“Fafaga Lou Agaga i le Tatalo Soo,” Liahona, Ape. 2024
Fafaga Lou Agaga i le TataloSoo
Tatou te manaomia le fafagaina faaleagaga o le fesootaiga ma lo tatou Tama Faalelagi, o se faamanuiaga ua avanoa mo i tatou i soo se mea ma taimi uma.
Ata pue o le tagata faatino o loo faaalia ai Enosa na saunia e Matt Reier
Sa tatou lagonaina uma lava le fiaaai muamua. O le fia aai o le auala lea e tau mai ai e le tino ia i tatou e manaomia le fafagaina. Ma a tatou fia aai, ua tatou iloa le mea e tatau ona tatou faia—aai.
E i ai foi auala e faailoa mai ai e o tatou agaga ia i tatou pe a tatou manaomia le fafagaina faaleagaga. Ae e foliga mai e faigofie atu mo i tatou le lē amanaiaina o le matelaina faaleagaga nai lo le matelaina faaletino.
E pei lava ona tele ituaiga meaai e mafai ona tatou aai ai pe a tatou fiaaai, e i ai foi mea eseese e mafai ona tatou faia e faatumu ai lo tatou matelaina faaleagaga. Mo se faataitaiga, e mafai ona tatou “taumamafa fiafia i afioga a Keriso” (2 Nifae 32:3) i tusitusiga paia ma e ala i upu a perofeta. E mafai ona tatou auai soo i le lotu ma aai ma feinu i le faamanatuga (tagai i le Mataupu Faavae ma Feagaiga 59:9). E mafai ona tatou auauna atu i le Atua ma Ana fanau (tagai i le Mosaea 2:17).
Ae o loo i ai se isi punavai o meaai faaleagaga o loo avanoa mo i tatou i taimi uma, i taimi uma o o tatou olaga, e tusa lava po o a o tatou tulaga. E mafai ona tatou fesootai e le aunoa ma le Tama Faalelagi e ala i le tatalo.
“Sa Matelaina Lo’u Agaga.”
A o tuli manu le perofeta o Enosa i le vao, sa ia mafaufau e uiga i “upu sa [ia] faalogo soo o tautala i ai [lona] tamā e uiga i le ola e faavavau, ma le olioli o le au paia.” O nei upu “sa goto loloto ifo i [lona] loto” (Enosa 1:3).
Ona sa i ai Enosa i lenei tulaga faaleagaga o le mafaufau, sa ia lagonaina se manaoga malosi: “Sa matelainalo’u agaga,” sa ia fai mai ai (Enosa 1:4; faaopoopo le faamamafa).
O le a le mea na faia e Enosa ina ua ia lagonaina lenei matelaina faaleagaga, lenei manao mo meaai faaleagaga? “Sa ou tootuli i lalo i luma o Lē na faia a’u,” na ia fai mai ai, “ma ou tagi atu ia te ia i le tatalo malosi ma le faatauanau mo lo’u lava agaga” (Enosa 1:4).
Sa maoae tele le matelaina faaleagaga o Enosa lea na ia tatalo ai “i le aso atoa … ma ina ua oo mai le po sa [ia] sii maualuga a’e pea [lona] leo sa oo ina oo atu i le lagi” (Enosa 1:4). Mulimuli ane, sa tali mai le Atua i lana tatalo ma faamagalo ana agasala. Sa lagona e Enosa ua tafiesea lona tausalaina. Ae o lona fafagaina faaleagaga e lei muta ai iina.
Sa ia aoao e uiga i le mana o le faatuatua ia Iesu Keriso, ma sa ia sasaa atu lona agaga atoa mo ona tagata—e oo lava i ona fili. Sa ia osia feagaiga ma le Alii ma faamautuina folafolaga mai ia te Ia. Ma ina ua uma le tatalo malosi a Enosa, sa alu atu o ia i totonu o lona nuu ma vavalo atu ma molimau atu e uiga i mea sa ia faalogo ma vaaia. (Tagai i le Enosa 1:5–19.)
E le o tatalo uma o le a taliina i se auala maoae, ae o o tatou aafiaga i le tatalo e mafai lava ona anoa ma suia ai olaga. E mafai ona tatou aoaoina nisi o lesona taua mai le aafiaga o Enosa i le tatalo. Mo se faataitaiga:
-
O le taumafai e ola atoatoa i le talalelei e mafai ona fesoasoani tatou te lagonaina ai lo tatou matelaina faaleagaga.
