Ua Na’o Tusiga Faatekinolosi
Sa Ou Faia Mea Uma Ou te Mafaia o se Matua. E Mafai Faapefea Ona Tuua Pea e La’u Fanau le Ekalesia?
E alala le tusitala i Iuta, ISA.
Ina ua tuua e nisi o lau fanau gaoioiga a le Ekalesia, sa ou mafaufau pe aisea na ou le maua ai faamanuiaga folafolaina o gaoioiga uma o le talalelei sa matou faia faatasi o se aiga i le aluga o tausaga. E tolu lauga o le konafesi aoao na fesoasoani ia te au e agai ai i luma ma le faatuatua.
Ina ua avea au ma se matua, sa ou lagonaina se tiutetauave mamafa e lagolago lau fanau i luga o le ala o feagaiga ma ia mautinoa na latou mulimuli i le fuafuaga a le Tama Faalelagi.
Na amata i o’u tausaga talavou, sa ou matauina ai fautuaga i matua i le toeitiiti lava o konafesi aoao uma, e aofia ai mea nei:
-
Na ta’u mai e Peresitene Ezra Taft Benson (1899–1994) ia i tatou afai o le a tatou “amataina se suesuega faamaoni” o le Tusi a Mamona, o le a tatou “maua le mana sili atu e tetee atu ai i faaosoosoga[,] … o le mana e aloese ai mai le taufaasese[,] … [ma] le mana e tumau ai i luga o le ala lauitiiti ma le vaapiapi.”1 O lea sa ou iloa ai o le a faitau e lo’u aiga le Tusi a Mamona o se aiga i aso taitasi.
-
Na aoao mai le folafolaga i le aiga e faapea “ua i ai i matua se tiute paia e tausia a latou fanau i le alofa ma le amiotonu, … e aoao i latou ia alofa ma auauna le tasi i le isi, [ma ia] tausia poloaiga a le Atua[.] … O tane ma ava—tina ma tamā—o le a latou tali atu i le Atua mo le faataunuuina o nei mea e ao ona faia.”2
-
Sa faamanatu mai ia i tatou e Peresitene M. Russell Ballard (1928–2023) e faapea, ina ia mafai ona “puipuia ma faasaoina ma faamalolosia o tatou aiga ma auaiga i se lalolagi ua matua faigata tele i itu faafeagai,” e tatau ona tatou “tumau i le faia o tatalo faaleaiga i aso taitasi ma afiafi faaleaiga faalevaiaso[,] … aoao atu le talalelei ma tulaga faatauaina autu i lou aiga[, ma] … fatu ni sootaga anoa faaleaiga e tuu atu ai i lau fanau se faasinomaga e malosi atu nai lo mea e mafai ona latou maua ma a latou paaga po o le aoga po o se isi lava nofoaga.”3
I le avea ai ma se tina talavou, sa ou faaliliuina nei faatonuga uma o lona uiga o lo’u tiutetauave le laveaiina o la’u fanau. Sa ou lagonaina afai ou te faia nei mea uma faatasi ma lo’u aiga o le a puipuia la’u fanau mai faaosoosoga ma taufaamata’u i a latou molimau.
Peitai, i nai tausaga ua mavae atu a o feagai la’u fanau ma le faateleina o taufaamatau i a latou molimau ma o nisi ua le toe o mai i le lotu, ua ou lagonaina le faalataina. Sa ou mafaufau pe aisea na foliga mai ai matou te lei mauaina le folafolaga a Peresitene Benson o le a puipuia la’u fanau i le mana e tetee atu ai i faaosoosoga ma taufaasese ma tumau ai i le ala sa’o ma le vaapiapi.
Sa ou agai atu i le konafesi aoao ia Aperila 2022 ma se loto mafatia. Sa ta’u mai e le isi au tama o loo tauivi o ia ma lana molimau. Sa amata ona ou matamata i le konafesi aoao ma fesiligia ai le fesili lea e tasi sa saunoa i ai Elder Adrián Ochoa o le Fitugafulu i lana lauga i le aoauli o le Aso Toonai, “O Aoga Le Fuafuaga?”4 I lo’u mafaufau, sa ou popole e leai.
