Elder Ronald A. Rasband: Dunay Talento nga Lider, Mapahinunguron nga Amahan
Ni Elder M. Russell Ballard
Sa Korum sa Napulog Duha ka mga Apostoles
Mga litrato sa maayong kabubut-on sa pamilyang Rasband, gawas kon gipahibalo
Si Ron Rasband wala gayud magduha-duha nga moserbisyo siya og full-time nga misyon. Ang bugtong pangutana sa 19 anyos samtang nag-abli sa iyang mission call mao ang asa siya moserbisyo.
“Ang akong amahan nagmisyon didto sa Germany. Ang akong magulang nga lalaki nagmisyon didto sa Germany. Ang akong umaabut nga bayaw nga lalaki nagmisyon didto sa Germany,” siya nahinumdom. “Nagtuo ko nga moadto ko sa Germany.”
Apan ang Ginoo adunay laing mga plano. Si Ron gitawag, hinoon, ngadto sa Eastern States Mission, nga ang ulohang buhatan didto sa Siyudad sa New York, USA. Nasagmuyo, gidala niya ang iyang mision call ngadto sa iyang kwarto, miluhod sa kilid sa iyang higdaanan, nag-ampo, mipakli bisan asa sa iyang mga kasulatan, ug misugod sa pagbasa:
“Tan-awa, ug sud-onga, Ako adunay daghan nga mga katawhan niini nga dapit, sa naglibut nga mga rehiyon; ug ang usa ka masangputon nga pultahan pagabuksan diha sa naglibut nga mga rehiyon niining silangan nga bahin sa yuta.
“Busa, Ako, ang Ginoo, mitugot kaninyo sa pag-anhi niini nga dapit; kay sa ingon kini gikinahanglan ngari kanako alang sa kaluwasan sa mga kalag” (D&P 100:3–4; emphasis gidugang).
Diha-diha dayon, ang Espiritu Santo mipamatuod ni Ron nga ang iyang tawag ngadto sa Eastern States Mission wala masayop.
“Mibiya ko gikan sa pagkasagmuyo ngadto sa pagbaton sa una sa akong daghang mga impresyon sa kasulatan nga kini ang dapit diin ang Ginoo gusto nga ako moadto,” siya nahinumdom. “Usa kadto ka makapausab sa kinabuhi nga espirituhanong kasinatian alang kanako.”
Ang iyang misyon sa Eastern States mao ang una sa daghang mga calling sa Simbahan nga modala kaniya sa mga dapit nga wala niya damha nga iyang maadtoan. Ug sa matag calling—isip usa ka magtutudlo, bishop, high councilor, presidente sa misyon, sakop sa Seventy, Senior President sa Seventy, ug Apostol ni Ginoong Jesukristo—gidawat ni Elder Ronald A. Rasband ang kabubut-on sa Ginoo ug mipadayon sa pagsalig sa Iyang Espiritu samtang siya nagserbisyo sa mga anak sa Dios.
Natawo sa Matarung nga Ginikanan
Sa iyang unang pakigpulong isip usa ka Apostol ni Jesukristo, gipahayag ni Elder Rasband ang kinasingkasing nga pasalamat alang sa iyang mga katigulangan. “Natawo ko sa matarung nga mga ginikanan diha sa ebanghelyo,” miingon siya, “ug sila usab natawo sa matarung nga mga ginikanan balik sa unom ka henerasyon.”1
Ang iyang inahan, si Verda Anderson Rasband, usa ka mahigugmaon nga lider kinsa miugmad sa batan-ong Ron og gugma sa mga kasulatan. Ang iyang amahan, si Rulon Hawkins Rasband, usa ka matinud-anong naghupot sa priesthood kinsa mipakita og ehemplo sa mga hiyas sa kakugi.
Natawo niadtong Pebrero 6, 1951, sa Siyudad sa Salt Lake, Utah, USA, si Ronald A. (Anderson) Rasband mao ang bugtong nga anak sa panaghiusa sa iyang mga ginikanan. Ang duha puro naminyo ug nadiborsyo, ug si Ron nagtubo ubos sa dugang nga pag-atiman sa duha ka magulang nga mga lalaki ug usa ka magulang nga babaye.
