Kita Iyang mga Anak
Parehas ang atong balaanong kagikan ug parehas nga walay limit nga potensyal pinaagi sa grasya ni Jesukristo.
Nakahinumdom ba kamo sa kasinatian ni propeta Samuel dihang gipadala siya sa Ginoo ngadto sa balay ni Jesse sa pagdihog sa bag-ong hari sa Israel? Nakita ni Samuel si Eliab, kamagulangang anak ni Jesse. Si Eliab, ingon og, taas ug may pamarog sa usa ka lider. Nakita kadto ni Samuel ug mihimo og konklusyon. Nahitabo nga sayop kadto nga konklusyon, ug gitudloan sa Ginoo si Samuel: “Ayaw pagtan-aw sa iyang nawong, kon sa iyang gitas-on sa iyang barog; … kay ang tawo nagatan-aw sa panagway sa gawas, apan ang Ginoo nagatan-aw sa kasingkasing.”1
Nakahinumdom ba mo sa kasinatian sa disipulo nga si Ananias dihang gipadala siya aron panalanginan si Saulo? Nadunggan na daan ni Ananias ang reputasyon ni Saulo, ug ang iyang kabangis, ang walay hunong nga pagpanglutos sa mga Santos. Nadungog ni Ananias ug mihimo siya og konklusyon nga seguro dili siya mangalagad kang Saulo. Nahitabo nga sayop kadto nga konklusyon, ug gitudloan sa Ginoo si Ananias: “Siya pinili nga galamiton ko sa pagdala sa akong ngalan sa atubangan sa mga Hentil, ug sa mga hari, ug sa mga anak sa Israel.”2
Unsay problema ni Samuel ug ni Ananias niining duha ka sitwasyon? Gitan-aw nila gamit ang ilang mga mata ug gipaminaw nila gamit ang ilang mga dunggan, ug ang resulta, gihukman nila ang uban basi sa panagway ug sa tabi-tabi.
Dihang ang mga escriba ug ang mga Pariseo nakakita sa babaye nga gihukmang nanapaw, unsay ilang nakita? Usa ka babayeng imoral, makasasala nga angayang patyon. Dihang nakita siya ni Jesus, unsay Iyang nakita? Usa ka babayeng sa temporal nga paagi minunot sa kahuyang sa unod apan makabangon pinaagi sa paghinulsol ug sa Iyang Pag-ula. Dihang nakita sa mga tawo ang senturyon, kansang sulugoon naparalisar, unsay ilang nakita? Tingali ilang nakita ang usa ka samokan, estranghero, angay nga tamayon. Dihang nakita siya ni Jesus, unsay Iyang nakita? Usa ka tawo nga mahunahunaon sa kaayohan sa sakop sa iyang panimalay, nga nagtinguha sa Ginoo uban sa katarong ug hugot nga pagtuo. Dihang nakita sa mga tawo ang babaye nga may problema sa pagdugo, unsay ilang nakita? Tingali usa ka hugaw nga babaye, usa ka sinalikway nga angayang likayan. Dihang nakita siya ni Jesus, unsay Iyang nakita? Usa ka babayeng masakiton, nag-inusara ug nalayo tungod sa mga kahimtang nga dili niya makontrolar, nga nanghinaot nga mamaayo ug mahisakop na usab.
Sa matag sitwasyon, nakita sa Ginoo kining mga indibidwal kon si kinsa sila ug sa tukmang paagi gipangalagaran ang usag usa. Sama sa gipahayag ni Nephi ug sa iyang igsoong si Jacob:
“Siya nagdapit kanilang tanan sa pagduol ngadto kaniya … , itom ug puti, ulipon ug gawasnon, lalaki ug babaye; ug siya naghinumdom sa mga luog; ug ang tanan managsama ngadto sa Dios.”3
“Ang usa ka binuhat sama ka bililhon sa iyang panan-aw ingon sa uban.”4
Hinaot nga kita usab dili motugot nga ang atong mga mata, ang atong mga dunggan, ang atong mga kahadlok, mopahisalaag kanato apan dayag nga moabli sa atong mga kasingkasing ug hunahuna niadtong anaa sa atong palibot sama sa Iyang gihimo.
