Kon ang Panimalay Masudlan sa Pornograpiya—Ang mga Asawa ug mga Bana Kinahanglan Magpaayo
Nakita nako ang gahum sa Manluluwas sa pag-ayo moabut sa mga asawa ug ingon man usab sa mga bana kon ang mga bana nanlimbasug sa pornograpiya.
Mga paghulagway sa litrato nga gibarugan sa mga modelo
Sulod sa akong unang unom ka bulan isip bishop, adunay pipila ka mga magtiayon sa akong ward miduol nako misalig sa pagsulti kanako sa panlimbasug sa mga bana sa paggamit sa pornograpiya. Sa ubang mga sitwasyon, ang asawa nabug-atan gikan sa pagkahikurat sa bag-o lang nahibaloan nga makadaot nga sekreto; ang uban nakahibalo na sulod sa mga bulan o mga tuig.
Akong gibati ang kalooy sa matag usa niining managtiayon ug nabati ang matubsanon nga gahum sa Manluluwas samtang ako nagtambag sa regular ug mainampingon nga paagi sa matag usa sa mga igsoon aron matabangan sila nga “iyabyab ang mga kadena … nga mogapos [kanila] og hugot” (2 Nephi 9:45).
Tingali ang labing dako nga mga pagpadayag sa Espiritu miabut, bisan pa niana, samtang akong nahimamat ang ilang mga asawa. Akong nabantayan nga, samtang ang pipila ka mga samad bag-ohay lang ug ang uban dugay nang mga na-uwat sa mga pila na katuig nga pagkabantang, ang tanan niini nga mga sister nagsagubang og lawom nga espirituhanong kasakit gumikan sa mga pangutana sama sa, “Unsa may akong nabuhat nga maoy nakaingon nga wala siya nadani kanako?” o “Nganong gusto man niya maghunahuna sa iyang kaugalingon uban sa laing tawo kay kanako?”
Tungod kay ang bana ang may kalapasan, sayon kini alang sa bishop nga mobati nga ang bana ang labing nagkinahanglan sa mga yawe aron maablihan ang makaayo nga gahum sa Manluluwas, apan akong nakat-unan nga ang panginahanglan sa asawa nga mamaayo sa kasakit ug sa truma susama ra sa panginahanglan sa pagpaayo sa bana sa sala ug sa naghingapin nga mga gana.
Sa iyang diskurso ngadto sa mga Nephite, ang propeta nga si Jacob nanghimaraut sa mga tawo sa ilang mga binuhatan nga dili matinud-anon ngadto sa ilang mga asawa, “kadaghanan kansang mga pagbati hilabihan kalumo ug kaputli ug kahuyang sa atubangan sa Dios” (Jacob 2:7). Siya mipadayon: “Kamo nakasamad sa mga kasingkasing sa inyong malumo nga mga asawa … tungod sa inyong ngil-ad nga mga panig-ingnan sa ilang atubangan; ug ang mga bakho sa ilang mga kasingkasing misaka ngadto sa Dios batok kaninyo” (Jacob 2:35). Ako mismo nakasaksi niining mga pagbakho. Kining mga higayon sa pagbakho dili lamang tungod sa lawom nga pagbati sa pagluib tungod sa paggamit sa iyang bana og pornograpiya apan gumikan usab sa paggamit og mga pulong nga makapaubos ug binastos nga gawi nga kanunayng gipadayag isip resulta sa iyang kaugalingong panglimbasug. Komon kini, sa pagkatinuod, alang sa usa ka tawo kansang kinaiya nga nasayran ipasangil ngadto sa iyang asawa ang iyang kinaiya, magtumbok sa pipila sa mga nabuhat sa asawa o kapakyasan. Makasubo gayud, komon usab kini sa asawa nga modawat ug gani motuo niining mga pasangil.
Usa sa ingon niana nga magtiayon naglingkod sa akong opisina human ang bana mibutyag sa pagkagumon sa pornograpiya sukad pa sa iyang kabatan-onan. Samtang naminaw sa usa ka leksyon sa Relief Society nga gibase sa pakigpulong ni Sister Linda S. Reeves sa kinatibuk-ang komperensya sa Abril 2014, “Panalipod gikan sa Pornograpiya—usa ka Panimalay nga Nakapokus kang Kristo,” ang asawa misugod sa pag-ila sa kritikal nga kinaiya sa iyang bana ngadto kaniya ang kadaghanan sa mga kalagmitan nga gihulagway sa magtutudlo. Human sa leksyon, siya miatubang sa iyang bana uban sa pangutana, ug iyang gikumpisal ang tinagoan sa dugay nang panahon. Ang iyang nadaut na nga bili sa kaugalingon karon napilo-pilo na uban sa nagdilaab nga kasuko. Atol sa ilang unang miting uban kanako, sila naglisud sa pagtan-aw kon sa unsang paagi nga ang ilang kaminyoon makapadayon. Ako misiguro kanila nga adunay paglaum, mihatag og pipila ka inisyal nga tambag, ug dayon midapit kanila sa pagbalik ug makigkita kanako tagsa-tagsa.
