“3 Tuua ni Kairiiri ibukin Kabonganaan Bwaai n Rabakau Aika a Boou ao Bwaai ni Kaongora,” Riaona, Maati 2024.
3 Tuua ni Kairiiri ibukin Kabonganaan Bwaai n Rabakau Aika a Boou ao Bwaai ni Kaongora
Ngkai e tabe n rikirake bwaai n rabakau aika a boou, kabonganaan bwaai n reitaki a na buokira ni waaki rake n te wanawana.
E rikirake ni bibitaki bwaai n rabakau aika a boou. Kukune aika a boou aika ai tibwa ngkai a uotii kawai aika a boou ni kabonganaan bwaai ni kaongora. E uota te bitaki ae kaakawaki te mitin ni booreti bwa antai aika a konaa n karekea taekan koroboki. Rerio ma terewition a uota te bitaki ae korakora n arora n toma ma kaongora, rongorongo, ao kakukurei. Te intanete e bitia bwa mwaitira rongorongo ae ti kona ni karekea ao antai ae konaa ni karikia. Bwaai ni kaongora a bita arora n ukoukoura, n reitaki ma , ao n toma ma aomata. Ngkai e rikirake wanawanan te mitiin, ti kaaitaraaki ma titiraki aika a boou.
Ni kabane bwaai n rabakau aika a boou a aki kona n tamaroa ke n buakaka ni kabane. Ma, e riki n taainako bwa ai aron te bwai ni karababaan te taratara are e konaa ni kaotai aanga aika a boou ao raraoma aika a boou. Ngkai ti keiaki n riki n aron Kristo, ara kaeka nakon bwaai n rabakau aika a boou ao bwaai ni kaongora a konaa n uota nakon maiura bwa tera ae kaakawaki riki.
Tua ao Reirei ni Kairan Maiura
Eng, akea rinanin tuua ake a na kairii ara babaire nakon kairara bwa tera ae ti na karaoia ma bwaai n rabakau aika boou ao bwaai ni kaongora. Ma, ti konaa n reiakinii reirei bwa a na buokira ni kairiira ngkai ti karaoi ara rinerine. E reirei Unimwane Dieter F. Uchtdorf man te Kooram n Abotoro n te Tengaun ma Uoman: “Tuua bon bwaai aika akea tokiia ao n maiuakinaki n te aonaaba ae bwanin. Tua aika a onoti ke kammwakuran tuua akanne a mwakuri raoi n taabo tabeua ma aki mwakuri n taabo tabeua. Te bwai are katiteuanaira bon Iesu Kristo ao Ana reirei iaon koaua aika akea tokiia, e ngae ngke waaki aika a onoti a bibitaki i nanon te tai ao ni katei aika a maiti.”1
E na buokira n tiku ni kawain te berita ae tabu iriiran reirei aika a boboto i aon koaua man te euangkerio. E na kairiira te Tamnei ngkai ti keiaki mwaaka ni karaoi rinerine ake a boboto i aon reirei akanne. Ma ngaia are tera tuua aika a kona ni kairii ara rinerine ibukin bwaai n rabakau aika boou ao bwaai ni kaongora?
1. I konaa ni kabonganaa inaomatau ae raoiroi ni karaoi rinerine n babairea au tai iaon bwaai n rabakau aika boou. E na aki tautaekanai.
E konaa n tabetai n namakinaki bwa bwaai n rabakau aika boou a tautaekana aron maium. E kakaawaki bwa e na uringaki bwa ko konaa ni karaoi rinerine n taua taekan bwaai n rabakau aika boou. E na aki tautaekaniko. Ko konaa n rineia mai i nanom n kabonganai bwaai n rabakau aika boou ao bwaai ni kaongora n kakaraoa ae raoiroi ao n ukora “ae raoiroi, ae kakateke, ke ae tamaroa rongorongona ke ae kamoamoaaki”(Taekan te Onimaki 1:13).
E taku te Uea, Bwa ngai, te Uea, iai au mwakuri ae korakora ibukim ae ko na karaoia” (Reirei ao Berita 112:6). Iangoia bwa ko na kanga ni kabonganai bwaai n rabakau aika boou ni katiai mwakuri ake a korakora ao n tiku ni “ingainga ni kan karaoa te waaki ae e raoiroi” (Reirei ao Berita aika Tabu 58:27). Ko na bae ni kainnanoa kabonganaan bwaai n rabakau aika boou n am beku. Ko na bae ni kabonganaa ni kunei aekakin waaki ni kakukurei. E kona ni buokiko n toma ma tabeman. Ao e konaa ni buokiko n reiakinaki, n rikirake, ao ni kakoroi bukin ana mwakuri te Uea. Ma, kabonganaana tabeua a kona ni kakiriwee, aki riai, ke ni kaikoaki. Nakon ae e na tautaekana arom bwaai n rabakau aika boou, kabongana te wanawana ao ana kairiiri te Tamnei ni karaoi rinerine are e na karikiko bwa ko na tautaeka.
