“Anaanakin Nanou nakon te Soap Opera: I Kanga n Angan te Atua bwa E na Tautaeka,” Riaona, Maati 2024.
Ananaakin Nanou nakon te Soap Opera: I Kanga n Angan te Atua bwa E na Tautaeka
Ngke I katoka matakuakinan te kamataku ae te soap opera, I namakina ana kairiiri te Tamnei ae Raoiroi ae korakora i nanon maiu.
Kamataata n te tamnei iroun Benedetta Vialli / Salzman International
E uota te mwaaka ae korakora rinean Iesu Kristo, “O, ti na kanga ni kainanoa Mwaakana ibukin boong aika a na roko.”1 E a korakora te mangaongao n ara aonaaba. E taraa ni korakora ana kairoro teuare e buakaka i aoia natin te Atua aika a mwaiti. E kamoamoaaki te aki raoiroi, ao a katikii ara taratara man uotira nako taian kariiri man ake a na uotira ni kaanira nakon te Uea.
N tokanikai i aon aei, ti riai n rinea Iesu Kristo ni maiura ao n kanakoi bwaai ake a kamatauningaa te tamnei. E reirei Moronaai nakoira, “Kawanawanako i nanon am bong ni kataaki, kanakoa mai iroumi te baareka” (Moomon 9:28) ao e kaoira, “Nakomai nakon Kristo, ma ni kakororaoaki irouna, ao ma ni kaakeai mai iroumi bwaai ni kabane aika tiaki aron atua; … ma n tangira te Atua ma korakorami, ami iango ao marurungimi” (Moronaaii 10:32).
Ti na kanga ni kanakoi bwain te aonaaba ao ni kabatia riki nanonara n roko nakon Kristo? Ti bane ni kakaokoro n taabo aika ti mena iai n te waaki aei. Ti bane ni kona ni katokii bwaai ake a tutukiira man namakinan ana mwakuri te Tamnei ae Raoiroi. Ti kainanoa mwaakan ana Mwakuri ni kamaiu te tia Kamaiu ni karaoana, ao e moa man kabonganaan inaomatara n rinerine n Rineia.
Te Nano ni Kan Rin Iai
Ngke I mena n te kauarinan n reirei, I riki bwa kaain te tiim n kaungaunga ae rangi n tanoata taekana. N ara kateineiai ni katoabong, a aki toki ni kakaraki nakoiu ataeinainen au tiiim n kaungaunga iaon taekan rongorongon te soap opera are e otioti n te terewition. I tuai mamataku iai ao I ataia bwa te kamataku ae e aki rangi n tamaroa kanoana. Ma, I namakina te kationakoaki ni katoabong n tain te kataneiai n aia tai n marooro ni kukurei ataeinaine ibukin te kamataku. E wirikiriki nakoiu te Tamnei ae Raoiroi bwa N aki mataku iai, ma e korakora nanou n tangiria bwa N na riki bwa kaain te maroro, ngaia are I a moana matakuakinana.
E aki taraa ni buakaka te kamataku irou. I iangoia irou bwa e naaki rootai. I ataia bwa N na bon aki konaa ni karaoi bwaai aika a buakaka are I noria ni karaoia kaain te kamataku. I a baenako ao ni mamataku n te kamataku ni katoabong. Ngke I a nako n reirei n te kuura ae rietaata ae Brigham Young, I bairea tain au kiraati bwa I aonga n teimatoa n mataku n te kamataku ni katoabong. I bon aki kona ae n na aki mataku ni mwakoron te kamataku aei.
I a iein ao n reke au moan nati. I kakawenea ibukin rawean motirawana ni katoa bong n tain te kamataku bwa I aonga n mataku iai.
E a nako te ririki teuana ma teuana, e bati ana wirikiriki te Tamnei nakoiu bwa I riai ni katoka matakuakinan te kamataku. Ma I rawa iai. I rangi n reke nanou irouia taan kamataku ao maiuia. Ai bon au kawai ni karekean te rau, ngaia are I bon reitinakoa mataku iai. E anaaki nanou bwa e aki urubwai nakoiu.
Te Kakao
Tebwi ma ruaia te ririki i mwiin kitanakin te kauarinan, I teimatoa n mamatakuakina te kamataku ni katoabong. N te maungatabu ni kabuta, e marooro Titita Sheri L. Dew, te Kauoman ni Kauntira n te Beretitentii ni Kabuta n te Bootaki n Aine n te tai arei, e marooro iaon kitanakin te aonaaba ao bwaai aika aki itiaki. E taku i mwiina, “I kaoi ngkami n tatabemani ngkami nako bwa kam na kinaa teuana te bwai ae ti konaa ni kitanna man te aonaaba aio ao n roko ni kaanira riki nakon Kristo”2
Ngke e kanakoa te kakao anne, I namakina korakoran te Tamnei ae rianako, ao I ongo te taeka n au iango, “Ko riai ni katoka matakuakinan te kamataku anne ngkai!” E rangi ni korakora; kanga ai aron ae oreaki iai ubu. I ataia n te tai naba arei bwa N na riai n aki manga katannako man te wirikiriki. I a tia n namakina te kaumaki n aki manga mataku n te kamataku. I a tibwa ataia bwa akea temanna te tia kamataku ae karaoa te bwai ae tamaroa ke n rine. I a tia ni kaoa te bwai ae akea manenana nakon maiu ni katoabong. I kamatoa nanou nakon te Uea, n te tai naba anne ao ikekei, bwa N naaki manga mataku riki iai.
