Mga Pag-aghat sa Espiritu
Ang makanunayon nga pakig-uban sa Espiritu Santo mao ang usa sa labing talagsaon nga espirituhanong mga gasa nga matagamtam sa mga Santos sa Ulahing mga Adlaw.
Pasiuna
Bag-ohay lang, ang mga mata sa tibuok kalibotan nakatutok diha sa 2023 FIFA Women’s World Cup nga gi-host sa Australia ug New Zealand. Ang banggiitan nga mga atleta nga nagrepresentar sa kapin 200 ka nasodnong kuponan gikan sa tibuok kalibotan nagpakita sa ilang kalig-on, dedikasyon, talento, ug pagka-atleta samtang sila nagkigsangka alang sa kinatas-ang dungog alang sa soccer.
Atong gikatingad-an ang mga mandudula sa nagkadaiya nga mga esport ug sa ubang mga disiplina kinsa mikab-ot sa kinatas-an nga ang-ang sa ilang art. Kita maghisgot kabahin sa ilang natural nga hinatag sa Dios nga mga talento o mga gasa. Kini naglakip niadtong gigasahan diha sa sayaw, mga gymnastiko, musika, art, drama, matimatika, siyensya, ug daghan pa. Matag usa sa maong tawo nagpakita sa hinatag sa Dios nga mga gasa nga napalambo ug nahasa pinaagi sa tibuok kinabuhi nga pagkugi, pagtuon, ug pagpraktis. Ang hinatag sa Dios nga mga gasa makapahimo sa katawhan nga gigasahan [gifted].
Paggamit sa Espirituhanong mga Gasa
Sa pagsabot niini diha sa panglantaw sa ebanghelyo, ang Dios naghatag sa Iyang mga anak og daghang espirituhanong mga gasa, nakapahimo kanila nga sa espirituhanong paagi gigasahan nga mga katawhan. Ang mga miyembro nga nagtuman sa pakigsaad sa Simbahan nahatagan og mga gasa sa Espiritu, nga naglakip sa gasa sa pagpamatuod kang Jesukristo isip atong Manluluwas, sa gasa sa Espiritu Santo, sa gasa sa hugot nga pagtuo nga moayo ug mamaayo, sa gasa sa pagsabot, sa gasa sa pagdawat og mga milagro, ug sa mga gasa sa kaalam ug kahibalo.1 Ang Ginoo nagdapit kanato nga matinguhaong mangita sa labing maayo nga mga gasa, bisan ang espirituhanong mga gasa. Siya mihatag og espirituhanong mga gasa sa pagpanalangin kanato ug aron maggamit sa pagpanalangin sa uban.2
Sa pagbalik ngadto sa atong analohiya sa gigasahan nga mga mandudula, importante nga hinumdoman nga ang pagbaton lang sa usa ka gasa dili makapahimong banggiitan. Bisan pa ang talagsaon nga natural nga talento, pinaagi gyod sa makugihon ug tumang paghago sa pagpraktis ug paningkamot nga ang mga mandudula molambo ug mahanas sa ilang buhat aron makab-ot ang ilang labing taas nga ang-ang sa arte. Bisan kadtong mga gasa nga nadawat ug giablihan sa kasagaran giubanan sa kabalaka nga “pipila pa ka pag-asembol ang gikinahanglan.”
