“Koauan Taeka,” Riaona, Maati 2024.
Bannan te Onimaki
Koauan Taeka
A rangi ni bati au titiraki, ma a buokai raou ao te Ekaretia ni karekei kaeka.
Kariaia n te tamnei iroun te tia korokaraki
Inanon rikirakeu n akea te katei ni Kiritian i Taiwan, I aki kaikawaaki n maiuakina te aro. I kakoaua iroun te Atua, ma akea te bwai ae I ataia ibukin Iesu Kristo. Au mwakuri bon au aro ao te tabetabe i nanon maiu are I karekea. Ni ikotaki ma anne ao e korakora irou kabonganaan te kamanging ao te moko. Te tia mooi naba ngai n te koobe ao te ii. Aikai kateia ma aroaroia taan bitineti.
I moana kaitiboou ma Ana Ekaretia Iesu Kristo ibukiia Aika Itiaki ni Boong aika Kaitira iroun au kainrou ma ana utu. Bon kaain Amerika Chase. E ikawarake n te Ekaretia ao ni karaoa ana mwakuri ni mitinare, ma e aki rangi ni kakaonimaki n te tai anne. Natina te mwaane ae te ikawai, e katauraoia nakon ana mwakuri ni mitinare, ao e boutokaaki ana iango iroun Chase.
N tain te kainiinin n te COVID‑19, ti ira te bootaki n toa ni mweengaia ana karo Chase, ni matakuakina te kanakobwanaa are e kanakoaki man te umwantabu n aia Ekaretia. Ngke e a bwara, a kakabwaia ao ni kabuta te kariki ao te ran natin Chase mwaane uoman.
Iai au titiraki aika mwaiti. E kaekai ni kabane au kainrou ni karaurau. Antai Iesu? Tera te namakin ae reke i nanou ni katoa ara tai ni bootaki ibukin bootaki n taromauri? Te namakin ae I tuai man namakinna mai i mwaaina. Tera ae a tei ibukin te kariki ao te ran? Bukin tera a waanako ranin matau ngkana I kana te toa? Tera te rau ae I namakinna aei?
I kunea te webutiaite n au taetae n teuana te tairiki are e kabwarabwara bwa antai Iesu ao ni kaota taekan maiuna. N te bong are i mwiina, I tuanga tinan au kainrou bwa I ataia bwa antai Iesu ao bwa I kakoauaa.
E roko te bitiobi nakon te auti n te Tabati teuana ibukina bwa natin Chase are te ikawai ena katabua tarina ae e uarereke nakon te ibonga . Ngke e katokaa baina te karimoa n nati i aon atuun tarina are e uarereke, E aki toki tangiu. I namakina te roko n nano ae bubura i nanou, E aki toki ranin matau ni waanako. I mwiina, e kabwarabwara nakoiu au kainrou bwa I namakina te Tamnei ae Raoiroi ao e namakinna naba.
I nooria bwa e a oki ana tangira au kainrou ibukin te Ekaretia. Ma, I ataia bwa bwaai ni kabane ake I namakinna a toma nakon te Atua ao nakon te bwai ae koaua. I namakina te tangira ae I tuai man namakinna mai i mwaaina.
“I Wetea Atuau”
E a bane tain beebwan mwanangau ao I riai n oki nako Taiwan. I nanon te namwakaina are i mwiina n ti ngai, E bua te namakin are I a tia n nanamakinna. N te tai anne, I kaonaki n te bwarannano ao te rootongitong. A rangi ni korakora n taonai namakin akanne ao I tangiria n taenikai. I aki rangi n ataa arou n tataro, ma I wetea te Atua ao n tuanga au namakin ao au iango ni kabane. E roko te rau n au namakin—te namakin are I a tia ngkoa n rinanona ngke I ira te taromauri ni mweengara. I ataia bwa bon te Tamnei ae Raoiroi. E anganai te rau.
I mwiin aio, e karokoia mitinare au kainrou bwa a na reireinai. I tuangiia bwa I a kaman ataa te euangkerio are e kaokaki bwa e koaua ao bwa I ataa namakinan te Tamnei ae Raoiroi. Ma I raraoma bwa I ataia bwa e matoatoa irou kakakin te moko ao nimakin te kobee ma te ii.
I moana kaean te taromauri, wareka ana Boki Moomon, ao ni kaitibo ma mitinare aine teniua ke aua te tai n te wiiki. I nanon taina, e buokai ni katoka te moko ao nimakin te kobee ao te ii te Tamnei ae Raoiroi.
E noora te bitaki irou i nanon wiiki ma wiiki raraou ma ngke I uarereke. I kaoia nakon au tai n reirei ma mitinare. E namakina naba te Tamnei ae Raoiroi ao ni karekea ana koaua, ngke e ongongora. Ni keerikaakin te aoraki ae te COVID‑19, au kainrou, e a kakaonimaki n te Ekaretia, ao n roko i Taiwan. Ti mareaki, ao e bwabetitoai. I riki bwa te aomata ae boou.
Titita Weiling Chen (Winnie) ma mitinare aine ao membwa n te uoote ake a reiakinna ao ni kakaungaa. “Ti teimatoa ni marooro ni katoa wiiki ao ni kaai ni mwakuri ni weteau n te Ekaretia n te Bootaki n Aine,” e taku.
Raraou n te bootaki ni bitineti ao raoraou ma ngkoa, ni ikotaki ma tabeman kaain te bangke ao taan tei man bootaki ni mwaakete, a taku bwa a noorai bwa I a bitaki ao ni kukurei riki. I kaoiia nakon au bwabetito, ao a roko. I mwiina, a tuangai bwa a namakina naba te namakin ae a tuai man nanamakinna mai i mwaaina.
I aki maaku n tuangiia tabeman bwa I ataia ao n namakina aron Iesu Kristo—ae I ataia bwa e koaua. I ataia bwa e otaamwaaka au kakoaua. A nooria ake a tia ni kinaai n te tai ae maan. Aia karinerine ibukin au onimaki e karekea naba aki mokoia ao nimakin kamanging n bobotaki n bitineti ao n katairiki. E rangi n okoro aio n waakin kateira n ara bitineti.
Raao ni koaua aika Titita Canfield ma Jin Hua, ake a anaaki nanoia n te Ekaretia rinanon ana rairaki Titita Canfield.
I aki maaku ni kaotia bwa a nooria tabeman, ongo, ao n namakina au kakoaua. I kakoaua bwa a na namakina are I namakinna aomata aika a mwaiti ake a aki ataia bwa a na kangaa ni kunea te Atua ao Iesu Kristo ngkana a ongo koauan te taeka. N na tatauraoi n taainako n tibwaa te taeka are e bita maiu.