Magmahimong Malinawon nga mga Sumusunod ni Kristo
Ako mopamatuod nga ang “malinawon nga mga sumusunod ni Kristo” makakaplag og personal nga kalinaw niini nga kinabuhi ug usa ka mahimayaon nga langitnong paghiusa og balik.
Nagpuyo kita sa panahon diin ang “malinawon nga mga sumusunod ni Kristo”1 nakasinati og talagsaong mga hagit. Kadtong mituo, mapaubsanong nagsimba, ug nagpamatuod kang Jesukristo sa kanunay nakasinati og mga pagsulay, kasakitan, ug mga kalisdanan.2 Ang akong asawa, si Mary, ug ako nakasinati usab. Sa miaging pipila ka tuig nakita namo nga daghan sa akong suod nga mga higala sa hayskol, mga kompanyon sa misyon, pipila sa ilang minahal nga mga asawa, ug kanhi mga kauban sa trabaho nangamatay na, o, sama sa gisulti ni Presidente Russell M. Nelson, migradwar ngadto sa pikas bahin sa tabil. Nakita namo nga ang pipila nga gipadako pinaagi sa hugot nga pagtuo ug tinuohan mitipas sa dalan sa pakigsaad.
Makapaguol, nawad-an kami og apo nga lalaki nga nag-edad og 23 sa usa ka trahedya sa aksidente sa sakyanan. Pipila sa minahal nga mga higala, mga sakop sa pamilya, ug mga kauban nag-antos usab og dagkong mga hagit sa panglawas.
Sa higayon nga ang mga pagsulay mahitabo, magbangotan kita ug maningkamot sa pagtambayayong sa alantoson sa usag usa.3 Magbangotan kita sa butang nga dili matuman ug sa mga awit nga dili makanta.4 Ang bati nga mga butang mahitabo ngadto sa buotan nga mga tawo dinhi niining mortal nga panaw. Ang makagun-ob nga mga kalayo sa Maui didto sa Hawaii, sa habagatang Chile, ug sa Canada mao ang mga ehemplo sa makalilisang nga mga panghitabo nga usahay atubangon sa buotan nga mga tawo.
Mabasa nato diha sa Perlas nga Labing Bililhon nga gipadayag sa Ginoo ngadto kang Abraham ang mahangtoron nga kahimtang sa mga espiritu. Nakat-onan ni Abraham ang mahitungod sa atong kinabuhi sa wala pa dinhi sa yuta, pagkaorden nang daan, ang Paglalang, ang pagpili og usa ka Manunubos, ug kining mortal nga kinabuhi, nga mao ang ikaduhang kahimtang sa tawo.5 Ang Manunubos mipahayag:
“Kita magbuhat og usa ka yuta diin kini sila mahimo nga makapuyo;
“Ug kita mosulay kanila dinhi, aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila.”6
Karon kitang tanan ania dinhi sa ikaduhang kahimtang sa atong panaw sa pag-uswag ngadto sa usa ka gingharian sa himaya isip kabahin sa mahinungdanong plano sa Dios alang sa kaluwasan ug kahimayaan. Kita gipanalanginan og kabubut-on ug anaa ubos sa mga pagsulay sa pagkamortal. Kini mao ang panahon nga gihatag alang nato sa pagpangandam sa pagsugat sa Dios.7 Bulahan kita nga nakaila ni Jesukristo ug sa Iyang tahas sa plano. Kita adunay pribilehiyo nga mahimong mga miyembro sa Iyang gipahiuli nga Simbahan—Ang Simbahan ni Jesukristo sa mga Santos sa Ulahing mga Adlaw. Isip malinawon nga mga sumusunod ni Kristo kita maningkamot sa pagsunod sa Iyang mga sugo. Dili gayod sayon alang sa Iyang mga sumusunod. Dili usab sayon alang sa Manluluwas nga magmatinud-anong motuman sa Iyang mortal nga misyon.
