Bwanaaia Aika Itiaki ni Boong aika Kaitira

Taiaoka Kamaiua Tinau

Iroun Christi Gerlach, Utah, USA

I rangi ni maaku ngke e kainnanoa te korokoro nakon buroona tinau, ma e reiakinai n tataro au tia reirei n te Buraimwarii ae kakaonimaki.

Christi Gerlach ao tinana

Kariaia n te tamnei iroun te tia korokaraki

Ngke 10 au ririki, e reke aorakin te buro ae kaakaiaki iroun tinau. E tiku n te onaoraki ibukin marurungina i nanon wiiki aika a mwaiti.

I nanon te tai aei, au tia reirei n te Buraimwarii, Titita Ellen Johnson, e roroko ni mweengau teuana te tai n te wiiki n noonorai. I a bon tibwa kaaina te Buraimwarii ao ni karako ootau n te euangkerio. E kakaota ana koaua Titita Johnson ni katoa wiiki nakoiu ao ni marooroakina te tataro. E reiakinai bwa ngkana I tataro, e na kaeka au tataro Tamau are i Karawa.

I mwiin tabeua te wiiki, e a kekerikaaki marurungin riki tinau. Iai te kangaanga nakon buroona ike e a tangira te korokoro. E taku ana taokita bwa e kona ni mate n akean te korokoro nakon buroona. Katautaun maiuna, bon, ti 50/50.

E bon boou ao ni karuanikai te korokoro ni kaukan te buroo ni moan 1960 tabun. A iangoia taan korokoro bwa a na korea tinau mai bwabwaana nakon riin nukana mai nuukana ao i mwiina ni kauka riinkaokaona bwa a aonga n roko ni buroona. A mwaiti aoraki aika a aki maiu n te korokoro. I rangi n rootaki nanou ao ni maaku ngkana e na mate tinau.

E babane ana tai tamau n ana makuri ke n te onaoraki i rarikin Tinau. E tararuaai ma mwaneu, Pam, tariu ae e ikawai riki. N te tairiki, I namakina te maroaa ao te maaku, ma I iangoa are e a tia n reireinai Titita Johnson ibukin te tataro. I aki toki ni katorobubua i rarikin au kainiwene ao n tang, ni bubutia Tamau are i Karawa bwa e na kamaiua tinau.

N teuana au tataro ae I tangi iai, e roko i aou te rau ae korakora ao e toki tangiu. I namakinna bwa a na bane n NAKORAOI bwaai ni kabane. I namakina te kakoaua ba e na maiu tinau ao n noorai ni ikawairake ao N naaki riai n raraoma. I aki ongo te bwanaa ke n noora te mii ni burabeti; kaantaninga, ma e reke irou te mabu, ao namakinan te rau. I aki raraoma iai. E a tia ni kaeka au tataro Tamau are i Karawa, ao I bon ataia.

Kamataata n te tamnei iroun Alex Nabaum

E maiu tinau man te korokoro. E maamara ao n aoraki n angiin maiuna, ma e a tia ni kaekaa au tataro Tamau are i Karawa ao ni kamaiua. E noorai ni ikawairake, ni mare, ao n reke natiu.

Ririki i mwiina, ngke e riki n Abotoro Beretitenti Russell M. Nelson, e tuangai tinau bwa bon ngaia te tia korokoro n te buroo are e kamaiua. I korea au reta ni karabwaa. Ngke e koroboki rikaai, e karabwaai ibukin au reta ao ni kaaitaua te Atua ibukin ana mwakuri.