“Te Tia Kamaiu ibukia Aomata ni Kabane, te Euangkerio ibukia Aomata ni Kabane,” Riaona, Maati 2024.
Te Tia Kamaiu ibukia Aomata ni Kabane, te Euangkerio ibukia Aomata ni Kabane
Te euangkerio, Mwakuri ni kamaiu, ao Mangautin Iesu Kristo e kakabwaia natin te Atua ni kabane.
Kristo ao te Mwaane ae Nakibaina, iroun J. Kirk Richards, e na aki karaoaki katotongana
Ana euangkerio Iesu Kristo ae kaokaki bon, te moan, ae rang ni kakawaki, n aki totoki, e kuneaki iai te kukurei ae akea tokina, te rau ni koaua, ao te kimwareirei ibukia aomata n tatabemaniia nako n boong aika kaitira. Kakabwaia are e raanga man te euangkerio ao man ana nanoanga Kristo ae akea tiana tiaki ibukia ti tabeman aika a rineaki, man boong ake rimoa , ke ni boong aikai.
E aoria ngke ti aki namakina te mwengaraoi, ao buure ake a kararoaira mairouna n te tai teuana, e tuangira ara Tia Kamaiu bwa “e arora baina [nakoira] i nanon te bong ae bwanin” (Iakobwa 6:4), kaoira ni kabane bwa ti na roko i Rouna ao n namakina Ana tangira.
Kakabwaia n te Euangkerio ibukia Aomata ni Kabane n te Aonnaba
E a tia ana euangkerio Iesu Kristo “ni kaokaki ni boong aika kaitira bwa e na kaaitara … kainnaoia aaba ni kabaneia, reeti, neewe, ao aomata n te aonaaba.”1 Te euangkerio e tauraoi nakoia aomata ni kabuta te aonaaba ao reeti nako n reireia bwa aomata “titebo aroia ni kabane imatan te Atua” (2 Nibwaai 26:33).2 E tei ana Boki Moomon bwa te kakoaua ae kakaawaki n te koaua aei.
Te rekooti ae korakora aei e taekinna ae Kristo e uringiia aaba ni kabane (taraa 2 Nibwaai 29:7) ao ni kaoti “nakoia aika a kakoaua, … [ao ni mwakurii] kakai aika a korakora, kanikina, ma kamiimi ibuakoia natiia aomata” (2 Nibwaai 26:13). Ibuakon kamiimi aika a korakora aikai, kanikina, ao kamiimi bon kabutanakoan te euangkerio. Ngaia are, ti kanakoia mitinare ni kabuta te aonaaba ni kakoauaa te rongorongo ae raoiroi. Ti tibwaua naba te euangkerio ma aomata ake a uakaan ma ngaira. Kammwakuran kiingin te nakoanibonga ae kaokaki ibukiia aika a maiu ao ake a mate e kamatoaa bwa bwaninin te euangkerio e na tauraoi nakoia natiia kaaro ake i karawa aika naati mwaane ni kabaneia ao naati aine—ngkoa, ngkai, ao nakon taai aika a na roko.
Boton te euangkerio aio—are oin aia rongorongo ni kabane burabeti ma abotoro ake a weteaki nakon te mwakuri—bwa Iesu bon te Kristo ao E roko bwa e na kakabwaiaia aomata ni kabaneia. Ngkai kaain Ana Ekaretia Iesu Kristo Ibukiia Aika Itiaki ni Boong aika Kaitira, ti katanoata bwa Ana anga karea ni kamaiu bon ibukiia aomata ni kabane n te aonaaba.
Kainanoan te Mwakuri ni Kamaiu ae Akea Tiana
N au tai ni kawari aba ni kabuta te aonnaba, I karaoi intawiu ma membwa n te Ekaretia man aaba aika a kakaokoro. E rotaki nanou n ongo aia namakin n taian kakabwaia inanon maiuia man ana Mwakuri ni Kamaiu Iesu Kristo, e ngae ngke a kaotia ae iai aia bure mai imwaaina. Ai tamaroara bwa te karaunano man Ana Mwakuri ni Kamaiu ni kaitiaki e tatauraoi n taainako ibukira ni kabane!