Sa ou tatalo ia iloa le mea e mafai ona ou faia e fesoasoani ai i la’u fanau ia mananao e toe foi i le auai i le lotu. E manaia i le taimi lava lena. Na oo mai tali i le taimi o le konafesi aoao. Ae o tali na oo mai sa le o le mea lea sa ou faamoemoeina.
E tolu lesona na fesoasoani ia te au e suia ai lo’u loto.
Lesona 1: E le mafai ona ou mauaina le ala a lau fanau i le lagi.
I le taeao o le aso Sa na saunoa mai Elder D. Todd Christofferson o le Korama a Aposetolo e Toasefululua:
“E malamalama sese nisi i folafolaga a le Atua faapea o le usiusitai ia te Ia e fua mai ai ni taunuuga patino i se taimi patino. Latou te ono mafaufau, “Afai ou te auauna atu ma le filiga i se misiona tala’i, o le a faamanuiaina au e le Atua i se faaipoipoga fiafia ma ni fanau” po o le “Afai ou te le faia a’u meaaoga i le Sapati, o le a faamanuiaina au e le Atua i ni togi lelei,” po o le “Afai ou te totogia sefuluai, o le a faamanuiaina au e le Atua i le galuega lea sa ou manao ai.’ Afai e le tupu tonu i le ala lea pe tusa ai ma se taimi na faamoemoeina, latou te ono lagonaina le faalataina e le Atua. Ae e le tutupu fua ni mea i auala faalelagi. E le tatau ona tatou mafaufau i le fuafuaga a le Atua o se masini faifaatau faalevateatea tatou te (1) filifili ai se faamanuiaga moomia, (2) tuu i totonu se aofaiga o galuega lelei, ma (3) vave ai loa ona tiliva mai le oka.
“O le a faamamaluina lava e le Atua Ana feagaiga ma folafolaga ia i tatou taitoatasi. E le tatau ona tatou popole i lena mea [tagai i le Mataupu Faavae ma Feagaiga 82:10]. O le mana togiola a Iesu Keriso—o le na afio ifo i lalo o mea uma ona toe afio a’e ai lea i le mea maualuga [tagai i le Mataupu Faavae ma Feagaiga 88:6] ma ua umia mana uma i le lagi ma i le lalolagi [tagai i le Mataio 28:18]—ua faamautinoa mai ai e mafai e le Atua ma o le a faataunuuina Ana folafolaga. O le mea e tatau ai o tatou faamamalu ma usitaia Ana tulafono, ae e le o faamanuiaga uma na muai folafola mai i luga o le usiusitai i le tulafono [tagai i le Mataupu Faavae ma Feagaiga 130:20–21] ua fatuina, mamanu, ma faatulagaina taimi e tusa ai ma o tatou faamoemoega. Tatou te faia le mea silisili ae e tatau ona tuu atu ia te Ia le puleaina o faamanuiaga, i le faaletino ma le faaleagaga.”5
Ou te mautinoa sa ou faalogo muamua i aoaoga faapena, ae o le taimi lea na oo mai ai i le taele o lo’u loto. O le taimi lea ua ou sauni e faalogo i ai, ma sa manaomia ona ou faalogo i ai.
Sa faamanatu mai foi ia te au se savali o le konafesi aoao na muamua atu mai ia Peresitene Dieter F. Uchtdorf, a o avea ma Fesoasoani Lua i le Au Peresitene Sili:
“E le mafai ona tatou mauaina lo tatou ala i le lagi; o manaoga o le faamasinotonu e tu o se papupuni, lea e leai ai so tatou malosi e faatoilalo ai e i tatou lava ia.
“Ae e le leiloloa tagata uma.
