Panahon sa Senior Missionary
Usa sa labing maayo nga paagi alang sa mga senior nga magtiayon sa paghimo og talagsaong mga handumanan mao ang pagmisyon.
Kon ang atong mga higala kinsa 60 o 70 anyos makalimot na sa mga butang, kita kanunay mokomedya nga sila malimtanon na tungod kay sila anaa na sa “panahon sa pagka-senior.” Apan ako gusto kong mohisgut og usa ka lahi nga matang sa panahon sa pagka-senior—usa ka panahon nga talagsaon nga ang handuman niini walay katapusan. Kini mao ang panahon nga ang senior missionary couple makaamgo nga ang ilang gibuhat maoy gusto sa Ginoo nga ilang buhaton. Sa maong halandumon nga panahon makaamgo sila nga:
-
Duna silay tibuok kinabuhi nga kasinatian nga ipakigbahin, ug mga talento, mga kahanas, ug pagsabut sa ebanghelyo nga ilang magamit sa pagpanalangin sa uban.
-
Ang ilang ehemplo panalangin ngadto sa ilang mga anak ug mga anak sa ilang mga anak.
-
Samtang sila moserbisyo sila naghimo og walay katapusang pakighigala.
-
Ang ilang kaminyoon nagkalig-on kada adlaw.
-
Ang pagserbisyo sa Iyang pangalan maanindot.
Mga Panahon nga Nagsingabut
Ang akong mga higala nga senior couple, ang mao nga panahon kinahanglang nagsingabut alang sa kadaghanan kaninyo. Ikonsiderar ang istorya nga gisaysay ni Elder Jeffrey R. Holland sa Korum sa Napulog Duha ka mga Apostoles mahitungod sa unsay nahimo sa senior couple nga nagserbisyo sa Chile. Ang ginikanan sa usa ka batan-ong elder namatay. Ang mission president layo kaayo nga siya dili makaadto sa misyonaryo diha-diha dayon.
“Apan dihay usa ka buotan [hingkod] nga missionary couple nga nagserbisyo sa area,” miingon si Elder Holland. “Miabut sila ug milingkod uban niana nga mga misyonaryo ug malumong miamuma ug mihupay kaniya hangtud nga ang mission president makahimo og personal nga pagkontak. Kami dunay talagsaong batan-ong mga misyonaryo sa among misyon, apan walay batan-ong mga misyonaryo ang makahimo alang niana nga elder unsay nahimo niana nga couple.”1
Ang ilang kahanas nianang higayona mao ang pagmaymay sa panahon sa panginahanglan. Wala sila mabalaka sa pagsulti og bisan unsa nga mga pinulongan gawas sa pinulongan sa Kristohanong gugma. Wala sila mabalaka nga dili makatambong sa adlawng natawhan sa apo o pagpanalangin sa usa ka bata, bisan unsa pa ka importante kadto nga kalihokan. Naghunahuna sila mahitungod kon asa sila mahimong gamiton sa Ginoo sa pagpanalangin sa kinabuhi sa usa sa Iyang mga anak. Ug tungod kay sila andam, Siya nakahimo nila nga mopresentar alang Kaniya.
Ang Pagserbisyo Panagsa ra Mahimong Sayon
Ang tinuod mao, walay senior missionary sayunan nga mobiya sa panimalay. Mao sad sila si Joseph Smith, Brigham Young, John Taylor, o Wilford Woodruff. Duna usab silay mga anak ug mga apo, ug nahigugma sila sa ilang mga pamilya sama nato. Apan sila usab nahigugma sa Ginoo ug gustong moserbisyo Kaniya. Moabut ang adlaw mahimong magkita kita niining mga maisugon kinsa mitabang sa pagtukod niini nga dispensasyon. Kon moabut na kini, malipay kita nga kita wala magduhaduha kanus-a kita angay nga moserbisyo.
Ang uban gusto nga moserbisyo samtang nagpuyo gihapon diha sa panimalay. Human sa usa ka pag-ataki si Aase Schumacher Nelson (walay relasyon) anaa na sa wheelchair, nahadlok siya nga ang iyang tibuok kinabuhi nga tinguha nga magmisyon uban sa iyang bana nga si Don dili matuman. Dayon usa ka silingan nakig-istorya kanila kabahin sa iyang mga Church-service mission sa bishop’s storehouse. Nadasig sila, nakig-istorya sila sa supervisor sa pasilidad, mikompleto sa ilang mga porma sa rekomendasyon ug gitawag sa pagserbisyo sulod sa duha ka adlaw usa ka semana sa storehouse duol sa ilang balay.
“Sayon ra nga mopahayahay ug mohunahuna nga, ‘O, wala na ako kinahanglana,’” miingon Aase Nelson. “Apan karon akong gibati nga ako ko gikinahanglan. Ug kana nahimo nakong pagpamatuod.”
Siguradong Gikinahanglan Pa Kamo
Kon kamo matintal sa paghunahuna nga kamo wala na kinahanglana, tuguti ko sa pagsiguro kaninyo nga kamo gikinahanglan. Walay mission president sa Simbahan kinsa dili ganahan nga makabaton og dugang nga mga couple nga magserbisyo sa iyang misyon. Ang mga senior makapalig-on sa batan-ong mga elder ug sister. Mohatag sila og suporta nga makatabang sa uban aron mas makaserbisyo og maayo sa ilang kaugalingong mga responsibilidad. Ug mahunahuna ba ninyo ko unsa kini ngadto sa usa ka lider nga namiyembro lang sulod sa pipila ka tuig nga dunay makatabang nga mga miyembro sa Simbahan nga daghan og kasinatian? Ang mga senior couple sa kasagaran mao ang usa ka literal nga tubag sa mga pag-ampo sa mga bishop ug branch president.
Kami nag-awhag sa mga mission president sa pagpangita sa mga couple nga makatabang sa mga panginahanglan sa ilang mga misyon. Ang mga bishop kinahanglang mangita sa mga couple nga makaserbisyo. Ang LDS.org naglista og mga pahina sa mga oportunidad alang sa mga senior couple. Apan labaw sa tanan, ang mga couple kinahanglang moluhod ug mangutana sa Langitnong Amahan kon ang panahon mao ba ang husto alang kanila nga moserbisyo og misyon. Sa tanan nga mga kwalipikasyon, ang tinguha sa pagserbisyo mao ang labing importante (tan-awa sa D&P 4:3).
Samtang modayeg ko sa trabaho sa mga senior missionary, ako nakaamgo nga dunay daghan nga gustong moserbisyo apan dili makahimo. Ang mga limitasyon tungod sa edad o dili maayong panglawas kinahanglang timbang-timbangon pag-ayo, sama sa importante nga mga panginahanglan sa mga sakop sa pamilya. Kon dunay dakong tinguha nga moserbisyo apan dunay mga limitasyon, ang uban mahimong maoy mohimo alang kaninyo, ug kamo makahatag sa gikinahanglan nga kwarta.
Ang mga senior couple, bisan kinsa kamo o asa man kamo, palihug pag-ampo mahitungod niini nga oportunidad sa paghimo og talagsaong mga panahon sa pagkamisyonaryo. Ang Langitnong Amahan motabang kaninyo kon unsay inyong mahimo.