Ang Ikaduhang Edisyon sa Isangyaw ang Akong Ebanghelyo Anaa na Karon

Dul-an sa duha ka dekada human sa pagmantala sa Isangyaw ang Akong Ebanghelyo: Usa ka Giya sa Misyonaryo nga Pangalagad, ang Simbahan mimantala og ikaduhang edisyon (nga nagdala sa subtitle Usa ka Giya sa Pagpakigbahin sa Ebanghelyo ni Jesukristo).

Si Presidente Russell M. Nelson mipahibalo sa ikaduhang edisyon atol sa seminar sa Simbahan alang sa bag-ong mga lider sa misyon niadtong Hunyo. “Kinig bag-ong edisyon miabot sa panahon nga ang kalibotan paspas nga nagkausab,” miingon siya. “[Kini] nagpakita sa kasensitibo sa daghan niadto nga mga kausaban. Kini naglangkob sa pipila sa labing maayong panudlo nga sukad akong nakita aron sa pagtabang sa mga tawo nga modawat sa imbitasyon sa Ginoo sa pagduol ngadto Kaniya.”

Ang gibag-o nga edisyon naglakip sa mga pagtulon-an gikan sa mga lider sa Simbahan nga gihatag sukad gimantala ang unang edisyon niadtong 2004. Nahisubay kini sa gibag-o nga Kinatibuk-ang Tamdanan nga Basahon ug sa ubang bag-ong mga palisiya. Kini naglakip usab sa mga pagpanalipod ug sa mga lagda alang sa paggamit sa teknolohiya sa pagpakigbahin sa ebanghelyo.

Ang Kinatibuk-ang Presidente sa Young Women nga si Sister Bonnie H. Cordon miingon: “Unsa ang nakanindot mao nga ang matag usa sa Napulog Duha nagtutok niini. Ang Unang Kapangulohan mibasa sa kinatibuk-an niini. Ug kini mao gayod ang libro nga gihatagan sa Manluluwas sa Iyang pagtugot.”

Ang ikaduhang edisyon sa Isangyaw ang Akong Ebanghelyo anaa sa Gospel Library app ug sa online sa Iningles, French, Portuguese, ug Spanish. Ang giprinta nga mga edisyon mogawas sa kataposan sa 2023. Dugang mga pinulongan ang anaa sugod sa Enero 2024.