Mga Anak nga Babaye sa Atong Amahan sa Kahangturan

Tun-i sa mainampuong paagi kini nga materyal ug tinguhaa nga masayud unsay angay nga ipakigbahin. Sa unsang paagi nga ang pagsabut sa “Ang Pamilya: Usa ka Pamahayag ngadto sa Kalibutan” mopalambo sa inyong hugot nga pagtuo sa Dios ug mopanalangin niadtong inyong giamumahan pinaagi sa visiting teaching? Alang sa dugang nga impormasyon, adto sa reliefsociety.lds.org.

Silyo sa Relief Society — Hugot nga Pagtuo, Pamilya, Kahupayan

Ang mga kasulatan nagtudlo kanato nga “kaliwat man diay kita sa Dios” (mga Buhat 17:29). Ang Dios mitawag ngadto kang Emma Smith, asawa ni Propeta Joseph Smith, isip “akong anak nga babaye” (D&P 25:1). Ang pamahayag sa pamilya nagtudlo kanato nga ang matag usa “hinigugmang espiritu nga … anak nga babaye sa langitnong mga ginikanan.”¹

“Diha sa [premortal] nga dapit, among nakat-unan mahitungod sa atong mahangturong ilhanan sa pagkababaye,” miingon si Carole M. Stephens, unang magtatambag sa kinatibuk-ang kapangulohan sa Relief Society.

“Ang atong mortal nga panaw sa kalibutan wala makausab nianang mga kamatuoran.”²

“Ang inyong Amahan sa Langit nahibalo sa inyong ngalan ug nahibalo sa inyong kahimtang,” miingon si Elder Jeffrey R. Holland sa Korum sa napulog duha Ka mga apostoles. “Nakadungog Siya sa inyong mga pag-ampo. Nahibalo Siya sa inyong mga gilauman ug mga damgo, lakip ang inyong mga kahadlok ug mga kahigawad.”³

“Tanan kita nahisakop ug gikinahanglan sa pamilya sa Dios,” miingon si Sister Stephens. Ang tanang pamilya sa kalibutan managlahing tan-awon. Ug samtang gibuhat nato kutob sa atong mahimo sa paghimo og lig-ong tradisyunal nga mga pamilya, ang pagkasakop sa pamilya sa Dios wala mag-agad sa bisan unsa nga status—status nga minyo o dili, sa pagkaginikanan, sa pinansyal, sosyal, o bisan sa status nga atong gi-post sa social media.”⁴

Dugang nga mga Kasulatan

Jeremias 1:5; Mga Taga-Roma 8:16; Doktrina ug mga Pakigsaad 76:23–24

Gikan sa Atong Kasaysayan

Diha sa iyang asoy sa Unang Panan-awon,⁵ si Propeta Joseph Smith nagmatuod sa daghan nga mga kamatuoran—lakip na nga ang atong Langitnong Amahan nahibalo sa atong ngalan.

Ang batan-ong Joseph nanlimbasug nga masayud hain nga simbahan moapil ug nakakita sa giya sa Santiago 1:5. Si Joseph nakahukom nga siya mangutana sa Dios.

Usa ka buntag sa tingpamulak niadtong 1820, siya miadto sa kakahoyan aron mag-ampo apan diha-diha dayon gipugngan sa pipila ka ngitngit nga gahum. Niini siya misulat:

“Dinhi niini nga higayon sa dako nga kahadlok, ako nakakita og usa ka dako nga gilis sa kahayag ibabaw gayud sa akong ulo, labaw sa kahayag sa adlaw, nga nag-anam og paubos hangtud kini midapat kanako.

“Diha-diha nga kini mipakita ako nakakaplag sa akong kaugalingon nga giluwas gikan sa kaaway nga migapos kanako. Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:16–17).