“Kombinasyon siya sa among mga ginikanan, mao nga kaming tanan nahigugma kaniya,” miingon ang iyang igsoong babaye, si Nancy Schindler. “Wala gayud tuguti ni Ron nga magbarug nga magtapad sila si Mama ug Papa o maglingkod nga magtapad nga wala siya sa ilang tunga.”
Sa kinatibuk-an si Ron usa ka buotan nga bata, apan giangkon niya nga siya may pagka-sipat.
“Sobra pa sa pipila ka higayon, ang akong mga magtutudlo sa [Primary] miadto sa akong inahan, ang stake Primary president, ug miingon, ‘Kana si Ronnie Rasband lisud dad-on nga pagkabata,’” miingon siya. “Apan wala gayud sila mawad-i og paglaum kanako. Mipakita sila kanako og dakong gugma ug kanunayng midapit kanako balik ngadto sa klase.”2
Ang pagkabata ni Ron nakasentro diha sa Simbahan—mga miting sa ward, mga party sa ward, mga panihapon sa ward, ug mga sports team sa ward. Kon dili siya busy sa meetinghouse sa Cottonwood First Ward, nagtrabaho siya og lain-laing mga trabaho, nagbuhat og mga kalihokan sa Scouting, ug nakig-uban sa mga higala. Sa panimalay, ang panahon sa pamilya nakasentro diha sa mga kasulatan, mga dula, ug sa mga buluhaton.
“Ang akong amahan mitudlo kanako kon unsa ang trabaho pinaagi sa iyang ehemplo,” miingon siya. “Ang akong mama mitudlo kanako kon unsa ang trabaho pinaagi sa pagpabuhat nako niini.”
Ang amahan ni Ron nagdrayb og delivery truck sa pan, mobangon og alas 4:00 sa buntag ug dugay nga mauli sa balay matag gabii. Ang iyang inahan nagpabilin sa balay aron sa pag-atiman sa mga bata, nagdugang sa kinitaan sa pamilya pinaagi sa paghimo ug pagpamaligya og mga porcelain lace doll.
Ang dala na sa pagkatawo nga abilidad ni Ron sa pagpangulo, pagdelegar, ug paghuman og buhat sa mga butang—nga nakatabang gayud kaniya sa iyang propesyonal ug eklesyastikal nga mga responsibilidad—napamatud-an nang daan nga mapuslanon.
“Si Ron gi-assign nga mag-mower sa nataran,” nahinumdom ang iyang igsoong babaye. Apan si Ron, sama kang Tom Sawyer nga gisulat ni Mark Twain, adunay pamaagi sa pagkumbinsir sa iyang mga higala sa pagtabang kaniya.
“Motan-aw ko sa gawas, ug anaa didto ang iyang labing suod nga higala nga nag-mower sa nataran alang kaniya,” miingon si Nancy. “Pagkasunod semana lain na usab sa iyang mga higala ang nag-mower. Maglingkod lang siya sa atubangan nga beranda ug makigkinataw-anay ug makigkomedyahay uban kanila samtang nagbuhat sila sa iyang trabaho.”
Ang mga ginikanan ni Ron naglisud sa pinansyal, apan ang pamilya adunay ebanghelyo. “Wala gayud mi daghang kwarta,” nahinumdom si Ron, “apan wala gayud kini nakaapekto sa akong kalipay.”
Kasaligan nga mga Higala ug mga Lider
Sa pagdako, napanalanginan si Ron og maayo nga mga higala ug kasaligan nga mga lider sa priesthood, lakip sa iyang presidente sa stake sulod sa 14 ka tuig sa iyang pagkabatan-on—si James E. Faust (1920–2007), kinsa sa wala madugay nagserbisyo sa Korum sa Napulog Duha ka mga Apostoles ug sa Unang Kapangulohan. Ang pamilya ni Ron adunay suod nga relasyon ni Presidente Faust ug sa iyang pamilya. “Kanunay siyang motawag nako nga usa sa iyang mga bata-bata sa Cottonwood tungod kay mitabang siya sa pagpadako nako,” siya miingon.
