Ang Pagpamatuod ni Ethan
Ang tagsulat nagpuyo sa Utah, USA.
Ingon og sama sa tanan gawas ni Ethan adunay pagpamatuod.
“Paminaw, paminaw. Ang Espiritu Santo mohunghong. Paminaw, paminaw sa hinay nga hinagawhaw nga tingog” (Children’s Songbook, 106).
Si Ethan naglingkod sa sharing time ug mitan-aw samtang ang iyang suod nga higala, nga si Sam, nagpamatuod. Ang iyang higala nga si Sarah naglingkod sa atubangan, nagpaabut sa iyang turno. Naghisgot si Sam mahitungod sa proyekto sa pagserbisyo nga iyang gibuhat. Miingon siya nga siya adunay pagpamatuod bahin sa pagserbisyo. Mihatag si Sarah sa iyang pagpamatuod mahitungod sa mga pamilya. Ang magtutudlo ni Ethan mipamatuod usab. Naghisgot siya mahitungod sa buhat sa templo. Silang tanan mipamatuod nga ang Simbahan tinuod. Ingon og ang tanan gawas ni Ethan adunay pagpamatuod.
“Unsa may akong pagpamatuod?” Naghunahuna si Ethan.
Naghunahuna siya pipila ka tuig na ang milabay sa dihang siya ug ang iyang mga higala nabunyagan. Ang iyang magtutudlo sa Primary, nga si Sister Calder, mihatag og pakigpulong bahin sa Espiritu Santo.
“Ang Espiritu Santo makahatag kaninyo og mainit nga pagbati diha sa inyong kasingkasing. Makatabang siya kaninyo nga masayud sa tinuod,” siya miingon. “Ug mao kana ang paagi aron kamo makaangkon og pagpamatuod sa unsay inyong gituohan.”
Naningkamot si Ethan sa pagbuhat unsa ang matarung aron iyang mabati ang Espiritu Santo. Nagbasa siya mga kasulatan ug nag-ampo. Apan siya wala pay gibati nga kainit sa pagbati nga gihisgutan sa mga tawo. Nagpasabut ba kana nga siya walay pagpamatuod?
Kini nga pangutana nagpabilin sa hunahuna ni Ethan sa pagsunod adlaw. Naghunahuna gihapon siya niini sa dihang siya ug si Sam nag-skateboard human sa klase. Naghunahuna siya unsaon niya sa pagpangutana si Sam mahitungod niini.
“Oy, Sam,” sa katapusan nangutana si Ethan, “nahadlok ka ba sa dihang nagpamatuod ka gahapon?”
Milukso si Sam gikan sa iyang skateboard ug mipaingon sa balilihan. “Wala man,” siya miingon, padulong molingkod. “Gipakigbahin nako ang akong pagpamatuod sa pamilya sa gabii sa wala ang pagpamatuod.”
Milingkod usab si Ethan nagsabak sa iyang skateboard. “Apan giunsa nimo pagkahibalo nga ikaw dunay pagpamatuod?”
“Aw, nag-ampo ko ug mibati ako og maayo mahitungod niini.”
Hinay nga miyango si Ethan ug gipatuyok ang ligid sa iyang kamot. Sa ingon gusto usab siya nga mobati nianang paagiha.
Nianang gabhiona, nga dihang ngitngit ug hilom ang balay, si Ethan miluhod tupad sa iyang higdaanan aron mag-ampo.
“Langitnong Amahan,” siya miingon, “palihug tabangi ko nga makabaton og pagpamatuod. Tabangi ko nga masayud nga ang Simbahan tinuod. Nga si Joseph Smith usa ka propeta. Ug nga ang Basahon ni Mormon tinuod.”
Sa tunga-tunga sa iyang pag-ampo, mihunong si Ethan. Naghunahuna siya sa makadiyot. Dayon nangutana siya sa iyang kaugalingon, “Aw, ako ba dunay nasayran bisan unsa?”
Ug dayon ang usa ka hilum, malinawon nga pagbati miabut kaniya. Dili kadto gamhanan nga mainit nga pagbati. Apan si Ethan nasayud, nga kadto ang Espiritu Santo.
Usa ka hunahuna ang misulod sa alimpatakan ni Ethan: “Ako nasayud nga ako nasayud.” Ug samtang siya naghunahuna mahitungod niini, siya nakaamgo nga siya mibati na niining malinawon nga pagbati.
Matag higayon nga siya mobasa sa Basahon ni Mormon, mibati siya og maayo ug matarung. Karon nasayud siya nga kana nga pagbati mao ang Espiritu Santo nga nagpamatuod kaniya. Sa dihang miadto siya sa simbahan ug mibati og maayo ug matarung nga tua didto, kadto mao usab ang Espiritu Santo. Siya aduna nay pagpamatuod!
Dili kinahanglan nga siya masayud sa tanan karon. Apan siya nasayud nga ang Espiritu Santo tinuod ug makatabang kaniya sa pag-angkon sa iyang pagpamatuod.
Nagsugod sa pag-ampo pag-usab si Ethan. Apan niining higayona mao ang pagsulti og pasalamat.