akong pagka-30, apan nagproblema ko sa pinansyal tungod sa mga hagit sa pamilya. Wala koy nakit-an nga bisan unsang solusyon, ug naghunahuna ko nga ang mga hagit dili matapos. Gikapoy ko sa pinansyal ug emosyonal nga paagi. Nagsugod usab ko sa pagduhaduha sa akong espirituhanong kalig-on. Nianang lisod nga panahon nga ang akong presidente sa stake mihatag sa calling ngari kanako. Ako gihapong gidawat ang tawag, bisan og lisod.
Ang akong asawa adunay interbiyo usab sa presidente sa stake, apan dili siya makaingon og oo, ug wala usab siya mobalibad apan nagpadayon sa pagtulo ang mga luha. Naghilak siya sa tibuok semana, nangutana sa Langitnong Amahan, “Nganong karon man?” ug “Nakaila Ka ba gayod sa matag indibidwal?” Wala siya makadawat og tubag, apan gipaluyohan ko isip bishop pagkasunod Dominggo. Wala na siya mangutana sa Langitnong Amahan niadto nga mga pangutana apan misuporta nako sa akong calling sulod sa unom ka tuig.
Sa Dominggo sa dihang ako gi-release, ang akong asawa nakadungog og tingog samtang nagdawat siya sa sakramento. Ang tingog mihunghong ngadto kaniya, “Tungod kay lisod kaayo alang kanimo ang paglakaw, ako siyang gitawag isip usa ka bishop aron maggunit kanimo ug maglakaw uban kanimo.” Sa paghinumdom sa milabay nga unom ka tuig, iyang naamgohan nga ang tanan sa daghang mga hagit nga daw walay kataposan nasulbad ra gayod.
Atong makat-onan nga kon kita maghunahuna nga dili kini ang maayong panahon alang kanato sa pagdawat og usa ka calling, tingali kini ang panahon nga atong gikinahanglan pag-ayo kana nga calling. Sa matag higayon nga ang Ginoo mohangyo kanato sa pagserbisyo sa bisan unsa nga calling, ma-gaan man o bug-at nga calling, Iyang makita ang atong mga panginahanglan. Siya naghatag sa kalig-on nga atong gikinahanglan ug adunay mga panalangin nga andam nga ibu-bu kanato samtang kita matinud-anon nga moserbisyo.
Adunay daghan pang mga butang nga makabalda kanato sa pagpabilin diha sa dalan sa pakigsaad. Bisan unsa pa kini, dili pa gayod ulahi nga ibalik ang atong mga kasingkasing ngadto sa Langitnong Amahan alang sa tabang. Si Elder Paul V. Johnson mitudlo kanato: “Kon sundon nato si Satanas, kita naghatag niya og gahom. Kon sundon nato ang Dios, Siya mohatag kanato og gahom.”6
Si Hari Benjamin sa Basahon ni Mormon mipamatuod: “Ako nagtinguha nga kamo kinahanglan maghunahuna sa bulahan ug sa malipayon nga kahimtang niadto nga naghupot sa mga sugo sa Dios. Kay tan-awa, sila bulahan sa tanan nga mga butang, sa temporal ug sa espirituhanon; ug kon sila magpabilin nga matinud-anon hangtod sa kataposan sila pagadawaton ngadto sa langit, nga pinaagi niana sila mahimo nga mopuyo uban sa Dios diha sa usa ka kahimtang nga walay kataposan ang kalipay.”7
3. Sa Unsang Paagi ang Pagtuman sa mga Pakigsaad uban sa Dios Makapalipay Kaninyo?
Ang akong asawa nag-ingon nga ang among kaminyoon naghiusa kanamo, ug tungod niana siya makahimo sa mga butang nga dili niya mahimo kaniadto. Pananglitan, sukad sa bata pa siya, maglisod gayod siya og gawas unya moadto sa ngitngit, apan dili na lisod tungod kay ako mouban kaniya. Siya mubo ug dili makaabot sa taas nga mga estante gawas kon siya mogamit og lingkoranan o hagdan, apan akong maabot ang mga butang gikan sa taas nga mga estante alang kaniya tungod kay mas taas ko niya. Ang pagpas-an sa yugo sa atong Manluluwas ngari kanato sama niana. Kon atong iyugo ang atong kaugalingon ngadto Kaniya, makahimo kita sa mga butang nga dili nato mahimo sa atong kaugalingon tungod kay Siya makahimo sa mga butang nga dili nato mahimo sa atong kaugalingon.
Si Elder David A. Bednar miingon: “Ang paghimo ug paghupot og sagradong mga pakigsaad nagyugo kanato ug sa Ginoo nga si Jesukristo. Sa tinuod nga kahulogan, ang Manluluwas nagtawag kanato sa pagsalig ug pagbitad og dungan uban Kaniya, bisan tuod ang atong labing maayong paningkamot dili ikatandi sa Iyaha. Samtang kita mosalig ug mobitad sa atong luwan uban Kaniya panahon sa atong panaw sa mortalidad, sa tinuod ang Iyang yugo sayon ug ang Iyang luwan gaan.”8
Si Presidente Nelson mitudlo usab:
“Ang pagpakigtambayayong sa Manluluwas nagpasabot nga kamo makagamit sa Iyang kusog ug matubsanon nga gahom.”9
“Ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on kanato sa pagpakigbatok sa atong mga pagsulay, mga tintasyon, ug mga kasakit. Kini nga gahom makapasayon sa atong dalan. Kadtong kinsa nagsunod sa mas taas nga mga balaod ni Jesukristo makagamit sa Iyang mas dako nga gahom.”10
“Ang pagtuman sa mga pakigsaad sa pagkatinuod makahimo sa kinabuhi nga mas sayon! Ang matag tawo nga mohimo og mga pakigsaad diha sa mga bunyaganan ug diha sa mga templo—ug motuman niini—nakapadugang og agianan ngadto sa gahom ni Jesukristo.”11
Minahal kong mga kaigsoonan, gusto ba kamo nga magmalipayon? Pagpabilin diha sa dalan sa pakigsaad. Ang inyong kinabuhi mahimong mas sayon, mas malipayon, ug mapuno sa hingpit nga kalipay. Ang atong Manluluwas nagdapit kanato, “Umari kamo kanako, kamong tanan nga nabudlay ug nabug-atan, ug papahulayon ko kamo.”12 Siya mao ang buhi nga Kristo. Iyang gipas-an ang atong mga alantoson ug gihimong mas sayon ang atong kinabuhi. Sa ngalan ni Jesukristo, amen.