Inubanan sa matinguhaong pag-ampo nga akong ihalad agig pagpangandam alang niana nga mga miting, ako usab giribyu ang mga sugyot nga gihatag sa Ministering Resources diha sa LDS.org, ilabi na sa mga kapanguhaan alang sa pagsuporta sa mga kapikas nga mga tiggamit sa pornograpiya, diin ako mibasa sa mosunod: “Ipahayag ang inyong gugma ug kahingawa alang kaniya sa indibidwal nga paagi, ingon man usab alang sa iyang kapikas. Klaroha nga siya dili responsable alang sa kinaiya sa iyang kapikas sa paggamit og pornograpiya o dili maayo nga kinaiya ug wala paabuta nga mosagubang sa abosadong kinaiya.”
Samtang ako nakighimamat niini nga sister, naminaw ko niini nga tambag ug gidugangan kini sa kasiguroan nga ang mga lihok sa iyang bana dili mahitungod kaniya, dili kabahin sa usa ka butang nga siya aduna o walay gibuhat, apan hinoon ang mahitungod sa iyang kaugalingon nga mga panagsumpaki. Akong nakita ang kusog nga pagbati sa kahupayan ug kahuwasan miabut kaniya samtang siya mihangop sa mga pulong ug gibati ang pagkumpirma sa Espiritu nga kini gayud tinuod. Sa katapusan sa interbyu, siya nangutana kon ako mohatag kaniya og panalangin sa priesthood. Akong naamgohan nga ako ra ang bugtong tawo nga iyang kadangpan alang sa ingon nga panalangin, samtang siya mas ganahan nga ipabilin nga pribado ang iyang sitwasyon gikan sa pamilya ug mga higala.
Sa pagtabang sa proseso sa pagpaayo, akong gidapit ang bana sa pagtambong sa usa ka lokal nga addiction-recovery group sa mga Santos sa Ulahing mga adlaw, ug ako miawhag sa iyang asawa sa pagtambong sa nahiuyon nga grupo alang sa mga magtiayon ug mga sakop sa pamilya. Siya misulti kanako kabahin sa kahupayan nga iyang gibati gikan sa ubang mga sister kinsa nakasabut unsa ang iyang giantus ug ang paglaum nga gihatag ngadto kaniya aron makakita og mga managtiayon nga nagumon sa samang pagsulay ug nakahimo ra sa paggawas gikan niini og dungan.
Pipila na ka bulan ang milabay karon sukad sa akong unang miting uban niini nga mga magtiayon, ug mitubo ang akong gugma ug kabalaka alang kanila isip resulta sa among daghan nga inter-aksyon. Samtang akong namatngunan nga ang ilang gipadayon nga dalan dili mahimo kon walay mga kalisud, akong kalipay ang makahibalo nga sa matag bulan nga ang bana nagpabiling gawasnon gikan sa kahigal ug pornograpiya ug nakita ang pagsaka sa bili sa kaugalingon ug sa pagsalig sa iyang asawa, nga makita dayon.
Sa bag-uhay nga mga interbyu uban kanila, ang pag-antus ug mga luha gikan sa among unang mga miting napulihan na og kanunayng pahiyom ug gani katawa. Apan tingali ang labing mahinungdanon nga mga resulta mao ang paglaum—paglaum nga dili lamang nga makapadayon ang ilang kaminyoon apan aduna na usab gani kini potensyal nga mahimong usa ka butang nga maanindot ug mahimayaon.
Nakamatngon ko nga, sa walay palad, dili tanang magtiayon nakasinati niining sama nga resulta. Pipila ka mga kaminyoon mahimong mapakyas kon ang tiggamit sa pornograpiya mobalibad sa paghimo og kalamboan. Dili igsapayan sa dalan nga gipili sa bana, hinoon, akong nakat-unan nga ang tambag sa pagpangalagad ngadto sa mga asawa dinasig. Manghinaut ko nga walay sister sa niining sitwasyon nga mobati nga siya nataligam-an, nahusgahan og sayop, o nasaypan sa pagsabut sa iyang bishop. Ang pagpangalagad sa bishop mao ang usa ka mahinungdanong lutsanan diin ang Manluluwas nagpakita sa Iyang gahum sa hingpit nga pag-ayo sa matag kasingkasing—bisan niadtong “natusok sa lawom nga mga samad” (Jacob 2:35).
Ubos: Si Kerri nahugno gyud sa dihang nahibalo siya sa mga hagit sa iyang bana sa pornograpiya, apan siya nakabaton og paglaum ug pagkaayo pinaagi ni Jesukristo ug sa Iyang Pag-ula.