Pipila ka tuig ang milabay, ang akong asawa, si Isabelle nakadawat og dili kasagaran nga buluhaton sa pagpangalagad. Gihangyo siyang mobisita sa usa ka biyuda sa among ward, sa sister nga may problema sa panglawas ug kansang kasubo nagdala og kapait sa iyang kinabuhi. Ang iyang mga kurtina sarado, ang iyang apartment dili han-ay, dili siya gustong mabisitahan ug mibungat nga “wala koy mahimo kang bisan kinsa.” Wala matarog, mitubag si Isabelle, “Aduna! Duna kay mahimo kanamo pinaagi sa pagtugot namo nga moanhi ug mobisita nimo.” Ug mao nga si Isabelle miadto, sa matinud-anong paagi.
Paglabay sa panahon, kining buotan nga sister gioperahan sa iyang tiil, nga nagkinahanglang ilisan ang iyang bendahe matag adlaw, butang nga dili mahimo kon siya ra. Sulod sa mga adlaw, adtoon siya ni Isabelle, hugasan ang iyang mga tiil, ug ilisan ang iyang mga bendahe. Wala gayod niya makita ang kangil-ad, wala gayod niya mapanimahoi ang kabaho. Ang nakita lamang niya mao ang usa ka matahom nga anak sa Dios nga nagkinahanglan sa gugma ug malumo nga pag-amuna.
Sulod sa napulo ka bulan, ako ug ang uban pa nga dili maihap napanalanginan sa gasa ni Isabelle sa pagtan-aw sama sa pagtan-aw sa Ginoo. Presidente sa stake ka man o tig-abiabi sa ward, hari ka man sa England o nagpuyo sa payag, parehas man kamo niya og sinultihan o dili, nagtuman ka man sa tanang sugo o naglisod pa, dalitan niya kamo sa iyang labing maayong pagkaon sa labing nindot nga mga plato. Ang kahimtang sa panalapi, kolor sa panit, kultural nga kaagi, nasyonalidad, gitas-on sa pagkamatarong, kahimtang sa katilingban, o bisan unsang paagi sa pag-ila o timaan [label] dili importante kaniya. Nagtan-aw siya gamit ang iyang kasingkasing, gitan-aw niya ang tanan nga anak sa Dios.
Si Presidente Russell M. Nelson nagtudlo:
“Ang kaaway nagmaya sa mga timaan tungod kay kini nagbahin kanato ug nagpugong sa paagi nga kita maghunahuna mahitungod sa atong kaugalingon ug sa usag usa. Pagkaguol kon kita mopasidungog sa mga timaan kay sa kita mopasidungog sa usag usa.
Ang mga timaan mahimong mosangpot ngadto sa pagpanghukom ug kaligutgot. Ang bisan unsang abuso o pagpihig ngadto sa laing tawo tungod sa nasyonalidad, kaliwat, sekswal nga kahilig, gender, naabot sa edukasyon, kultura, o ubang mahinungdanon nga mga timailhan makapasilo sa atong Tiglalang!”5
Ang French dili kana mao ako, didto ko natawo. Ang pagkaputi dili kana mao ako, kana kolor sa akong panit, o kakulang og kolor. Ang pagka-propesor dili kana mao ako, kana gibuhat nako sa pagsuporta sa akong pamilya. Ang pagka-General Authoriy Seventy dili kana mao ako; kana mao ang dapit nga akong giserbisyohan sa gingharian niini nga panahon.
Ang “una ug labaw sa tanan,” sama sa gipahinumdom kanato ni Presidente Nelson, nga ako “anak sa Dios.”6 Mao usab kamo; ug mao usab ang tanan nga katawhan sa atong palibot. Ako nag-ampo nga mas molambo ang atong pasalamat niining talagsaon nga kamatuoran. Makapausab kini sa tanan!
Tingali nagdako kita sa managlahing kultura; tingali naggikan kita sa lahi-lahing ekonomikanhong mga kahimtang sa katilingban; ang mortal natong kabilin, lakip ang atong nasyonalidad, kolor sa panit, ganahan nga pagkaon, nahibaloan sa politika, uban pa, tingali managlahi kaayo. Apan kita Iyang mga anak, kitang tanan walay eksepsiyon. Parehas ang atong balaanong kagikan ug parehas nga walay limit nga potensyal pinaagi sa grasya ni Jesukristo.