Walay panahon si Ron alang sa mga sport sa eskwelahan sa dihang miabut siya sa high school tungod kay kanunay siya nga adunay trabaho, apan mogahin gayud siya og panahon alang sa maunungon nga mga panaghigalaay nga milungtad sa tibuok kinabuhi.
“Kanunay kong nakadayeg ni Ron kon kinsa siya, apan dili siya perpekto,” miingon ang higala sukad sa pagkabata nga si Kraig McCleary. Uban sa pahiyum, siya midugang, “Ako siyang giingnan nga kon malangit siya, maadto usab ako didto tungod kay gibuhat namo ang samang mga butang samtang nagdako.”
Nagsugod si Ron sa iyang misyon sa sayong bahin sa 1970, apan si Kraig naghunahuna nga ilangan lang una ang misyonaryo nga pagserbisyo hangtud inig human sa panahon sa pagpangayam niana nga tinglarag. Mao kanang higayuna kon kanus-a si Ron mitawag kaniya gikan sa iyang misyon.
“Wala ko masayud kon sa unsang paagi siya nakakuha og pagtugot nga makapanawag, apan iya kong gibadlong tungod sa kakulang sa kadasig nga mobiya alang sa akong misyon,” miingon si Brother McCleary. “Siyempre, wala nako gilangay-langay.”
Gitawag ni Ron ang iyang misyon nga usa ka “talagsaon” nga kasinatian. “Gipanalanginan ko sa Ginoo og daghang milagruso, makapalambo sa pagtuo nga mga kasinatian,” miingon siya. “Ang akong misyon adunay dakong impluwensya sa akong espiritwal nga kinabuhi.”
Gigahin ni Ron ang bahin sa iyang misyon didto sa mga isla sa Bermuda. Ang iyang presidente sa misyon, si Harold Nephi Wilkinson, mipadala lamang sa “labihan gayud ka masulundon nga mga misyonaryo” didto tungod kay panagsa ra siya makabisita kanila.
“Kami ra gayud didto, apan ang presidente dili na kinahanglan nga mabalaka kabahin namo,” nahinumdom si Ron. “Nabuhat namo ang angayang buhaton.”
Ang “Ideyal nga Babaye” sa Delta Phi
Human sa iyang misyon niadtong 1972, nakakita si Ron og trabaho, nag-enrol sa University of Utah niana nga tinglarag, ug mipasakop sa Delta Phi Kappa, usa ka club sa kolehiyo alang sa mga returned missionary. Sa sosyal nga mga kalihokan sa club sa kolehiyo, dali gayud niyang nabantayan ang usa ka madanihon nga batan-ong babaye nga ginganlan og Melanie Twitchell. Si Melanie usa sa napili nga “ideyal nga mga babaye” sa Delta Phi, kinsa mitabang sa mga kalihokan sa pagserbisyo sa club sa kolehiyo .
Sama ni Ron, naggikan si Melanie sa usa ka aktibo nga pamilya nga Santos sa Ulahing mga Adlaw. Ang iyang amahan, nga usa ka opisyal sa militar, ug ang iyang inahan wala gayud mitugot nga ang kanunay nga pagbalhin-balhin sa pamilya mahimong hinungdan nga dili sila makasimba.
Nakadayeg si Melanie sa kamabination, kamatinahuron, ug kahibalo sa ebanghelyo ni Ron. “Nakaingon ko sa akong kaugalingon, ‘Ingon niana siya ka talagsaon nga tawo nga dili igsapayan kon dili nako siya ika-date. Gusto lang nako nga mahimo niyang labing suod nga higala.’”
Samtang naglambo ang ilang relasyon, ang Espiritu mipamatuod sa iyang mga impresyon kang Ron ug sa iyang pasalig [commitment] ngadto sa Ginoo. Sa wala madugay ang ilang panaghigalaay milambo ngadto sa unsay gitawag ni Melanie nga usa ka “ideyal nga romantiko nga relasyon, sama sa istorya diha sa libro.”
