Espirituhanong Kalig-on: Paghimo og Barko nga Dili Malunod

Ni Elder Dale G. Renlund

Sa Korum sa Napulog Duha ka mga Apostoles

Gikan sa debosyonal sa Brigham Young University, Sept. 16, 2014. Alang sa kompleto nga teksto sa Iningles, bisitaha ang speeches.byu.edu.

Nagkinahanglan kita og igo nga espirituhanong kalig-on aron magmalampuson sa pagnabigar sa atong mortal nga mga kinabuhi ug mobalik nga luwas ngadto sa atong langitnong panimalay.

Diha sa sayong bahin sa ika-17 nga siglo, ang hari sa Sweden, si Gustav II Adolf, mimando nga himoon ang barkong igugubat nga gihinganlan og Vasa. Ang paggama sa barko nagpakita sa dakong panginahanglan sa kapanguhaan, ilabi na sa oak nga maoy gamiton sa pagtukod sa salakyan. Si Gustav Adolf mibantay og maayo sa proseso sa pagtukod, gisiguro nga ang Vasa hingpit nga motuman sa iyang mga gilauman.

Sa gisugdan na ang paghimo, si Gustav Adolf mimando nga ang Vasa patas-an. Tungod kay ang suporta sa gilapdon nga gitukod gikan sa bililhong oak, ang hari misugo sa mga tigtukod nga dugangan ang gitas-on sa barko nga walay pag-dugang sa gilapdon niini. Bisan nasayud na ang mga tiggama sa barko nga ang pagbuhat sa ingon mokompromiso sa kasarang sa paglawig sa Vasa, nagduhaduha sila sa pagsulti sa butang nga nasayud sila nga dili gustong madunggan sa hari. Ilang gituman. Miinsister usab si Gustav Adolf nga kini nga barko dili butangan sa ordinaryong mga armas apan mga kanyon sa tulo ka mga andana, nga ang kinabug-atan nga mga kanyon ibutang sa ibabaw nga andana. Usab, supak man sa ilang mas maayo nga paghukom, ang mga tiggama sa barko mituman.

Niadtong Agosto 10, 1628, ang Vasa misugod sa unang paglawig niini. Sa dihang nakabiya na ang Vasa sa pantalan, usa ka kusog nga hangin misulod sa mga layag niini, ug ang barko misugod sa pagtakilid. Wala abti og dugay, “mitakilid kini ug nasudlan og tubig agi sa pwerta sa kanyon hangtud hinayhinay kining mitidlum apil ang layag, mga bandila ug ang tanan.”¹ Ang unang paglawig sa Vasa sa mga 4,200 ka pye (1,280 m).

Ang naghinubra nga tinguha ni Gustav Adolf alang sa simbolo sa gahum maoy miguba sa desinyo sa labihan unta ka maanindot nga barkong iglalayag, ang labing gamhanang barkong igugubat niana nga panahon. Ang mga tiggama nagpanagana sa pagpahibalo—ang ilang kahadlok nga dili ikalipay sa hari—mihikaw sa hari sa ilang kahibalo ug panabut. Ang tanan nga nalambigit nawad-an sa panglantaw sa mga tumong sa pagpaningkamot: aron sa pagpanalipod sa Sweden ug pag-tanyag og interes sa gawas sa nasud. Ang usa ka barko nga mosulay sa pagsupak sa mga balaod sa physics yano lang nga dili molutaw.

Aron magmalampuson kitang magnabigar sa atong mortal nga kinabuhi, nagkinahanglan kita og igong espirituhanon nga kalig-on sa pagsagubang sa hangin ug mga sulog, mohimo sa gikinahanglan nga pagliko ug mobalik nga luwas ngadto sa atong langitnong panimalay. Adunay mga butang nga atong mahimo aron mapalambo ang atong espirituhanong kalig-on. Mohisgut ko sa upat.

Pagsunod sa mga Sugo sa Dios

Ang una mao ang pagsunod sa mga sugo sa Dios. Sama sa Vasa nga gipaubos sa pisikal nga balaod, kitang tanan ubos sa espirituhanon nga balaod. Walay usa nga pinalabi. Kinahanglan nga mosunod kita niini nga espirituhanong mga balaod, nga atong gitawag og mga sugo sa Dios.

Ang pagtrabaho uban sa pisikal nga balaod sa paggama sa barko tingali nabati ang pagkaistrikto ni Gustav Adolf, apan ang Vasa dili unta malunod sa wala pa ang misyon niini kon gituman lang unta kining mga balaod. Hinoon, aduna unta kini sa kagawasan ug kasarang sa pagtuman kon unsa ang tuyo sa pagbuhat niini.

Mao usab, ang pagkamasulundon sa balaod sa Dios nagpreserbar sa atong kagawasan, kasarang, ug abilidad sa pagkab-ot sa atong potensyal. Ang mga sugo wala gituyo aron sa pagpugong kanato. Hinoon, ang pagkamasulundon modala ngadto sa dugang nga espirituhanong nga kalig-on ug molungtad nga kalipay.

Ang pagkamasulundon mao ang atong pagpili. Si Jesus misugo, “Tan-awa, ako mihatag nganha kaninyo sa mga sugo; busa paghupot sa akong mga sugo” (3 Nephi 15:10). Ingon niana ka yano. Desisyuni kini. Pagdesisyon karon nga magmasulundon gayud. Walay mas makapalig-on sa espirituhanon. Walay mohatag kanato og mas dakong kagawasan sa pagtuman sa atong misyon sa kinabuhi.