“O le alofatunoa o le Atua o lo tatou faamoemoe sili ma le faavavau lea. …
“O le faaolataga e le mafai ona faatauina i le tau o le usiusitai; ae e faatauina i le toto o le Alo o le Atua [tagai i le Galuega 20:28].”6
Ua ou iloa lena mea. Sa ou iloa e le mafai ona ou mauaina lo’u lava ala i le lagi. Ae mo sina mafuaaga, sa ou manatu ai e mafai e lo’u usiusitai ona maua le ala a la’u fanau i le lagi. O le tele o lo’u suesueina o le saunoaga a Elder Christofferson ma isi, o le tele foi lea o lo’u iloaina sa faavaleaina a’u e pepelo a Satani faapea e lei manaomia e la’u fanau se Faaola pe afai o a’u o se “matua atoatoa.” A o ou suesue ma mafaufau i na lauga, sa fesoasoani le Agaga ia te au e amata ona malamalama o galuega uma e puipuia ai la’u fanau mai faaosoosoga ma le taufaasese ma i le apitaogalu o a latou molimau e taua ae e le faamautinoaina o le a tumau la’u fanau i luga o le ala o feagaiga.
O le faitalia o se vaega taua o le fuafuaga a le Tama Faalelagi. Ua tuuina mai ia i tatou uma le meaalofa o le filifili mo i tatou lava, e tusa lava pe o lona uiga e mafai e a tatou fanau ona filifili e liliu ese mai mea na aoaoina ai i latou. E ui i lea, e aapa atu pea le Alii i Ana fanau faalogogata i le alofa, ma i le avea ai ma ni matua faalelalolagi e mafai ona tatou faia foi faapea.
I le konafesi aoao ia Oketopa 2018, na aoao mai ai Elder Dale G. Renlund:
“E ui e finagalo le Atua ia tatou i ai i luga o le ala o feagaiga, ae Na te tuu mai ia i tatou le mamalu o le filifiliga.
“O le mea moni, e finagalo le Atua, faamoemoe, ma faatonu mai ina ia filifili Ana fanau taitasi mo i latou lava. O le a Ia le fosia i tatou. E ala atu i le meaalofa o le faitalia, ua faatagaina ai e le Atua Lana fanau e ‘fai mo i latou lava ae le faamalosia.’2 Nifae 2:26)].”
Ou te maua le mafanafana tele i le mea na sosoo ai o le saunoaga a Elder Renlund:
E tusa lava pe o le a le umi tatou te lei i ai i le ala pe o le a foi le mamao na tatou oo i ai, o le taimi lava tatou te filifili ai ia suia, e fesoasoani mai le Atua ia tatou toe foi mai [tagai i le Alema 34:31]. Mai le silafaga a le Atua, o le salamo faamaoni ma le fetaomi atu i luma ma le tumau ia Keriso, pe a tatou toe foi mai i luga o le ala, o le a pei lava na tatou le’i o ese. Na totogi e le Faaola a tatou agasala ma faasaoloto i tatou mai le faaali faaitiitia i le fiafia ma faamanuiaga.”7
Ou te iloa tatou te manaomia uma le Faaola. O lenei upumoni e aumaia ia te au se toomaga loloto. E ui o loo tumau pea lo’u tiutetauave o le aoao o la’u fanau ma lagolagoina i latou i luga o le ala o feagaiga, ae e le o la’u galuega le laveai o a’u lava po o la’u fanau. O le galuega lena a le Faaola, ma o loo Ia faia ma le atoatoa. O le galuega a le Tama Faalelagi ma Lona mamalu “ia aumaia le tino ola pea ma le ola e faavavau” (Mose 1:39). Ua ia te Ia se ata o le faaolataga mo Ana fanau uma. E tatau ona ou faalagolago i Lana fuafuaga, ae le o la’u fuafuaga. Ma sa ou taumafai e manatua o loo Ia tausia Ana folafolaga e puipuia ma faamalolosia o tatou aiga. Ou te faatuatua o loo Ia valaaulia pea la’u fanau ia o mai ia te Ia, ma o le a Ia faamafanafana ma faamalosia a’u a o ou taumafai e faia foi faapea.
Lesona 2: O le faatalitali i le Alii e mafai ona avea o se nofoaga paia.