Miingon si Elder Rasband nga usa siya ka perpekto nga kauban alang niya. “Parehas mi ni Melanie diha sa debosyon sa ebanghelyo ug panulundon [heritage]. Nahimo kaming labing suod nga higala, ug mao kana ang higayon nga gihangyo nako siya nga makigminyo kanako.”
Naminyo sila niadtong Septyembre 4, 1973, didto sa Templo sa Salt Lake. Sukad niadto, miingon siya, ang iyang “mahangturong kapikas nga wala maghunahuna sa iyang kaugalingon … mitabang nga mahimo ko nga mas maayong disipulo ni Jesukristo. Ang iyang gugma ug suporta, ug sa 5 namo ka anak, sa ilang mga kapikas, ug sa among 24 ka apo, nakapalig-on kanako.”3
“Adto Na Ta”
Samtang nagserbisyo isip presidente sa elders quorum sa iyang ward sa minyo nga mga estudyante, nakaila ni Ron si Jon Huntsman Sr., ang high council adviser sa ward. Nakadayeg dayon si Jon sa paagi sa pagpangulo ni Ron sa korum.
“Aduna siyay talagsaon kaayong mga kahanas sa pagpangulo ug sa pag-organisar,” nahinumdom si Elder Huntsman, kinsa nagserbisyo isip Area Seventy gikan niadtong 1996 hangtud sa 2011. “Nakahunahuna ko nga dili sagad nga ang usa ka batan-ong lalaki kinsa anaa pa sa kolehiyo nga makapangulo og usa ka korum sa ingon nga paagi.”
Sulod sa pipila ka bulan, gibantayan ni Jon ang paghimo ni Ron sa mga ideya ngadto sa buhat samtang gihuman niya ang mga katungdanan sa priesthood. Sa dihang giablihan ang usa ka senior marketing nga posisyon sa kompanya ni Jon—nga nahimong Huntsman Chemical Corporation—nakahukom siya nga si Ron adunay mga kahanas nga iyang nagustohan ug mitanyag kaniya sa trabaho. Ang posisyon misugod pagkasunod semana didto sa Ohio, USA.
“Giingnan nako si Melanie, ‘Dili ko moundang og eskwela ug mobalhin,’” nahinumdom si Ron. “Naningkamot ko sa tibuok nakong kinabuhi aron makagradwar sa kolehiyo, ug sa katapusan duol na ko sa akong tumong.”
Gipahinumduman ni Melanie si Ron nga ang pagpangita og usa ka maayo nga trabaho mao ang rason nganong nag-eskwela siya.
“Unsa may imong gikabalak-an?” nangutana siya. “Nahibalo ko kon unsaon sa pag-impake ug pagbalhin. Nahimo na nako kini sa tibuok nakong kinabuhi. Tugutan ko ikaw sa pagtawag sa imong inahan kada gabii. Adto na ta.”
Ang pagsalig ni Jon kang Ron wala masayop. Ubos sa pagtudlo ni Jon, paspas ang pagsaka ni Ron sa naglambo nga kompanya, nga nahimong presidente ug chief operating officer niini niadtong 1986. Nagsige siya og biyahe alang sa kompanya—sulod sa Estados Unidos ug sa laing nasud. Bisan pa sa iyang busy nga iskedyul, naningkamot si Ron nga makauli matag tapus sa semana. Ug kon mobiyahe siya, ikuyog niya panagsa ang mga sakop sa pamilya.
“Kon mauli na siya sa panimalay, ipabati gyud niya sa mga bata nga sila espesyal ug gihigugma,” miingon si Melanie. Motambong siya sa ilang mga kalihokan ug mga sports event kutob sa mahimo. Si Jenessa MacPherson, usa sa upat ka mga anak nga babaye sa managtiayon, miingon nga ang eklesyastikal nga mga katungdanan sa iyang amahan ma-Dominggo kanunayng nakapugong kaniya sa paglingkod uban sa pamilya atol sa mga miting sa Simbahan.
