Elder Alexander Dushku

Kinatibuk-ang Awtoridad nga Seventy

Ang mga ginikanan ni Elder Alexander Dushku mipasakop sa Simbahan didto sa Boston, Massachusetts, USA, human mobisita sa World’s Fair sa Siyudad sa New York niadtong 1964. Ang iyang amahan espirituwal nga natandog sa unsay iyang nakat-onan mahitungod sa ebanghelyo diha sa giesponsoran sa Simbahan nga pabilyon, ug siya midapit sa mga misyonaryo sa pagtudlo kaniya ug sa iyang pangasaw-onon.

Ang iyang mga ginikanan bag-o sa Simbahan sa dihang natawo siya, apan si Elder Dushku miingon nga nasayod siya nga siya moserbisyo og misyon.

“Sa diha lamang nga ako nagmisyon nga ako nagsugod sa pagkasabot sa himaya sa misyonaryo nga buhat ug kon unsa ka gamhanan kini,” miingon si Elder Dushku, kinsa nagserbisyo sa Portugal Lisbon Mission gikan sa 1986 hangtod 1988. “Hingpit kining nakapabuka sa akong mga mata ngadto sa gingharian sa Dios ug unsa ang gipasabot niini.”

Si Elder Dushku nagtuo nga ang pagkamiyembro sa Simbahan adunay dakong potensiyal nga makahimo og kalainan sa kalibotan.

“Bisan kon ang atong gidaghanon tingali diyotay ra, kini makahuluganon ug gamhanan,” siya miingon. “Kita maglakaw uban ni Kristo, nga magginunitay. Ug dayon kita maglakaw uban sa usag usa. Kita mismo mahimong mga kamot ug tingog sa Ginoo sa pagbayaw ug paglig-on sa uban.”

Si Alexander Dushku natawo niadtong Nobiyembre 17, 1966, ngadto nila ni Nicholas ug Donna Lee Dushku sa Fairfield, California, USA. Si Elder Dushku naminyo ni Jennifer Burnham niadtong 1988 sa Salt Lake Temple. Sila adunay walo ka anak ug siyam ka apo.

Si Elder Dushku nakaangkon og bachelor’s degree sa economics gikan sa Brigham Young University niadtong 1990. Siya nakadawat og juris doctorate gikan sa BYU’s J. Reuben Clark Law School niadtong 1993. Siya nagtrabaho sa kompaniya sa pamalaod alang sa nasyonal nga interes sa publiko ug klerk sa US Court of Appeals alang sa Seventh Circuit sa wala pa ang iyang labing bag-ong pagpanarbaho sa Kirton McConkie nga kompaniya sa pamalaod sa Siyudad sa Salt Lake, diin siya nagtutok sa Unang Pag-usab sa Batakang Balaod sa Estados Unidos ug kagawasan sa relihiyon.

Si Elder Dushku nagserbisyo isip usa ka presidente sa stake sa panahon sa iyang pagkatawag. Nagserbisyo usab siya isip usa ka bishop, high councilor, magtatambag sa bishopric, ug presidente sa korum sa mga elder.