Mensahe sa Unang Kapangulohan
Panagna ug Personal nga Pagpadayag
Ni Presidente Henry B. Eyring
Unang Magtatambag sa Unang Kapangulohan
Ang tinuod nga Simbahan ni Jesukristo napahiuli na ug anaa dinhi sa yuta karon. Ang Simbahan ni Jesukristo sa mga Santos sa Ulahing mga Adlaw kanunayng gigiyahan pinaagi sa buhing mga propeta ug mga apostoles, kinsa makadawat og giya gikan sa langit.
Kanang balaang sumbanan mao usab sa karaang panahon. Atong makat-unan diha sa Biblia: “Sa pagkatinuod ang Ginoong Dios dili magabuhat sa bisan unsa, gawas kon ang iyang tinago ipadayag niya sa iyang mga alagad ang mga propeta” (Amos 3:7).
Ang Dios nakigsulti na usab sa atong panahon, pinaagi ni Propeta Joseph Smith. Iyang gipadayag pinaagi ni Propeta Joseph ang ebanghelyo ni Jesukristo diha sa kahingpitan niini. Iyang gipahiuli ang Iyang balaan nga pagkapari uban sa mga yawe ug tanan nga mga katungod, gahum, ug naglihok sa sagrado nga gahum sa priesthood.
Sa atong panahon, ang buhing mga propeta ug apostoles gitugutan sa pagpamulong, pagtudlo, ug paggiya sa uban sa pagtugot gikan sa Dios nga Amahan ug ni Ginoong Jesukristo. Ang Ginoo nagsulti ngadto sa Propeta: “Unsa nga Ako ang Ginoo namulong, Ako namulong, ug Ako dili mangayo og pasaylo alang sa akong kaugalingon; ug bisan pa ang mga langit ug ang yuta mahanaw, ang akong mga pulong dili mahanaw, apan ang tanan matuman, bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38).
Sa kinatibuk-ang komperensya kaduha sa usa ka tuig, mapanalanginan kita sa oportunidad sa pagpaminaw sa pulong sa Ginoo alang kanato gikan sa Iyang mga sulugoon. Mao kana ang usa ka pribilehiyo nga dili mapalit. Apan ang bili niana nga oportunidad nag-agad kon atong gidawat ang mga pulong ubos sa samang Espiritu diin sila gihatag ngadto niadtong mga sulugoon (tan-awa sa D&P 50:19–22). Sama nga ilang nadawat ang giya gikan sa langit, busa kinahanglan kita usab. Ug kana nagkinahanglan kanato sa samang espiritwal nga paningkamot.
“Buhata ang Imong Homework”
Mga tuig nang milabay usa sa sakop sa Korum sa Napulog Duha ka mga Apostoles mihangyo kanako sa pagbasa og pakigpulong sa komperensya nga iyang gi-andam alang sa kinatibuk-ang komperensya. Sakop ko sa junior nga korum. Akong dungog nga siya misalig nako sa pagtabang kaniya nga makit-an ang mga pulong nga gusto sa Ginoo nga iyang ipamulong. Siya miingon ngari kanako uban sa pahiyum, “Ah, mao kini ang ika-22 nga sinulat nga pakigpulong.”
Akong nahinumduman ang mahigugmaon ug mabination nga tambag ni Presidente Harold B. Lee (1899–1973) nga nahatag kanako sa una uban sa dakong gibug-aton: “Hal, kon gusto ka nga makadawat og pagpadayag, buhata ang imong homework.”
Mibasa ko, namalandong, ug miampo nianang ika-22 nga sinulat. Nagtuon ko kutob sa mahimo ubos sa impluwensya sa Espiritu Santo. Sa panahon nga kanang sakop sa korum mihatag sa iyang pakigpulong, akong nabuhat ang akong homework. Dili ko sigurado nga kon nakatabang ba ko, apan nasayud ko nga nausab ko sa dihang nakadungog ko sa mga pakigpulong nga gihatag. Mga mensahe miabut kanako nga lapas pa sa mga pulong nga akong nabasa ug kana iyang gipamulong. Ang mga pulong nga adunay mas dakong kahulugan kay sa akong nabasa diha sa sinulat. Ug ang mensahe nga daw gitumong alang kanako, haum sa akong panginahanglan.
Ang mga sulugoon sa Dios nagpuasa ug nag-ampo aron makadawat sa Iyang mensahe nga alang kanila nga ihatag niadtong kinsa nanginahanglan sa pagpadayag ug inspirasyon. Unsay akong nakat-unan gikan niana nga kasinatian, ug sa daghan pa nga sama niini, mao nga ang pag-angkon sa labing nindot nga kaayohan anaa sa pagpaminaw sa buhing mga propeta ug mga apostoles, kinahanglan kita mismo ang maningkamot sa pagdawat og pagpadayag.
Nahigugma ang Ginoo sa matag tawo kinsa unta makadungog sa Iyang mensahe, ug Siya nasayud sa mga kasingkasing ug mga kahimtang sa matag usa. Nasayud Siya unsa ang ikorehir, unsa nga pag-awhag, ug unsa nga mga kamatuoran sa ebanghelyo ang labing makatabang sa matag tawo sa iyang pilion nga mouswag ngadto sa dalan sa kinabuhing dayon.
Kita nga naminaw ug nagtan-aw sa mga mensahe sa kinatibuk-ang komperensya usahay mohunahuna inighuman, “Unsay labing maayo nga akong mahinumduman?” Ang gilauman sa Ginoo alang sa matag usa kanato mao nga ang atong tubag mahimong: “Dili gayud nako makalimtan ang higayon nga nabati nako ang pakighinabi sa Espiritu sa akong hunahuna ug kasingkasing nagsulti kanako nga unsay akong mahimo aron mapahimuot nako ang akong Langitnong Amahan ug ang Manluluwas.”
Makadawat kita nianang personal nga pagpadayag kon atong dunggon ang mga propeta ug mga apostoles ug samtang kita mobuhat diha sa pagtuo nga madawat kini, sumala sa giingon ni Presidente Lee nga kita makahimo. Nasayud ko nga kana tinuod gikan sa kasinatian ug pinaagi sa pagsaksi sa Espiritu.