“Mag-ilog mi kon si kinsa ang molingkod sa iyang tapad diha sa simbahan tungod kay panagsa ra gayud kaayo nga anaa siya didto,” siya miingon. “Akong mahinumduman nga kuptan nako ang iyang kamot ug maghunahuna sa akong kaugalingon, ‘Kon ako lang makat-unan nga maparehas niya, maanaa ko sa saktong dalan ug mas mahisama sa Manluluwas.’ Siya sa kanunay mao ang akong bayani.”
Ang anak nga lalaki sa managtiayon, si Christian, nahinumdom sa nindot nga handumanan sa “panahon sa amahan ug anak.” Ang pakighigalaay sa uban temporaryo lang tungod sa kanunayng pagbalhin sa pamilya, siya miingon, “apan ang akong amahan mao kanunay ang akong labing suod nga higala”—bisan kon dili siya palupig.
Kon mag-basketball man uban kang Christian, magdula og board game uban sa iyang anak nga mga babaye, o mangisda uban sa pamilya ug mga higala, ganahan si Ron nga modaug.
“Samtang nagtubo mi, dili gayud siya motugot ni bisan kinsa nga modaug,” miingon si Christian. “Kinahanglan namo kining haguan, apan nakapahimo kini namo nga mas maayo. Ug ang tradisyon nagpadayon uban sa iyang mahigugmaong mga apo.”
Sulod sa katuigan, daling nabantayan sa pamilya ni Ron kon sa unsang paagi nga ang pagpangalagad diha sa pagpangulo sa Simbahan nakapalambo sa iyang abilidad sa pagpakita og gugma ug kalooy, sa pagpahayag sa mga pagbati sa Espiritu, ug sa pagdasig sa uban sa pagbuhat sa ilang pinakamaayo. Human sa pagkatawo sa apo nila ni Ron ug Melanie nga si Paxton, ang pamilya misalig og maayo sa espirituhanong kalig-on ug suporta ni Ron.
Si Paxton, nga natawo nga dunay talagsaon nga genetic disorder, nag-antus sa pipila ka problema sa panglawas nga misulay sa pamilya sa pisikal, emosyonal, ug sa espirituhanong paagi. Si Elder Rasband mitawag sa panaw nga misunod sa pagkatawo ni Paxton nga “malisud nga pagsulay alang sa pagkat-on sa espesyal nga mga leksyon nga nahigot ngadto sa kahangturan.”4
Atol sa tulo ka tuig ni Paxton dinhi sa yuta—sa dihang adunay daghang pangutana ug gamay ra ang mga tubag—nagbarug si Elder Rasband isip tinubdan sa espirituhanong kalig-on, nangulo sa iyang pamilya sa pagdangup ngadto sa gahum sa Pag-ula ni Jesukristo.
Uban sa pagpahibalo sa iyang bag-o nga calling, ang pipila ka mga sakop sa pamilya ug mga higala wala na mahibulong. “Kadtong tanan namo nga nakaila niya,” miingon si Christian, “miisa sa among kamot sa kinatas-an sa dihang gipaluyohan siya isip usa ka Apostol.”
“Moadto Ko Aron Moserbisyo”
Niadtong 1996, sa edad nga 45, anaa si Ron sa tunga-tunga sa usa ka malampuson nga panarbaho sa dihang miabut ang tawag sa pagserbisyo isip presidente sa misyon sa New York New York North Mission. Sama sa mga Apostoles sa karaan, “diha-diha gibiyaan [niya] ang [iyang pukot]” (Mateo 4:20).
“Ang pagdawat sa call wala kaabut og usa ka segundo,” miingon si Elder Rasband. Miingon siya ngadto sa Ginoo, “Gusto ka nga ako moadto aron moserbisyo, moadto ko aron moserbisyo.”
Gidala ni Ron ang usa ka talagsaong leksyon nga iyang nakat-unan gikan sa iyang propesyonal nga kasinatian: “Ang mga tawo mas importante pa kay sa bisan unsa nga butang.”5 Uban niana nga kahibalo ug sa iyang napalambo nga mga kahanas sa pagpangulo, andam na siya aron sugdan ang full-time nga pagserbisyo sa gingharian sa Ginoo.
