Ko Hono Fakamanatua Hotau Fakamoʻuí ʻi he Taimi Kilisimasí

Hangē ko e fakalea ʻo ha foʻi hiva ʻiloa, ko e Kilisimasí ʻa e “taimi fakalata taha ʻo e taʻú!”¹ Ka ʻi he taimi ʻe niʻihi, ʻi he lotolotonga ʻo ʻetau fakavavevave ke kumi ha ngaahi meʻaʻofa, palani ha paati, mo teuteuʻi hotau ngaahi ʻapí, ʻoku faingofua ke ngalo ʻa e ʻuhinga moʻoni ʻo e faʻahitaʻú. ʻI he ngaahi talanoa ko ʻení, ʻoku vahevahe ai ʻe ha kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimuí Ni ʻi he Pasifikí ha ngaahi tukufakaholo fakafāmili mo ha ngaahi manatu melie makehe ʻoku tokoni ke ʻai hotau Fakamoʻuí ko e meʻa mahuʻinga taha ʻo ʻenau ngaahi fakafiefia ʻi he Kilisimasí.

Meia Sisitā Phyllis Marshall

Uooti Massey Park, Siteiki Auckland Papatoetoe

ʻI heʻeku hoko ko ha faʻē kei siʻí, naʻá ku fakatokangaʻi ʻa e fakaʻau ke lahi ange ʻa hono fakaʻaongaʻi ʻo e Kilisimasí ki he fakapisinisí ʻi he taʻu takitaha. Naʻá ku manako ʻi he ngaahi teuteu mo e mūsika naʻe tā ʻi he ngaahi falekoloa lalahí pea ʻi he letioó, ka naʻa nau ʻomi ha ngaahi fakakaukau fakapoto ʻo e meʻa ʻoku totonu ke tau fakataú, fōtunga hotau ngaahi ʻapí mo e meʻatokoni ʻoku totonu ke tau maʻú. Naʻe ʻikai ke nau fekauʻaki kinautolu mo e ʻaloʻi ʻo e Fakamoʻuí, ʻa ia ko e ʻuhinga totonu ia ʻo e faʻahitaʻú. Ko ia ai, naʻá ku pehē mo hoku husepāniti ko Simí ʻi ha taʻu ʻe taha ke ma ʻahiʻahiʻi ha meʻa. ʻI he pongipongi Kilisimasí, naʻe ʻā hake ʻa e fānaú ki ha meʻaʻofa pē ʻe tolu ʻi he lalo ʻakaú pea mo ha fakamanatu ʻo hono maʻu ʻe hotau Fakamoʻuí ha meʻaʻofa pē ʻe tolu mei he Kau Tangata Potó. ʻI he ngaahi taʻu hoko maí, naʻá ma ʻahiʻahiʻi ai ha ngaahi founga kehe ke fakatefito ʻa e tokanga ki he Kilisimasí ʻia Sīsū Kalaisi. Naʻe kau heni ha foaki meʻaʻofa fakapulipuli, ʻa ia naʻa mau ʻave ai ha puha ʻo ha ngaahi meʻaʻofa mo ha meʻatokoni ki ha fāmili faingataʻaʻia, tukituki ʻi he matapaá pea mau lele ʻo toitoi. Naʻá ma kamataʻi foki mo ha ngaahi fakataha lotu ʻi he pongipongi Kilisimasí naʻe fakahoko ai ha ngaahi hiva mo ha lotu pea mo hono lau ʻi he loto-ʻapasia ʻa e talanoa faka-Tohi Tapu ʻo e ʻaloʻi hotau Fakamoʻuí. Kuo hoko ha niʻihi ʻo e ngaahi ʻekitivitī ko ʻení ko ha ngaahi tukufakaholo tuʻuloa, pea kuo nau liliu ʻa e founga ʻoku mau fiefia mo fakamanatua ai ʻa e Kilisimasí.

Meia Bree-Ell Rangi

Uooti Alfriston, Siteiki Auckland Manurewa

Ko e tukufakaholo ʻoku ou maʻu mo hoku fāmilí ʻi heʻemau fakamanatua ʻa e Kilisimasí, ko ʻemau ʻā hake ʻi he pongipongi Kilisimasí ʻo lau ʻa e talanoa ʻo hono ʻaloʻi ʻo e Fakamoʻuí. ʻOku mau aleaʻi ʻEne mahuʻinga kiate kimautolú, ko e ngaahi feilaulau naʻá Ne fakahokó mo e ngaahi tāpuaki kuó Ne foaki maʻamautolú.

ʻI he kotoa ʻeku moʻuí, ʻi he Palaimelí mo e Toʻu Tupú, kuó u fiefia maʻu pē ʻi he ngaahi manatu melie ʻo e Kilisimasí ʻa e taimi feohi fakalata mo hoku fāmilí mo e kāingá. Ko e manatu melie ʻe taha ʻoku ou fiefia taha aí ko e taimi naʻe foaki mai ai ʻe heʻeku kui fefiné kiate kimautolu takitaha fānaú ha meʻaʻofa. Naʻá ne kofu fakalelei ʻa e meʻaʻofá, pea ʻi heʻeku fakaava hake iá, naʻá ku ʻohovale ke sio ki ha tohi. Naʻe ʻikai ko ha toe tohi ange, ka ko e Tohi ʻa Molomoná. Naʻe ʻikai mahino lahi kiate au ʻi he taimi ko iá ʻa e mahuʻinga ʻo e meʻaʻofá ni. Naʻá ku toki ʻilo kimui, ʻi heʻeku tupu ʻo fuʻu lahi angé, ʻa e lelei ʻoku maʻu ʻi he meʻaʻofa ko ʻení. Kuo teʻeki ngalo ʻa e manatu melie ko ʻeni ʻo ʻeku kui fefiné. Naʻa mo ʻeku kei taʻu siʻí, naʻá ne fakatōloloto ʻa e ongoongoleleí ki heʻeku moʻuí. Kuo fakamālohia ʻe he sīpinga mo e ʻofa naʻá ne maʻu ki he Fakamoʻuí ʻa ʻeku tuí mo e fakamoʻoní.

ʻOku ou ʻilo ʻoku moʻui ʻeku Tamaí, ko Sīsū ʻa e Kalaisí, pea kuó Ne toe tuʻu Ia. ʻOku ou fakamoʻoni kapau te ke fekumi ki Heʻene ʻofá ʻi he ngaahi taimi ʻo e vaivaí, te Ne foaki kiate koe ha mālohi . . . Ke hoko mai ʻa ia ʻe hoko maí. ʻOku ou tuku ʻeni mo kimoutolu ʻi he huafa ʻo Sīsū Kalaisí, ʻĒmeni.