2. Ngkana I kamanenaa inaomatau ni bairei bwaai aika n a karaoi, I namakina ae raoiroi ao ni karaoi riki rinerine aika a tamaroa.
Tao iai te bwai ae ko a tia n rinanona ngke ko karaoa te rinerine ni kaineti ma bwaai n rabakau aika boou ae ko namakinna bwa e aki riai karaoana. E konaa n irekereke ma bwaai ni kaongora ake ko rangi ni kamanenai ke te tai ae kabaneaki i aon te waaki ae karaoaki. N onean mwiin banen nanom n taekan kaairua ake ko a tia ni karaoi, e tamaroa riki bwa ko na kabotoa am iango ni waakinako n rikirake. Ngkana ko karao am babaire ni moantaai, ko na karaoi rinerine aika a tamaroa riki nakon ae ko na karaoi babaire n te tai naba anne. Ko konaa ni karaoi kairakim ae e ineti ma ana kainibaire te euangkerio bwa e na buokiko ni karaoi rinerine aika a tamaroa.
Ngkana ko kuneko bwa ko kabongana buaka ke n kabanea am tai n bwaai ni kaongora, karekea te ninikoria ni bitiko. N aron, ngkana iai aekakin kaongora aika a aki karekea te namakin ae raoiroi, bita anuam. Ngkana ko kabonganai bwaai n rabakau aika boou ni kamanenai bwaai ni kaongora ke n rinanon aroaro aika ko atai bwa a aki eti, ninikoria ni bitaki—ao karekea iroum te taotaonakinnano ngkai ko keiaki mwaaka ni karaoi bitaki akanne. Iangoi tabeua bwaai aika ko konaa ni karaoi bwa ko na bitaki. N aron, ngkana ko kunea bwa e kangaanga karaon babaire aika a raraoi n taai aika a riai i nanon te bong anne, ko riai ni bairei taai ake ko na kabonganaa iai bwaai n rabakau ao taai ake ko na aki kabonganai.
N aron naba anne, ngkana ko kabonganai bwaai n rabakau aika boou ni kakorakorako, reitaki ma tabeman, ao ni katiaa ana mwakuri te Uea, ao namakina te Tamnei, kateimatoako kakaroai bwaai akanne. Ngkana ko kokoaua raoi ibukin am rinerine, e na buokiko am onimaki ni kabonganaa inaomatam n aanga are a na kairiko n namakina ae tamaroa riki ao n reitinako ni karaoi rinerine aika a raraoi.
3. I konaa ni kabonganaa inaomatau ae raoiroi n rineia bwa n na katokia.
Ko na bae n namakinna bwa e okiloki te titiraki anne ibukin bwaai n rabakau aika boou ao bwaai ni kaongora. Mwaitira ae rangi ni mwaiti? I riai ni karikirakea ke ni kauarerekea kabonganaan bwaai ni kaongora ke bwaai n rabakau aika boou? I kabonganaa raoi au tai n ae riai? Tai kataia ni karekei iango aikai bwa a na karawawatako. Uringnga bwa e TAMAROA n toki teutana ao n toki man te bwai ni kaongora. Katokana e kona n ae rinean karaoan waaki ni kakukurei tabeua inanon tabeua te aoa nakon taraakin te tikuriin ke aki kabonganaan te bwai n rabakau ae boou, n aron bwaai n reitaki n te kareke rongorongo, n te tai ae maan.
E karekea te kakabwaia ae korakora bwaai n rabakau aika boou ni buokira n teimatoa n reitaki ma aomata tabeman; ma, ibukina bwa ti konaa n reitaki n taai aika ti taku tiaki nanona bwa ngaira ti kainnanoia n toma n te tai are ti bon taku. E kauringiira te Uea, “Tiiku n rau ao n ataia bwa Ngai te Atua” (Reirei ao Berita aika Tabu 101:16). Kakoaua bwa ko karekea am tai n toma ma Ngaia.
Kawanawanako
Ngkai a tabe n rikirake bwaai n rabakau aika a boou, ti na kaitarai babaire aika a mwaiti. I rarikin taraakin te Ekaretia ibukin rinanin tuua aika a onoti, ti kona n rairaki nakon Tamara are i Karawa, te Tia Kamaiu, koroboki aika a tabu, ao aia taeka burabeti ni boong aikai ibukin reirei ni kairiira n ara rinerine. E na buokira te Tamnei n ataia bwa a e eti ara rinerine. A kaineti naba ana taeka Iakobwa n boong aikai n aron kabonganaakia ngke e moan reirei nakoia: “O kam na kawanawanaingkami; tera ae N na kona riki n taekinna?” (Iakobwa 6:12).