Nakita nila ni Ron ug Melanie ang misyonaryo nga buhat sa Siyudad sa New York nga parehong mahagiton ug makapadasig. Dali ra nga nakadelegar si Ron sa responsibilidad ngadto sa mga misyonaryo—nakapadasig nila nga magmaunungon, ug sa pagtudlo, pag-ugmad, ug pagbayaw kanila diha sa proseso.
Niadtong 2000, walo ka mga bulan human nakompleto nila ni Ron ug Melanie ang ilang misyon, gitawag si Ron ngadto sa Seventy, diin ang iyang pagpangandam, kasinatian, ug daghang mga talento mipanalangin sa Simbahan. Isip usa ka sakop sa Seventy, siya miserbisyo isip magtatambag sa Europe Central Area Presidency, mitabang sa pagdumala sa buhat sa 39 ka mga nasud. Bisan tuod nga mibiya siya sa kolehiyo sobra na sa 40 ka tuig ang milabay, nagpabilin siya nga usa ka seryuso nga estudyante, midawat sa padayon nga pagtudlo gikan sa iyang senior nga mga Kaigsoonan samtang midumala siya sa North America West, Northwest, ug tulo ka mga Area sa Utah; miserbisyo isip Executive Director sa Temple Department; ug miserbisyo sa Presidency sa Seventy, nga nakigtambayayong og maayo uban sa Napulog Duha.
Bag-ohay lang, si Elder Rasband mikomentaryo, “Unsa ka dakong dungog ug kahigayunan alang kanako nga mahimong labing ubos diha sa Napulog Duha ug nga makat-on gikan kanila sa tanang paagi ug sa tanang higayon.”6
“Unsa ang Ilang Nasayran, Ako Nasayud”
Itaas sa wala: gilitratohan ni Wendy Keeler; tuo: Mormon nga mga Tigsangyaw, ang Unang mga Misyonaryo sa Denmark, ni Arnold Friberg (gibase sa usa ka painting ni Christen Dalsgaard, 1856); Si Dan Jones Mipukaw sa Wales, ni Clark Kelley Price
Duha ka painting nga giadorno sa bong-bong sa opisina ni Elder Rasband. Ang usa mao ang Mormon nga mga misyonaryo nga nagtudlo og usa ka pamilya didto sa Denmark niadtong mga 1850. Ang ikaduha mao ang unang misyonaryo nga si Dan Jones nga nagsangyaw samtang nagbarug ibabaw sa usa ka atabay didto sa Bristish Isles. Ang mga painting (sa ibabaw sa tuo) makapahinumdom ni Elder Rasband sa iyang kaugalingong katigulangan.
“Kining nag-una nga mga pioneer mihatag sa tanan nga anaa kanila ngadto sa ebanghelyo ni Jesukristo ug nagbilin og panulundon nga sundon sa ilang mga kaliwatan,” mipamatuod siya.7 Unsay nakapadasig sa katigulangan ni Elder Rasband nga mouswag taliwala sa kalisdanan ug pagpanggukod mao gayud ang mipasarang kaniya alang sa iyang bag-o nga calling: ang kahibalo ug usa ka sigurado nga pagsaksi sa Ginoo ug sa Iyang buhat.
“Daghan pa kaayo ko og angayng makat-unan sa akong bag-o nga calling,” miingon siya. “Akong gibati nga mapainubsanon kaayo kabahin niana. Apan adunay usa ka aspeto sa akong calling nga akong mahimo. Makapamatuod ko ‘sa pangalan ni Jesukristo sa tibuok kalibutan’ (D&P 107: 23). Siya buhi!”8
Isip usa ka apo sa tuhod sa mga pioneer, siya midugang: “Unsa ang ilang gibati, ako mibati. Unsa ang ilang nasayran, ako nasayud.”9
Ug unsay ilang gilauman alang sa ilang kaliwatan gipakita diha sa kinabuhi, mga pagtulun-an, ug pagserbisyo ni Elder Ronald A. Rasband, kinsa misunod sa ilang ehemplo ug mitahud sa ilang kabilin [legacy] samtang siya nagpadayon sa unahan isip usa sa espesyal nga mga saksi sa Ginoo.