Ang mga kasulatan klaro, daghan ang monunot sa paagi nga nag-ingon “kaon, inom, ug paglipay, kay ugma kita mamatay.”8 Ang ubang dili tumutuo midangop ngadto sa naglain nga mga grupo sa susama og panghunahuna nga mga partisipante nga nagpasiugda og “bag-o na pod nga butang”9 ug mga pilosopiya sa mga tawo.10 Wala sila kahibalo kon asa pangitaon ang kamatuoran.11
Ang malinawon nga mga sumusunod ni Kristo dili mosunod sa bisan asa niana nga dalan. Kita maabiabihon, maapilon nga mga sakop sa mga komunidad diin kita nagpuyo. Kita nahigugma, nagpakigbahin, ug nagdapit sa tanang anak sa Dios sa pagsunod sa mga pagtulon-an ni Kristo.12 Kita nagsunod sa tambag sa atong minahal nga propeta, si Presidente Nelson: kita nagpili sa tahas sa “usa ka tigpasiugda og kalinaw, karon ug sa kanunay.”13 Kining dinasig nga paagi nahisubay sa mga kasulatan ug sa propetikanhong giya.
Niadtong 1829 ang gipahiuli nga Simbahan wala pa maorganisar, wala pa usab mamantala ang Basahon ni Mormon. Usa ka gamayng grupo sa nagkalisod nga mga tawo, nadasig sa Espiritu sa Dios, misunod ni Propeta Joseph Smith. Ang Ginoo mipadayag ni Joseph og tambag alang sa lisod nga mga panahon: “Ayaw kahadlok, gagmay nga panon; pagbuhat og maayo; tugoti nga ang yuta ug impyerno maghiusa sa pagbatok kaninyo, kay kon kamo gitukod diha sa akong lig-on nga sukaranan, sila dili makabuntog.”14 Siya usab mitambag kanila nga:
“Paghunahuna ngari kanako sa matag hunahuna; ayaw pagduha-duha, ayaw kahadlok.
“… Pagmatinud-anon, paghupot sa akong mga sugo, ug kamo makapanunod sa gingharian sa langit.”15
Klaro lang, ang atong langitnong padulngan dili mausab kon kita mag-antos og kalisdanan. Diha sa Mga Hebreohanon kita gitambagan nga “manuol kita sa trono sa grasya, aron makadawat kitag kaluoy, ug makakaplag kitag grasya nga makatabang kanato panahon sa pagpanginahanglan.”16 Si Jesukristo mao ang “tinubdan sa dayon nga kaluwasan.”17
Ganahan ko sa mga pulong ni Mormon, nga gikutlo sa iyang anak nga si Moroni, nagdayeg “sa malinawon nga mga [sumusunod] ni Kristo … tungod sa inyong malinawon nga paglakaw uban sa mga katawhan.”18
Kanato nga anaa sa Simbahan nga naningkamot nga mahimong malinawon nga mga sumusunod ni Kristo, usa ka mas hayag nga adlaw ang nagpaabot kanato samtang kita nagtutok sa atong Ginoo ug Manluluwas, si Jesukristo. Ang mga pagsulay mga kabahin sa mortalidad ug mahitabo sa kinabuhi sa tanan sa tibuok kalibotan. Naglakip kini sa dagkong panagbangi tali sa mga nasod ug mga indibidwal.
Ang mga lider sa Simbahan kanunayng gipangutana, “Nganong ang makiangayong Dios motugot man sa bati nga mga butang nga mahitabo, labi na ngadto sa buotan nga mga tawo?” ug “Ngano nga kadtong matarong ug anaa sa serbisyo sa Ginoo dili man makalingkawas gikan nianang mga trahedya?”
Kita wala masayod sa tanang tubag; apan, kita nasayod sa importante nga mga baroganan nga magtugot kanato sa pag-atubang sa mga pagsulay, kasakitan, ug mga kalisdanan nga adunay hugot nga pagtuo ug pagsalig sa usa ka hayag nga kaugmaon nga naghulat sa matag usa nato. Walay mas maayo nga ehemplo nga anaa sa kasulatan mahitungod sa pagsagubang sa kasakitan kaysa pulong sa Ginoo ngadto ni Joseph Smith, ang Propeta, samtang usa siya ka binilanggo didto sa Bilanggoan sa Liberty.
Ang Ginoo sa usa ka bahin mipahayag:
“Kon ang mga apapangig gayod sa impyerno mobuka ug moabli sa ba-ba og dako diha kanimo, ikaw masayod, akong anak, nga kining tanan nga mga butang makahatag kanimo og kasinatian, ug alang sa imong kaayohan.