Sa samang paagi, ako nakaobserbar og kalisod sa pagkat-on og bag-ong butang kalabot sa espirituhanong mga gasa. Ang paggamit sa espirituhanong mga gasa nagkinahanglan og espirituhanong pagbansay. “Ang pagbaton sa giya sa Espiritu Santo sa inyong kinabuhi nagkinahanglan og espirituhanong buhat. Kini nga buhat naglakip og bug-os nga pag-ampo ug makanunayon nga pagtuon sa kasulatan. Naglakip usab kini sa pagtuman sa inyong mga pakigsaad ug sa mga sugo sa Dios. … Kini naglakip sa takos nga pag-ambit sa sakramento sa matag semana.”3
Unsa man ang mga bunga sa pagbansay sa espirituhanong mga gasa? Kini naglakip sa mga pag-aghat gikan sa Espiritu nga makatabang kanato sa pag-atubang sa atong inadlaw adlaw nga panginahanglan ug mogiya kanato unsa ang buhaton ug isulti ug mga panalangin sa kalinaw ug kahupay. Samtang kita maminaw ug mobuhat niining espirituhanong mga pag-aghat, ang Espiritu Santo mopadako sa atong mga abilidad ug kapasidad nga molabaw pa kaayo sa unsay atong mahimo sa atong kaugalingon. Kini nga bililhon nga espirituhanon nga mga gasa motabang kanato sa matag aspeto sa atong mga kinabuhi.4
Ang makanunayon nga pakig-uban sa Espiritu Santo mao ang usa sa labing talagsaon nga espirituhanong mga gasa nga matagamtam sa mga Santos sa Ulahing mga Adlaw.
Unsa ka importante kini nga gasa? Si Presidente Russell M. Nelson hingpit nga mitubag niini nga pangutana sa dihang siya namahayag nga “sa umaabot nga mga adlaw, dili na posible ang espirituhanong pagsugakod kon wala ang giya, direksiyon, ug makahupay nga impluwensiya sa Espiritu Santo.”5
Unsaon sa Pagdapit ug sa Pag-ila sa mga Pag-aghat sa Espiritu
Sa tibuok sa akong pagpangalagad, akong nakit-an ang malukpanon nga pagtinguha sa tanan aron masayod kon unsaon sa pagdapit ug sa pag-ila ang mga pag-aghat sa Espiritu Santo. Ang mga pag-aghat sa Espiritu personal kaayo ug moabot sa lain-laing mga paagi. Kita, hinoon, bulahan nga nakabaton sa mga pulong sa mga propeta, sa karaan ug sa bag-ong panahon, naghatag kanato og bililhon nga mga panabot mahitungod kon unsaon sa pagdawat og direksiyon gikan sa Espiritu.
Tugoti ko nga motanyag og upat ka makagiya nga mga baroganan nga mahimong makaabag kaninyo sa pagdapit ug sa pag-ila sa mga pag-aghat sa Espiritu.
Barog sa Balaan nga mga Dapit
Ang una mao ang pagbarog sa balaan nga mga dapit.6 Ako bag-ohay lang nga miapil og open house didto sa Tokyo Japan Temple. Ang tubag sa pormal nga mga imbitasyon gipadala ngadto sa media ug VIP nga mga bisita milabaw kaayo sa gilaoman. Gatosan ang miapil niining giniyahan nga mga paglibot sa templo. Ang mga bisita natandog sa hilabihan tungod sa katahom sa templo, lakip sa mga sundanan ug sa mga motif nga adunay lawom, nga mga koneksiyon sa tradisyon sa Hapon. Mas makapatandog gayod mao ang balaanong pagtahod ug matinahoron nga reaksiyon nga nakuha gikan sa mga bisita samtang ang mga ordinansa alang sa katigulangan gihulagway diha sa mga lawak diin kini mahitabo. Apan ang labing makapainit sa kasingkasing mao ang mga pagdasig sa Espiritu.
Usa sa maong higayon mao ang uban sa usa ka prominenteng opisyal sa gobyerno nga nagpabiling nasilsil sa akong panumdoman. Nagsunod sa usa ka higayon nga makapamalandong nga kahilom diha sa celestial nga lawak, emosyonal ug lawom nga natandog, siya mihunghong sa akong dunggan, “Bisan ang hangin nga akong giginhawa niini nga lawak lahi ang pamati.” Ako miila nga siya naningkamot sa paghulagway sa presensiya sa Espiritu Santo, nga, sa pagkatinuod, nagpuyo diha sa sagradong mga dapit. Kon kamo naglaom sa pagbati sa Espiritu, adto sa usa ka dapit kon asa ang Espiritu dali nga makapuyo.
