Mga Kahigayunan sa Senior nga Misyonaryo: Gikinahanglan, Gipanalanginan, ug Gihigugma
Ang pagserbisyo isip usa ka magtiayon nga misyonaryo mahimong mas makapailin-ilin, dili mahal, ug mas malipayon kay sa imong mahunahunaan.
“Makaanhi ba kamo ug motabang?”
Mao kini ang pangutana nilang Gerald ug Lorna Malmrose sa Washington, USA, nga natubag na sa una. Misanung usab sila sa dihang ang ilang kanhi bishop, nga usa ka presidente sa misyon sa una, mihangyo kon makaserbisyo ba sila uban kaniya didto sa West Indies. Misanung na usab sila sa dihang ang ilang presidente sa stake mitawag kanila sa pagtuman sa usa ka pagsebisyo og misyon sa mga punoang buhatan sa Simbahan sa Salt Lake, Utah, USA, sa pagtrabaho sa mga computer ug mga kapanguhaan sa tawo.
Sa dihang ilang kanhi nga bishop ug presidente sa misyon, si Reid Robison, mitawag sa pag-usab, niining higayuna isip presidente sa missionary training center sa Accra, Ghana, siya nangutana kon ang mga Malmrose makatabang pa ba pag-usab.
“Nasayud kami nga makasalig kami sa Ginoo,” miingon si Elder Malmrose. “Busa mihukom kami nga mosalig pag-usab Kaniya.” Misanung sila, mikompleto sa ilang mga porma sa rekomendasyon, midawat sa ilang call, ug sa wala madugay miadto na sa Ghana.
Nagserbisyo isip usa ka Magtiayon
Ang mga kasinatian sa Malmrose nagpakita og pipila ka mga baruganan mahitungod sa mga senior nga mga magtiayon nga nagserbisyo og misyon nga mahimong dili masabtan sa kadaghanan:
-
Adunay mga duha ka matang sa misyon. (1) Ang Presidente sa Simbahan motawag sa senior nga magtiayon sa pagserbisyo sa ilang kaugalingong panimalay o layo sa panimalay. (2) Ang presidente sa stake motawag og Church-service nga mga magtiayon nga misyonaryo aron ibutang sa lokal o part time nga panginahanglan sa rehiyon, gikan sa 8 ngadto sa 32 ka oras matag semana. Sa kasagaran mopuyo sila ug moserbisyo sa lokal apan usahay mahimong moserbisyo layo sa panimalay.
-
Gi-awhag ang mga presidente sa misyon sa pagpangita og mga magtiayon nga makaabut sa mga panginahanglanon sa ilang misyon, ug ang mga magtiayon mahimong magpakita sa ilang mga gusto. “Wala kami mag-ingon nga ang mga magtiayon makahagpat ug magpili sa ilang mga misyonaryo nga buluhaton,” mipasabut si Elder Jeffrey R. Holland sa Korum sa napulog Duha ka mga Apostoles. “Ang usa ka tawag usa gihapon ka tawag. … [Apan] makig-istorya kami sa atong senior nga mga magtiayon mahitungod sa ilang mga gusto nga pagserbisyo, ug matag konsiderasyon ihatag aron sila makaserbisyo kon asa ug unsaon nila sa pagserbisyo.”1
-
Mga presidente sa misyon makigtambag sa magtiayon mahitungod kon unsaon nga magamit sa labing maayo ang ilang mga kahanas ug mga abilidad. “Aron makabaton sa labing makahuluganon nga kasinatian isip usa ka senior nga magtiayon,” si Presidente Robison miingon, “kinahanglan makabaton kamo sa oportunidad sa pagtrabaho sa duha ka mga dapit nga kamo malingaw ug kon diin kamo adunay lebel sa kahanas nga makapabati ninyo nga dunay butang nga gikatampo.”
Sama pananglit, si Presidente Robison nasayud nga si Elder Malmrose makasulti og French, makatabang tungod kay daghang Africano nga makasulti og French. “Napalantawan nako siya nga nalambigit sa pagbiyahe ug sa pagtrabaho sa visa,” miingon si Presidente Robison. “Apan sa among pag-abut dinhi, akong nabati nga wala ang iyang tinuod nga interes. Busa ako siyang gidapit sa paggamit sa iyang mga kahanas sa computer. Naluwas niya ang among taas kaayo nga mga oras.” Si Elder Malmrose nakatabang usab sa mga misyonaryo, ilabi na sa mga misyonaryo nga French ang pinulongan, pag-andam sa mga pangalan ug sa paghimo sa buhat sa templo alang sa ilang mga pamilya. Si Sister Malmrose, usa ka certified nga medical assistant, na-assigned sa pagkigtambayayong sa doktor sa misyon ug nurse.