“Ang Anak sa Tawo mikunsad ubos kanilang tanan. Labaw pa ba ikaw kay kaniya?
“… Ayaw kahadlok unsa ang mahimo sa tawo, kay ang Dios mouban kanimo hangtod sa kahangtoran.” 19
Klaro kini nga kita adunay Amahan sa Langit nga personal nga nakaila ug nahigugma kanato ug hingpit nga nakasabot sa atong pag-antos. Ang Iyang Anak, si Jesukristo, mao ang atong Manluluwas ug Manunubos.
Si Presidente Russell M. Nelson ug si Presidente M. Russell Ballard parehong mipasabot og maayo sa kamahinungdanon sa bag-ong edisyon sa Isangyaw ang Akong Ebanghelyo.20 Moapil ko sa ilang kadasig. Kining bag-ong edisyon, nagpalig-on sa sagrado nga kasulatan, nga gamhanang namahayag nga:
“Diha sa Iyang maulaong sakripisyo, si Jesukristo midala diha sa Iyang kaugalingon sa atong mga sala, mga kasakit, mga balatian, ug mga kahuyang. Tungod niini, Siya nasayod ‘sumala sa unod unsaon pagtabang ang iyang katawhan sumala sa ilang mga kahuyang’ (Alma 7:12; tan-awa usab sa bersikulo 11). Siya nagdapit, ‘Duol ngari kanako,’ ug kon atong buhaton, Siya mohatag nato og kapahulayan, paglaom, kalig-on, panglantaw, ug pagkaayo (Mateo 11:28; tan-awa usab sa mga bersikulo 29–30).
“Samtang kita mosalig ni Jesukristo ug sa Iyang Pag-ula, Siya makatabang kanato nga makalahutay sa atong mga pagsulay, mga balatian, ug mga kasakit. Mahimong mapuno kita sa tumang kalipay, kalinaw, ug kahupayan. Ang tanan nga dili makiangayon kabahin sa kinabuhi mahimong mapahusto pinaagi sa Pag-ula ni Jesukristo.”21
Kita magmalipayon nga mahimong malinawon nga mga sumusunod ni Kristo.
Ang plano sa atong Amahan alang sa kalipay sa Iyang mga anak naglakip dili lang sa kinabuhi sa wala pa dinhi sa yuta ug sa mortal nga kinabuhi apan sa kinabuhing dayon usab, lakip na ang dako ug mahimayaong paghiusa og balik uban niadtong nawala kanato. Tanang sayop tarungon, ug atong makita uban sa hingpit nga kaklaro ug sa kawalay sayop nga panglantaw ug panabot.
Ang mga lider sa Simbahan mikompara niining panglantaw sa tawo nga naglakaw sa tunga-tunga sa tulo ka akto nga drama.22 Kadtong walay kahibalo sa plano sa Amahan dili makasabot unsay nahitabo sa unang akto (o sa kinabuhi nga wala pa dinhi sa yuta) ug sa mga katuyoan nga gi-establisar didto; ni sila makasabot sa pagpasabot ug resolusyon nga moabot sa ikatulong akto, nga mao ang mahimayaong katumanan sa plano sa Amahan.
