Mga Tingog sa mga Santos sa Ulahing mga Adlaw
Tabangi Siya
Thomas Robbins, California, USA
Naglinya ko sa estasyonan sa gasolina. Sa akong atubangan, usa ka inahan nga may duha ka gagmayng bata mipalit og $3 nga gasolina ug duha ka mga cone sa vanilla ice cream.
Sa unang pagtan-aw, akong nakita nga gamay ra ang ilang kwarta. Nagtiniil ang mga bata ug gision og mga sinina.
Nakadungog ko sa babaye nga mibutang sa daghang mga sensilyo sa counter aron bayran ang iyang gipalit.
Human ako makabayad sa akong gasolina, migawas ko ug mipasiplat sa sakyanan sa inahan. Daan na kaayo nga model nga kas na og gasolina.
Mibati ko og gamay nga simpatiya niining inahan sa duha ka bata, apan gipaandar nako ang motor ug mipadagan.
Wala kaabut og usa ka minuto sa akong pagpadagan, usa ka tingog akong nadungog: “Tabangi siya.” Ang pag-aghat kaduha miabut.
Naglingo-lingo ko, naghunahuna nga tingali mibiya na siya. Unsay man say akong isulti niya?
Ang tingog miabut nga klaro sa ikatulo nga higayon: “Tabangi siya!”
Mibalik ko sa gasolinahan, naghunahuna kon unsay akong isulti niya kon naa pa siya didto.
Sa pag-abut, nakita nako nga abli ang pultahan sa iyang sakyanan. Naglingkod siya sa may manubila, ug ang iyang duha ka gagmayng bata sa luyo nalingaw og kaon sa ice cream.
Nag-ampo ko, nangutana sa Langitnong Amahan unsay akong isulti. Ang sama nga tingog miingon nako, “Pagpaila sa imong kaugalingon ug pangutan-a kon siya nagkinahanglan ba og tabang.” Miduol ko sa iyang sakyanan ug nagpaila-ila sa akong kaugalingon. Gisultihan nako siya nga akong gibati sa pagpangutana niya kon nagkinahanglan ba siya og tabang.
Misugod siya sa paghilak ug miingon, “Bag-o lang kong nag-ampo ni Jesus, naghangyo Kaniya sa pagpadala og usa ka tawo nga motabang nako.”
Ang Langitnong Amahan mitubag sa iyang pag-ampo. Gipalitan nako siya og gasolina ug mihatag niya og numero sa telepono sa usa sa among elders quorum kinsa nangita og empleyado nianang higayona. Wala ko masayud unsay nahitabo niining batan-ong inahan pagkahuman, apan ako mapasalamaton nga akong gisunod ang aghat sa pagtabang kaniya.