Mga Balita sa Simbahan

Apostoles ug mga Propeta Nangalagad sa mga Santos sa tibuok Kalibotan

Sa World Forgiveness Day niadtong Hulyo, si Presidente Russell M. Nelson mipakigbahin og mensahe sa pagpasaylo diha sa social media. “Ang pagpasaylo dili lamang usa ka higayon nga buhat apan usa ka nagpadayon nga proseso nga nagkinahanglan og pailob, kaluoy, ug pagsabot,” siya miingon. “Dili kanunay sayon ang pagpasaylo niadtong kinsa nakapasakit kaninyo. Makadawat kamo og kalig-on gikan ni Jesukristo.”

Si Presidente Dallin H. Oaks, Unang Magtatambag sa Unang Kapangulohan miawhag sa mga young adult sa tibuok kalibotan atol sa Mayo 21 nga debosyonal nga magbaton og mahangtorong panglantaw samtang sila magpakabuhi niining “makapaluya nga mga panahon.”

“Bisan unsay atong mga kalahian sa mga nilalang sa atong Langitnong Amahan, Siya nahigugma kanatong tanan, ug ang Iyang hingpit nga plano sa kalipay adunay dapit para sa tanan,” miingon si Presidente Oaks. “Atong mapakita ang atong gugma Kaniya pinaagi sa pagtuman sa Iyang mga sugo, lakip ang paghigugma sa Iyang mga anak.”

Si Presidente Henry B. Eyring, Ikaduhang Magtatambag sa Unang Kapangulohan, miawhag sa mga Santos sa Ulahing mga Adlaw sa pagtambong sa pagpahinungod sa Saratoga Springs Utah Temple niadtong Agosto 13 sa pagtubag inubanan sa hugot nga pagtuo ug kalagsik ngadto sa bag-ong balay sa Ginoo.

Ang mga miyembro sa Simbahan “gihatagan niini nga templo isip usa ka timailhan sa pagsalig sa Ginoo … ug sa Iyang kompiyansa nga [sila] motubag inubanan sa mas hugot nga pagtuo ug kalagsik,” miingon si Presidente Eyring. “Dinhi niini nga templo mas makakuha kamo kanunay sa mga gahom sa mga pakigsaad sa templo. Nasayod Siya sa inyong kasingkasing. Nasayod Siya sa inyong tinguha nga madasig ug mahimong mas matarong nga mga tawo—ingon nga ang kalibotan nag-anam ka mabingkilon ug ka daotan.”

Samtang ang mga miyembro maghisgot ug mopakigbahin sa mensahe sa Pagpahiuli, ang uban mobati sa kamatuoran sa ilang mga pulong, miingon si Presidente M. Russell Ballard, Akting nga Presidente sa Korum sa Napulog Duha ka Apostoles. “Ang labing talagsaong butang sa kasaysayan sa kalibotan nahitabo didto sa Sagradong Kakahoyan niadtong 1820,” miingon siya. “Ang kalangitan naabli.”

Namulong ngadto sa mga miyembro ug sa mga misyonaryo sa Toronto, Ontario, niadtong Abril, si Presidente Ballard nagpamatuod sa mapanagnaon nga tawag ni Joseph Smith. “Usa gayod kadto ka butang nga midulot sa iyang pagkatawo—gikan sa alimpulo sa iyang ulo ngadto sa mga lapalapa sa iyang mga tiil—sa dihang nakadungog siya sa atong Langitnong Amahan nga mitawag sa iyang ngalan, ‘Joseph, kini mao ang Akong Hinigugmang Anak. Paminaw Kaniya!’ [tan-awa sa Joseph Smith—Kasaysayan 1:17]. Kana mao ang atong mensahe,” gisultihan niya ang mga misyonaryo.

Niadtong Abril, si Elder Dieter F. Uchtdorf mibisita sa France, Egypt, ug Israel. Mitambong siya og mga panagtigom alang sa sakramento didto sa Egypt, namulong sa mga estudyante sa Brigham Young University Jerusalem Center, ug mibisita sa balaan nga mga dapit.

“Usa kini ka malipayon nga pagbati nga dili ikasulti nga ang Ginoo mihimo nako nga usa sa Iyang disipulo niining higayona,” siya miingon. “Siyempre, kitang tanan kinahanglan nga mahimong mga disipulo, ug kinahanglan nga tumanon nato ang mga pakigsaad nga atong gihimo.

