Pagserbisyo diha sa Simbahan
Salamat sa Imong Pagserbisyo
Nagrepresentar kamo niadtong mga kababayen-an kinsa, sukad sa panahon sa Nauvoo, miserbisyo sa usag usa pinaagi sa mahigugmaon ug dinasig nga visiting teaching.
Wala ako masayud sa inyong ngalan, pila ang inyong pangidaron, o bisan unsang butang mahitungod ninyo. Ang ako lang nahibaloan nga kamo ang visiting teacher ni Joann, ug mapasalamaton ako sa inyong makugihon nga serbisyo sa tibuok nakong kasingkasing.
Nasayud ko nga ang pagbisita sa usa ka dili kaayo aktibo nga sister sama ni Joann (ang pangalan giusab), ang akong umagad nga babaye, dili sayon, ilabi na kon siya dili kaayo maabi-abihon. Nagduda ko sa sinugdanan kon ganahan ba kaha siya nga kamo moadto. Apan si Joann misulti nako kamo nahimo niyang tinuod nga higala, pagduaw aron kumustahon siya ug pagdawat sa iyang kahimtang.
Sa 19 ka tuig sukad naminyo si Joann sa akong anak nga lalaki, mao kini ang unang higayon nga naghisgut siya nga adunay visiting teacher. Bag-ohay lang iyang gisulti kanako kon unsa ka kamakanunayon ang inyong pagbisita ug unsa ka mahunahunaon ug kamabination ninyo. Miingon siya nga gitabangan ninyo siya sa makadaghang higayon sa dihang siya nasakit ug mitanyag pa gani sa pagdala sa akong apo nga babaye ngadto sa Young Women.
Sa miaging 10 ka tuig, siya, akong anak nga lalaki, ug ang ilang pamilya nagpuyo gatusan ka mga milya gikan kanamo. Nag-ampo ako nga ang uban mohigugma ug moatiman kanila sama sa akong gibuhat, ug naghilak ako nga nangamuyo sa Langitnong Amahan nga ang uban motabang kanila ingon nga ako mohimo kon nagpuyo lang unta sila sa duol. Sa unsay gisulti ni Joann, kamo ang tubag sa akong mga pag-ampo.
Bisan kon si Joann ug ang akong anak nga lalaki wala magtuman sa Pulong sa Kaalam ug dili motambong sa simbahan, maayo gihapon sila nga mga tawo ug gihigugma nila ang ilang mga anak. Sa bisan unsang paagi ang inyong pagtan-aw wala maimpluwensya sa pagpanigarilyo ni Joann. Wala kamo maghukom kaniya kon nagtambong ba siya sa simbahan. Kinahanglan inyo siyang makaila ug masayran nga siya usa ka mahigugmaon nga inahan kinsa gusto nga ang iyang anak nga babaye motambong sa simbahan ug makaangkon og pagpamatuod. Ug sa dihang naoperahan si Joann, nagdala kamo og panihapon imbis maghunahuna kon siya ba ang nakaingon sa ubang problema sa iyang panglawas.
Pagkamapasalamaton nako nga kamo ang usa ka ehemplo alang sa akong apo nga babaye. Makatan-aw siya ninyo isip usa ka tawo kinsa nag-amuma sa tanan ug mogawas sa iyang nahimutangan aron sa pagpakita og mahigugmaong pagpakabana. Miingon siya nako nga usa ka adlaw sa dihang wala kamoy sakyanan, inyong gilakaw ang kapin sa usa ka milya ngadto sa iyang balay uban sa inyong gagmay nga mga anak aron sa pagdala og cookies.
“Naghunahuna ko nimo ug sa imong mama ug gustong mobuhat og maayong butang alang nimo—gayud lang,” ikaw misulti kaniya.
Hinaut akong masulti ninyo kon unsa ko kamapasalamaton sa inyong kamahalaron ngadto sa inyong calling isip visiting teacher. Nagrepresentar kamo niadtong mga kababayen-an kinsa, sukad sa panahon sa Nauvoo, miserbisyo sa usag usa pinaagi sa mahigugmaon ug dinasig nga visiting teaching. Gipakita ninyo kana nga pagserbisyo ug paghigugma pinaagi sa mapinanggaong pagbisita sa akong dili kaayo aktibo nga umagad nga babaye.
Salamat.