Iyang Andamon ang Agianan
Sama sa mga Malmrose, nakita sa uban nga mga magtiayon nga kon sila mosalig sa Ginoo, Iyang andamon ang agianan. Mao kana ang nahitabo nilang Alvin ug Corazon Rieta sa Kawit, Cavite, sa Pilipinas.
“Duha ka tuig sa wala pa ang among desisyon sa pagserbisyo, gisugdan namo sa pagpahimutang ang lig-on nga mga plano alang sa among negosyo sa pamilya,” mipasabut si Elder Rieta. “Ang among anak nga lalaki ug anak nga babaye nakagradwar na sa kolehiyo ug makapuli na namo, apan naghunahuna kami kon kinsa ang magsulbad sa problema sa negosyo ug unsay mga reaksyon sa among mga kliyente sa among mga plano.”
Si Sister Rieta nabalaka usab mahitungod sa pagbiya sa iyang nagkatigulang nga inahan. “Nahadlok ko nga mawala na siya kon malayo kami,” siya miingon. “Nabati usab nako ang kakulangan sa hagit sa pagtudlo sa ebanghelyo.”
Nakigtambag sila sa ilang bishop ug uban sa magtiayon nga bag-uhay lang nga miserbisyo didto sa Davao. “Silang tanan nagpamatuod nga ang Ginoo mogiya matag magtiayon aron masayud kon unsaon sa pag-atubang sa ilang mga kalihokan sa panimalay, ilang pamilya, ug ang mga pundo alang sa ilang misyon,” miingon si Sister Rieta.
“Samtang nagtinguha kami sa giya,” miingon si Elder Rieta, “ang among mga kahadlok nasulbad—ang among negosyo maayo ra ang dagan bisan sa mga hagit, among kliyente mipahayag sa hingpit nga kalipay ug suporta, ug ang among pamilya mas nagkasuod naghiusa sa pag-atiman sa among masakiton nga inahan. Gisugdan namo sa pagsabut nga ang Ginoo tinuoray gayud nga mitabang kanamo.”
Ang mga Rieta nagserbisyo karon sa member ug leadership support sa Philippines Cagayan de Oro Mission.
Daghan Kaninyo Makahimo
Ang uban sa mga magtiayon naghunahuna mahitungod sa pisikal nga limitasyon, apan dili sila si Keith ug Jennilyn Mauerman sa Utah, USA. Mga tuig ang milabay, upat ka bulan human sila naminyo sa Los Angeles California Temple, si Keith gitawag ug gipadala ngadto sa pakig-away. Usa ka airbourne squad lider, naglakaw siya nga nag-una sa mga sundalo sa dihang usa ka land mine mibuto. Nawad-an siya sa duha ka mga bitiis. Sa dihang siya miabut sa balay, si Jennilyn nagdali-dali ngadto sa iyang kiliran.
“Nasayud ko nga dili na ko kinahanglan nga mabalaka,” miingon si Keith, “tungod kay kami adunay mahangturon nga kaminyoon. Ang akong asawa misuporta kanako sa tibuok panahon. Siya gihapon nagtabang kanako matag adlaw.”
Sa dihang miretiro na si Sister Mauerman, sila mihukom sa pagserbisyo og misyon. Apan ang pagkapungkol ni Elder Mauerman nga ang duha gyud ka bitiis makahimo ba og problema? “Kanunayng adunay mga butang nga dili nako mahimo,” siya miingon, “apan adunay daghan kaayong mga butang nga akong mahimo, nasayud kami nga dunay dapit alang kanamo.”
Samtang nagkompleto sa ilang mga porma sa rekomendasyon, siya misusi sa usa ka kahon nga nagpasabut nga siya nakaalagad sa militar. Sa wala madugay sila nakadawat og tawag gikan sa Church Military Relations. “Aduna koy ID kard nga motugot kanamo sa pagsulod sa mga base sa militar, busa sila mihangyo sa among pagtugot sa pagrekomendar namo alang sa usa ka military relations mission.”
