Noda Tabana
Na iTukutuku ni iVakabula vei Au
Au sotava tiko mai na nuiqawaqawa me vitu na yabaki kau vakila na noqu iVakabula ni tiko kei au ena vei ikalawa kece. E dau vakayaloqaqataki au ena noqu bula cake tiko, ka dau tokoni au ena noqu veisiga ca. E sega ni dau laivi au meu sega ni vakacegui, ka tiko e vica na veika sotavi au rawa ni wasea ena sala au sa toro voleka kina vei Koya.
Edua na veika sotavi bibi a yaco ena noqu imatai ni yabaki ena semineri. Keimami a vulica tiko na iVola i Momani ka yabaki dredre sara vei au ena noqu ilakolako me baleta na ituvaki ni bula ni noqu vakasama. Ia au tovolea meu rawata na takete a solia na noqu qasenivuli meu wilika taucoko na iVola i Momani (ena imatai ni gauna). Na kena wiliki a vaka edua na rarama ena loma ni cava butobuto, ka dua na bogi au a yacova yani na 3 Nifai 13:31–34. A vosa tiko o Jisu vei ira na Nifaiti, ka kaya:
“O koya mo dou qai kakua ni lomaocaoca ka kaya: A cava eda na kania? se, A cava eda na gunuva? se, A cava eda na vakaisulu kina?
“Raica sa kila na Tamamudou Vakalomalagi ni sa yaga vei kemudou na ka kecega oqo.
“Ia mo dou vakasaqara taumada na matanitu ni Kalou kei na nona ivalavala dodonu, ia ena soli me kena ikuri vei kemudou na ka kecega oqo.
“O koya mo dou qai kakua ni lomaocaoca ena vuku ni mataka, ena lomaocaoca na mataka ena vuku ni kena ka.”
E a lako mai vei au na Yalo niu wilika na veitikina oqori, a vakararamataka na vosa ena noqu talevoni—vakatataka, lainitaka na rukuna, ka tukuna vei au, oqo e nomu mo rogoca—au a vakila na katakata, e vaka niu tutuvitaki, au rogoca na vosa me vaka ga e vosa vakadodonu tiko vei au na iVakabula Vakai Koya. E dau se na vuti ni yagoqu ena veigauna kece au wilika kina na veitikina oqori baleta nira sa rui kaukauwa dina ni rogoci.
Ena vuku ni veitikina oqori, au kila kina ni kila kece tu na noqu nuiqawaqawa na Tamada Vakalomalagi. A kila o Koya ena gauna oya na noqu sasaga bula tiko e veisiga, ka kila vinaka o Koya na ka e gadrevi meu rogoca meu vakacegui kina. E vaka na iotioti ni tiki ni dua na iba me semati yani, ka tekivu mai na gauna oya, au digitaka meu vakasaqara taumada vagumatua na matanitu vaka Lomalagi, me vaka e vakamacalataka o Jisu Karisito, me vakaotia kina na iyaloyalo. Au a cakava na ka au rawata meu dau nanumi Koya kina, ka sa tubu tiko vakamalua na noqu ivakadinadina mai na gauna oya.
Meu vakamatatataka , ea sega ni lako tani na noqu nuiqawaqawa. Au sega ni vakabulai vakasauri ena dua na caka mana—sa rawarawa mai na noqu bula cake tiko ena gauna oqo, ia e toso tiko ga. Ia ena noqu vauci au vua na iVakabula, a vakamamadataka o Koya na noqu icolacola. Au a bula. Au bula dinau tu vei Jisu Karisito, kau tomana meu vakanamata ka sasagataka na matanitu ni Kalou. Na wiliki ni veitikina oya a vakayaco veisau kina noqu bula—au a soli au vei Koya ka vakasaqarai Koya, niu kila ni veika kece au a lomaleqataka ena yaco me wali koya vakataki koya ena dua na siga.