Walay Paglubad nga mga Istorya sa Ebanghelyo

Ang Priesthood: Usa ka Lig-ong Tinubdan

Ni Elder L. Tom Perry (1922–2015)

Sa Korum sa Napulog Duha ka mga Apostoles

Kini nga artikulo naandam ni Elder L. Tom Perry niadtong Mayo 28, 2015, duha ka adlaw sa wala pang iyang kamatayon, mahimong ikapaambit uban sa mga batan-ong tighupot sa prieshood.

Ang labing dako nga kalig-on sa akong kinabuhi mao ang priesthood sa Dios. Nagtuo ko nga kini usab mahimong usa ka lig-ong tinubdan alang kaninyo batan-ong mga lalaki. Apan aron kini adunay gahum sa inyong kinabuhi, kinahanglan nga kamo mosabut ug mogamit niini.

Unang mga Kasinatian uban sa Priesthood

Nagtubo ko sa usa ka komportable nga palibut sa Logan, Utah. Wala ko nabalaka mahitungod sa pagkaon o kapuy-an o edukasyon sa akong pagkabata. Apan tingali tungod kay ang kinabuhi sayon, nagkinahanglan ko og usa ka butang nga kahuptan nga makapalig-on kanako.

Alang kanako kana nga tinubdan mao ang priesthood sa Dios. Ako anaa sa usa ka talagsaong sitwasyon sa dihang ako nagtubo pa. Ang akong papa gitawag nga bishop sa dihang ako usa ka tuig pa ang panuigon, ug siya ang akong bishop sulod sa 19 ka tuig. Ang iyang inamahan ug espirituhanon nga paggiya dako kaayong tabang kanako.

Mao tingali nga naghinam-hinam ko sa pagdawat sa Aaronic Priesthood sa akong ika-12 nga adlawng natawhan. Nakahinumdom ko sa espesyal nga adlaw nga akong gibati ang mga kamot sa akong amahan diha sa akong ulo samtang siya mi-orden kanako. Human niana, nadawat nako ang mga katungdanan sa Aaronic Priesthood ug nakadawat og mga calling nga nakalingaw nako pag-ayo.

Ang pag-apud-apod sa sakrament espesyal kaayo kanako. Makita ninyo ang mga tawo nga mopasalig sa ilang kaugalingon sa pagsunod sa Ginoo ug mosunod sa Iyang mga sugo samtang sila miambit sa mga simbolo sa Iyang lawas ug dugo.

Nagtubo sa Pagsabut sa Priesthood

Samtang nagpadayon ang panahon, migradwar ko sa high school, ug dayon human sa usa ka tuig sa kolehiyo, ako gitawag sa misyon. Nalingaw ko sa matag minuto niini ug nahigugma sa akong mga kompanyon. Dunay usa nga nakapalig-on nako. Ako nakakat-on og daghan gikan kaniya samtang gituman namo ang mga responsibilidad.

Tungod kay ang nasud anaa sa gubat, sa dihang mibalik ko gikan sa akong misyon ako miapil sa United States Marine Corps. Sa dihang nahuman na ang gubat, mibalik ko sa kolehiyo, naminyo, ug nagsugod og pamilya. Sunod-sunod nga propesyonal nga mga pagbalhin-balhin midala kanako ngadto sa daghang mga dapit sa Estados Unidos, diin nakakat-on ko og daghan samtang nagserbisyo sa daghang mga calling sa priesthood. Sa katapusan miabut ko sa Boston, Massachusetts, diin ako nagserbisyo isip stake president. Gikan didto ako gitawag nga mahimong assistant sa Napulog Duha ug dayon, human sa 17 ka bulan, ngadto sa Korum sa Napulog Duha ka mga Apostoles.

Mga Leksyon nga Nakat-unan isip usa ka Apostol

Unsay akong nakat-unan isip usa ka sakop sa Korum sa Napulog Duha?

Akong nakat-unan nga adunay usa ka giya, usa ka lig-on, ug usa ka panalipod sa priesthood.

Ang priesthood kanunay nga anaa. Sa wala pa si Adan moanhi sa yuta, siya adunay priesthood. Sama sa kaliwatan ni Adan nga nagkatibulaag uban sa priesthood, gikinahanglan ang pag-organisar unsaon sa pagpangalagad sa priesthood. Ang Ginoo mihimo niana pinaagi sa pagtawag ni Abraham sa pagdumala sa iyang pamilya sa mga tighupot sa priesthood. Nagpadayon kini nga organisasyon ubos ni Isaac ug Jacob, kansang ngalan sa wala madugay giilisan og Israel.

Gatusan ka mga tuig ang milabay, ang mga anak sa Israel nahimong ulipon. Ang Ginoo mipadala ni Moises sa pagluwas kanila, apan sa dihang giluwas sila, nagpakita sila nga dili andam isip katawhan alang sa Melchizedek Priesthood. Mao nga gibilin kanila ang Aaronic Priesthood hangtud sa panahon sa Manluluwas.

Akong namatikdan nga makapaikag unsay unang gibuhat sa Manluluwas sa Iyang pagsugod sa Iyang pagpangalagad. Gi-organisar niya ang Melchizedek Priesthood. Mitawag siya sa Napulog Duha ka mga Apostoles ug mitudlo kanila sa mga balaod ug mga kapunongan sa priesthood. Iyang gitawag si Pedro nga mahimong labaw nga Apostol, pag-establisar og usa ka linya sa awtoridad sa Iyang Simbahan. Niadtong adlawa ug karon, si Jesukristo kinsa mopili sa Iyang labaw nga Apostol sa pagdumala sa Simbahan, ug ang Manluluwas mao ang mogiya kaniya sa iyang mga katungdanan sa priesthood.

Busa ang priesthood adunay direkta nga linya gikan sa atong Ginoo ug Manluluwas pinaagi sa labaw nga Apostol ngadto sa ubang mga Apostoles ug ngadto sa ubang mga naghupot sa priesthood diha sa Simbahan. Ang mga yawe sa awtoridad gihatag ngadto sa mga Apostoles, ug samtang kadto nga mga yawe ania sa yuta, kita giyahan mismo sa Ginoo. Kining balaanong direksyon nanalipod kanato ug naghatag kanato og kasiguroan nga ang Simbahan dili mosimang gikan sa kamatuoran. Kini magpabilin nga makanunayon tungod kay kini wala gidumala ni bisan kinsang tawo dinhi sa yuta. Gidumala kini sa Ginoo.

Pagkat-on sa mga Doktrina sa Priesthood

Ang labing mahinungdanon nga tambag nga akong ihatag kaninyo batan-ong mga lalaki mao ang pagtuon sa mga doktrina sa priesthood, sabta ang gahum nga anaa kaninyo sa paggamit sa inyong priesthood, ug pagkat-on kon sa unsang paagi kini makapanalangin sa inyong kinabuhi ug sa kinabuhi sa uban.

Ako mosaad nga kon kamo makakat-on sa mga doktrina sa priesthood ug motuman sa inyong mga katungdanan sa priesthood, ang priesthood mahimong usa ka lig-ong tinubdan nga mohimo ninyo nga luwas sa espirituhanon nga paagi ug mohatag ninyo og hingpit nga kalipay. Pagmatinud-anon nga korum sa priesthood. Tabangi ang inyong mga higala ug dad-a sila sa inyong korum. Paghimo og usa ka panag-igsoonay sa inyong korum nga mahimong permanente nga pundasyon sa inyong kinabuhi.