Ang mga Mauerman gitawag sa pagserbisyo sa usa ka base sa militar sa North Carolina, USA. Si Elder Mauerman nahinumdom: “Ang timailhan nga naa sa ganghaan nag-ingon ‘Fort Bragg, Panimalay sa Airborne.’ Kon ang gwardya miabi-abi kanamo uban sa motto sa airborne ‘All the Way!’ kini mao ang unang higayon nga ako kining nadungog sa mga katuigan. Ang pamati niini sama nga anaa sa panimalay, bisan og wala na ako sa Fort Bragg. Nasayud ko nga ang among call sa misyon hingpit nga pagkahaum ug nga ang Ginoo mahunahunaon kanako.”
“Gitudloan kami sa mga leksyon mahitungod sa pagkahimong self-reliant ug pagbangon dayon ug mahitungod sa pagpalig-on sa kaminyoon,” miingon si Sister Mauerman. “Sa sinugdanan dili mi gusto nga mopakigbahin sa among istorya, apan among nakaplagan nga ang pagpakigbahin niini makahimo sa tanang kalainan. Ang mga sundalo ug ang ilang mga kapikas mitan-aw kanamo ug miingon, ‘Kon makahimo kamo niini, kami usab.’”
Ang mga Mauerman dunay positibo nga kasinatian sa North Carolina nga sila naghangyo sa pagserbisyo pag-usab. Karon sila mobyahe og mga 40 ka milya (64 km) gikan sa ilang panimalay sa Orem ngadto sa Siyudad sa Salt Lake kaduha sa usa ka semana sa pagserbisyo diha sa buhatan sa Church Military Relations. Sila usab motudlo sa senior nga mga magtiayon didto sa missionary training center sa Provo, diin ilang nakaplagan nga ang kada grupo naglakip sa usa ka tawo kinsa nakabuntog sa mga kalisdanan aron makaserbisyo.
Unibersal nga mga Pinulongan
Natawag ngadto sa Brazil Cuiabá Mission, sila si Randy ug Lou Ellen Romrell nga taga Utah nabalaka. Bisan tuod si Elder Romrell mialagad sa Brazil isip usa ka batan-ong misyonaryo, nahikalimtan na niya ang iyang Portuguese. Ug si Sister Romrell dili kamao mag-Portuguese. Ang pagtuon ug pagpaningkamot, bisan pa niana, nakatabang ni Elder Romrell ang iyang kahanas sa Portuguese sa pagbalik ug si Sister Romrell sa pagtubo. Mao usab ang usa ka ukulele.
“Wala gayud ko nagplano sa pagdala iniini,” miingon si Sister Romrell, “apan si Elder Romrell nadasig, ug kini mao ang kanindot nga makita kon kini natuman. Samtang nagtudlo kami sa mga investigator ug gitrabaho ang pagpaaktibo pag-usab ug pakigdait, makalingaw kining gamiton aron madasig ang mga tawo sa pagkanta. Nagkat-on kami sa pinulongan, ug ang mga himno makadala sa lig-on nga espiritu uban kanila.”
Bisan tuod ang iyang mga kahanas sa Portuguese gipalambo pa gihapon, larino na siya sa musika. “Ang musika makapapundok sa mga tawo,” siya miingon. “Bisan kon dili nako masabtan ang tanang butang nga ilang isulti atol sa pagbisita, kon kami manganta na, mokonektar namo.” Gidapit sa pagsulti sa mga eskwelahan mahitungod sa American holiday sa Thanksgiving, ang mga Romrell manganta sa himno sa pasalamat—giubanan sa ukulele. Ug si Sister Romrell naggamit usab sa usa ka instrumento sa labaw sa naandang kahibalo, sa piano, sa pag-duyog sa mga himno sa simbahan.
Ug sa Portuguese? “Bisan kon kamo dili lareno, ang pagkat-on og pipila ka mga pulong makatabang,” siya miingon. “Ang yano nga pagsulti og hello ug pagtimbaya sa mga tawo molungtad og dugay. Pahibaloa sila nga ikaw nagkat-on. Himoa kining yano ug salig sa Espiritu.” Ug ang Espiritu, siyempre, usa ka laing pinulongan nga ang tanan makahimo sa pagpakigbahin.
