Mga Profile sa Young Adult
Pagsukod sa mga Panalangin sa Madagascar
Bisan pa sa politikanhong kasamok ug ekonomikanhong mga kalisud sa iyang nasud, si Solofo nagsalig sa mga panalangin nga moabut gikan sa pagsunod sa ebanghelyo.
Mga litrato: ibabaw gihatag ni Solofo Ravelojaona; ubos © iStock/Thinkstock
Human ang iyang asawa nag-antus og subo nga nakuhaan atol sa unang pagmabdos, si Solofo Ravelojaona mibati nga ang ilang mga pag-ampo natubag human sa usa ka tuig sa ikaduha nga pagmabdos. Siya ug ang iyang asawa, si Hary Martine, mikonsiderar nga ang pagkatawo sa ilang anak nga babaye nahimong usa sa ilang labing dako nga panalangin. Si Solofo mipasabut, “Tungod kay kami nangamuyo sa Dios ug Siya mihatag niya ngari kanamo, amo siyang gipanganlan og, Malagasy, nagpasabut og ‘ang tubag sa Dios.’”
Si Solofo, usa ka young adult gikan sa Madagascar, naghupot sa kahibalo nga ang Dios motubag sa mga pag-ampo ug sa panahon nga mopanalangin sa mga matinud-anon. “Ang kinabuhi lisud,” miingon si Solofo, “ug kon dili makuha sa mga tawo ang unsay ilang gusto, ang uban magsugod sa pagpangutana, ‘Nganong nahitabo man kini kanako?’ Tingali mobiya sila sa Simbahan o mokwestyon sa ilang pagtuo sa Dios. Apan kon kita mosunod sa ebanghelyo ug magbasa sa mga kasulatan, mas sayon kini. Kon kamo nagsunod gayud sa ebanghelyo, inyo gayud makita ang mga panalangin.”
Nagpuyo sa usa ka nasud uban sa bug-at nga mga hagit, sama sa tumang kawad-on, kahuyang sa pangagamhanan, huyang nga inprastraktura, ug natural nga mga kalamidad, maklaro nganong nakaingon si Solofo nga lisud ang kinabuhi. Apan alang kaniya, ang mga panalangin nianang pagsunod sa ebanghelyo molabaw pa sa bisan unsa nga kalisud. “Dili gani nako ma-ihap ang mga panalangin nga akong nadawat, samtang ako nagsunod sa ebanghelyo,” miingon siya.
Tungod kay ang Simbahan bag-o sa Madagascar (ang unang branch naorganisar niadtong 1990), si Solofo nag-ingon ang labing lisod nga bahin mahitungod sa pagkamiyembro mao ang mga hungihong ug sayop nga pagsabut mahitungod sa Simbahan. Si Solofo mikomentaryo nga, sama sa panan-awon ni Lehi sa kahoy sa kinabuhi, “ang mga tawo mahimong dili hingpit nga mihangop sa ebanghelyo tungod kay sila mibati nga naulaw atubangan sa ilang mga higala ug nahadlok nga sila isalikway pinaagi sa ilang pamilya.” Unsay nakalahi ni Solofo, ang sugyot niya, mao nga, “wala gayud nako ikaulaw sukad. Nagsunod ko sa ebanghelyo, ug sa kanunay gusto nako kining ipakigbahin sa akong mga kaubanan, bisan og ang uban nila dili gayud interesado.” Kanunay siyang mipakigbahin sa iyang yano nga pagpamatuod, nga ang iyang kauban sa trabaho miangga kaniya og “pastor.”
Taliwala sa ekonomikanhon ug politikanhong kagubot, si Solofo ug Hary Martine misalig sa mga panalangin sa ilang mga pakigsaad sa templo (sila naminyo sa Johannesburg South Africa Temple usa ka tuig human sa ilang mga misyon—siya sa Uganda, si Hary sa Madagascar), ingon man usab sa ilang pagsalig sa Ginoo. “Anaa kanako ang ebanghelyo, ug ibutang lang nako ang akong kinabuhi sa mga kamot sa Dios,” pasabut ni Solofo. Makasalig siya sa iyang lig-on nga pagpamatuod tungod kay aduna na siyay hugot nga pagtuo sa “mga tubag sa Dios.”