Mapainubsanon sa Pagdawat ug Pagsunod

Ni Elder Joni L. Koch

Sa Seventy

Ang pagkamapainubsanon usa ka dako nga panginahanglanon aron kita maandam sa pagbalik sa presensiya sa Dios.

Sa ikalima nga kapitulo sa Alma, usa ka makapahinuklog nga pangutana ang gihatag: “Kamo makaingon ba, nga kon kamo tawgon aron mamatay niini nga takna, diha sa inyong mga kaugalingon, nga kamo dihay igo nga pagpaubos?”¹ Kana nga pangutana nagpasabot nga ang pagkamapainubsanon usa ka dako nga panginahanglanon aron kita maandam sa pagbalik sa presensiya sa Dios.

Kitang tanan ganahan nga maghunahuna nga kita may igo nga pagpaubos, apan ang pipila ka kasinatian sa kinabuhi makapaamgo nato nga isip tawo kasagaran ato na nga kinaiya ang garbo ug pagkamasinupakon.

Mga tuig na ang milabay, sa dihang ang among duha ka anak nga babaye nagpuyo pa sa balay, nakadesisyon ko nga ipakita nila ug sa akong asawa ang luna sa negosyo diin ako ang gisangonan sa kompanya nga akong gitrabahoan.

Ang akong tinuod nga katuyoan mao ang pagpakita nila sa dapit diin, dili sama sa among panimalay, ang tanan mobuhat gayod sa unsay akong ipabuhat nga dili na mangutana nako. Sa dihang naabot kami sa atubangan nga gate, nga kasagaran awtomatik nga maabli kon magpadulong na ang akong sakyanan, natingala ko nga wala kini moabli niining higayona. Kondili, usa ka guwardiya nga wala pa nako sukad makita ang miduol sa akong sakyanan ug nangayo sa akong ID sa kompaniya.

Ako siyang giingnan nga wala gayod ako nagkinahanglan og ID aron makasulod sa luna sakay sa akong sakyanan ug dayon nangutana niya sa kasagaran ipangutana sa mapagarbohon nga tawo: “Nakaila ka ba kon kinsa ang imong kaistorya?”

Diin siya mitubag, “Nan, kay wala man ang imong ID sa kompanya, dili ko makaila kon si kinsa ka, ug samtang naa ko niini nga gate, dili ka tugotan nga mosulod sa dapit kon walay eksakto nga pagpaila.”

Naghunahuna ko nga motan-aw sa samin sa likod aron tan-awon kon unsa ang reaksiyon sa akong mga anak nga babaye atong tanan, apan nakahibalo ko nga sila nahimuot kon unsa ang nahitabo! Ang akong asawa nga naa sa akong tupad naglingo-lingo sa iyang ulo kay wala makauyon sa akong gibuhat. Ang akong kataposan nga nabuhat mao ang pagpangayo og pasaylo sa guwardiya ug miingon nga nasubo ko sa dili maayo nako nga gipakita kaniya. “Gipasaylo na tika,” miingon siya, “apan kon wala ang imong ID sa kompanya, dili ka makasulod karon!”

Nagmaneho dayon ko nga hinay kaayo pabalik sa balay aron kuhaon ang akong ID, nga tingali nakat-on niini nga bililhong leksiyon: kon kita mopili nga dili magpaubos, kita mopadulong nga maulawan.

Sa Proverbio atong makita, “Ang kagarbo sa tawo makapahimo kaniyang ubos; apan kadtong mapinaubsanon sa espiritu makabaton og kadungganan.”² Aron nga makapalambo og pagkamapainubsanon, kita kinahanglang makasabot kon unsa gayod ang kahulogan niini sa konteksto sa ebanghelyo.