Ang atong mga templo ug mga panimalay mao ang labing sagrado niining gipahinungod nga mga dapit. Dinhi niining dapita kita mas dali nga makadapit ug makaila sa Espiritu. Ang uban nga balaan nga mga dapit naglakip sa mga meetinghouse, mga bilding sa seminary ug institutes, ug mga site sa kasaysayan sa Simbahan ug mga sentro sa bisita. Barog sa balaan nga mga dapit.
Barog uban sa Balaan nga mga Tawo
Ikaduha, barog uban sa balaan nga mga tawo. Akong ihulagway ang ikaduha nga makagiya nga baroganan sa laing panumdoman.
Dili nako malimtan nga nag-apil sa usa ka debosyonal nga gipahigayon sa usa ka popular nga arena sa esport. Kasagaran, kini nga arena mapuno sa hugyaw sa fans nga nag-abiba sa ilang kaugalingong kuponan ug tingali mobiaybiay sa ilang kaaway. Apan niining gabhiona, ang palibot daw lahi. Ang arena napuno sa liboan ka batan-ong katawhan nga nagpundok sa pagpasidungog ug pagsaulog sa kinabuhi ni Propeta Joseph Smith. Ang ilang balaanong pagtahod, hilom nga hinagawhaw; pasalamat; ug mainampoon nga mga kasingkasing mipuno sa arena uban sa presensiya sa Balaang Espiritu. Tinuod nakong makita kini sa ilang mga panagway. Mao kadto ang gasa sa Espiritu Santo nga naglihok, nagmatuod sa mga pagpamatuod nga nahatag alang ni Joseph Smith ug sa Gipahiuli nga ebanghelyo.
Ang Espiritu dili kapugngan sa pagtambong sa usa ka panagpundok sa balaan nga katawhan. Kon kamo naglaom sa pagbati sa Espiritu, uban sa mga tawo diin ang Espiritu daling makig-uban. Ang Manluluwas miingon niining paagiha, “Kay kon may duha o tulo nga magkatigom sa akong ngalan, anaa ako uban kanila.”7 Alang sa batan-ong katawhan, ikonsiderar ang inyong mga panagtigom sa balaan nga mga katawhan, mga korum ug mga klase, AKK ug seminary, mga kalihokan sa ward ug sa stake—bisan sa ward choir. Pilia nga makauban sa mga katawhan ug moadto sa mga dapit diin ang pagkamatarong mapalgan. Pangitaa ang inyong kalig-on diha sa kahuyang. Pangitaa ang maayo nga mga higala. Mahimong maayong mga higala. Suportahe ang usag usa. Mobarog uban sa balaan nga mga katawhan.
Pagpamatuod sa Balaan nga mga Kamatuoran
Ikatulo, kanunayng mopamatuod sa balaan nga mga kamatuoran kutob sa inyong mahimo. Ang Maghuhupay kanunayng mopakigbahin sa Iyang tingog kon kita mopamatuod gamit ang atong tingog. Ang Espiritu parehas nga mosaksi ngadto sa mamumulong ug sa tigpaminaw.
Ako nakahinumdom sa makausa nga misakay og taxi sulod sa 45 minutos didto sa Siyudad sa New York. Nakabaton og usa ka mahigalaon nga panag-istorya bahin sa ebanghelyo uban sa drayber atol sa akong biyahe padulong sa tugpahanan, mibayad ko niya ug nangandam nga mogawas sa taxi. Dayon nakaamgo ko nga wala pa ko nakahatag og usa ka pagpamatuod sa akong gipakigbahin. Mihunong, mipakigbahin ko og yano, mubo nga pagpamatuod, nagdapit sa Espiritu, nakapalugmaw sa mga luha sa among mga mata.