O se lesona lona lua sa ou aoaoina e mai ia Sister Amy A. Wright, Fesoasoani Muamua i le Au Peresitene Aoao o le Peraimeri, lea na saunoa vave lava ina ua maea Elder Christofferson. Sa ia aoao mai:
“E tele taimi i o tatou olaga e mafai ai ona tatou iloa i tatou lava, faapei o le pipili ‘aisi i le faitotoa o le malumalu, “sa faatalitali ai i le Alii” ma le onosai—po o nisi foi taimi ua le lava le—onosai” [Isaia 40:31].’ Faatalitali ia faamaloloina faaletino pe faalelagona. Faatalitali mo tali e tuia ai le vaega aupito loloto o o tatou loto. Faatalitali mo se vavega.”8
O la’u tatalo o le alu i lena konafesi aoao sa mo ni taunuuga vave. Sa ou iloa e le moni lenei mea, ae ou te lei faamoemoe e aoao ni lesona e uiga i le taua o le faatalitali.
Sa faaauau Sister Wright: “O le faatalitali i le Alii e mafai ona avea o se nofoaga paia—se nofoaga o le faalauteleina ma le faaatoatoaina, lea e mafai ai ona tatou iloa le Faaola i se ala e matua’i patino lava. O le faatalitali i le Alii atonu foi o se nofoaga lea tatou te fesili ai i tatou lava, ‘Le Atua e, o fea o i ai oe?’ [Mataupu Faavae ma Feagaiga 121:1]—o se nofoaga e manaomia ai e le faapalepale faaleagaga i tatou e faaaoga le faatuatua ia Keriso e ala i le filifili ma le loto i ai pea lava pea o Ia.”9
Ua ou tuuina atu lenei manatu faavae i le tele o mafaufauga talu mai lena konafesi aoao. O le aoao e faatali, ina ia onosai i la’u fanau ma a latou filifiliga, ma ia talitonu o loo sailia pea e le Alii i latou le tele o taumafaiga i la’u vaega. Ou te moomoo maimau pe ana faigofie e pei o le faia o le filifiliga i se tasi taimi e talitonu ai ona faatumulia lea i le filemu mo o’u aso uma, a o ou tatalo ia filifili la’u fanau e aapa atu i le Faaola ma faatino le faatuatua ia te Ia. Ae e le o le auala lena mo a’u. O nisi aso ua faigofie ai ona gauai atu i le leai o se faamoemoe ma le faanoanoa, e lafoai ona atonu e foliga mai “e le o aoga le fuafuaga.” E manaomia ai se taumafaiga tele ma le faapalepale faaleagaga e faaaoga ai le faatuatua ma faatumauina ai le faamoemoe i le fuafuaga a le Tama Faalelagi pe a ou vaai atu i lau fanau o faia ni filifiliga e le atagia ai upumoni paia sa ou aoaoina ai i latou. Ae, o aso uma ou te filifilia ai le faamoemoe nai lo le faanoanoa, o loo ou filifilia o Ia. Ma saga fai atu pea lava pea.
O lenei tauiviga ua ou latalata atili atu ai i le Atua. Ua ou liliu atu ai ia te Ia e ala i le tatalo. Ua taulai atu i la’u suesuega o tusitusiga paia. Ua liliu atu ai au i le malumalu. O le mea sili lava, ua matuai ou faafetai ai lava mo le Togiola a Iesu Keriso. Ou te matua faafetai lava i le iloa e alofa o Ia i la’u fanau ma na Ia ofoina mai Lona soifua mo i latou.
O le aoao e faatalitali i le Alii ua avea ma se nofoaga paia mo au. Ua avea nei ma aafiaga toe faaleleia. O le suesueina o nei lauga o le konafesi aoao ma le taulai atu i la’u suesuega o le talalelei ua faalolotoina ai lo’u malamalama i aoaoga faavae ma faamalosia ai lo’u faatuatua. O loo ou aoaoina lea fuaitau i luga o lea fuaitau, ma lea mataupu i luga o lea mataupu ia faalagolago i le Alii ma i le fuafuaga o le togiola a le Tama Faalelagi a o tatalo pea ina ia filifili la’u fanau e mulimuli ia Iesu Keriso ma Lana talalelei. Ma o loo ou tulimatai atu i le isi konafesi aoao e faaopoopo i lo’u aoaoina ma la’u molimau.