Si C. S. Lewis mihisgot niini sa ingon niini nga paagi: “Seryoso nga butang ang pagpuyo sa katilingban sa posibling mga dios ug mga diosa, nga mahinumdom nga ang bati kaayo ug dili makalingaw ikaistorya nga tawo sa usa ka adlaw mahimong usa ka linalang diin, kon imong makita karon, matintal gayod ikaw sa pagdayeg … Walay ordinaryo nga mga tawo. Wala pa gayod kamo makaistorya og yano nga mortal. Ang mga nasod, mga kultura, mga art, mga sibilisasyon—kini mga mortal, ug ang ilang kinabuhi para nato sama sa kinabuhi sa insekto. Apan mga imortal kining atong gipasiawan, gikauban sa trabaho, giminyoan, giyam-iran, ug giabusohan.”7
Ang atong pamilya gihatagan og kahigayonan nga makapuyo sa managlahing nasod ug kultura; ang among mga anak napanalanginang maminyo og lahi nga mga kaliwatan. Akong naamgohan nga ang gipahiuling ebanghelyo ni Jesukristo maoy tighimo natong managsama [equalizer]. Samtang hangupon nato kini sa tinuoray, “makighiusa mismo ang maong Espiritu sa atong espiritu aron sa pagmatuod nga kita mga anak sa Dios.”8 Kining makapahingangha nga kamatuoran ug tanang timaan ug mga ilhanan nga posibling mosakit kanato ug sa atong pakigrelasyon sa usag usa sa yanong paagi “gilamoy diha ni … Kristo.”9 Nahimo kining tin-aw nga kita, ug ang uban usab, “dili na mga langyaw ug dumuloong, kondili mga katagilungsod sa mga balaan, ug sa panimalay sa Dios.”10
Bag-o lang nakadungog ko og presidente sa branch sa usa sa among mga yunit nga dunay lain-laing pinulongan nga miingon bahin niini, sama sa gihimo ni Elder Gerrit W. Gong, isip pagkahisakop diha sa pakigsaad.11 Pagkaanindot nga konsepto! Nahisakop kita sa pundok sa katawhan diin ang tanan naningkamot sa pagbutang sa Manluluwas ug sa ilang mga pakigsaad diha sa sentro sa ilang kinabuhi ug sa pagsunod sa ebanghelyo sa malipayong paagi. Sa ingon niana, imbis motan-aw sa usag usa gamit ang gituis nga panglantaw sa mortalidad, ang ebanghelyo mopataas sa atong mga panan-aw ug magtugot nga atong makita ang usag usa pinaagi sa dili masayop, walay pagkausab nga panglantaw sa atong sagradong mga pakigsaad. Sa ingon niini, kita mowagtang sa atong kaugalingon nga natural nga mga pagpihig ug pagkadili patas ngadto sa uban, diin makatabang usab nga maminosan ang ilang pagpihig ug pagkadili patas ngari kanato,12 sa talagsaong mahiyason nga sikulo. Sa tinuod, sundon nato ang pagdapit sa minahal natong propeta: “Minahal kong kaigsoonan, kon giunsa nato pagtagad ang usag usa importante kaayo! Kon giunsa nato sa paghisgot ug ang mahitungod sa uban diha sa panimalay, sa simbahan, sa trabaho, ug sa online importante kaayo. Karon, ako mohangyo kanato nga kita motagad sa uban sa mas labaw, mas balaan nga paagi.”13
Karong hapona, sa diwa niana nga pagdapit, tinguha nakong idugang ang akong pasalig niana sa atong talagsaong mga bata sa Primary:
Kon lahi ang pamaagi mo,
Sila mopalayo nimo,
Ug ako! Dili!
Kon lahi ang pag-istorya mo,
Kataw-an ka sa ubang tawo,
Ug ako! Dili!
Mag-uban ug, Mag-istorya.
Pagpakita’s akong gugma.
Jesus wa magpalayo.
Gihigugma N’ya ang tanan.
Ako sab! Ako sab!14
Mopamatuod ko nga Siya nga atong gitawag og Amahan sa Langit mao gayod ang atong Amahan, nga Siya nahigugma kanato, nga Siya nakaila sa matag usa sa Iyang mga anak sa tukma gayod, nga Siya nagpangga sa hilabihan sa matag usa, ug nga kita sa tinuod managsama ra Kaniya. Mopamatuod ko nga ang atong pagtagad sa usag usa mao ang direktang pagpakita sa atong panabot ug pagpasalamat sa kinadak-ang sakripisyo ug Pag-ula sa Iyang Anak, atong Manluluwas, si Jesukristo. Ako nag-ampo nga, sama Kaniya, kita mohigugma sa usag usa kay kana ang hustong butang nga buhaton, dili tungod kay naghimo sila sa hustong butang o mihaom sa “tukma” nga pagkahaom. Sa ngalan ni Jesukristo, amen.