Ang ubang tawo mokonektar sa pagkamapainubsanon ngadto sa ubang butang sama sa, pananglitan, pagkahimong kabos. Apan sa pagkatinuod naay daghan nga kabos ug mapahitas-on ug daghan usab nga adunahan apan mapainubsanon. Ang uban nga maulawon kaayo o adunay ubos nga pagtan-aw sa kaugalingon mahimong tan-awon nga mapainubsanon sa gawas apan sa sulod diay kay puno kaayo sa garbo usahay.

Mao nga unsa man ang pagkamapainubsanon? Sumala sa Isangyaw ang Akong Ebanghelyo, kini mao ang “pagkaandam sa pagsunod ngadto sa kabubut-on sa Ginoo. … Kini mao ang pagkahimong matudloan. … [Usa kini] ka mahinungdanon nga timaan sa espirituhanong paglambo.”³

Seguradong adunay daghan nga kahigayonan alang natong tanan aron molambo niini nga Kristohanong kinaiya. Gusto nako nga tan-awon usa kon unsa kita ka mapainubsanon, o kinahanglan nga, sa pagsunod sa tambag sa atong propeta. Usa ka mubo nga pasulit alang sa tagsa-tagsa nato mahimong ang:

Ato ba nga isulti ang tibuok nga ngalan sa Simbahan sa tanan nato nga mga interaksyon? Si Presidente Russell M. Nelson miingon, “Ang pagkuha sa ngalan sa Ginoo gikan sa Simbahan sa Ginoo usa ka dakong kadaogan ni Satanas.”⁴
Ato ba nga gipatigbabaw ang Dios sa atong mga kinabuhi pinaagi sa pagdawat sa tukma kaayo nga pagdapit sa atong propeta? “Karon moawhag ko sa atong mga miyembro bisan asa nga manguna sa pagbiya sa mga kinaiya ug binuhatan sa diskriminasyon.”⁵
Ato ba nga gibuntog ang kalibotan, misalig sa doktrina ni Kristo labaw pa sa mga pilosopiya sa tawo, sama sa gitudlo sa atong propeta?⁶
Nahimo ba kita nga mga tigpasiugda sa kalinaw, sa pagsulti og positibo nga mga butang ngadto ug mahitungod sa katawhan? Si Presidente Nelson nagtudlo kanato sa miaging kinatibuk-ang komperensiya sa mosunod: “Kon adunay mga butang nga mahiyason, matahom, o maayo og dungog o dalaygon, nga atong masulti mahitungod sa laing tawo—sa dayag o sa tago—kana mao unta ang atong sumbanan sa komunikasyon.”⁷

Kini mga yano apan gamhanan nga mga pahimangno. Hinumdomi, ang usa lang ka butang nga kinahanglang buhaton sa katawhan ni Moises aron mamaayo mao ang paghangad ngadto sa bitin nga tumbaga nga gibutang sa ibabaw.⁸ Apan “tungod sa pagkayano sa paagi, o sa kasayon niini, adunay daghan kinsa namatay.”⁹

Atol niini nga komperensiya atong nadungog ug madungog pa ang walay paghunong nga tambag sa atong mga propeta ug apostoles. Usa kini ka tukma nga okasyon aron makapalambo og kamapainubsanon ug tugotan ang atong hugot nga mga opinyon nga mabuntog sa mas hugot nga kombiksyon nga ang Ginoo namulong gayod pinaagi niining pinili nga mga lider.

Labaw sa tanan, sa pagpalambo og kamapainubsanon, kita kinahanglan nga makasabot ug modawat nga dili kita makahimo sa pagbuntog sa atong mga hagit o makab-ot ang atong tibuok nga potensyal pinaagi sa atong kaugalingong paningkamot lamang. Ang makadasig nga mga mamumulong, mga manunulat, mga tigbansay, ug mga tig-impluwensiya sa tibuok kalibotan, ilabi na sa digital nga mga plataporma, moingon nga ang tanan nagdepende lamang diha kanato ug sa atong mga gibuhat. Ang kalibotan nagtuo diha sa usa ka bukton nga unod.