Lesona 3: Ua saunia e le Atua se auala e liliu ai maa tu’ia i ni maa laa.
O se lauga lona tolu na ou maua ai le faamoemoe o le konafesi o Elder Larry S. Kacher. A o ou suesueina lenei lauga, sa aoaoina ai au ma le mamana. Ua ou aoaoina e faatagaina i tatou e le Alii ia oo i le lavelave o le olaga e fesoasoani ia i tatou e liliu atu ia te Ia. Na aoao mai Elder Kacher e “i ai le faigofie i le isi itu o le gaogaosa o le olaga a o tatou ‘[tutumau] ia Keriso ma se susulu atoatoa o le faamoemoe’ [2 Nifae 31:20].
“O se vaega o le faamoemoega o le olaga o le faatagaina lea o na maatu’ia e avea ma maa e laa ai i luga a o tatou fe’a’ei i le mea ua ou ta’ua o le “apefa’i o le faatuatua”—o se apefa’i aua e ta’u mai ai o le faatuatua e lē tumau. E mafai ona alu i luga po o lalo e tusa ai ma filifiliga tatou te faia.”10
Ua ou tuputupu ae e ala i lenei tofotofoga o lo’u faatuatua. I lo’u atamai faatauvaa, ou te manao e faasaoina la’u fanau mai tofotofoga o le olaga. Ae pe o le a ou faafitia ea la’u fanau lenei lava tuputupu a’e e tasi? I le atamai tele o le Atua, ua Ia saunia ai se ala mo i tatou e mulimuli ai, i Lana fuafuaga o le faaolataga. A o tatou faatautaia lena ala, tatou te fetaiai ma luitau e tofotofoina ai lo tatou faatuatua i le Tama Faalelagi ma Iesu Keriso. E pule lava i tatou e faaaoga lo tatou faitalia e filifili ai e mulimuli ia Keriso i la tatou lava apefai o le faatuatua, ma faatagaina ai o tatou tofotofoga e avea ma maa-laa nai lo maa tu’ia. Ua faamanatu mai e Elder Kacher ia i tatou e faapea “o lo tatou alualu i luma o se alualu i luma o se alualu i luma e faavavau.”11
Ua le uma le tala a lau fanau. E moni le ata o le faaolataga a le Atua, ma e manaomia ona ou faatuatua i Lana fuafuaga ma faalagolago i Lona faamoemoega. A o faaauau pea ona faaaoga e la’u fanau lo latou faitalia, ou te taumafai e manatua o le a aapa atu pea le Alii ia i latou ma o le a Ia fesoasoani ia i latou e toe foi mai pe afai latou te filifili e faia. Ua malosi o ia e laveai.
Ua ou maua le faamoemoe i le Faataoto 3:5–6:
“Ia e faatuatua i le Alii ma lou loto atoa; ae aua le faalagolago i lou lava atamai.
“Ia e manatua o ia i ou ala uma, ona faatonuina ai lea e ia lava ou ala.”
Ou te mautinoa o loo i ai isi o loo aafia i o latou lava tofotofoga o le faatuatua. Atonu e talitutusa foi oe ma a’u, pe atonu foi e te tauivi ma ni fesili eseese. Sei ou fautua atu ia outou avatu o outou atugaluga i le Alii a o lei amataina le konafesi aoao ma e ala foi i se suesuega faifai pea o le konafesi aoao ma tusitusiga paia. Fai le taumafaiga e “faalogo ia te Ia,”12 ona faalagolago lea ia te Ia e aoao oe i mea e tatau ona e faalogo i ai. Ou te iloa e alofa o Ia ia i tatou ma ua ia te Ia le mana e laveai ai i tatou ma laveai ai a tatou fanau e pei o i tatou—ma latou—e filifili taitoatasi e liliu atu ia te Ia i le faatuatua.