-
O lo tatou matelaina faaleagaga e mafai ma e tatau ona aumaia i tatou i o tatou tulivae e saili le fesoasoani a le Tama Faalelagi.
-
O le tatalo i le Tama Faalelagi e mafai ona fesoasoani e faamalie ai lo tatou matelaina faaleagaga—ona sosoo ai lea ma nisi.
-
E mafai ona tatou tatalo i soo se mea, i soo se taimi.
-
O le tatalo e mafai ona fesoasoani ia i tatou ia salamo.
-
O le tatalo e mafai ona faamalosia ai lo tatou faatuatua ia Iesu Keriso.
-
E mafai ona tatou maua se molimau patino e faafofoga mai lo tatou Tama Faalelagi ia i tatou ma o loo Ia silafia i tatou.
-
O le molimau ma le malosi tatou te maua e ala i le tatalo e mafai ona fesoasoani ia i tatou e auauna atu ai ma faamalolosia isi.
O Lo’u Aafiaga ma le Mana o le Tatalo
E pei o Enosa, sa ou aoaoina nisi o nei lava lesona e ala i aafiaga patino. Sa auai ou matua i le Ekalesia a Iesu Keriso o le Au Paia o Aso e Gata Ai a o ou laitiiti, ma sa ou papatiso ina ua valu o’u tausaga. Sa ou maua i taimi uma se lagona lelei ma le mafanafana i lou loto e uiga i lo’u Tama Faalelagi ma e uiga ia Iesu Keriso, Lana talalelei toefuataiina, ma Lana Ekalesia. Ae ana ou le oo i le toeitiiti atoa le 16 o ou tausaga na ou tatalo ai e uiga i le moni o nei mea.
Sa fai mai lo’u epikopo musuia ou te faiaoga i se vasega a le autalavou o le Aoga Sa. Sa tatau ona ou aoao atu se lesona e uiga i le auala e mafai ai ona matou maua se molimau o le talalelei e ala i le tatalo. O lenei tofiga mai lo’u epikopo na mafua ai ona ou mafaufau loloto atili e uiga i la’u lava molimau. Sa ou faaaluina le taimi e suesue ai le Tusi a Mamona ma lagonaina i taimi uma e moni le Ekalesia. Sa ou talitonu lava i taimi uma i le Faaola o Iesu Keriso, ae ou te lei loto lava i le folafolaga a Moronae o loo maua i le Moronae 10:4–5. Ou te lei tatalo lava e uiga i le moni aiai o le talalelei.
Ou te manatua lo’u lagonaina i lo’u loto afai o le a ou aoaoina nei talavou i le ala e maua ai se molimau e ala i le tatalo, e tatau ona ou tatalo mo sa’u lava molimau. Sa matelaina lo’u agaga—atonu i se auala ese mai ia Enosa, ae ui i lea sa ou lagonaina se manaoga faaleagaga.
A o ou saunia le lesona, sa ou tootuli ma ofo atu le manao o lo’u loto i lo’u Tama Faalelagi e faamautu le upumoni sa ou lagonaina i totonu. Ou te le’i faamoemoeina se faaaliga maoae. Ae ina ua ou fesili atu i le Alii pe moni le talalelei, sa oo mai i lo’u loto se lagona matagofie tele—lena leo filemu ma le itiiti e faamautu mai ia te a’u e moni ma e tatau ona faaauau pea ona ou faia le mea sa ou faia.
Sa matua malosi lava le lagona ma sa le mafai ai ona ou le amanaiaina lena tali ma faapea atu ou te le’i iloaina. Sa alu lena aso atoa o o’u faalogoina le fiafia tele. Sa i ai lo’u mafaufau i le lagi ma mafaufau i le lagona matagofie i lo’u loto.
O le Aso Sa na sosoo ai, sa ou tu ai i luma o au uo e toatolu pe toafa o le vasega, o e na laiti uma nai lo a’u. Sa ou molimau atu ia i latou o le a tali mai le Tama Faalelagi i a latou tatalo pe afai e i ai lo latou faatuatua.
O se tatalo na taliina na maua e Elder Soares a o avea ma se alii talavou na faatagaina ai o ia e molimau atu—o se faifeautalai (luga atu o le taumatau), tamā ma le tane, ma le Aposetolo—e tali mai le Tama Faalelagi i tatalo e tuuina atu i le faatuatua.