E bon aki beebete! Tebwi ma ruaia te ririki ni kakaraoia ao n ananaaki nanou iai e bon kangaanga katokana. E a roko te Moanibong ao ai tain te kamataku. I nakonako nakon te tabo are e mena iai bwain kaotan te Bwai n Tamnei. I rangi ni kan kamaiua. I uringnga au motinnao nakon te Uea bwa N naaki manga mataku riki iai. I taonnako.
I mwiina I iangoa te tia kamataku are e mamate nanou iai ao n iangoia bwa tera ae riki nakoina ao I a manga mwananga n oki nakon bwain kaotan te Tamnei. I ataia bwa I kainnanoa ana ibuobuoki te Atua, ma ngaia are I a katorobubua ao n tataro ibukin te korakora bwa N na kona n aki mataku iai. I iangoa au berita nakon Tamau are i Karawa, ao I otinako man te ruu. I rineia ni iriira taian wirikiriki are I a tia ni karekea mairoun te Tamnei ae Raoiroi ao ni karinea au motinnano.
E okioki te bwai are e riki anne ni katoabong n te wiiki anne ao n te wiiki are i mwiina. Ni katoabong, I katorobubua n tataro ao ni bubuti ibukin te kakorakora n aki matakuakinna, ao ni katoa bong I rinea Iesu Kristo ao n kitana te kamataku n te bwain tamnei ae aki itiaki. I karekea te kakorakora n tokanikai man te korakora are e anga te tia Kamaiu rinanon Ana Mwakuri ni kamaiu.
I mwiin tabeua te tai ni karaoan aio, e riki te kakai. Ai bon akea nanou ni matakuakina te kamataku, i mwiin matakuakinana ni katoabong i nanon 19 te ririki. E bon rang kamimi! Ai bon akea naba nanou ni matakuakina taian kamataku ake I tatangirii ake I a bon tia ni mamatakuakinna, I a bon toki mai iai.
E matoatoa nanou, ao I a kinaa bwa tera raoi te buakaka. I kaotia ma te koaua bwa I a tangiria ni kan totokoa kaotin baika a buakaka. (taraa 1 I-Tetaronike 5:22). Ai bon akea nanou nako iai.
Te Kakabwaia ae Moan te Kamiimi
Ma te bwai ae moan te kamimi ae riki bon namakinan ana iraorao te Tamnei ae Raoiroi n raka i nanon maiu nakon riki taneiai ake I karekei mai i mwaina. E rangi ni korakora rikiraken tamneiu! N ririki akanne I a tia n taku bwa I kukurei n ana iraorao te Tamnei ae Raoiroi, ma I a tia ni karekea ae karako n are e reke irou. I ataia bwa matakuakinan kamataku akanne ni katoa tai a tia n rangi n rootaii. I a tia ni kabuaa n ririki aika a mwaiti karekean te reitaki ae korakora ma te Atua. Ngkana I kabonganaa inaomatau n rinerine ni katokii bwaai aika aki itiaki, bwain te aonaaba, e roko nakoiu ni waekoa te Tamnei ae korakora, ao ai tamaroara te kaokoro are e a tia n riki ni maiu n kakorakoraaki, ni karauaki, ao n kairakiu.
Ti taumatoa nakon bwaai aika akea manenaia—bwaai aika a kaina te mataroa nakon kakabwaia are e tangiria te Atua n uotia nako nanon maiura. Bukin tera ti onea mwiin te mwaaka ae korakora, ana ibuobuoki te Tamnei nakon bwaai ni kakukurei ke nakoia aika a rangi n tanoata? Tao matakuakinan te kamataku n te bwai n tamnei tiaki te bure ae bubura, ma e a tia ni kararoaai man karekean te Tamnei ae Raoiroi n ae mwaiti ni maiu ao ni kamamaara rikiraken tamneiu.
I rangi ni kakaitau bwa e aki kitanai te Uea ma e taotaonakinnano ni bubutiai bwa N na katoka karaoan te bwai ae e aki itiaki bwa E aonga ni kaona maiu n kaonrakea ma Ana kairiiri.
E maeka te tia korokaraki i Utah, USA.