Noda Tabana
Rekitaki na Siga ni Vakacecegu ena Solibula
O rau na vakawati vou o Oleni kei Ana Ngungutau e Serene, Ositerelia erau a tekivutaka na nodrau bula vata vakairau ena nodrau masulaka me rau kila na cava e vakarautaka tu vei rau na Turaga me rau vulica. Oti vakalailai oya, a soli vei Oleni edua na konitaraki ni qito rakavi me 2 na yabaki ena dua na kalavo e Griffith, edua na tauni lailai ka ono na aua na kena yawa mai Serene. Ni oti edua na veivosaki vinaka kei na masu, erau a digitaka me ciqoma na konitaraki ka solia taumada vei rau na kalavo na ilavo kei na so na bonisi me vukea na vuvale ena toki ka lai tiko ena nodrau itikotiko vou.
E a kurabuitaki vei rau na veiwatini, ni gauna a tekivu kina na qito, e vuqa na qito era a tuvai tu me vakayacori ena vei Sigatabu. Nirau yaco yani, erau vakasamataka taumada na veivuke sa solia oti vei rau na kalavo. A vakamatatataka na jeameni nio Oleni mena sauma na nona dinau ena nona qito ena veiqito ka sa tuvai oti tu.
A kaya o Oleni, “Ena gauna au a qito voli kina e Serene . . . na neimami qito rakavi kece a dau yaco ena vei Vakarauwai. Oqo a vou vei au, kau a sega ni logaloga vinaka niu qito ena vei Sigatabu . . . au a nanuma ni gadrevi meu vakameautaka na tikina oqo kei na noqu kalavo.”
Sega ni dede mai na veitalanoa oya a yaco na COVID-19, ka mani muduki kina na qito ena yabaki oya. A vakila o Oleni ni oqo e a isau ni nona masu, ia na nona konitaraki a tosoi tale me rua na yabaki me rawa ni qito kina ena dua taucoko na draki ni qito ka bokoca kina na nona dinau kina kalavo.
A nanuma lesu o Oleni, “Ni roro tiko mai na draki vou ni qito ena 2021, au a vakaraitaka vua [na jeameni ni kalavo] niu na sega tiko ni qito ena vei Sigatabu kau na vaqara edua tale na sala meu sauma kina na noqu dinau. A tukuna o koya vei au ni tiko ga erua na madigi: ‘Qito’ se ‘Sauma’. Au a sega ni vakatitiqataka ni ka e dodonu meu cakava sai koya meu muria na ivakaro ni Turaga ka na vakarautaka o Koya edua na sala.”
A veitaratara kei nona bisopi me vakacegui ka vakasalataki ka vakadeitaki vua ni dodonu na nona vakatulewa. “Au a qirita lesu na jeameni ka tukuna vua niu [sa na biubiu] mai na kalavo kau na qai bokoca na noqu dinau. Eratou a solia vei au e tini na vula meu cakava vakakina.”
E rau duavata na veiwatini merau na cakacaka vakaukauwa merau bokoca kina na nodrau dinau ka veiqaravi vagumatua ena nodrau veikacivi vaka qasenivuli ni semineri. Erau vakabauta ni kevaka erau cakava na nodrau itavi, na Turaga ena vakarautaka edua na sala.
“Ni oti noqu digitaka meu vakatabuya na Siga ni Vakacecegu . . . a vakalougatataki keirau na Tamada Vakalomalagi ena vuqa sara na sala. E a dolavi na veikatuba eso ka tosoi cake na kequi sau vakacakacaka,” a kaya o Oleni. Ni oti e vica na vula ki muri, a tauyavutaka o Oleni na nona bisinisi vakaikoya ka rawa kina vua me bokoca vakatotolo na nona dinau ki na kalavo. Sa qai rawa vei rau na veiwatini me rau toki lesu ki Serene.
Oqori na gauna a ciqoma kina o Oleni edua na kaci me sota kina kei na nona peresitedi ni iteki, ka a sureti koya me veiqaravi vaka bisopi ena tabanalevu na Griffith Ward, ena iteki na Riverina Stake. “Oqo e a veivakidacalataki,” a nanuma lesu. “Na igolegole i vale e a vakanomodi ka vakaturu wainimata.” Nirau yaco i vale, erau a tekiduru ena masu o Oleni kei Ana ka kerea na veivakacegui mai vua na Tamada Vakalomalagi.
E nanuma o Oleni: “Ena gauna oya a vakadeitaka kina vei au na Yalo niu a sega ni toki mai Serene ki ke meu mai qito rakavi. A kauti au mai ki ke na Tamada Vakalomalagi meu qaravi ira na Luvena ka liganicakacaka ena tarai cake ni Nona matanitu ena iwase oqo ni Nona were ni vaini. Oqo, e sega ni tiko na neirau ituvatuva me toki lesu i Serene ia keirau navuca me veiqaravi ena yaloi keirau, igu, vakasama kei na kaukauwa kece ena veikacivi oqo. Au sarava tiko na liga ni Turaga ena noqu veiqaravi me yacova mai oqo kau lomana vakalevu na noqu tabanalevu kei na cakacaka cecere oqo.”
“Au kila ni noqu iVakabula a cabora na Nona bula ena vukuqu, kei na ka levu duadua au rawa ni sauma kina sai koya meu tovolea meu talairawarawa ka maroroya na Nona ivakaro. Niu yaco koso, au kila niu rawa ni goleva na Nona Veisorovaki me laveti au cake ka vaqaqacotaki au meu toso tiko ga ki liu. Na Vakatabui ni Siga ni Vakacecegu e veivakalougatataki. Au kila ni kevaka eda muria na ivakaro oqo na noda bula ena vakasinaiti ena rarama kei na vuku mera vakalougatataki kina na tani ena macawa oqo.”