“Te Ubu n te Wintoo,” Riaona, Maati 2024.
Bwanaaia Aika Itiaki ni Boong aika Kaitira
Te Ubu n te Wintoo
I taku bwa e rangi n reberake kaain rarikiu, ma I kunea bwa e bon ti kainnanoa raoraona.
Kariaia n te tamnei iroun te tia korokaraki
I aki toki n nonora te ubu anne ae tarataraai man wintoon te auti ni maeka. I taku i rou, “E aki ngkanne kananokawaki ae temanna ae teimatoa n taratara man aia wintoo, ni motika taekan te bwai are a karaoia kaain rarikiia?”
Teuana te bong i mwiina I taku n au iango bwa I riai n nako n nooria ngkana I kona ni ibuobuoki. I baireia bwa N na uota tabeua kariki aika a umunaki aika a boou.
Te kariki ae bue e kamaenakoa te buraoki are inanon buroon te unaine ae kain rarikiu. Ma rannimatana, e tuangai bwa e bon namakina te botu n ti ngaia. Akea ae kakawaria ao n tareboon nakoina, a aki naba ake bon oin natina. Ma baina ae ruru, e kaoa ranin matana man moana.
E ikerake ao n taku ngkanne, “Ai tamaroara ngkana ti a bon kitana naba te aonaaba aei. I aki motika taekan temanna ngkana I tatara tinaniku man au wintoo. I ti matakuakiniia ataei n takakaro ao bwaai riki tabeua ake a riki i tinaniku.”
Kamataata n te tamnei iroun Alex Nabaum
I nanon te tai, ao ti maroorakina taekan te euangkerio. E aki karongoa n te moantai ibukina bwa buuna e a tia ni beku bwa te tia kairiiri n te Ekaretia teuana. Ma mwaitin riki ara tai ni marooro, mwaitin riki anaan nanona ni koaua ake I tibwaia ibukin Iesu Kristo ao Ana euangkerio are e tia ni kaokaki.
E rangi n tamaroa bwa titebo ara Iesu!” e taku. “Ti na manga noorira i karawa?”
“Eng,” I kaeka, “ti na manga ikotaki ikekei—n taubai.”
Mai ikanne, ti riki bwa rao ni koaua n ririki aika a bati, ni karokoa motirawana man te aonaaba aei.
I iangoia ngkai bwa raraou are kaain rariku e a taratara man wintoon mwengana i karawa, n iriira ara waaki ao ni kantaningaia bwa e bati te inanoi ao te tangira i marenara.