Bwanaaia Aika Itiaki ni Boong aika Kaitira

I ataia bwa I a tia ni Kamanoaki

Iroun Ljubica Blaževic, Herzegovina-Neretva Canton, Federation of Bosnia-Herzegovina

E korakora te buaka i tinaniku, ma ngke I wareka ana Boki Moomon, I namakina te rau ao n aki maaku.

Kamataata n te tamnei iroun Alex Nabaum

N te ririki 1992 e korakora te buaka i Yugoslavia. E katoabong boomiakin ara kaawa ae Mostar. A bane ni katokaki mwakuri ibukin te bootanaomata, ni ikotaki ma tabo ni kanako bwai.

N 1 n Eberi, e karebwerebwe te aba n au mataroa. Ngke I kaukia, te mwaane ae I tuai man nonoria mai i mwaina e anganai te batia mairoun natiu te aine, are e maeka n te tai anne i Malaga, Spain, ike e a kaaina iai Ana Ekaretia Iesu Kristo ibukiia Aika Itiaki ni Boong aika Kaitira. I nanona bon katooton ana Boki Moomon.

I moana warekakina n te bong naba anne. E korakora te buaka i tinaniku, ma ngke I wareware, I namakina te rau ao n aki maaku. I mwiina, I reiakinna bwa te rau are I namakinna bon te Tamnei ae Raoiroi. I ataia bwa I kamanoaki ao N na bon aki mate.

Ngke I wareware, I reiakina taekan Iesu Kristo bwa E bon teimatoa ni maiu. I reiakina taekan te bwabetito ao ana Ekaretia te Tia Kamaiu. I namakinna bwa a bane ni koaua bwaai ni kabane ake I warekia. N te tai teuana ma teuana, e kaekaekai au titiraki natiu te aine.

Ni maten kaainabau n 2019, I baireia bwa N na nako n te United States, are e a maeka iai ngkai natiu te aine. I tangiria n nooria ao n reiakina riki taekan te Euangkerio ae kaokaki.

I tiku i Salt Lake City, Utah, ibukin aua ao te teiterana te namwakaina. I nanakon te taromauri ni katoa wiiki ma natiu te aine. E reke irou te namakin ae I aki konaa ni kabwarabwara. I karekea aia reirei mitinare. I ataia bwa e koaua. I rinanon te bong ae te kabanea n tikiraoi i nanon maiu ngke I bwabetitoaki ao ni kamatoaaki bwa kaain ana Ekaretia Iesu Kristo ibukiia Aika Itiaki ni Boong aika Kaitira n Tuurai 27, 2019.

A bane n tang aomata ngke I nakonako i nanon te ruu bwa N na kamatoaaki i mwiin bwabetitoakiu. Te bwabetitoaki ao karekean ana bwai n tituaraoi te Tamnei ae Raoiroi bon te bwai n tangira ae e korakora mairoun Tamara are i Karawa. I mwiin kamatoaau, I namakinna bwa e uki karawa ao ti bane ni bootaki ni mena ikekei. N au kakabwaia n tamanuea i mwiina, I karekei berita mai karawa, aika a bati ao man onoti.

E koaua Ana Boki Moomon. Ti konaa n karekea oin ara kakoaua, man wareware ao n ara tataro. Ma te kakoaua anne, ti na ataia ae Iotebwa Timiti bon Ana burabeti ao irouna, e kaokaki ana Ekaretia Iesu Kristo nakon te aonnaba.