Pag-alagad diha sa Panimalay
Sila si Paul ug Mar Jean Lewis gikan sa Utah nakaserbisyo na og tulo ka mga misyon (sa Palmyra New York Temple; Hong Kong Temple sa China; ug Croatia, Serbia ug Slovenia nga may seminaries ug institutes). Nangadam sila sa pagserbisyo sa uban sa dihang ang ilang presidente sa stake nangutana, “andam ba kamo sa pagserbisyo dinhi sa atong stake, sa pag-abag sa misyon nga atong gipuy-an?”
“Bag-o kami dinhi, mao nga kini usa ka talagsaon nga oportunidad,” miingon si Sister Lewis. “Nagserbisyo kami uban sa batan-on nga mga elder ug mga sister, nakabaton og kasuod uban sa presidente sa misyon, moadto sa mga miting sa district ug zone, ug makigtrabaho sa mga ward mission lider.” Mobisita usab sila sa mga investigator ug niadtong kinsa dili kaayo aktibo.
“Nahimamat namo ang maanindot nga mga tawo nga dili gyud unta namo mailhan,” si Sister Lewis miingon, “lakip sa uban nga dili na aktibo. Ang makita nga sila mibalik, modawat sa mga ordinansa, ug moadto sa templo usa ka talagsaon nga panalangin.”
“Daghan sa mga magtiayon, kon sila maghunahuna mahitungod sa pagserbisyo og misyon, mabalaka mahitungod sa unsay ilang buhaton uban sa ilang panimalay ug sa ilang sakyanan o kon unsay ilang mabiyaan sa ilang pamilya,” miingon si Elder Lewis. “Makapuyo kami sa among kaugalingong balay ug magdrive sa kaugalingon namo nga awto. Giawhag kami sa pagtambong sa mga kalihokan sa pamilya, basta dili lang kini makabalda sa misyonaryo nga mga responsibilidad. Ug ania gani kami alang sa pagkatawo sa usa ka apo.”
Mga Panalangin sa Pamilya
Sa laing bahin, sila si Jill ug Kent Sorensen, kinsa gikan sa samang stake, misulti nga usa sa labing maayo nga pamaagi sa pagpalig-on sa ilang pamilya mao ang pagserbisyo nga layo sa panimalay. Miingon si Sister Sorensen, “Usa sa dakong pangatarungan nga ihatag sa magtiayon nga dili moadto mao ang mga apo, minyo nga mga anak nga anaa sa kalisud, mga anak nga babaye nga nagpaabut nga manganak, tigulang na ang mga ginikanan—daghan pang rason. Ang pamilya mao ang prayoridad, ug kamo mingawon nila kada adlaw. Apan ang pag-adto og misyon mopadala og gamhanang mensahe nga ang misyonaryo nga buhat importante usab.”
Gawas pa, pahinumdom si Elder Sorensen, “adunay daghan kaayong paagi nga makapangumusta karon nga inyong masusi sa tanang panahon.”
Ang mga misyonaryo nga panaw sa mga Sorensen gisugdan tulo na katuig ang milabay, sa dihang ilang bishop mihangyo kanila nga mopahigayon og binulan nga fireside alang sa mga magtiayon nga naghunahuna sa misyonaryo nga pagserbisyo. “Pagkahuman sa kanunayng pakig-istorya mahitungod niini,” miingon si Sister Sorensen, “kinahanglan kaming moadto usab!” Sila nakadawat og tawag sa pagserbisyo sa Cook islands, diin ang mga apohan ni Jill miserbisyo 50 ka tuig ang milabay.
Karon, taliwala sa ubang mga katungdanan, sila gihangyo sa pagtudlo sa mga klase sa Biblia sa mga eskwelahan.
“Kami naghisgot mahitungod kang Kristo nga mao ang bato,” miingon si Elder Sorensen. “Mihatag kami sa mga estudyante og usa ka gamay nga bato ug miawhag kanila sa pagpabilin nga lig-on sa pagtuo diha kang Kristo. Karon bisan asa kami moadto, ang mga tawo moingon, ‘Lig-on kaayo!’ kon sila makakita kanamo.”
Makaanhi ug Motabang
Kon kamo namalandong sa usa ka full-time nga misyon o sa usa ka Church-service mission, kining tanang mga magtiayon mangutana ninyo sa samang pangutana nga gipangutana ni Presidente Robison kang Gerald ug Lorna Malmrose: “Makaanhi ba kamo ug motabang?” Ug sila mosulti kaninyo nga, bisan unsaon pa ninyo pag-apil, kini nga saad tinuod: Kamo gikinahanglan, kamo makatampo, ug kamo mapanalanginan ug gihigugma.