Mai lava i lena taimi, sa tumau pea lenei molimau ia te a’u. Ua fesoasoani ia te au e faia ai faaiuga, aemaise lava i taimi na ou feagai ai ma luitau. O lena tatalo i lena aso, faatasi ai ma molimau faaopoopo ua ou mauaina i le aluga o tausaga, ua mafai ai ona ou molimau atu i tagata, ma le talitonuga maumaututu, e mafai ona latou maua tali mai le Tama Faalelagi pe afai latou te tatalo i le faatuatua. E moni lenei mea e pei ona ou molimau atu ai o se faifeautalai, o se taitai o le Ekalesia, o se tamā ma se tane, ma e oo lava i aso nei o se Aposetolo.
O Le A le Taimi ma le O Le A o le Tatalo
Ioe, e le na o le tatou tatalo pe a tatou lagonaina se manaoga faaleagaga e faapitoa le malosi. O le a le taimi e tatau ai ona tatou tatalo? Ma o le a le mea e tatau ona tatou tatalo atu ai? O le tali puupuu e i ai i soo se taimi ma soo se mea lava.
O le Atua o lo tatou Tama Faalelagi. O le iloaina o lenei mea e suia ai le ala tatou te tatalo ai. Na a’oa’o mai le Perofeta o Iosefa Samita: “O le i ai o se silafia i le Atua, e amata ai ona tatou iloa le auala e faalatalata atu ai ia te Ia, ma le ala e fesili ai ina ia tatou maua se tali. … A tatou saunia loa e o mai ia te Ia, ua Ia saunia foi e afio mai ia i tatou.”1
E saunia i taimi uma lo tatou Tama Faalelagi e faafofoga mai ia i tatou ma e finagalo ia tatou tatalo soo atu ia te Ia. E tatau ona tatou “filifili faatasi ma le Alii i a tatou mea uma e fai“ (Alema 37:37) ma tatalo i le taeao, aoauli, ma le po. E tatau ona tatou tatalo i le fale, i le galuega, i le aoga—soo se mea atonu tatou te i ai ma i soo se tasi o a tatou taumafaiga (tagai i le Alema 34:17–26).
E tatau ona tatou tatalo i o tatou aiga (tagai i le 3 Nifae 18:21). E tatau ona tatou tatalo “i le leo ma i [o tatou] loto, i luma o tagata ma i le nao oe” (Mataupu Faavae ma Feagaiga 81:3). “Ioe, ma a outou le tagi atu i le Alii, ia tuu o outou loto ia faatumuina, ia tuuina atu pea ia te ia i le tatalo e le aunoa, mo lo outou manuia, ma le manuia foi o i latou o e ua siomia outou” (Alema 34:27). Ma e tatau ona tatou tatalo e le aunoa i le Tama i le suafa o Iesu Keriso (tagai i le 3 Nifae 18:19–20).
Atatusi o Iosefa Smita saunia e Walter Rane, e le mafai ona kopiina
Faalatalata Atu i lo Tatou Tama Faalelagi
E finagalo lo tatou Tama oi le Lagi e faamanuia i tatou. Ma o le a Ia faia—pe a tatou ole atu. Na aoao mai le Perofeta o Iosefa Samita, “Ia manatua a aunoa ma le ole atu e le mafai ona tatou maua se mea; o lea, ole atu ma le faatuatua, ma o le a outou maua ai faamanuiaga faapena e pei ona silafia e le Atua e tatau ona faaee i o outou luga.”2
O a tatou tatalo e le aunoa ma le fai soo o se vaega taua o se taumafa paleni o meaai faaleagaga i o tatou agaga fiaaai. O fesootaiga ma le Tama Faalelagi e ala i le tatalo o loo avanoa ma talileleia i soo se mea ma taimi uma.
O se tasi o mau ou te fiafia lava i ai o loo aoao mai ai le auala e tatau ona tatou faalatalata atu ai i lo tatou Tama Faalelagi pe a tatou tootutuli e tatalo: “Ia e lotomaualalo; ma o le a taitai oe e le Alii lou Atua i le lima, ma tuu mai ia te oe tali i au tatalo” (Mataupu Faavae ma Feagaiga 112:10). A tatou lotomaualalo ma usiusitai, o le a faatasi le Tama Faalelagi ma i tatou. O le a Ia taitai i tatou i le lima. O le a Ia musuia i tatou i le mea e o i ai ma le mea e fai. O le a Ia tali mai i a tatou tatalo e tusa ai ma Lona finagalo, ala, taimi, ma le malamalama atoatoa i mea e lelei mo i tatou.
E tatau ona tatou manatua ma faapelepele i lenei avanoa e o atu ai i le nofoalii o le Atua ma maua faamanuiaga i Lona aao.