Noda Tabana
Vakacilava na Rarama ni Kosipeli ena 78
O Baraca John William Orth, 78 e vakacilava tiko na rarama ni kosipeli dina ga ni tauvi koya tiko na mate na Parkinson. O John e lewenilotu yalodina Ni Lotu i Jisu Karisito ni Yalododonu Edaidai ena nona bula taucoko, ka veiqaravi ena veikacivi duidui eso, oka kina vaka dua na bisopi. Ena lima na yabaki sa oti, ena nona valuta tiko vakadede na mate, a gadrevi vei John me sa lai tiko ena Lutheran Homes e Glynde, ena Ceva kei Ositerelia, edua na itikotiko ni veiqaravi vei ira na qase ka cicivaka na Lotu vaka Luca.
Dina ni vakaleqai tu na nona bula, edau nanuma tu ga o John na veika vinaka ka dau vakaogai koya ena nona itikotiko ena Lutheran Home, ka vakarautaka tu na soqoni ni lotu kei na kalasi ka raici raraba mai vua edua na italatala tudei. Ni oti vakalailai nona toki i kea, a kila o John ni na tiko tani me dua na gauna o nai talatala ka mani vakatura me liutaki na kalasi mai vei ira na tiko ekea ena gauna ni nona yali—ka marautaka o John me liutaka edua, ke gadrevi. A ciqoma nai talatala na nona vakatutu ka sa taura oti e vica vata na kalasi o John tekivu mai na gauna oya, ka oka kina edua na lotu kaburaki vakamacawa(ke bula vinaka) ena TV vei ira na tiko ena itikotiko kei na veikoro voleka.
Ena gauna mada ga ni dredre vakayago, edau vakayagataka o John e vica vata na auwa ena dua na macawa me vakarautaka na nona lesoni, ka dau cavuta kina ena qaqarauni eso na vidio kei na iyaragi ni vuli eso mai Na Lotu i Jisu Karisito ni Yalododonu Edaidai. Ni se qai tekivu, edau dikeva o nai talatala na veilesoni yadua ni bera ni vakavulici, ia oqo sa sega soti ni dau kauwai kina veivakavulici nei John. Na itukutuku nei John sa vakavuna me soli kina eso na ilavelave ni iVola i Momani vei ira na tiko ena itikotiko, ka vuqa era kerea vua me taleva eso na ulutaga vakatabakidua. Edau taleitaka me tukuna o koya edua na kerekere vakaoya, ka yaco kina edua na veivakavulici 5 na macawa ena ulutaga ni loloma soliwale.
Sa veivakayarayarataki tale ga o John ki na so na veiveisau ena itikotiko oya. A vakarautaka o koya eso na kadi ka tiko kina na idusidusi ni ituvatuva ni masu me soli vei ira na lewe ni itikotiko. Ena gauna oqo era masulaka na kakana ena gauna ni kana ka solia edua na vakasama vakayalo me tiki ni nodra bose ni veiqaravi se vakalewe ni itikotiko. E nuitaka o koya ni oqo ena vakauqeti ira mera masu vakawasoma ka nanuma tiko na ituvatuva ni veivakabulai.
E vakadeitaka o John ni nona ilesilesi sai koya me wasea na kosipeli vei ira na wekana ena itikotiko oya, me vakarautaki ira kina so tale na ivakavuvuli me solia na inuinui vei ira era taqayataka na veika e tu mai liu. E vinakataka o koya mera vakila na veika vinaka me baleta na bula e daku ni ilati ka kila na loloma nei Tamada Vakalomalagi. Ni takali edua na lewe ni itikotiko, ena vakarautaka o John na nodra ituvatuva ni kawa solia na yacadra me caka na nodra cakacaka ni valetabu, ke rawa.
E sega ni kurabuitaki, ni nona ivolanikalou taleitaki sai koya na Mosaia 2:17: “Ia raica, au sa tukuna vei kemuni na veika oqo mo ni vulica kina mo ni yalomatua; mo ni vulica kina ni ko ni sa qarava tiko na nomuni Kalou ena gauna ko ni qaravi ira tiko kina na wekamuni”.
Ena Me ni 2023, a ciqoma kina o John edua na veisiko sega ni namaki mai vei Elder Paul Whippy na Vitusagavulu ni Wasewase ena Pasifika ni Lotu. Ea veivakauqeti vei Elder Whippy na ivakaraitaki ni loloma va Karisito kei na veiqaravi nei John ka wasea kina vei Elder Taniela B. Wakolo, na nona iliuliu ni matabete ena Mataveiliutaki ni Wasewase, na veika sotavi oqo.
Ni tukuni vei John ni via raici koya talega o Elder Wakolo, ea tuvalaka o koya eso na dauveiqaravi me vakadeitaka nona vakaisulu tu ena isulu ni lotu, ka vakarau tu kina veisiko. Ena veisiko ruarua oqo, a wasea kina o John na nona ivakadinadina vei rau na elda kei na so na lesoni e sa vulica ena veiyabaki ni nona veiqaravi yalodina ena lotu.
E lomani vakalevu o John mai vei watina o Diana, kei iratou na luvena tagane e lima: O Benjamin, John William Junior, David, Andy, Sam kei iratou na nodratou dui matavuvale. Eratou cibitaka na nona tomana tiko na veiqaravi va Karisito ka ratou muria tiko na nona ivakaraitaki ena nodratou veikacivi ena nodratou tabanalevu kei na iteki.
Ena 2018 a vakaraitaka kina o President Russell M. Nelson, “Na Turaga sa vakatotolotaka tiko na Nona cakacaka me vakasoqoni Isireli. Na vakasoqoni vata oya sa ka bibi duadua e yaco tiko e vuravura nikua. E sega tale ni dua na ka e tautauvata kei na kena ilevu, e sega ni dua tale na ka e tautauvata na kena bibi, e sega ni dua tale na ka e tautauvata na kena lagilagi”.1
E ciqoma o Brother John Orth na itukutuku nei Peresitedi Russell M. Nelson ka cakava tiko o koya na ka e rawata me vakasoqoni Isireli kina e yasa ruarua ni ilati. O koya e ivakaraitaki talei ni nomu vakacaudreva tiko na nomu cina ka vosota kina ivakataotioti se mani vakacava na bolebole kei na dredre ni bula.