“Apan ang maanaa dinhi ug mosaksi isip usa ka disipulo, sama sa gibuhat sa apostoles sa karaang mga panahon, butang nga nakapalagsik sa akong kasingkasing ug nakapabayaw nako ngadto sa kahimtang nga dili mahulagway. Ug uban sa dakong pagpaubos, ako mibati nga ang Ginoo misalig kanako nga mahimong saksi alang Kaniya ug sa Iyang ngalan. Pagkanindot nga maglakaw sa dapit diin nagpuyo ug naglakaw ang atong isigka Apostoles.”

Si Elder David A. Bednar mipahinungod sa gibag-o nga panimalay nila ni Joseph ug Emma Smith didto sa Kirtland, Ohio, niadtong Agosto 26. Si Elder Bednar misulti sa grupo nga mga 300 ka tawo, lakip sa mga halangdon sa komunidad ug mga lider sa relihiyon: “Kini nga balay labaw pa kay sa usa ka gambalay nga adunay maanindot nga kasaysayan. Kini nga balay sa tinuod panimalay nila ni Joseph ug Emma Smith—ang dapit diin sila nagpuyo sa labing dugay nga panahon sa wala pa ang kamatayon ni Joseph.”

Si Elder Quentin L. Cook namulong sa tinuig nga Komperensiya sa Brigham Young University niadtong Agosto. Siya nakamatikod nga ang mga eksperto sa pagkahingkod sa panghunahuna misugyot nga ang pagserbisyo og misyon naghatag og proseso sa pagkahingkod alang sa pagkat-on nga mao ang pagpangandam alang sa mas taas nga edukasyon.

Labaw sa duha sa ikatulo nga bahin sa mga estudyante sa BYU nakaserbisyo og mga misyon, miingon si Elder Cook. “Depende sa semester, sobra kana sa 21,000 ka mipauli na nga mga misyonaryo. Hunahunaa ang kalig-on nga gidala niining mga estudyante sa BYU sa tibuok kalibotan. Agig sangpotanan, hunahunaa kon sa unsa nga paagi nga ang ilang mga kasinatian sa misyon makapalig-on sa kahimtang sa pagkat-on niini nga kampus.”

Atol sa pagbisita ngadto sa New Zealand ug Australia niadtong Mayo, si Elder D. Todd Christofferson midapit sa mga Santos sa Ulahing mga Adlaw sa New Zealand sa pagpangandam alang sa pagpahinungod sa Auckland Temple inigka 2024 pinaagi sa pagkahimong mas balaan ug Kristohanon.

Siya midapit kanila sa pagpangutana sa ilang mga kaugalingon, “Unsay akong mabuhat nga makapahimo nako nga mas balaan nga tawo, usa ka mas maayo nga halad ug gasa sa akong kaugalingon aron ipresentar ngadto sa Ginoo niana nga adlaw sa pagpahinungod?”

Si Elder Neil L. Andersen mipamatuod ni Jesukristo atol sa usa ka buluhaton sa Septiyembre didto sa Asia. “Ang akong kasinatian isip usa ka Apostol sa Ginoo nakahatag nako og usa ka pagsaksi nga si Jesus mao ang Kristo ug nga Siya naggiya sa Iyang buhat dinhi sa yuta pinaagi sa Iyang propeta ug pinaagi sa Iyang Apostoles,” siya miingon. Si Elder Andersen didto sa Asia North Area sa Simbahan aron sa pagpangalagad sa mga Santos sa Ulahing mga Adlaw sa Korea, Mongolia, ug Japan.

Niadtong Abril 22, si Elder Ronald A. Rasband nakigkita sa deputy president sa South Africa, nga si Paul Mashatile, ikaduha ngadto sa presidente sa South Africa. Kini nagtimaan sa unang higayon nga ang usa ka lider sa Simbahan nakigkita sa usa ka opisyal sa gobyerno nga ingon niini ka taas og ranggo sa South Africa.

Ang mga lider namalandong sa pipila ka paagi nga ang Simbahan nakatabang sa paghupay sa pag-antos sa mga tawo ug mihatag sa mga tawo sa South Africa, sa kantidad nga R240 ka milyon (sobra sa US $13 ka milyon) nga bili sa tabang sukad sa 2018. Ang mga donasyon naglangkob sa tabang sa katalagman aron sa pagsuporta sa mga inisyatibo sa pagpanarbaho sa kabatan-onan, suporta sa mga programa sa pagpanguma, ug mga pagpakgang sa kapintas kabahin sa gender.

Si Elder Rasband miingon nga naglaom siya nga kini nga mga paningkamot nagpakita nga ang Simbahan “magdugay dinhi. Buhaton nato kini aron sa pagsunod sa duha ka dagkong dugo: sa paghigugma sa Dios ug sa paghigugma sa atong isigka tawo.”