Daghan ang wala makadayeg nga ubos sa Iyang mahigugmaon ug hingpit nga plano, kadtong nakita nga nabentahaan nga walay nahimong sayop magmadaogon sa kataposan.23
Ang mga kasulatan klaro: ang malinawon nga mga sumusunod ni Kristo kinsa mga matarong, nagsunod sa Manluluwas, ug nagtuman sa Iyang mga sugo mapanalanginan. Usa sa labing importante nga mga kasulatan alang niadtong mga matarong, bisan unsa pa man ang ilang sitwasyon sa kinabuhi, naapil sa pagpamulong ni Hari Benjamin ngadto sa iyang katawhan. Siya misaad nga kadtong matinud-anong nagtuman sa mga sugo mapanalanginan sa tanang butang niini nga kinabuhi ug “pagadawaton ngadto sa langit … [ug] mopuyo uban sa Dios diha sa usa ka kahimtang nga walay kataposan ang kalipay.”24
Kita nahibalo nga hapit tanan kanato nakasinati og pisikal ug espirituwal nga mga unos sa atong mga kinabuhi, ang uban makagun-ob. Ang mahigugmaon nga Amahan sa Langit ug ang Iyang Anak, si Jesukristo, kinsa nangulo sa Iyang gipahiuli nga Simbahan, nagsangkap kanato og mga kasulatan ug mga propeta aron sa pag-andam kanato, pagpasidaan kanato mahitungod sa mga peligro, ug sa paghatag kanato og giya sa pagpangandam ug pagpanalipod kanato. Ang pipila ka giya nagkinahanglan og dihadiha nga aksiyon, ug ang uban nagsangkap og proteksiyon alang sa daghang katuigan sa umaabot. Ang pasiuna sa Ginoo diha sa Doktrina ug mga Pakigsaad, seksiyon 1, nag-awhag kanato nga “maminaw sa mga pulong sa mga propeta.”25
Ang seksiyon 1 nagpasidaan usab nato, “Pangandam kamo, pangandam kamo alang niana nga moabot.”26 Ang Ginoo naghatag sa Iyang katawhan og usa ka higayon sa pagpangandam alang sa mga hagit nga ilang atubangon.
Ang Ginoo naghatag og gamhanan nga pagpadayag ngadto ni Presidente Brigham Young niadtong Enero 14, 1847, didto sa Winter Quarters.27 Kini nga pagpadayag usa ka talagsaong ehemplo sa Ginoo nga nag-andam sa katawhan alang niana nga moabot. Ang matinud-anong mga Santos misugod sa ilang panaw paingon sa sangtuwaryo nga bukid sa Salt Lake Valley. Malamposon nilang natukod ang Templo sa Nauvoo ug nadawat ang sagradong makaluwas nga mga ordinansa. Gipapahawa sila sa Missouri, ug ang mga nangdaugdaog kanila mipapahawa kanila sa Nauvoo sa usa ka delikado nga panahon sa tingtugnaw. Ang pagpadayag ngadto ni Brigham naghatag og praktikal nga tambag kon unsaon pagpangandam alang sa panaw. Ang Ginoo mihatag og espesyal nga gibug-aton bahin sa pag-atiman sa mga kabos, sa mga biyuda, sa walay mga amahan, ug sa mga pamilya niadtong nagserbisyo sa Mormon Battalion samtang ang kadaghanan sa mga Santos mipadayon ngadto sa ilang makuyaw nga panaw.
Agi og dugang sa paghatag og laing tambag sa pagpuyo nga matarong, ang Ginoo mihatag og gibug-aton sa duha ka baroganan nga magamit gihapon karon.
Una, Siya miawhag kanila nga “dayga ang Ginoo uban sa awit, uban sa sayaw, ug uban sa usa ka pagdayeg nga pag-ampo ug pagpasalamat.”28
Ikaduha, ang Ginoo mitambag nga kon sila “magmasulub-on, tawga ang Ginoo nga inyong Dios uban sa pangamuyo, nga ang inyong mga kalag unta magmalipayon.”29
Kining duha ka pag-awhag nindot nga tambag alang sa atong panahon karon. Ang mga kinabuhi nga puno sa pagdayeg, musika, ug pagpasalamat napanalanginan sa talagsaong paagi. Ang pagkamalipayon ug pagsalig diha sa langitnong tabang pinaagi sa pag-ampo usa ka gamhanang paagi aron mahimong malinawon nga mga sumusunod ni Kristo. Ang pagpaningkamot nga kanunay nga magmalipayon makatabang nga malikayan nga makaangkon og negatibong kinaiya.
Ang kataposang linya sa usa ka makahuloganong himno nagpadangat sa mahinungdanong tubag diha sa matahom nga pagpahayag: “[Walay kasub-anan sa yuta nga dili mahupay sa langit].”30
Isip usa ka Apostol ni Ginoong Jesukristo, ako mopamatuod nga ang malinawon nga mga sumusunod ni Kristo makakaplag og personal nga kalinaw niini nga kinabuhi ug usa ka mahimayaon nga langitnong paghiusa og balik. Ako mohatag og segurado nga pagsaksi sa kabalaan sa Manluluwas ug sa katinuod sa Iyang Pag-ula. Siya ang atong Manluluwas ug Manunubos. Sa ngalan ni Jesukristo, amen.