“E na riai ni iai te mwakuri ni kamaiu,” e taekinna Amureki, “bwa ngkana akea ao aomata nako a na bane ni mate.” Ti na bon “bwaka ao …bua, … ma ti ngkana a rinanon te mwakur ni kamaiu,” are e kainanoa “te anga karea ae akea tiana ao akea tokina.” Ngaia are “bon akea te bwai ae aki kainnanoa te mwakuri ni kamaiu ae aki totoki are e na kona n tau ibukin buren te aonaba” (Aramwa 34:9, 10, 12).
E reirei naba te burabeti ae Iakobwa bwa ibukin ae “e reke te mate nakoia aomata ni kabane, … e riai ni iai te mwaaka ni mangauti” ni karokoira i matan te Atua (2 Nibwaai 9:6).
E riai n tokanikai te aba man te bure ao te mate. Aio bon Ana mwakuri te Tia Kamaiu, are E ninikoria ni kakoroa nanona ibukiia ni kabane natin te Atua.
Ketetemwane, iroun J. Kirk Richards, e na aki katotongaki
Ana Anga Karea Ara Tia Kamaiu
N ana kabanea n tairiki i aon te aba, E rin n te Onaroka i Ketetemwane Iesu Kristo. Ikekei, E katorobubua ibuakon aroka aika oriwe ike e a moana iai korakaina ae korakora are ti aki konaa ni kabootaua ngai ma ngkoe.
Ikekei, are e moana katokaana i aona aia bure kaain te aonnaba. E namakina te maraki ni kabane, uruaki n nano, ao rawawata, ao E rinanon te rawawata, ao te korakai are e reke iroum, ngkai, ao ni kabane aomata ake a tia n maeka ke ana maeka n te aonnaba. Te karawawata ae korakora ao akea tiana “are e karekea [Nakoina], … te kabanea ni korakora, bwa e na ruru ibukin te maraki, ao n wawanako te rara man bwangabwangan kunna” (Reirei ao Berita aika Tabu 19:18). Bon ti Ngaia ae kona n karaoa aio.
Bon akea riki temanna ae tau
Ni kabooa mwiin te bure.
Bon ti ngaia ae konaa ni kauka te mataroa
I karawa ao ni kariniira iai.3
I mwiina ao e uotaki Iesu nako Korokota, ao inanon te waaki ae aki riai ao n eti n rongorongon te aonaaba, E tauraki n te kaibangaki. Bon akea ae konaa n anaa Maiuna mai Irouna. Ngkai Ana Riki Temanna te Atua, Iai mwaakana i aon te mate n rabwata. E konaa n tataro nakon Tamana, ao anera aika a bati a kona n roko n totokoa Korakaina ao ni kaota tautaekana i aon bwaai nako. “Ma e na iraanaki iai ni kakoauaaki koroboki aika a tabu,” E titiraki Iesu n tain Kamwaneakina, “bwa a na roko baikai?” (Mataio 26:54).
Man ongotaekana ae kororaoi nakon Tamana—ao ana tangira ae kororaoi ibukira—Iesu E kukurei n anga Maiuna ao ni kakoroa nanon ana anga karea ni kamaiu ae akea tiana, are e karekeaki ma ngkoa ao ni waakinako n akea tokina.
Ana Tokanikai Ara Tia Kamaiu
E anga te tua nakoia Ana Abotoro Iesu bwa a na reitaanako Ana mwakuri i mwiin Matena. Ana kanga ni karaoa anne? Tabeman mai buakoia bon taan akawa, ao bon akea ae reiakinaki i nanon tinakoke ibukin te mwakuri. N te tai anne, ana Ekaretia Kristo e taraa n ae n tokina e na bon maunanako. Ma a kunea te korakora Abotoro ni buokiia ni weteaia ao ni katea rongorongon te aonnaba.
Tera ae karika reken te korakora man te mamaara ae ai aron anne? E taku te tia kairiiri n te aro ae te Anglican ao te tia rabakau ae Frederic Farrar: “Iai teuana, ao bon ti teuana koauan te kaeka—te mangauti man te mate. Bitaki aika korakora aikai a bon riki man mwaakan mangautin Kristo .”4 Ngkai taan kakoaua n utin te Uea, a ataia Abotoro bwa akea te bwai teuana ae kona n totokoa rikiraken te mwakuri aei. Aia kakoaua bon ngaia boton kakorakoraakiia ngkai te Ekaretia are rimoa e kaitarai kangaanga ni kabane.