Kon kamo magtinguha ug makakuha og mga oportunidad sa pagpakigbahin sa inyong pagpamatuod ngadto sa uban, kamo makahimo og mga higayon sa pag-ila sa Espiritu alang sa inyong kaugalingon.
Paminaw sa Balaang Espiritu
Ang kataposan nga baroganan mao ang pagpaminaw ngadto sa Balaang Espiritu. Siya mamahimo natong makanunayon nga kauban apan Siya mamulong sa pino, hinay nga tingog. Si propeta Elias misuta nga ang tingog sa Ginoo wala diha sa hangin, sa linog, o sa kalayo apan mao ang “hinay ug malumong tingog.”8 Kini “dili usa ka tingog sa dugdog” apan hinuon “usa kini ka hagawhaw nga tingog nga hingpit sa kalumo, ingon nga kini usa ka honghong,” ug bisan pa man kini “modulot bisan ngadto sa kinahiladman sa kalag.”9
Si Presidente Boyd K Packer namahayag: “Ang Espiritu dili mokuha sa atong pagtagad pinaagi sa pagsinggit o sa pag-uyog kanato sa bug-at nga kamot. Kon dili kini mohunghong. Kini mohapuhap sa hinay nga paagi nga kon kita bisi, mahimong dili gayod nato kini mabati.”10 Ako nakaobserbar nga usahay ang Iyang tingog pino kaayo, o ako daghan kaayo og gibuhat, nga ang usa ka minahal mahimong makakuha niini alang kanako. Kadaghan na nga higayon kon ang mga pag-aghat sa Espiritu Santo moabot kanako pinaagi sa akong asawa, si Lesa. Ang matarong nga mga ginikanan o mga lider mahimong makadawat usab og dinasig nga giya alang kaninyo.
Ang kasaba, kaguliyang, ug panagbingkil nga nagkaylap sa kalibotan mahimong mopatigbabaw sa malinawon, hilom nga mga pagbati sa Balaang Espiritu. Pangita og hilom nga dapit, usa ka balaan nga dapit diin kamo mahimong magtinguha sa pagdawat og direksiyon gikan sa Espiritu.
Pipila ka mga Pulong sa Pasidaan
Samtang kamo magkonsiderar niini nga mga baroganan sa pagdapit ug pag-ila sa Espiritu, ikonsiderar ang mosunod nga mga pulong sa pasidaan nga giya.11
Ikompirmar ang inyong espirituhanong mga pagbati. Sama pananglit, ang mga pagbati gikan sa Espiritu mahiuyon sa mga kasulatan ug sa mga pagtulon-an sa buhi nga mga propeta.
Iseguro nga ang mga pagbati nga inyong nadawat nahauyon sa inyong buluhaton. Gawas lang kon kamo gitawag pinaagi sa tukma nga awtoridad, ang mga pagbati gikan sa Espiritu wala gihatag aron kamo motambag o mokoriher sa uban.
Ang esprituhanong mga butang dili mapugos. Kamo makaugmad og usa ka kinaiya ug usa ka palibot nga makadapit sa Espiritu, ug kamo makaandam sa inyong kaugalingon, apan kamo dili modiktar kon unsaon o kanus-a ang pagdasig moabot. Pagmapailobon ug salig nga kamo makadawat unsa ang inyong gikinahanglan kon ang panahon husto na.
