Pagkahikurat, Kaguol, ug ang Plano sa Dios
Ang tagsulat nagpuyo sa Albania.
Atol sa labing makahugno nga kasinatian sa akong kinabuhi, mibati ko nga giubanan ako sa Langitnong Amahan panahon sa akong tibuok panaw.
Paghulagway pinaagi ni David Curtis
Sayo kadto sa buntag niadtong 2008 sa dihang ang akong mama mipukaw nako aron sa pag-eskwela. Malipayon gayud ko nianang buntaga, apan wala ko nakahibalo nga mabali kini ngadto sa kinangil-aran nga adlaw sa akong kinabuhi o ang katapusan nga adlaw nga ikauban ko siya. Wala nako nahuman ang akong mga klase nianang adlawa kay ang usa ka higala mikuha nako ug gisultihan ko nga ang akong mama nagpakamatay. 12 anyos pa lang ako.
Naghunahuna ko, “Kon unsaon nako pagkabuhi kon wala akong mama?” Siya ang akong suod nga higala.
Sulod sa pila ka bulan naghilak ko. Dili ko ganahan nga moeskwela tungod kay lahi ang pagtratar sa ubang mga bata ngari nako ug mibati og kalooy kanako. Wala ko kahibalo unsay angay kong buhaton; ang ako lang nahibaloan nga kinahanglan ko nga maglig-on alang sa tanan.
Usa ka adlaw, human sa lima o unom ka bulan gikan sa pagkamatay sa akong mama, nag-inusara ko sa akong lawak tungod sa bintana, naghilak, naningkamot sa pagsabut kon unsay akong tuyo dinhi. Sa kalit lang nakadungog ko og tingog sa akong hunahuna: “Ikaw akong anak nga babaye, dili nako itugot nga mag-antus ka.” Nasayud ko nga mao kadto ang Dios. Apan natingala ko niini tungod kay wala na ko mituo Kaniya, ilabi na akong gibati nga ang Dios mao ang nagkuha sa akong inahan gikan kanako. Bisan og wala ko masayud unsa ang Iyang ipasabut, mibati ko nga luwas.
Tulo ka tuig ang milabay miadto ako sa Rome, Italy, aron mobisita sa akong tiyo. Permi niyang gisulti nako ang mahitungod niining simbahan nga iyang adtoan. Usa ka Dominggo, iya kong gipauban kaniya. Kanunay nakong mahinumduman nga naglakaw paingon sa pultahan sa simbahan sa unang higayon ug mibati sa gugma sa Langitnong Amahan sa dihang ako misulod. Kini ingon og panimalay.
Misugod ko sa pagsimba kada Dominggo ug sa matag kalihokan sa semana. Ganahan ko nga makig-uban sa mga kabatan-onan sa Simbahan. Sila nakahimo kanako nga mas malipayon. Naghunahuna ug nagtuo sila sa samang mga butang nga akong gituohan. Dayon, human sa tulo ka bulan, nahumana ang akong holiday sa summer ug gikinahanglan na nakong mobalik sa Albania.
Dihang miuli ko, akong gisultihan ang akong papa kabahin sa mga pagbati nga akong naangkon sa tanan nga panahon. Wala siya ganahi niini. Miingon siya nga nako nga dili siya mosugot nga magpadayon ko sa pagsimba o magkat-on pa ug dugang mahitungod niini. Busa kinahanglan ko nga magpailub sulod sa tulo ka tuig hangtud nga mag-edad ko og 18. Dayon makahukom na ko alang sa akong kaugalingon ug magpabunyag.
Atol niining panahona ako napanalanginan og daghan kaayong mga tawo nga mosulti kanako mahitungod sa unsay ilang nakat-unan matag Dominggo sa simbahan. Usa niadtong mga tawhana mao si Stephanie. Nagpuyo siya sa Italy sa dihang ang akong tiyo nagpamiyembro sa Simbahan, apan mipauli siya sa iyang panimalay sa Estados Unidos. Ang akong tiyo naghunahuna nga maayo alang kanamo nga magsinulatay sa usag usa, busa ako siyang gidugang isip higala diha sa Facebook.
Bisan tuod wala pa kami magkaabut, kanunay gyud kong mapasalamaton kaniya sa pagtabang kanako sa pagtukod sa akong hugot nga pagtuo ug pagkat-on og dugang mahitungod sa ebanghelyo ni Jesukristo. Misulat siya nako hapit kada Domingo ug misulti nako sa tanang butang nga iyang nakat-unan sa simbahan ug dayon mitubag sa akong mga pangutana. Siya usa ka talagsaon nga higala ngari kanako.
Sa katapusan, human sa mga tuig nga pagpailub, nabunyagan ko duha ka adlaw human sa akong ika-18 nga adlawng natawhan. Ug sa wala madugay akong gipakigbahin sa akong inahan ang kalipay nga akong gibati nianang adlawa, tungod kay ako ang magpabunyag alang kaniya. Nasayud ko nga mahimo siyang mapasigarbuhon sa kinabuhi nga akong gipili.
Mibati ko nga napanalanginan sa Langitnong Amahan tungod kay Siya nag-uban kanako sa tibuok nakong panaw sa daghan kaayong mga paagi. Kinahanglan lang ko nga maghulat ug magmapailubon tungod kay Siya adunay plano alang kanako. Siya ang mihatag kanako og kalig-on sa paglahutay sa tanang mga hagit nga akong giatubang. Anaa Siya kanunay, nagtabang kanako nga mas magmalipayon.