Pagpatalinghug sa Tambag ug Mahimong mga Tigkat-on sa Tibuok Kinabuhi

Ikaduha, kinahanglan tang mohatag og pagtagad ug mopatalinghug sa tambag gikan sa kasaligan nga mga kapanguhaan ug mopasalig sa atong mga kaugalingon nga mamahimong mga tigkat-on sa tibuok kinabuhi.

Usa sa mga lit-ag sa pag-angkon og kahibalo mao ang pagkamapahitas-on nga moabut kon kita maghunahuna nga kita nasayud kaayo nga wala nay nahabilin nga makat-unan. Nakita nato kining tanan diha sa mga indibidwal kinsa sigurado kaayo sa ilang kamaayo. Lisud gayud kaayo ang pagtudlo sa usa ka tawo nga nakahibalo-sa-tanang butang.

Isip nagmatngon niini, ug nagmatinguhaon nga mahimong tigkat-on sa tibuok kinabuhi, si Presidente Henry B. Eyring, Unang Magtatambag sa Unang Kapangulohan, miingon, “Usa gihapon ako ka bata nga daghang angay makat-unan. Kadaghanan sa mga tawo makatudlo nako sa bisan unsang butang.”² Sa dihang siya mitawag kanako sa pagka General Authority, si Presidente Eyring nagtudlo kanako og importante nga leksyon. Miingon siya nga kon makadungog siya og tawo nga mag-istorya nga iya nang nadunggan sa una o maggamit sa usa ka kasulatan nga sinati kaayo siya, mangutana siya sa kaugalingon, “Nganong mihatag ang Ginoo og gibug-aton niana ngari kanako?” ug “Unsa pa man ang akong angay nga makat-unan gikan niana nga istorya o kasulatan?” Kon gusto kita nga dugangan ang atong espirituhanong kalig-on, kita mahimong andam sa pagkat-on ug igo ang kamapainubsanon sa pagdawat og giya sa bisan unsa nga pangidaron ug kasinatian.

Kini atoa gayud nga pagpili. Mahimo kitang maminaw ug mopatalinghug sa tambag nga gihatag ngari kanato sa atong mga lider sa Simbahan, ilabi na niadtong atong gipaluyohan isip mga propeta, manalagna, ug mga tigpadayag; pinaagi sa mga ginikanan, ug sa sinaligan nga mga higala—o dili. Makatinguha kita nga mahimong tigkat-on sa tibuok kinabuhi—o dili. Makapalambo kita sa atong espirituhanon nga kalig-on—o dili. Kon mapakyas kita sa pagpalambo sa atong espirituhanong kalig-on, mahisama kita sa Vasa—usa ka barko nga dili molutaw.

Pagserbisyo sa Uban

Ikatulo, ang pagdirekta sa atong hunahuna ngadto sa uban, pag-amuma sa uban, ug pagserbisyo sa uban makadugang sa atong espirituhanong kalig-on.

Ang kahangturan magpabilin nga mas klaro nga matutokan kon atong tutokan ang pagtinguha sa pagtabang sa mga anak sa Langitnong Amahan. Nakita nako kini nga mas sayon sa pagdawat sa pagdasig kon ako nag-ampo sa pagkaplag kon unsaon nga akong matabangan ang uban kay sa mag-ampo lang alang sa akong kaugalingon.

Mahimong magtuo kita nga dunay panahon sa umaabut nga maanaa kita sa mas maayo nga sitwasyon sa pagtabang. Sa pagkatinuod, karon mao ang panahon. Nasayop kita kon atong gihunahuna nga mas sayon kon aduna kitay mas dakong panahon, mas daghang kwarta, o mas daghan sa bisan unsa nga butang aron makaserbisyo sa uban. Bisan unsa pa ang kahimtang, aduna tay kapilian. Motabang ba kita sa uban o dili? Mahagbung kita sa dakong pagsulay sa mortalidad kon pilion nato nga dili motabang niadtong nanginahanglan. Ug, kon motabang kita, makapalambo kita sa atong kaugalingong espirituhanong kalig-on.

Paghimo ni Jesukristo nga Atong Pundasyon

Ikaupat, sa katapusan, ug ang labing importante, ang atong espirituhanong kalig-on magkadako sigun sa gidak-on sa atong pag-istablisar ni Jesukristo isip atong pundasyon.

Kon wala si Kristo, anud-anuron kita sama sa usa ka sakayan nga ilabay-labay lang sa mga balud. Wala kitay gahum tungod kay wala kitay layag. Wala kitay kalig-on, ilabi na sa mga panahon sa unos, tungod kay wala kitay ankla. Wala kitay direksyon o katuyoan tungod kay wala kitay bisan unsa nga kapaingnan. Kinahanglan gayud nga atong himoon si Kristo nga atong pundasyon.

Aron sa pag-atubang, pagbuntog, ug maandam alang sa nagsukwahing hangin ug nagsukwahing mga sulog sa kinabuhi, kinahanglan kita nga mosunod sa mga sugo sa Dios; mahimong magmapaubsanon, andam, ug determinado nga mga tigkat-on sa tibuok kinabuhi; pagserbisyo sa uban; ug pag-establisar ni Jesukristo isip pundasyon sa atong mga kinabuhi. Samtang kita mobuhat sa ingon kita mopalambo sa atong espirituhanong kalig-on. Dili sama sa Vasa, mahimo kitang makabalik ngadto sa luwas nga dapit, nakatuman na sa atong kapalaran.