“I Tia ni Katobibiaki irouia Aomata ma I Teimatoa n Namakina te Maroaa n Tii Ngai,” Riaona, Mati 2024.

Kairake n Ikawai

I Tia ni Katobibiaki irouia Aomata ma I Teimatoa n Namakina te Maroaa n Tii Ngai

Iroun Anne Aketch

Ngke I mwaing n raroa ma mweengau, au reitaki ma karawa e buokai ni katokanikaiai man te marooa n ti ngai.

Tamnei

te aine ma ootan taura ni katobibia, ao tabeman aomata a nakonako ni katobibia

Ko ataa te namakin ngkana ko katobibiaki irouia aomata ma ko bon teimatoa n namakina te maroaa?

Man te tai are I kinatana mweengau i Uganda ao ni mwaing nako Dubai ibukin te mwakuri, I namakina te maroaa ae korakora n taainako. Ni mweengau n au tabo are i maeka iai, a kakamaurai aomata n te kawai. Ti kinaira i marenara. Ti boutokaira i marenara. A mwaiti raoraou ao utu ake titebo au onimaki ma ngaiia.

Ma bon tiaki aekan anne ikai. I maeka n te katei ae rangi ni kaokoro, n te kaawa ae rangi ni bubura ae bati aomata iai ake a rangi n tabetabe n aia mwakuri. Ma e ngae ngke I nanakon au uoote ao ni kataia ni kinaiia kairake n ikawai ao kaain te uoote, kanoan ara mwakuri e karekea aki nakoraoin kakaitiboora n aki raka i aon tabeua te aoa are ti kabanea n te taromauri ni katoa wiiki.

E rangi n bubura Dubai ao n anai nano, ao I kakaitau ngkai I mena ikai. Ma e konaa ni karika te maroaa, riki ngkana ko namakina te maroaa. A rangi ni kaubwai aomata ikai ao n taraa n nakoraoi maiuia. Ma, ni maekau ibuakon bwaai aika a rangi n tamaroa aikai ao kateitei aika a tikiraoi, I iango n tabetai:

Tera ae I karaoia ma maiu? Bon aio raoi te tabo ni koaua ibukiu?

Kunean Manga Kaainakin te Tabo

E kabwarabwara Unimwaane D. Todd Christofferson man te Kooram n Abotoro n te Tengaun ma Uoman bwa “e kakawaki namakinan kaainakin te tabo nakon rabwata, ara iango ao marurungin tamneira.”¹ E aki roko n au iango kakawakin te namakin anne ni karokoa I aki manga namakinna—tiaki n te taromauri, ao n taabo nako, ae I ataia.

N na kanga ni kunea ngkai, I raroanako mairouia ake I tangiria?

I nanon te tai, I a moanna ni kina “kakawakin Iesu Kristo n riki bwa kaaina.”²

Ma mwaitin kan nooraia raoraou ao au utu, I nooria bwa I bon aki maenako ma aomata ni kabane i nanon maiu ngke I mwaing—Bon iai au tia Kamaiu ao Tamau are i Karawa ae tatangira are e tangiria n taainako bwa N na reitaki ma ngaia.

Ngaia are I a moana karaoan are I konaa ni karaoia n katamaroaa au reitaki ma Ngaiia ni katoabong. I ongoraa nakon kamatebwaian Nakomai, Iriirai ngkana I nako ni biri. I karina au bwai ni kakauongo n te mwakuri ao n ongora nakon koroboki aika a tabu, ngke I katiai tabeu.

Ae kakawaki riki, I reiakina tamaroan te bwaintituaraoi ae reke n te tataro nakon Tamara are i Karawa. I marooro ma Ngaia ni katoatai ao ni iangoia raoi riki nakon are I kakaraoia mai i mwaaina. Ngkana I namakina te maroaa, I tataro ao n namakina Ana karaunano. Ngkana I taibina te meeri ao ni kataia n taotaonakinnano ma raou ni mwakuri, I tataro ao ni butiia ibukin ana buoka.

I tangira are e taekinna Beretitenti Thomas S. Monson (1927–2018) ibukin te tataro: “Nakoia ake … a korakai ma kangaanga aika a bubura ao aika a uarereke, te tataro bon te tia karekea te korakora n tamnei; bon te beeba ni mwananga nakon te rau. Te tataro bon te kawai ni kaania Tamara are i Karawa, ae e tangiriira. Marooro ma Ngaia n te tataro ao kakauongo nakon te kaeka. A karikaki kakai rinanon te tataro.”³

Ni karekean te tai Nakoia ni maiura, riki rinanon tataro, I a moanna n nooria bwa e ngae ngke I aki katobibiaki irouia au aomata ao au katei, I bon kona ni katobibiaki iroun te Tamnei ao n namakina ana tangira te Atua.

Ti Konaa n Taainako n Reitaki

A bon kangaanga aron bwaai, ma iai au kaantaninga ibukin taai aika a na roko. Ao I karekea koauan are e reireia Te Tari Milton Camargo, te Moan Kauntira n te Reirei n Tabati n te Beretitentii ni Kabuta: E maiu Iesu Kristo ni maiura ngkai. E kona n rang ni mwaiti, rorokona ni katoabong ni maiura. Ngaia bon buokara n ara kangaanga, ma ti riai n euti matara ao ni kabotoi ara iango Irouna.”⁴

I bon teimatoa ni marooa n taai tabetai, ma I ataia bwa n taainako, n taainako I konaa n tataro nakon Tamau are i Karawa ao ni karekea ana Makuri ni Kamaiu Iesu Kristo.

I konaa n tataro n tei ke n katorobubua, n ti ngai ke n te kurubu.

I kona n tang nakon Tamara are i Karawa.

I kona n anga au karabwarabwa.

I kona ni butiia ibukin te kairiiri ao te kamanoaki.

Ao n reitakiu rinanon au berita ae tabu, I ataia bwa Ngai, natin Tamara are i Karawa te aine, ae bon ana Bwai. Rinanon Ana kairiiri, I kona n namakinna bwa e eti au tabo ae I mena iai, ni karaoa are E tangiria bwa N na karaoia.