Atol sa pagbisita niadtong Septiyembre ngadto sa Iceland, Scotland, ug England, si Elder Gary E. Stevenson mihatag og gibug-aton sa panginahanglan sa mga Santos sa Ulahing mga Adlaw nga mahimong “usa ka kasingkasing ug usa sa hunahuna” (Moises 7:18) inubanan sa “mga kinabuhi nga nakasentro ni Jesukristo,” mohimo kutob sa atong mahimo sa pagsunod Kaniya. Giubanan sa iyang asawa, nga si Lesa, si Elder Stevenson mibisita sa Reykjavik, Iceland, niadtong Septiyembre 7 sa wala pa mopaingon ngadto sa Edinburgh, Scotland, ug Northampton, England, niadtong Septiyembre 9–10.

Sa debosyonal sa Marriott Center atol sa Brigham Young University’s Education Week niadtong Agosto 22, si Elder Dale G. Renlund mihatag og tulukibon nga wali kon sa unsa nga paagi nga ang obserbasyon, rason ug hugot nga pagtuo magkatambayayong aron moabot ang pagpadayag. Kon sa tinagsa-tagsa lang, ang obserbasyon, rason, ug hugot nga pagtuo dili kasaligan, gitudlo ni Elder Renlund. Kining tulo kinahanglan nga magkatambayayong.

Ang “pagtuo ‘dili ubanag buhat walay kapuslanan’ [Santiago 2:20] dili makapakaylap sa kaugalingon. Ang hugot nga pagtuo motubo lamang pinaagi sa obserbasyon ug rason, inubanan sa ubang espirituwal nga buhat. Agi og dugang, ang obserbasyon, rason, ug hugot nga pagtuo sa kanunay kinahanglanon dili lamang aron makadawat og personal nga pagpadayag apan aron makasabot niana nga pagpadayag.”

Niadtong Hunyo 15, si Elder Gerrit W. Gong nakigkita sa His Eminence Sheik Osman Nuhu Sharubutu, ang National Chief Imam ug Grand Mufti sa Republika sa Ghana. Ang miting nahitabo sa pinuy-anan sa Grand Mufti sa Accra.

Si Elder Gong mipakigbahin kon sa unsa nga paagi nga Ang Simbahan ni Jesukristo sa mga Santos mitamod sa atong unang mga ginikanan, sila si Adan ug Eva, sama sa mga Muslim: “Kami, usab, nagtuo nga kita gikan sa samang mga ginikanan ug kinahanglan nga magpuyo nga magkauyon isip usa ka pamilya.” Si Elder Gong misulti nga kita gigiyahan sa usa ka propeta sa Dios, si Presidente Russell M. Nelson, kansang mga pagtulon-an susama sa Imam. “Ang among propeta nagtudlo namo nga ipatigbabaw ang Dios labaw sa tanan, siya nagtudlo nga kaming tanan kinahanglan mahimong mga tigpasiugda og kalinaw, siya nagtudlo nga kami kinahanglang motabang sa among kabatan-onan nga makakuha og edukasyon ug pagbansay aron sila magmalamposon sa kinabuhi, ug siya nagtudlo kanamo sa paghatag og gahom sa mga babaye ug sa among nagtubo nga henerasyon. Kining tanang butang akong nadungog gikan kanimo karon.”

Si Elder Ulisses Soares mibiyahe og 10 ka adlaw ngadto sa Chile, Uruguay, ug Argentina niadtong Hunyo. Ang iyang panahon sa Argentina naglakip sa usa ka pakigpulong sa komperensiya sa lain-laing relihiyon, usa ka interbiyo sa usa ka inila nga peryodista sa Argentina, ug sa pagpangalagad ngadto sa mga miyembro sa Simbahan.

“Ang kalinaw magsugod sa pagtahod alang sa ka talagsaon sa matag tawo,” si Elder Soares misulti niadtong nagpundok alang sa World Congress of Interreligious and Intercultural Dialogue didto sa Buenos Aires. “Ang konsepto sa kaligdong sa tawo mahimong managlahi gikan sa kultura ngadto sa laing kultura, apan kini nahimong makanunayon sa madalidalion ug mausabon nga kalibotan. Ang tawhanong mga katungod nagsulbad sa mga dili balanse nga pribilehiyo, bahandi, ug oportunidad. Ug kadto nga mga katungod kinahanglan nga gamiton sa tibuok kalibotan.”