Kalinaw sa Akong Kasingkasing

Ni Carol F. McConkie

Unang Magtatambag sa Kinatibuk-ang Kapangulohan sa Young Women

Niadtong otso anyos pa ko, akong nakita ang propeta, si Presidente David O. McKay (1873–1970). Miabut siya aron sa pagpahinungod sa bag-ong building sa Simbahan sa Palmyra, New York, USA. Ang akong pamilya mitambong sa pagpahinungod. Daghang mga tawo miabut usab. Naghinam-hinam kaming makakita sa propeta!

Gamay kaayo ko, busa lisud alang kanako sa pagtan-aw sa palibut sa tanang mga tawo. Apan gibati gihapon nako ang gugma ni Presidente McKay. Sulod lang sa usa ka minuto, akong nakita ang iyang puti nga buhok ug ang iyang mabination nga nawong. Naghunahuna ko, “Kini ang dagway sa usa ka propeta sa Dios.” Nakabasa ko kabahin sa mga propeta diha sa mga kasulatan, apan kini mao ang akong unang higayon nga nakakita og usa ka propeta o bisan unsa nga General Authority sa linawas. Nakaamgo ko nga ang mga propeta tinuod nga mga tawo. Ug sila nahigugma kanato! Kanunay akong nahinumdom sa gugma ug kalinaw nga akong gibati nianang adlawa.

Sa dihang 11 anyos ko, duna koy laing kasinatian nga nakatabang kanako nga mobati og kalinaw sa akong kasingkasing. Nagsingabut ang komperensya sa stake, ug ako mokanta sa stake choir. Naghinam-hinam kaayo ko! Gisul-ob nako ang nindot nga puti nga shirt, ug mibati ko nga espesyal kaayo. Ang among gikanta mao ang mga pulong gikan sa Juan 14:27, “Kaninyo ibilin ko ang kalinaw, kaninyo ihatag ko ang kalinaw: hatagan ko kamo niini, dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw.”

Kadto nga mga pulong nakapatandog sa akong kasingkasing, ug nakahinumdom gyud ko niini sukad niadto. Sa dihang mikanta ko niadto nga mga pulong, ako nasayud nga kini tinuod. Gibati nako nga ang Espiritu Santo misulti nako nga ang pagsunod ni Jesukristo makatabang kanato nga mobati og kalinaw. Sukad niadto, matag higayon nga ako adunay mga hagit, kini nga kasulatan mosulod sa akong hunahuna ug mohatag kanako og kalinaw. Ang kamatuoran nga akong nakat-unan sa dihang gamay pa ko nakapanalangin sa akong tibuok kinabuhi.