Ni bongin te Itita aei, Ngai ana tia kakoaua ae katabuaki, I katanoata bwa n teuana moaningabongin te Tabati ngkoa, e uti man te mate te Uea ae Iesu Kristo ni kakorakoraira ao n urua ana kabaebae te mate ibukia aomata ni kabaneia. E maiu Iesu Kristo! Bwa Ibukina, te mate bon tiaki tokira. Akea boon Mangautin Kristo ao bon te bwaintangira nakoia aomata ni kabane n te aonnaba.
Kristo ao Maria n te Ruanimate, iroun Joseph Brickey
Nakomai Nakon Kristo
Te euangkerio ao ana Mwakuri ni Kamaiu Iesu Kristo bon ibukiia aomata ni kabane—are nanona bwa ngaira, ni kabane. Te kawai n tingaia are ti rinanon ana kakabwaia n ana mwakuri ni kamaiu te tia Kamaiu ae bwanin bon mairoun temanna ae kariaia Ana kakao: “Bane mai nako Iu” (Mataio 11:28).
Ti nakon Kristo ngkana ti kammwakura ara onimaki i Rouna ao ni karaoa ara rairannano. Ti roko Nakoina ngke ti bwabetitoaki n Arana ao n karekea te bwai n tituaraoi ae te Tamnei ae Raoiroi. Ti roro Nakoina ngke ti kawakin taian tua, karekei otenati, karinea ara berita aika a tabu, butimwaai bwaai ake a riki n te tembora, ao n maiuakina maiuia ana reirei Kristo are a maiuakinna.
N taai tabetai, ko na kaitaraaki ma te bwara n nano ao te un. E kona n urua nanom ibon ibukim ke ibukin temanna ae ko rang tangiria. Ko konaa n karawawataaki man aia bure tabeman. Kairua ake ko a tia ni karaoi—tao ake a rangi ni kakaiaki—a kona ni karekea te maaku nakoim bwa te rau ao te kukurei a tia ni kitaniko n akea tokina. Ngkana a roko taai akanne, uringnga bwa e aki ti tabekii rawawatan am bure te tia Kamaiu ma e “[a tia] n rinanon te kainnano ni maraki ma te karawawataaki ao te kaririaki n aekaia nako (”Aramwa 7:11), n ikotaki ma rawawatam! Ibukina bwa E a tia n rinanona ibukim, E ataia bwa E na kanga ni buokiko ngkai ko kariaia Ana kakao ni bitakin te maiu: “Nakomai Nakoiu”
Kam Bane ni Butimwaeaki ni Kabane
E a tia ni kamataata Iesu Kristo bwa ni kabane natin Tamara are i Karawa titebo aron reken irouia ana kakabwaia Ana euangkerio ao Ana Mwakuri ni Kamaiu. E kauringiira bwa ni kabane “n akea ae kaokoroaki, ao n akea ae aki kariaiakaki” (2 Nibwaai 26:28).
“E kaoiia ni kabane bwa na nakoina ao ni katoonga raoiroina; ao akea temanna ae aki rawa n nakoina, ae bwatabwata ao ae e mainaina, te bure ke te inaomata, te mwaane ao te aine” (2 Nephi 26:33).
“E kaoiia ni kabane”—are nanona bwa ngaira ni kabane!! Ti riai n aki katokai iaora ke iaoia tabeman kabwarabwarakira ae akea nanoia ao n aki eti. Ti riai n aki karaoi waaki ni kaitaraa ana tangira te tia Kamaiu ke ni karekea te iango bwa ngaira ke aomata tabeman a aki kona ni buokaki Irouna. N aron are ea tia n taekinna imwaaina, “ E aki kona [temanna] ni karinanoa nakon otan ana Mwakuri ni Kamaiu Kristo ae reitinako n akea tian otana.”5
Ma, n aron ae ti reireia Ngai ma Titita Holland tabeua te namwakaina imwain matena, ti tuangaki bwa ti na karekea iroura “te tangira ae kororaoi, are te tangira ae kororaoi” (2 Nibwaai 26:30).6 Aio te tangira are e kaotia nakoira te Tia Kamaiu, “Bwa bon akea te bwai ae kakaraoia ma ti bwaai aika a na kawaaka te aonaaba; ibukina bwa e tangira te aonaaba, n te aro are e anga oin maiuna bwa e aonga ni kairia aomata ni kabane nakoina” (2 Nibwaai 26:24).
I kakoaua bwa ana euangkerio ao ana mwakuri ni kamaiu Iesu Kristo bon ibukiia aomata ni kabaneia. I tataro bwa ko na kimwareirei n karekei kakabwaia are E uotii.