Gamita ang inyong labing maayo nga paghukom. Usahay kita gusto nga magiyahan sa Espiritu sa tanan nga mga butang. Apan, kasagaran ang Ginoo gusto nga atong gamiton ang hinatag sa Dios nga kinaadman ug mobuhat sa mga paagi nga mauyon sa atong labing maayo nga panabot. Si Presidente Dallin H. Oaks mitudlo:
“Ang tinguha nga magiyahan sa Ginoo usa ka kalig-on, apan kinahanglan kining pagaubanan og pagsabot nga itugyan ra sa atong Langitnong Amahan ang daghang mga desisyon diha sa atong personal nga mga pagpili. … Ang mga tawo nga mosulay sa pagpasa sa tanang paghimo og desisyon ngadto sa Ginoo ug mangamuyo alang sa pagpadayag sa kada pagpili sa dili madugay makakita og mga kahigayonan nga sila mag-ampo alang sa giya ug dili makadawat niini. …
“Kita kinahanglan magtuon sa mga butang diha sa atong mga hunahuna. … Dayon kinahanglan kitang mag-ampo alang sa giya ug lihokon kini kon madawat nato kini. … Kon dili kita makadawat og giya, kinahanglan molihok kita sumala sa atong labing maayo nga paghukom.”12
Panapos uban sa usa ka Imbitasyon
Agig pagtapos, ang mga Santos sa Ulahing mga Adlaw gigasahan, nga mga katawhan nga nagtuman sa pakigsaad. Bisan pa niana, magpabilin sa matag usa kanato ang pagtinguha sa pagbansay sa atong espirituhanong mga gasa ug dayon modapit ug magkat-on sa pag-ila sa mga pag-aghat sa Espiritu. Upat ka makagiya nga mga baroganan nga makaabag kanato niining mahinungdanon nga espirituhanong paningkamot mao ang:
-
Barog sa balaan nga mga dapit.
-
Mobarog uban sa balaan nga mga katawhan.
-
Pagpamatuod sa balaan nga mga kamatuoran.
-
Maminaw ngadto sa Espiritu Santo.
Ang inyong abilidad sa pagdapit ug sa pag-ila sa mga pag-aghat sa Espiritu molambo usa ka lakang sa usa ka higayon. “Ang pagkahimong mas mahiuyon ngadto sa pinulongan sa Espiritu sama sa pagkat-on og lain nga pinulongan. Kini anam-anam nga proseso nga nagkinahanglan og makugihon, mapailobon nga paningkamot.”13
Balik ngadto kon diin kita nagsugod, palihog hinumdomi nga isip Santos sa Ulahing mga Adlaw kamo gigasahan. Handurawa kining pamilyar nga talan-awon sa Dominggo sa puasa, bag-ohay lang gihulagway ngari kanako. Usa ka bata, nagbarog sa usa ka lingkoranan, hapit dili makita diha sa pulpito. Ang iyang amahan nagbarog sa iyang tupad, nga nagtanyag og pagdasig ug nag-abag og hinay nga hunghong sa iyang dunggan samtang mapagarbohon siya nga mipakigbahin, “Ako anak sa Dios.”
Ang nagsunod nga pagpamatuod naggikan sa usa ka young single adult nga misugod og pasiaw aron sa pagwagtang sa kulba, “Maayo unta nga adunay maghunghong sa akong dunggan nga sama niana.” Dayon adunay misantop nga pagdasig ug mipamatuod, “Ako adunay naghunghong sa akong dunggan nga—sama niana, ang Espiritu Santo!”
Ako motapos sa usa ka imbitasyon ilabi na alang sa tanang kabatan-onan! Kadaghanan ninyo magsugod sa inyong adlaw pinaagi sa pagbarog sa samin. Ugma, niining semanaha, niining tuiga, sa kanunay, hunong kon motan-aw kamo sa inyong kaugalingon sa samin. Hunahunaa sa inyong kaugalingon, o isulti og kusog kon gusto ninyo, “Wow, tan-awa ko! Talagsaon ako! Ako usa ka anak sa Dios! Siya nakaila kanako! Siya naghigugma kanako! Ako gigasahan—sa Espiritu Santo isip akong makanunayon nga kauban!”
Ako modugang sa akong pagpamatuod diha kaninyo, gigasahan nga mga Santos sa Ulahing mga Adlaw, sa Dios nga Amahan, ni Jesukristo, ug sa Espiritu Santo, kinsa nagpamatuod Kanila. Sa ngalan ni Jesukristo, amen.