Bwanaaia Aika Itiaki ni Boong aika Kaitira

Te Nanoanga 25 te Ririki i Mwiina

Iroun Mike Collins, California, USA

I kakaitau bwa te Atua e kabongana te reta ni mwakuriia Ana nanoanga.

Kariaia n te tamnei iroun te tia korokaraki

I nanon au tai n reireia te tieminari n te karangaina teuana i Eureka, California, USA, I titirakiniia au ataei bwa a na iangoia i bon irouia 10 te ririki n taai aika a na roko. I mwiina I tuangiia bwa a na korea te reta ma aia kakoaua n te euangkerio ao bwaai riki tabeua are a kan tibwaia n rongorongoia ngkoa. I tuangiia bwa N na meerina taian reta i nanon 10 te ririki man te tai anne.

E a nako te tai ao I aki kanakoi reeta akekei. Teuana te bong 25 te ririki i mwiina, e kunei reeta Heidi natiu te aine ao n titirakinai taekaia. I mwiin kabwarabwaraakin au iango are I angoia ngkoa, e kakaei aia atureti au ataei ngkoa akekei man kabonganaan te bwai n reitaki n te intanete.

Kamataata n te tamnei iroun Alex Nabaum

I mwiina ngke e a tia n meerinii taian reta, ti karekei kaeka aika a rangi n tamaroa. E koreia temanna au ataei n te tieminari:

“I tangiria bwa e na ataia tamam bwa iai bukina ngkai e a tibwa kunei reeta akanne. E korakai ma ana kakoaua natiu te aine ae 18 ana ririki ao e namakinna bwa te riki ni kororaoi irouia Aika Itiaki ni Boong aika Kaitira bon tiaki ibukina. E aki tibwai ana namakin ma ngaira. “E bon rangi ni kangaanga.”

Au ataei ngkoa aei, e rootaki ni bwaai ake e koreia natina te aine n ana rongorongo n te intanete, e taku:

I ataia bwa N na riai n marooro ma ngaia ibukina. N taainako, ngkana ti marooro, e kaota te un ni moana ao ni kaaitara, ao n akea te bwai ae taekinna. I anganna au reta ao tuanga bwa e na warekia.

“I ataia bwa e kaokioka warekan te moan barakurabe tabeua te tai. I koreia iai bwa I aki ataia ngkana I ataia bwa iai au kakoaua, ao bwa rikiu bwa Ae Itiaki ni Boong aika Kaitira e rangi ni bubura nakoiu ao tao bon tiaki ibukiu.

“E moana tangina natiu te aine. I tangiria bwa e na ataia bwa I rangi n oota n te bwai ae korakai iai. E na bon aki kakoaua n akean te reta anne! A kounako tabeua man ake e a tia n rootaki iai, I namakinna ni koaua bwa rokon te reta n taina aei bon te nanoanga n tangira. Ngke arona bwa I karekea 10 te ririki n nako, N na bae n tia ni karenakoa ao ni bua! Taiaoka karabwa tamam ibukin korean reta akanne ao ni mwanuokin i nanon ririki aika a tia n nako! Akea te bwai ae manennati.”

E tararuaia Ana tiibu Tamara are i Karawa ae tatangira, ao n oin Ana tai ae kamiimi, E kona ni mwakuriia ana nanoanga n tangira ao kakai i nanoia aomata n tatabemaniia n kaokiia ake a tia ni bua man te nanai.