Mga Magbalantay sa Tore
Mga Magbalantay
Ang mga magbalantay mao ang mga gwardya nga gibutang sa usa ka parel o diha sa tore aron sa pag-aninaw ug mopasidaan sa mga kakuyaw nga nagpadulong gikan sa halayo. Gisuholan sila aron sa pagpanalipud sa mga siyudad ingon man sa mga ubasan, umahan, o mga tugwayanan.
Mga Matang sa Tore
Ang mga tore sa mga paril sa siyudad kasagaran gitukod diha sa ganghaan o diha sa suok (tan-awa sa 2 Cronicas 26:9). Ang ganghaan ug suok sa mga tore naghatag og taas nga posisyon diin magtan-aw sa nagsingabut nga kakuyaw ug mao ray makasagang sa mga pag-atake sa kaaway (tan-awa sa 2 Cronicas 26:15).
Kuta o tore nga mga citadel sa kasagaran mga nagbarug nga estraktura nga gitukod diha sa taas nga dapit o ubang maayo kaayo nga mga dapit. Usahay igo-igo ang kadagko-on niini nga mahimong kadangpan alang sa tibuok populasyon sa siyudad kon maubos kini sa pag-ataki (tan-awa sa Maghuhukom 9:46–52).
Ang mga tore sa ubasan, mga umahan, o mga tugwayanan mga gagmay nga mga estraktura nga gitukod aron pagtabang sa pagpanalipod sa mga pananom ug mga kahayopan gikan sa mga kawatan ug mga hayop (tan-awa sa 2 Cronicas 26:10; Isaias 5:2; 27:3). Kasagaran, ang level sa ubos mao ang usa ka lawak diin ang mga himan gitipigan.
Mga Magbalantay sa Tore:
Adunay usa ka taas nga talan-awon. Isip gitawag sa Dios ug gitugutan nga mga sulugoon, ang mga propeta nahimulag gikan sa kalibutan, maduol ngadto Kaniya, ug gitugutan nga makakita sa mga butang gikan sa usa ka mas langitnong panglantaw.
Makita ang mga butang nga dili makita sa uban. “Ang usa ka manalagna masayud sa mga butang diin nangagi na, ug usab sa mga butang diin umaabut, ug pinaagi kanila ang tanan nga mga butang ipadayag, o, kaha, ang tinago nga mga butang mahimo nga makita, ug ang gitagoan nga mga butang mahimo nga magpakita, ug ang mga butang diin wala mahibaloi ipahibalo pinaagi kanila, ug usab ang mga butang mahimo nga ipadayag pinaagi kanila nga sa lain nga bahin dili gayud mahibaloan” (Mosiah 8:17).
Ang mabinantayon. Ang mga propeta adunay ligdong nga kapangakohan sa pagpasidaan kanato sa umaabut nga mga kakuyaw, ug sila mopadayon sa pagbuhat sa ingon dili igsapayan ang mga opinyon sa publiko o uso sa katilingban.
Nagpasidaan sa mga butang samtang kini anaa pa sa layo. “Usa ka propeta misaway sa sala ug nanagna sa mga sangputanan niini. Siya mao ang tingsangyaw sa pagkamatarung. Usahay, ang mga propeta mahimong dinasig nga managna sa umaabut alang sa kaayohan sa katawhan” (Giya ngadto sa mga Kasulatan, “Prophet,” lds.org/scriptures/gs).
Magtanyag og kaluwasan ug proteksyon. Pinaagi sa pagpatalinghug sa pasidaan sa mga propeta, kita makakaplag og kaluwasan ug paglikay sa mga kalamidad nga mahimong mahitabo kanato, sa tinagsa o sa tiningub nga paagi, kon kita dili mosunod.