Mapasaligon sa Paghunong
Ang tagsulat nagpuyo sa New York, USA.
Ang akong mga kahanas sa piano wala molambo, bisan human sa katuigan sa pagpraktis. Ang akong mga ginikanan miingon nga ako mahimong mohunong sa usa ka kondisyon: Kinahanglan kong makakat-on og 50 ka mga himno.
Mipauli ko sa balay, nga naghilak human sa makapahigawad nga leksyon sa piano. Ikaupat na kadto nako ka tuig sa pag-eskwela og piano, ug naglisud ko sa pagkat-on sa “Twinkle, Twinkle, Little Star.” Naningkamot ang akong magtutudlo sa pagpangita og positibo nga butang nga ikasulti mahitungod sa akong dili maayo nga pagpatukar, apan migrabe pa hinoon ang akong gibati. Ang akong mga ginikanan nagbayad sa mga leksyon sa piano nga dili nako gusto ug wala nay paglaum.
Gusto ko nga paundangon ko sa akong mga ginikanan. “Palihug,” mihangyo ko. “Buhaton nako ang bisan unsa. Unsa ang gikinahanglan?”
Human nila kini mahisguti, sila miingon, “Kon makat-on ka na og 50 ka mga himno, pahunungon ka na namo.”
Misugod ako sa pagpraktis diha-diha dayon. Gusto ko nga mohunong na mao nga ako andam nga mogahin og dugang nga panahon sa piano. Ang unang himno, “We Thank Thee, O God, for a Prophet” (Himno, nu. 19), miabut og usa ka bulan sa pagmaster. Gusto gyud kaayo kong mohunong, mao nga nagpadayon ko sa pagpraktis.
Usa ka talagsaong butang nahitabo: mas misayon ang pagmaster sa mga himno. Gibati nako nga mas malipayon sa tibuok semana. Akong nabantayan ang akong kaugalingon nga nag-hum sa mga himno nianang adlawa ug mokanta og mas kusog sa miting sa sakrament.
Sa katapusan, mihunong ko sa pagsubay pila na ka buok himno ang akong nakat-unan. Samtang ako mas mihanas sa piano, nakamatikod ko nga makakat-on ko og bag-ong himno nga dili abtan og 30 ka minutos.
Sa dihang akong gisuma ang tanan, nahibaloan nako nga misobra na ko og 50 ka mga himno. Ug wala nay kahigayunan nga ako mohunong sa pagpatukar og piano. Nahimo na akong masaligon sa akong abilidad sa pagpatukar ug mibati sa gahum sa mga himno sa akong kinabuhi.
Ang mga himno sama sa mga kasulatan; sila mamulong sa kamatuoran. Kon ako magpatukar og mga himno, gibati nako nga akong giunlod ang akong kaugalingon diha sa mga kasulatan. Ang pagkat-on unsaon sa pagpatukar sa mga himno maoy saktong sinugdanan sa pagpalig-on sa akong pagpamatuod ug pagkat-on sa kamatuoran. Akong nakita ang akong kaugalingon nga anaa sa mga pulong sa lain-laing mga himno aron sa pagtabang kanako sa akong tibuok adlaw. Ang pagpatukar sa piano nakapalig-on sa akong pagpamatuod ug nakabukas sa mga pultahan alang kanako bisan asa ko moadto.