Mga Pangutana ug mga Tubag
“Bugal-bugalan ko sa eskwelahan tungod kay ako LDS. Nasayud ko nga kinahanglan kong mobarug unsay akong gituohan, apan lisud kaayo! Unsaon nako nga mahimo kong maisugon?”
Sakto ka nga ikaw nagkinahanglan og kaisug sa pag-atubang niini nga sitwasyon. Human sa tanan, si Jesukristo mimando, “Tindog ug pakita, aron ang inyong kahayag mao ang usa ka sukaranan alang sa tanan nga mga nasud” (D&P 115:5). Apan sa pagbaton og kaisug sa pagpasiga sa inyong kahayag nagpasabut o wala magpasabut nga namulong batok niadtong kinsa nagbugal-bugal kaninyo.
Bisan asa niini, mahimo nimong tugutan ang oposisyon sa pagdasig nimo nga mas mahimong maayo. Samtang ikaw maningkamot sa pagpalig-on sa imong pagpamatuod, ikaw makapalambo sa matang sa kaisug nga makatabang nimo sa pagsulti o sa yano magpadayon sa pagbuhat unsay matarung, bisan kon ang uban magbugal-bugal.
Makalagot kon bugal-bugalan, apan hinumdumi nga ikaw makaampo aron mapuno sa gugmang putli aron ang uban mobati sa gugma ni Kristo pinaagi nimo (tan-awa sa Moroni 7:48). Tungod kay ang matag sitwasyon talagsaon, tinguhaa ang giya sa Espiritu aron masayud unsaon pagtubag sa usa ka Kristohanon nga paagi sa matag higayon.
Depende sa sitwasyon, tingali labing maayo nga makigsulti sa pribado uban niadtong nagbugal-bugal nimo o ibaliwala lang ang dili mahigalaon nga pagbugal-bugal samtang magpadayon sa pagpuyo sa imong mga gituohan. Kon ang uban dili interesado nga maminaw unsay imong buot isulti, ang imong ehemplo sa pagkamabination, pagpasaylo, ug sinseridad maoy labing maayong mensahe nga imong mapadala.
Pagpakita og Tinuod nga Kaisug
Kadtong nagbugal-bugal nimo tingali dili mohunong tungod lang kay ikaw nagmaisugon sa pagpahunong nila, apan tingali og sila mohunong kon ikaw maningkamot sa pagpakita sa kaisug pinaagi sa pagpuyo unsay imong gituohan—usa ka Santos sa Ulahing mga Adlaw. Sa dili pa ikaw mahibalo niini, ang kahayag sa pagtugot sa atong Langitnong Amahan modan-ag diha nimo, hinaut mobukas sa ilang mga mata sa gipahiuli nga ebanghelyo sa imong kinabuhi.
Bright U., edad 17, Imo State, Nigeria
Pangita og Kalig-on sa mga Sukaranan
Ang pag-ampo ug pagpuasa importante tungod kay kini makatabang nimo sa pag-atubang sa mga komedya ug mga hagit sa eskwelahan, sama nga si Jesukristo miatubang sa daghang pagbiay-biay sa dihang Siya dinhi sa yuta. Kini makatabang nimo sa pagpalambo og dugang nga gugma ug pailub ngadto sa mga tawo.
Walter C., edad 15, Jaén, Peru
Pagpagiya pinaagi sa Pag-ampo
Sulod sa dugayng panahon ako lang ang miyembro sa akong eskwelahan. Ang akong pinakasuod nga mga higala daw nakasabut nako, apan ang ubang mga higala sa eskwelahan mobugal-bugal kanako. Usa ka adlaw ako nag-ampo ug mibati sa panginahanglan nga makig-istorya sa usa kanila kinsa miawhag sa uban nga mobugal-bugal kanako. Mipasabut ko nga wala ko masuko kaniya, apan ako naghangyo kaniya sa paghatag kanako sa pagtahud nga iyang gustong maangkon. Human makadungog sa among panag-istoryahanay, usa sa akong mga magtutudlo kanunay nanalipod kanako kon makakita siya nga naay nahitabo. Ako nasayud nga ang Ginoo magauban kanimo samtang ikaw makig-istorya niini nga mga tawo.
Shanela S., edad 14, Pangasinan, Philippines
Lig-una ang Inyong Pagpamatuod
Una, pag-angkon og tinuod nga pagpamatuod sa mga kamatuoran nga gusto ninyong ipakigbahin sa uban. Dayon pagbaton og gugma alang sa mga tawo nga mobugal-bugal ug ayaw pakiglalis, tungod kay ang panagbingkil wala gayud suportahi sa Dios (tan-awa sa 3 Nephi 11:29). Ang labing importante, paningkamot sa pagbaton sa Espiritu kanunay uban kaninyo. Ang Espiritu motabang kaninyo nga makabaton og dugang nga paghigugma ug dugang nga kaisug, ug Siya mohimo sa inyong mga pulong nga gamhanan.
Julia F., edad 19, Hesse, Germany
Higugmaa ang Inyong mga Kaaway
Ako nakasinati niining susamang sitwasyon. Kon kamo adunay hugot nga pagtuo ug mopaubos sa inyong kaugalingon, kamo mapanalanginan uban sa kalig-on ug hugot nga pagtuo nga inyong gikinahanglan sa “paghigugma sa inyong mga kaaway, pagpanalangin niadtong nagtunglo kaninyo, … ug pag-ampo alang kanila” (Mateo 5:44). Moawhag ko kaninyo sa pagsiksik sa mga kasulatan alang sa mga tubag kon unsaon nga mahimong lig-on. Pag-ampo kon kamo mobati nga nag-inusara sa inyong hugot nga pagtuo. Ang Mga Taga-Roma 8:31 miingon, “Unsay may atong ikasulti mahitungod niini? Kon ang Dios dapig kanato, kinsa pa man ang batok kanato?” Anaa ang Dios sa inyong kiliran! Ang tanan posible.
Reagan T., edad 15, Utah, USA
Ayaw Kahadlok
Hisguti kanunay ang inyong relihiyon o tuyoa ang pagbuhat og butang aron kini mahisgutan. Diha ako sa susama nga sitwasyon ug misulat sa akong backpack og, “Ganahan Ko nga Nahimong LDS”. Pinaagi sa pagbuhat sa ingon, giablihan nako ang pultahan sa daghang mga oportunidad sa misyonaryo ug gipakita sa mga tawo nga wala ako mahadlok nga ipahibalo kanila nga ako usa ka LDS. Bisan unsay inyong buhaton, ayaw itugot nga sila mosamok kaninyo. Pag-ampo alang nila ug alang sa inyong kaugalingon. Sa dili madugay kon kamo mo-focus sa pagluwas sa uban, dili na kamo mahadlok sa pagpahibalo kanila sa kamatuoran sa ebanghelyo sa atong Amahan.
Savanna P., edad 14, Texas, USA