Atong Luna

Pagsunod sa Balaod sa Ikapulo

Sabrina T., São Paulo, Brazil

Sa gamay pa ako, ang akong pamilya ug ako miagig daghang pinansyal nga mga pagsulay nga milungtad hangtud mga 10 anyos na ko. Ang akong papa dili makita og laing trabaho, maong namaligya lang siya sa dalan ug gamay ra kaayo ang kinitaan. Ang akong inahan naa ra sa balay nag-atiman nako ug sa akong manghud nga lalaki.

Apan bisan nakaagi og daghang kalisdanan, kami adunay pagpamatuod sa pagbayad sa ikapulo ug paghatag og ubang mga halad. Matinud-anon kaming mibayad sa among ikapulo kada bulan ug wala gayud magkulang og bisan unsa nga butang. Nasayud kami uban sa kasiguroan nga kami kanunay gipanalanginan tungod sa walay kinutuban nga kalooy sa Ginoo ug tungod kay Siya motuman sa Iyang mga saad kon kita masulundon sa Iyang mga sugo.

Ang mga adlaw sa among pinansyal nga pagsulay sa katapusan natapos. Ang mga panalangin nga gihatag sa Ginoo kanamo niining katapusang pipila ka tuig talagsaon.

Nasayud ako nga alang niadtong kinsa matinud-anong nagbayad sa ikapulo ug mobayad sa ilang mga halad pinaagi sa gugma uban sa tumong sa pagpanalangin sa kinabuhi sa uban, dili makulangan ug gani mas maayo pa ang mahitabo, sama nako ug sa akong pamilya. Ang mga panalangin modaghan. Nasayud ako niini. Nagsunod ako niini.

Matinuoron sa Tanang mga Butang

Alivsi H., Jalisco, Mexico

Sa sinugdanan sa matag semester sa eskwelahan, makaangkon mi og libring mga produkto nga dunay notebook, usa ka agenda, ug sampol nga produkto. Usa ka tuig ako naglinya aron makuha nako ang alang nako ug nakaamgo nga ang sampol nga nakuha nako magamit kaayo nako.

Sa pagtapos sa adlaw, nakita nako nga sila nanghatag og duha ka sampol sa samang produkto. Sayon ra nga molinya pag-usab ug mokuha sa ikaduha, ug ako mihukom sa pagbuhat niini. Hinoon, libre man kini, ug gikinahanglan nako kana nga produkto.

Dali akong miadto sa kasilyas, diin nakakita ko og cell phone nga aksidenteng nabiyaan sa babaye. Usa kadto sa labing bag-o nga model, ug bag-o lang sad nga nawala ang akong telepono sa miaging semana. Apan wala ko maghunahuna nga hipuson kini. “Pagpangawat kana,” miingon ko sa akong kaugalingon.

Dayon, sa akong pagpadulong sa pagkuha sa akong ikaduhang butang, nakaamgo ko nga pareha ra nga dili matinuoron sama sa paghipos sa telepono tungod kay kinahanglan kong mamakak ug moingon nga wala pa man ko kakuha sa una.

Mapasalamaton ko niining gamay nga kasinatian nga mitudlo nako og dako nga leksyon. Giuli nako ang telepono ug mipauli nga usa ra ang notebook, usa ka agenda, ug usa ka sampol sa produkto, apan uban sa nindot nga pagbati nga matinuoron sa tanan nga mga butang, bisan unsa pa ka gamay.