Tudloi Sila sa Pagbasa sa Basahon ni Mormon

Emilien Rioux, Quebec, Canada

Atol sa among pagserbisyo sa Geneva Switzerland Mission, ako gitawag ug gi-set apart nga mahimong presidente sa branch, ug akong asawa gitawag isip presidente sa Relief Society. Naghiusa kami sa pagpaningkamot kutob sa among mahimo sa pagdasig sa nanlimbasug nga branch. Bisan tuod naorganisar niadtong mga 1960, ang branch walay bunyag sulod sa daghang mga tuig ug wala makapadala og mga misyonaryo ngadto sa misyon sulod sa 15 ka tuig.

Klaro kaayo nga kami nagkinahanglan sa tabang sa Ginoo sa pagpangita og solusyon sa daghang mga kalisud nga giatubang sa branch. Human ako nag-ampo mahitungod sa mga hagit sa branch, ang Espiritu sa Ginoo miingon ngari kanako, “Tudloi ang mga miyembro sa pagbasa sa Basahon ni Mormon, ug kamo magmalampuson.”

Diha-diha dayon, mihimo kami og mga plano nga mopasalig ang mga miyembro sa pagsugod sa pagbasa sa Basahon ni Mormon.

Talagsaong mga resulta misunod. Ang Kalinaw ug ang Espiritu mibalik ngadto sa branch. Bag-ong mga pamilya ang nagpamiyembro sa Simbahan. Nadasig sa iyang tinguha sa pagserbisyo, usa ka batan-ong lalaki nagmisyon. Pipila ka nanlimbasug nga mga kaminyoon nalig-on, ug ang mga pamilya nahimong mas suod. Kini nga branch nagpadayon sa pag-uswag karon.

Kami ug ang mga miyembro sa branch nakasaksi sa among mga kaugalingon sa milagroso nga gahum sa Basahon ni Mormon. Tinuod gayud kini nga sukaranang bato sa atong tinuohan ug sa atong mga pagpamatuod sa ebanghelyo ug ni Jesukristo. Gimahal namo kini sa tibuok namong kasingkasing. Tinubdan kini sa walay katapusan ug dili mausab nga kahibalo.

Kini nga kasinatian nagtudlo kanamo nga ang Basahon ni Mormon mao ang labing siguro nga paagi sa pagtabang sa atong mga kaigsoonan mobalhin gikan sa anino sa espirituhanong kangitngit nga mitabon sa yuta. Kini nga basahon nakahatag og kalinaw, kalipay, ug lig-on nga tinguha sa pagsunod sa Manluluwas nga si Jesukristo.