Apan pinaagi sa gipahiuli nga ebanghelyo, atong nakat-onan nga kita nakadepende kaayo sa kalooy sa Langitnong Amahan ug sa Pag-ula sa atong Manluluwas, si Jesukristo, “kay kami nasayod nga pinaagi sa grasya kami maluwas, human sa tanan nga atong mabuhat.”¹⁰ Mao nga importante kaayo ang paghimo ug pagtuman sa mga pakigsaad uban sa Dios, kay ang paghimo sa ingon makahatag kanato og hingpit nga kahigayonan sa makaayo, makahimo, ug makahingpit nga gahom ni Jesukristo pinaagi sa Iyang Pag-ula.

Ang pagtambong sa miting sa sakramento matag semana ug kanunay nga pagsimba diha sa templo aron sa pag-apil sa mga ordinansa ug sa pagdawat ug pagbag-o sa mga pakigsaad usa ka timailhan nga kita miila sa atong pagdepende sa Langitnong Amahan ug sa atong Manluluwas, si Jesukristo. Kana modapit sa Ilang gahom ngari sa atong mga kinabuhi aron motabang nato latas sa tanan natong mga problema ug sa kataposan makatuman sa sukod sa atong paglalang.

Dili pa lang dugay ang gitas-on sa akong kamapainubsanon ug pagsabot sa akong pagdepende sa Ginoo gisukod na usab. Nagsakay ko og taxi padulong sa airport aron makaabot sa mubo nga biyahe sa eroplano padulong sa usa ka dapit diin adunay lisod kaayo nga sitwasyon nga sulbaronon. Ang drayber sa taxi, kinsa dili miyembro sa Simbahan, mitan-aw nako sa samin ug miingon, “Makita nako nga dili maayo ang imong gibati karon!”

“Nakabantay diay ka?” Nangutana ko.

“Siyempre,” miingon siya. Dayon miingon siya og usa ka butang nga, “Ikaw sa pagkatinuod adunay negatibo kaayo nga gibati karon!”

Akong gipasabot niya nga ako dunay medyo lisod nga sitwasyon nga kinahanglan sulbaron, ug dayon siya nangutana nako, “Gibuhat na ba nimo ang tanan kutob sa imong mahimo aron masulbad kini?”

Mitubag ko nga gihimo na nako ang tanan nga akong makaya.

Siya miingon dayon og usa ka butang nga wala gayod nako makalimti: “Isalig kining tanan sa mga kamot sa Dios, ug mahimo ra nga maayo ang tanan.”

Mokompisal ko nga natental na gayod ko sa pagpangutana niya, “Nakaila ka ba kon si kinsa ang imong kaistorya?” Apan wala ko kini buhata! Ang akong gibuhat mao ang pagpaubos sa akong kaugalingon sa atubangan sa Ginoo sa tibuok nianang usa ka oras nga paglupad, nangayo alang sa balaanon nga tabang. Sa akong pagbiya sa eroplano, akong nakat-onan nga ang lisod nga sitwasyon nga sulbaronon nahan-ay na ug nga ang akong presensiya dili na gani kinahanglan.

Mga kaigsoonan, ang sugo, pagdapit, ug saad gikan sa Ginoo klaro ug makahupay: “Pagmapainubsanon; ug ang Ginoo nga imong Dios mogiya kanimo sa kamot, ug mohatag nimo og tubag sa imong mga pag-ampo.”¹¹

Unta kita mapainubsanon nga mosunod sa tambag sa atong mga propeta ug modawat nga ang Dios ug si Jesukristo lamang ang makapausab nato—pinaagi sa mga ordinansa ug mga pakigsaad nga nadawat sa Iyang Simbahan—ngadto sa atong labing maayo nga bersyon sa atong mga kaugalingon niini nga kinabuhi ug, sa moabot nga adlaw, mohimo nato nga hingpit diha ni Kristo. Sa ngalan ni Jesukristo, amen.