“Tera ae I kunea Ngke I Katokai man Bwaai n Reitaki,” Riaona, Maati. 2024.
Tera ae I kunea Ngke I Katokai man Bwaai n Reitaki
Kakerikaakan kabonganaan bwaai n reitaki a karekea nakoiu reken au tai irarikiia natiu ao ni kanakoraoa au reitaki ma te Tia Kamaiu.
Kamataata n te tamnei iroun David Green
Tabeua te ririki n nako, I ataia bwa e tuangai te Atua bwa N na kararoaai man te bwai n reitaki n te intanete. I ataia bwa katokau man bwaai n reitaki a bon rangi ni manena ibukiu, ma I ataia naba bwa I karekea te kukurei n te reitaki ma raou ake I karekeia iai. I aki konaa n ataia bwa N na kanga ni bairei bwaai aika uoua aikai; I bon ti ataia bwa e riai ni iai te bitaki.
I wareka te boki are e karikai bwa N na iangoa raoi te titiraki aio, “Maanra te tai ni kabonganai bwaai n reitaki ae tau mwaitina n uaana nakoia kain te komiuniti, n akea mwiina ni kabane aika a aki raoiroi?” I bon irou, te kaeka nakon te titiraki aei bwa 20 te miniti … n te namwakaina. I katea au kouru bwa e na koro nanon aei, ao man ana ibuobuoki te Uea, e rangi ni bebete nakon are I a tia ni iangoia mai i mwaaina. Te bwai ae I aki kantaningaia bwa mwaitira man te bitaki aei ae kona ni kakorakoraa au reitaki ma au tia Kamaiu. I a namakina riki ana tangira au Tia Kamaiu ibukiu; I a oota riki n Ana babaire ibukiu; ao I a noora riki kainanoia aomata ake irarikiu.
Tai Karika Rawean Tamnei Bwa e na Kaota Aron Kakawakiu
I ataia n taainako bwa Ngai bon natin te Atua ao E tangirai. I a tia n namakina ana tangira au tia Kamaiu i nanon taai ni kangaanga i nanon maiu. Ma e mwaiti te tai ae I karika te bwai n reitaki bwa e na baireia aron tarakiu ao te iango iaou. E ngae ngke I kataia ni bon kakoauaa irou bwa tamnei aika a nakoraoi iaon bwaai n reitaki a aki rotai, ma ngaia a bon rootai. Kauarerekean au tai n te bwai n reitaki e anganai raun au iango ao te aki kakarongoa are I kainnanoia n ongo bwanaan te Tia Kamaiu n tuangai Ana namakin ibukiu. I aki ataia ae e a rangi ni mwaiti kabuaan ongoraau nakon Bwanaana ni karokoa I karekea riki au tai ae mwaawa bwa E na mena iai.
I kakoaua n taainako te babaire ni kamaiu. I ataia bwa Iesu Kristo bon oin te babaire anne. Ma I kakoauaa naba bwa iai ana babaire ibukira n tatabemaniira Tamara are i Karawa. Larry M. Gibson, te Moan Kauntira ngkoa n te Beretitentii ni Kabuta n te Botaki n Ataeinimwaane, e reirei, “I ataia bwa e korakora raraoman Tamara are i Karawa ibukira n tatabemaniira nako ao n iai oin ana babaire ibukira ni karekea ara tabo i karawa.”1
I a tia ni kabanea te tai ae mwaiti ni kataia ao ni kunea bwa tera te kaantaninga ibukiu. Kabanean au tai iaon bwaai n reitaki e karekea nakoiu nneu are I konaa iai n noori karikibwai ni kabane, bwaai aika a kamiimi ake a karaoaki irouia aomata. A bati bwaai aika I karekea mairouia aomata aikai, ma e mwaiti riki te tai are I kabanea n ukeuke nakon karaoana. Man te tai are I kararoaai man bwaai n reitaki, I a tia n namakina kairakiu N ataia bwa tera ae tangiria bwa N na karaoia Tamau are i Karawa. A rangi ni mwaiti bwaai aika a rangi ni kakuba ao ni kaokoro man ake I a tia ni iangoia, ma a tia ni kaona maiu ni bwaai aika a tamaroa man mwaiti.
E roko te Tia Kamaiu bwa ti aonga n karekea te maiu ao e na bati n reke ae e mwaiti riki irouira (taraa Ioane 10:10). I kakaitau n ana wirikiriki te Tamnei ae Raoiroi are e anganiira ni buokira bwa ti na karekea ae mwaiti ni maiura.
Te Maiu i Aon Riki te Tikuriin
Te Tia Kamaiu E nooria ake aki tabeakinaki ke n noonoraki. I tatangira warekan karakinana n karaoan ana mwakuri ni ibuobuoki nakoia aomata ao n reiakiniia aroia ni kororaoi. Kabanean te tai ae bati n bwaai n reitaki e totokoai man noorakia aomata i nanon maiu, ni ikotaki ma au utu. I ataia bwa ngkana natiu aki namakina kakawakiia irou, a na waekoa n tarataranako nakon te aonnaba n nora kakawakiia iai.
I rangi ni miimi n au tangira ae i rou ibukia natiu ngkai e a bati riki au tai ma ngaiia. I tangira riki tibwangau bwa te tina n te ririki ae nako nakon taai ake mai i mwaaina. I a rikirake n ataia riki kaain rarikiu ao ni kakamwakuri riki n au komiunite. E a rikirake riki au tai ni karaoa au beku ni ibuobuoki. I taku ngkoa bwa bwaai n reitaki e buokai n atai bwaai aika riki, ma ni bon koauana e aki tau au tai n noora raoi kainnanoia ake a mena i rarikiu.
E taraa n ae kauarerekean kabonganaan te bwai n reitaki bon te bwai ae uarereke man bebete, ma e karekea nakoiu korakoran rikiraken au onimaki ao n kanakoraoa reitakiu ma au Tia Kamaiu. I ataia bwa e tangiriira Tamara are i Karawa, iai ana babaire ibukira, ao iai natira ake a kainnanoa namakinan nooraia iroura naba.
E maeka te tia korokaraki i New York, USA.