Bisan Kon Ikaw Maulawon

Ni Elder José A. Teixeira

Sa Seventy

Salig sa Ginoo, ug Siya mopanalangin kaninyo sa inyong mga paningkamot sa pagpakigbahin sa ebanghelyo.

Sa dihang ako usa ka bag-ong presidente sa misyon sa Brazil, ako nag-interbyu og pipila ka mga elder. Gihangyo nako ang usa sa pagsulti nako mahitungod sa iyang kaugalingon.

“Maulawon kaayo ko,” siya miingon. Nabalaka siya nga ang iyang pagkamaulawon makababag sa iyang pagserbisyo.

Ako nangutana, “Sa imong hunahuna ang Ginoo makatabang kaha nimo nga mahimong usa ka maayong misyonaryo?”

“Nagtuo ko nga ang Ginoo makahimo sa bisan unsa nga butang.”

“Kon mao hatagi Siya og higayon sa pagtabang nimo. Sa imong hunahuna makahimo ka niana?”

“Mahimo nako,” miingon siya.

Kinahanglan kong mokumpisal nga samtang siya mipalayo, naghunahuna ko, “Nan, manghinaut ko nga moepekto unta kini.”

Milabay ang mga semana ug sa wala madugay ang samang mga misyonaryo miabut alang na usab sa interbyu. Niining higayuna ang kompanyon sa maulawon nga elder miingon, “President, wala ko kahibalo unsay imong gisulti kaniya, apan kini nakahimo gyud og kalainan. Maayo na kaayo siyang makigsulti sa mga tawo.” Ug mao nga ako naghinam-hinam sa pagpakigsulti niya pag-usab.

Sa dihang misulod siya sa akong opisina, miduko siya.

“Duna koy maayong balita,” miingon siya. “Maulawon gihapon ko, apan mihangyo ko sa Ginoo nga tabangan ko. Dayon gibuka nako ang akong ba-ba ug misugod sa pagsulti. Ug kahibalo ka ba? Pirme na ni nakong buhaton karon. Wala na gani ko kahinumdom unsay akong gisulti. Ang talagsaong butang mao nga ang mga tawo ganahan niini. Gibati nila ang Espiritu. Maminaw sila nako ug sa unsay akong isulti nila.”

Natingala ko nga makakita sa unsa nga paagi kini nga misyonaryo nausab sa dihang misalig siya sa Ginoo. Nahimo siyang talagsaong instrumento sa pagdala og kalipay ngadto sa daghang mga tawo.

Pagbuntog sa Kahadlok

Kon kita mopakigbahin sa ebanghelyo, usahay kita mobati nga gikulbaan. Apan sa gipakita niining maulawon nga misyonaryo, ang Ginoo mogiya kanato kon kita mosalig Kaniya. Ang Espiritu Santo motabang kanato nga masayud unsay isulti (tan-awa sa 2 Nephi 32:2–3), ug kon ang mga tawo mobati sa Espiritu, sila kanunay motubag sa usa ka positibo nga paagi. Daghan ang maintriga sa unsay atong gituohan ug gustong mas makahibalo pa.

Hingpit nga Kalipay

Duna koy pagpamatuod nga ang Langitnong Amahan mogiya kanato sa atong mga paningkamot sa pagpakigbahin sa ebanghelyo, ug niana nga proseso kita mobati og hingpit nga kalipay. Sa pagkatinuod, kanang hingpit nga kalipay maanaa kanato dili lamang karon apan usab sa kalibutan nga moabut. (Tan-awa sa D&P 18:16.) Maayo kana nga rason sa paggawas gikan sa inyong komportable nga kahimtang ug mobuhat og butang, bisan kamo maulawon.

Tulo ka mga Kahadlok nga Inyong Mabuntog

Gawas sa pagkamaulawon, nakahibalo ko og tulo ka dugang nga mga kahadlok nga maoy makaingon nga kita moingon, “nahadlok ko nga kon ako makig-istorya mahitungod sa ebanghelyo, mawala ang akong mga higala.” Salamat kaayo nga, uban sa hugot nga pagtuo, kadto nga mga kahadlok mabuntog.

1. Wala koy igong kahibalo.

   Kon kamo kulang sa kahibalo mahitungod sa ebanghelyo, ang full-time nga mga misyonaryo makatabang. Makatudlo sila kanato sa mensahe sa Pagpahiuli, makatabang nato sa paglig-on sa atong hugot nga pagtuo diha ni Ginoong Jesukristo, ug makatabang nato nga makasabut sa paghinulsol ug unsaon sa paggamit niini sa atong kinabuhi ug ngano nga ang bunyag ug ang gasa sa Espiritu Santo importante. Laing mahinungdanon nga tinubdan sa kahibalo mao ang Isangyaw ang Akong Ebanghelyo. Ako moawhag sa matag batan-ong lalaki ug batan-ong babaye nga magbaton og kopya ug sa paghimo niini nga kabahin sa inyong inadlaw-adlaw nga pagtuon uban sa inyong mga kasulatan.

2. Wala gyud ko makahimo niini kaniadto.

   Kon kamo kulang sa kasinatian, pagpraktis uban sa mga misyonaryo! Makatabang sila kaninyo nga masayud kon unsa ang isulti o dili isulti sa usa ka piho nga sitwasyon. Samtang kamo mogahin og panahon uban sa mga misyonaryo, kamo mobati sa ilang gugma alang sa ebanghelyo ug sa ilang isigkatawo. Sila nakakaplag og kaisug sa pagpakigbahin sa ebanghelyo; sila makatabang kaninyo sa pagbuhat sa ingon.

3. MAHADLOK AKO sa pagpakigbahin.

   Kon kita mopakigbahin sa atong pagpamatuod, makatabang kita sa atong mga higala nga makakita og mas importante nga mga butang, ug mosugod sila sa pagtahud ug paghigugma kanato sa usa ka lahi nga kahayag. Mahitabo kini hapit matag higayon. Daghang kabatan-onan moingon, “nahadlok ko, apan kon ako mosulti sa tinuod, ang akong higala nagsugod sa pagsalig nako ug pagpangutana og dugang nga mga pangutana.” Dili kita angay nga mahadlok sa pagpakigbahin kon unsay anaa kanato. Bililhon kini kay kini moabut gikan sa Dios. Ug unsay mas maayo nga paagi sa pagpakita og gugma alang sa atong mga higala kay sa pagpakigbahin uban kanila unsa ang atong nahibaloan nga tinuod?